NKAZAARWA omuri 1926 omu kyaro kya Crooksville, omuri Ohio, United States. Tata na maawe bakaba batari banyadiini, kwonka itwe abaana munaana bakaba batugira ngu tuze omu kanisa. Aha Sande nkaba ninza omu kanisa y’Abamesodokisi. Obu naabaire nyine emyaka 14, omushomesa omu diini egyo akampa ekiconco ahabw’okugira ngu nkaba ntarikwosha kuza aha kanisa buri Sande kumara omwaka gwona.

Omu bwire obwo, mutaahi waitu orikwetwa Margaret Walker, omwe aha Bajurizi ba Yehova akatandika kutaayaayira maawe n’okugaaniira nawe ahari Baibuli. Eizooba rimwe, nkacwamu kubegaitaho omu kwega kwabo. Maawe akaba naateekateeka ngu ninza kuteganisa okwega kwe, n’ahabw’ekyo akanshaba ngu nshohore ndugye omu nju. Kwonka nkaguma niinteeraho kuhurira ebi barikugaaniira. Bwanyima ya Margaret kuguma naija emirundi mingi, akambuuza ati: “Noomanya eiziina rya Ruhanga?” Nkamugira nti: “Buri omwe ekyo naakimanya ngu ni Ruhanga.” Akangira ati: “Kwata Baibuli yaawe oze omuri Zaaburi 83:18.” Nkazayo, kandi naashanga ngu eiziina rya Ruhanga ni Yehova. Nkairuka naaza owa banywani bangye, naabagira nti: “Ku muraahikye omuka omwabazyo ogu, mushome  Zaaburi 83:18 omu Baibuli, reero mureebe eiziina rya Ruhanga.” Noobaasa kugira ngu nkatandika kubuurira ahonaaho.

Nkeega Baibuli kandi naabatizibwa omuri 1941. Bwanyima y’obwire bukye, nkaheebwa obujunaanizibwa bw’okwebembera okwega ekitabo okw’ekibiina. Nkahiga maawe na beene maawe kwija, kandi boona bakatandika kwija omu kwega ekitabo oku naabaire ninyebeembera. Kwonka tata we akaba atarikubikunda.

Nkaheebwa obujunaanizibwa bwingi omu kibiina, kandi nkaba nyine ebitabo bingi ebirikushoboorora aha Baibuli. Eizooba rimwe, tata akoorekyereza ebitabo byangye, reero yaagira ati: “Nooreeba ebyo byona? Tindikubyenda omu nju yangye, kandi naiwe noobaasa kugyenda nabyo.” Nkafuruka naatunga enju omu kyaro ekiri haihi ekirikwetwa Zanesville, omuri Ohio, kwonka nkaba nguma ningaruka omuka kubagumya.

Tata akateeraho kuremesa maawe kuza omu nteerane. Obumwe maawe ku yaabaire aba naaza omu nteerane, tata akaba amwirutsya amuharura amugarura omu nju. Kwonka akaba airuka araba aha rwigi orundi agumizamu aza omu nteerane. Nkaba ngambira maawe nti: “Otatiina. Naija kurugaho naaruha kuguma naakwirukaho.” Ku haahingwireho obwire, tata akarekyera aho kuzibira maawe, yaaguma naaza omu nteerane hatariho kurwana.

Omuri 1943 ekibiina kyaitu kikatandika kugira Eishomero ry’Obuheereza, kandi nkatandika kuha embazo omu ishomero. Obuhabuzi obu naabaire ntunga bwanyima y’okuha orubazo, bukampwera kushemeza omuringo ogu naabaire ningambamu.

Obwire obwo, amahanga gakaba gari omu rutaro rw’Ensi Yoona orwa II. Omuri 1944, bakanyeta kuza omu mahe. Nkaza omu mwanya ogurikwetwa Fort Hayes omuri Columbus, Ohio, baanshwijuma kureeba ku ndaabe nimbaasa, naijuza n’ebipapura. Kwonka nkagambira abakuru ngu tindikubaasa kuba omuserukare. Bakandeka naagyenda. Bwanyima y’ebiro bikye, omuserukare akaija owangye yaangira ati: “Corwin Robison, nyine ekipapura ekirikunyikiriza kukukwata.”

Bwanyima ya saabiiti ibiri obwo ndi omu kooti, omuramuzi akagira ati: “Ku ogire ngu nyine obushoboorozi, nkakuhaire ekifubiro ky’okukomwa ebiro byona eby’amagara gaawe. Oine eki orikwenda kugamba?” Nkagarukamu nti: “Ow’ekitiinisa, nshemereire kuba nintwarwa nk’omubuurizi. Orwigi rwa buri muntu nikyo kituuti kyangye, kandi mbuuriire abantu baingi amakuru marungi g’Obukama.” Omuramuzi akagambira abacwi b’emanja ati: “Ti muri aha kucwamu yaaba omwojo ogu n’omubuurizi nari ngaaha. Muri aha kucwamu yaaba aizire kuza omu mahe nari ngaaha.” Omu bwire obutarikuhika ekicweka ky’eshaaha, abacwi b’emanja bakagaruka baine ekihandiiko, ekirikworeka ngu naasingwa orubanja. Omuramuzi akacwamu ngu nkomwe emyaka etaano omu kihome ekiri omuri Ashland, Kentucky.

Saabiiti ibiri ez’okubanza nkazimara omu kihome omuri Columbus Ohio, kandi eizooba ry’okubanza nkaguma omu kashengye akangye nyenka. Nkashaba Yehova nti: “Tindikubaasa kuguma omu kashengye aka kumara emyaka etaano. Tindikumanya eki nyine kukora.”

Eizooba eryakuratsireho, abakuumi bakanyihamu.  Nkareeba ondiijo okomirwe owaabaire ari muraingwa, muhango, kandi naayemerera nawe turikuranzya omu dirisa. Akambuuza ati: “Bakukomiire ki, iwe mushaija mugufu, ’we?” Nkamugarukamu nti: “Ndi omwe aha Bajurizi ba Yehova.” Akangira ati: “Ori omwe aharibo? Mbwenu shi ahabw’enki ori aha?” Nkamugarukamu nti: “Abajurizi ba Yehova tibarikuza mu ntaro kwita abantu.” Yaangarukamu ati: “Bakureetsire omu kihome ahabw’okuba torikwenda kwita abantu. Bataire abandi omu kihome ahabw’okwita abantu. Ekyo kiine amakuru?” Nkamugarukamu nti: “Ngaaha, tikiine makuru.”

Reero akangira ati: “Kumara emyaka 15 nkaba ndi omu kihome ekindi, ahu naashomiire bimwe aha bitabo byanyu.” Nkashaba Yehova nti: “Yehova, mpwera omushaija ogu aze aha rubaju rwangye.” Omushaija ogwo orikwetwa Paulo akagira ati: “Omwe aha bakomirwe aba ku araakukwateho, iwe oteere orwari kyonka. Niinyija kubakujuna.” Aha muheru, boona 50 abaabaire bari omu kihome kyaitu nkaba ntaine buremeezi nabo.

Ku baatwire omu kihome ekya Ashland, nkashangayo ab’eishe-emwe abandi baingi. Okuba nabo kikampwera n’abandi kuguma tuhami omu by’omwoyo. Bakaba batuha ebicweka by’okushoma omu Baibuli buri saabiiti, kandi tukaba tutebeekanisa ebibuuzo n’eby’okugarukamu omu nteerane ezitebeekanisiibwe ab’eishe-emwe. Kandi hakaba hariho n’omuheereza orikukora aha bicweka by’okubuuriramu. Tukaba turi omu kishengye kihango ekiine ebitanda byetooroire ekisiika. Orikukora aha bicweka by’okubuuriramu akaba angira ati: “Robison, niiwe oine obujunaanizibwa bw’okureeberera ekitanda nanka na nanka. Buri muntu ori aha kitanda ekyo, niiwe oine kumubuurira. Hamya ngu waamubuurira atakagyenzire.” Nikwo twabaire tubuurira tutyo omu muringo ogutebeekanisiibwe gye.

Orutaro rw’Ensi Yoona orwa II rukahendera omuri 1945, kwonka bwanyima y’orutaro nkaguma omu kihome kumara akaire. Nkaba nyerarikiriire aha ka yaitu, ahakuba tata akaba angizire ati: “Naaheza kukweyihaho, abaatsigara nimbabaasa.” Ku naarugire omu kihome, nkashanga omuka ebirikushemeza. N’obu abantu mushanju omu ka yaitu baraabe baabaire nibahiiganisibwa, bakaba nibaza omu nteerane, kandi omwe ahari banyaanyazi akaba abatiziibwe.

Orutaro rwa Korea ku rwatandikire omuri 1950, bakagaruka baanyeta ngu nze ahari Fort Hayes. Ku baaherize kungyeza, omuserukare akangira ati: “Omu guruupu yaawe ori omwe aha baatunga obubonero bw’ahaiguru.” Nkagira nti:  “Ekyo kihikire, kwonka tindikubaasa kuza omu mahe.” Nkajuriza ebiri omu 2 Timoseo 2:3 reero naagira nti: “Naabaire omuserukare wa Kristo.” Bwanyima y’okumara obwire ahunami, akagira ati: “Noobaasa kugyenda.”

Bwanyima, nkaza omu rukiiko rw’abarikwenda kuza aha Beseeli aha ruteerane oruhango omuri Cincinnati, Ohio. Ow’eishe-emwe Milton Henschel akatugira ngu ow’eishe-emwe yaaba naayenda kukora n’obweziriki ahabw’Obukama, ekibiina nikibaasa kumukoresa aha Beseeli. Nkaijuza foomu y’okuza aha Beseeli, banyikiriza, reero naza Brooklyn aha Beseeli omu Kwamunaana 1954. Kwiha obwo ntwire aha Beseeli.

Tinkaburwaga murimo aha Beseeli. Kumara emyaka mingi, nkakora aha kyoma omu iteerero ry’ebitabo, naakora nka makanika, naahuunduza n’ekufuru. Kandi nkakora n’aha Byombeko by’Enteerane Empango omu rurembo New York.

Ninkunda entebeekanisa y’eby’omwoyo aha Beseeli, erikutwariramu okuramya kw’akasheeshe, Okwega Omunaara gw’Omurinzi, n’okwejumba omu kubuurira n’ekibiina. Ebi byona buzima bishemereire kuba omu maka g’Abajurizi ba Yehova. Abazaire n’abaana baabo ku barikushwijuma hamwe ekyahandiikirwe ky’eizooba, bakagira Okuramya kw’Eka, kandi bakeejumbira kimwe omu nteerane z’ekibiina n’omu kubuurira amakuru marungi, buri omwe omu ka naabaasa kuba gye omu by’omwoyo.

Ntungire abanywani baingi aha Beseeli n’omu kibiina. Abamwe bakaba bashukirweho amajuta, kandi hati baatungire omugabo gwabo omu iguru. Beitu abandi bakaba batashukirweho amajuta. Kwonka abaheereza ba Yehova boona otwariiremu n’Ababeseeli tibahikiriire. Ku ndikutunga okutaikirizana n’ow’eishe-emwe, butoosha niinteeraho kurinda obusingye. Ninteekateeka aha biri omuri Matayo 5:23, 24 n’oku tushemereire kutwaza haabaho okutaikirizana. Okushaba okusaasirwa tikyorobi, kwonka ku ndikuheza kushaba okusaasirwa, tindikuguma nyine oburemeezi na banywani bangye.

Ahabwa bwa bukuru, hati nikingumira kubuurira enju aha nju, kwonka tindekyeire aho. Nyegire Oruchaina rukye orurikwetwa Mandarin kandi ninkunda kubuurira Abachaina abu ndikubugana aha nguuto. Obumwe omu kasheeshe ningaba magaziini 30 nari 40.

 Nangwa mbaasize n’okugarukira omuntu orikutuura omuri China! Eizooba rimwe, omwishiki murungi akaamwenyera obu yaabaire naagaba ebirango by’obudaara bw’okugurizaho ebijuma. Naanye nkamumwenyera, reero naamuha Watchtower na Awake! z’Oruchaina. Akaikiriza yaazitwara kandi yaangira ngu eiziina rye ni Katie. Bwanyima y’ekyo, Katie ku yaabaire andeeba, akaba aija agamba naanye. Nkaba mwegyesa amaziina g’ebijuma n’ag’emboga omu Rungyereza, arikuguma naagarukamu ebi naagamba. Kandi nkamushoboororera ebyahandiikirwe, reero yaikiriza akatabo Eki Baibuli Erikwegyesa. Kwonka bwanyima ya saabiiti nkye, akabura.

Bwanyima y’ameezi makye, omwishiki ondiijo akarabaho naagaba ebirango nibyo bimwe, reero yaikiriza magaziini ezi naamuhaire. Saabiiti eyaakuratsireho, akampa esimu ye, kandi yaangira ati: “Gamba na China.” Nkagira nti: “Tihaine ou ndikumanya omuri China.” Kwonka akaangisiriza, n’ahabw’ekyo nkakiira esimu, reero naagira nti: “Halo, ogu ni Robison.” Oriya yaangarukamu ati: “Robby, ogu ni Katie. Nkagarukayo omuri China.” Naagarukamu nti: “China?” Katie yaagarukamu ati: “Eego. Robby, noomanya omwishiki ogwo owaakuha esimu? Ni murumuna wangye. Okanyegyesa ebintu birungi bingi. Nyabura ’we mwegyese nk’oku waanyegyeise.” Nkamugarukamu nti: “Katie, ninyija kuteeraho nk’oku ndikubaasa. Yebare kuumanyisa ahu ori.” Bwanyima, nkagamba na murumuna wa Katie ogw’aha muheru. Hoona ahu abaishiki abo baraabe bari, ninteekateeka ngu nibeega bingi ebirikukwata ahari Yehova.

Ntwire ninyejumba omu buheereza oburikwera oburikukwata ahari Yehova kumara emyaka 73. Ninshemererwa ahabw’okugira ngu Yehova akampwera kutejumba omu by’obutegyeki n’okuguma ndi omwesigwa obu naabaire ndi omu kihome. Kandi, barumuna bangye na banyaanyazi nibangambira ngu bakagira obumanzi ku baareebire okuhiiganisa kwa tata kutaandemesa. Maawe na beene maawe mukaaga boona bakabatizibwa. Nangwa na tata akarekyera aho okutuhiiganisa, yaatandika n’okwija omu nteerane obu yaabaire atakafiire.

Ruhanga ku araakunde, ab’omu ka yaitu na banywani bangye abaafiire, nibaija kuzooka omu nsi ensya. Teekateeka oku turikwija kushemererwa kuramya Yehova obwire bwona turi n’abakundwa baitu! *