1, 2. Ahabw’enki nikitangaaza kureeba ngu Yonasaani akanywana Daudi kandi yaamuhamiraho?

YONASAANI naabaasa kuba yaashemereirwe ahabw’oku omutsigazi muto Daudi yaasingwire Goliasi ekikaaka. Bwanyima ya Daudi kusingura, akeemerera omu maisho g’Omugabe wa Israeli Saulo, “aine omutwe gw’Omufilistia omu ngaro.” (1 Sam. 17:57) Yonasaani naabaasa kuba yaakunzire Daudi ahabw’obumanzi bwe. Kikaba nikireebwa butunu ngu Ruhanga naashagika Daudi, kandi ‘omutima gwa Yonasaani gukanywana n’ogwa Daudi.’ Nangwa ‘Yonasaani akaragaana na Daudi endagaano, ahakuba akamukunda nk’oku ayekunda.’ (1 Sam. 18:1-3) Ebiro byona eby’amagara ge, tarahemukire ahari Daudi.

² Yonasaani akaguma ari munywani wa Daudi, n’obu Ruhanga yaabaire atooraine Daudi kwija kuba niwe yaaba omugabe wa Israeli. Yonasaani akaba ayerarikiriire obu Saulo yaabaire naasherura Daudi kumwita. Yonasaani kubaasa kugumya munywani we, akaza Horeshi omu ihamba rya Buyudaaya. Yonasaani akahwera Daudi “yaamugumya omuri Ruhanga.” Akagira ati: “Otatiina . . . ; oryaba omugabe wa Israeli, naanye nkubeho owa kabiri.”​—1 Sam. 23:16, 17.

3. Niki eki Yonasaani yaabaire naatwara nka kikuru okukira okuhamira ahari Daudi, kandi nitukimanya tuta? (Reeba ekishushani aha kutandika.)

 ³ Butoosha nitukunda abantu abarikuguma bari abanywani n’obu haakubaho ki. Kwonka, ekikuru ekirikutureetera kusiima Yonasaani ti ahabw’okuhamira ahari Daudi kyonka, beitu n’ahabw’okuhamira ahari Ruhanga. Mbwenu shi ahabw’enki Yonasaani yaanywanire Daudi, omu mwanya gw’okumutwara nk’omuzigu we? Buzima, hariho eki Yonasaani yaabaire naatwara nka kikuru okukira okutunguuka kwe. Ijuka ngu akahwera Daudi “yaamugumya omuri Ruhanga.” Ekirikumanyisa ngu, eki Yonasaani yaabaire naayebembeza n’okuhamira ahari Yehova. Buzima, okuhamira ahari Yehova kikamubaasisa n’okuhamira ahari Daudi. Kandi abashaija aba bombi bakahamira aha ndagaano yaabo egi: “Mukama aryaguma ahagati yangye naiwe, kandi n’ahagati y’oruzaaro rwangye n’orwawe ebiro byona.”​—1 Sam. 20:42.

4. (a) Niki ekiraatureetere kutunga okumarwa n’okushemererwa okwabuzima? (b) Nituza kushwijuma ki omu kicweka eki?

⁴ Abakristaayo titurikwegomba abarikuhamira aha bandi kyonka, beitu naitwe nituhamira aha b’omu maka gaitu, banywani baitu n’ab’eishe-emwe. (1 Tes. 2:10, 11) Kwonka ekikuru munonga, twine kuhamira ahari Yehova. Ahakuba Niwe yaatuhaire amagara! (Kush. 4:11) Twaguma tumuhamiireho, nitutunga okumarwa n’okushemererwa okwabuzima. Kwonka twine kuhamira ahari Yehova n’obu twakuba turi omu kugyezibwa kw’amaani. Omu kicweka eki, nituza kureeba oku ebyahikire ahari Yonasaani birikubaasa kutuhwera kuhamira ahari Yehova omu mbeera ina ezigumire: (1) twaba nituteekateeka ngu titwine kworobera oine obushoboorozi, (2) twaba twine kucwamu ou turaayorobere, (3) abandi baaba batarikutwetegyereza nari baatutwariza kubi, na (4) kyaba kigumire kuhikiiriza okuraganisa kwaitu.

5. Ahabw’enki Abaisraeli kyabaire nikibagumira kuhamira ahari Ruhanga obu Saulo yaabaire ari omugabe?

⁵ N’obu Saulo araabe yaabaire ashukirweho amajuta kuba omugabe, bwanyima akagoma kandi Yehova yaamwanga. (1 Sam. 15:17-23) Obu Ruhanga ataramwihireho ahonaaho, emitwarize ye mibi ekagyeza obwesigwa bw’abu yaabaire naategyeka n’abanywani be. Kikaba nikibagumira kworobera Yehova, ahabw’okugira ngu omugabe owaabaire ari aha “kitebe ky’obugabe” akaba ahabire.​—1 Bus. 29:23.

6. Niki ekirikworeka ngu Yonasaani akaguma ahamiire ahari Yehova?

⁶ Obu Saulo yaagoma, omutabani Yonasaani akaguma ahamiire ahari Yehova. (1 Sam. 13:13, 14) Nabi Samueli akaba yaagizire ati: “Mukama taritsigaho bantu be ahabw’eiziina rye erikuru.” (1 Sam. 12:22) Yonasaani akooreka ngu naikiriza eki, obu eihe rihango ry’Abafilistia eryabaire riine ebigaari 30,000 ryatiinisa Israeli. Saulo akaba aine abashaija 600, kandi we na Yonasaani nibo bonka abaabaire baine eby’okurwanisa! Kwonka, Yonasaani akahika aha kigo ky’Abafilistia aine omukwatsi w’ebirwaniso bye wenka. Yonasaani akagira ngu tihariho kirikubaasa kuzibira Yehova kujuna, arikujunisa baingi nari bakye. Abaisraeli babiri aba bakaita abantu 20 aha kigo ekyo. Bwanyima n’ensi ekatengyeta; haabaho okutiina kwingi munonga. Abafilistia barikurabanamu, bakehindukana baatandika kwitana. Yonasaani ahabw’okwesiga Ruhanga, kikamubaasisa kusingura.​—1 Sam. 13:5, 15, 22; 14:1, 2, 6, 14, 15, 20.

7. Yonasaani akatwariza ata ishe?

⁷ N’obu omukago gwa Saulo na Ruhanga gwafiire, Yonasaani akaguma naakwatanisa na ishe ahu kirikwetengyesa. Nk’eky’okureeberaho, bakeejumba omu rugamba hamwe kurinda abaheereza ba Ruhanga.​—1 Sam. 31:1, 2.

8, 9. Nitworeka tuta ngu tuhamiire ahari Ruhanga twaha ekitiinisa abaine obushoboorozi?

 ⁸ Naitwe nka Yonasaani, nitubaasa kuhamya ngu tuhamiire ahari Yehova turikworobera abaine obushoboorozi omu muringo oguhikire, nk’oku Ruhanga arikwenda, n’obu abamwe barikureebeka nk’abatahikire kuheebwa ekitiinisa. Nk’eky’okureeberaho, omwebembezi wa gavumenti naabaasa kuba ari omushomankuzi, kwonka nabwo nitumuha ekitiinisa ahakuba “abakama abarikutegyeka” batwineho obushoboorozi buringaniire. (Shoma Abarooma 13:1, 2.) Buzima, twena nitubaasa kworeka ngu nituhamira ahari Yehova turikworobera abu ahaire obushoboorozi.​—1 Kor. 11:3; Heb. 13:17.

⁹ Olga ^[1] orikutuura omuri South America, akooreka ngu ahamiire ahari Ruhanga arikworobera iba nangwa n’omu mbeera ezigumire. Kumara emyaka mingi, iba akaba amwiniire ekiniga ahabw’okuba omwe aha Bajurizi ba Yehova. Akaba amureetera kwehurira kubi, kuguubwa kubi, ayanga kugamba nawe, kandi amutiinatiinisa kumwihaho abaana akamutsigaho. Kwonka Olga akaba ataihura ekibi ahabw’ekibi. Akaba akora kyona ekirikubaasika kuba omukazi murungi, atebeekanisa eby’okurya bya iba, ebijwaro bye, n’eka ye. (Rom. 12:17) Kyaba nikibaasika, akaba agyenda nawe omu nkiiko z’ekika kyabo nari eza banywani be. Nk’eky’okureeberaho, iba obu yaabaire naaza omu rurembo orundi kuza kuziika ishe, akatebeekanisa abaana na buri kimwe ekyabaire nikyetengyesa omu rugyendo orwo. Akaguma aha muryango gw’ekanisa ategyereize iba kuhitsya obu omukoro gwahendera. Bwanyima y’emyaka mingi, emiteekateekyere ye ekahinduka ahabwa Olga kumuha ekitiinisa kandi akamugumisiririza. Hati iba naamutwara aha Kyombeko ky’Obukama, nangwa amuhiga n’okuzayo, kandi obumwe n’obumwe iba naaza nawe omu nteerane.​—1 Pet. 3:1.

10. Yonasaani akamanya ata ou aine kuhamiraho?

¹⁰ Ahabw’okugira ngu Saulo akaba amaririire kwita Daudi, kikaba kigumiire Yonasaani kucwamu ou araayorobere. N’obu Yonasaani araabe yaabaire akozire endagaano na Daudi, nabwo akaba naayorobera ishe.  Kwonka Yonasaani akaba naamanya ngu Ruhanga naashagika Daudi beitu atari Saulo. N’ahabw’ekyo, Yonasaani akahamira munonga ahari Daudi okukira Saulo. Akarabura Daudi kweshereka, reero yaamugambaho gye ahari Saulo.​—Shoma 1 Samueli 19:1-6.

11, 12. Rukundo ei twiniire Ruhanga neetuhwera eta kumuhamiraho?

¹¹ Okuhamira ahari Ruhanga kikahwera Alice munyaanyazi-itwe kuruga Australia kucwamu ou aine kworobera. Ku yaatandikire kwega Baibuli, akaba agambira ab’omu ka yaabo ebintu birungi ebi yaabaire naayega. Bwanyima, Alice akagambira ab’omu ka yaabo ngu tarikwija kukuza Noiri nabo. Akabashoboororera gye, kwonka baamugirira ekiniga. Bakaba nibateekateeka ngu abehakaine. Alice naagira ati: “Maawe akangira ngu anyehakaine. Kikantangaaza munonga kandi naashaasha munonga, ahakuba nkaba ninkunda munonga eka yangye. N’obu kiraabe kyabaire kityo, nkamariirira omu mutima gwangye kubanza kuhamira ahari Yehova n’Omwana we, kandi bwanyima nkabatizibwa aha ruteerane oruhango orwakuratsireho.”​—Mat. 10:37.

¹² Twaba tutegyendesereize, nitubaasa kukunda munonga eihanga, ishomero, nari tiimu y’omuzaano okukira Ruhanga. Nk’eky’okureeberaho, Henry naakunda okuzaana omuzaano ogurikwetwa chesi. Eishomero rye rikaba nirikira kusinga empaka z’omuzaano ogwo, kandi Henry akaba naatamu amaani ge maingi. Akagira ati: “Mporampora, nkatandika kukunda munonga eishomero ryange omu mwanya gw’okukunda munonga Ruhanga. Okuzaana chesi aha wiikenda kukaza omu mwanya gw’obuheereza bwangye obw’Obukama. N’ahabw’ekyo nkacwamu kuruga aha tiimu y’omuzaano gwa chesi.”​—Mat. 6:33.

13. Okuhamira ahari Ruhanga nikituhwera kita kwemera oburemeezi bw’eka?

¹³ Obumwe nikiba kigumire kuhamira aha b’omu ka yaitu boona. Nk’eky’okureeberaho, Ken naagira ati: “Nkaba ninkunda kutaayaayira maawe okuzire, kandi obumwe nkaba mmureeta atuura naitwe. Kwonka omukazi wangye na maawe bakaba batarikukwatanisa gye. Omu kubanza, nkashobangirirwa ahakuba nkaba ntarikubaasa kushemeza omwe nkareka ondiijo. Omu mbeera egyo, nkareeba ngu nyine kubanza kuhamira aha mukazi wangye. N’ahabw’ekyo nkakoresa obwengye kubaasa kushemeza omukazi wangye.” Ken ahabw’okuhamira ahari Ruhanga n’okuha Baibuli ekitiinisa akabaasa kugira obumanzi bw’okushoboororera omukazi we ahabw’enki aine kutwariza gye nyina, kandi yaashoboororera na nyina ahabw’enki aine kuha omukazi we ekitiinisa.​—Shoma Okutandika 2:24; 1 Abakorinso 13:4, 5.

14. Saulo akatwariza kubi ata Yonasaani?

¹⁴ Okuhamira ahari Yehova nikibaasa kuguma omuntu oine obushoboorozi yaatutwariza omu muringo gutahikire. Yonasaani naabaasa kuba yaagumiirwe obu yaabaire ari omu mbeera nk’egyo. Omugabe Saulo, ou Ruhanga yaabaire ashukireho amajuta, akaba naamanya ngu mutabani we ni munywani wa Daudi, kwonka akaba atarikwetegyereza ahabw’enki yaamunywanire. Saulo akahemura Yonasaani arikugambisa ekiniga. Kwonka, Yonasaani tarayeshashwiize. Tararekyeire aho kuhamira ahari Ruhanga nari Daudi, owaabaire naija kuba omugabe wa Israeli.​—1 Sam. 20:30-41.

15. Ab’eishe-emwe baatutwariza omu muringo gutahikire, twine kutwaza tuta?

¹⁵ Obunaku obu, abarikureeberera ekibiina kya Yehova nibateeraho kutwariza gye buri omwe. Kwonka, ab’eishe-emwe aba nabo tibahikiriire, nibabaasa kuteetegyereza ebikorwa byaitu. (1 Sam. 1:13-17) Kwonka n’obu baakutugambaho ebitahikire nari bakatutwariza kubi, ka tuteereho kuhamira ahari Yehova.

16. Ni ryari obu twine kuhamira ahari Ruhanga omu mwanya gw’okweyendeza?

¹⁶ Saulo akaba naayenda ngu Yonasaani abe niwe yaamuhungurira nk’omugabe. (1 Sam. 20:31) Kwonka okuhamira ahari Ruhanga kikahiga Yonasaani kunywana Daudi omu mwanya gw’okweyendeza kuba Omugabe. Nitubaasa kuteeraho kutooreza Yonasaani tugire omutima gw’okuteyendeza, twaguma nitwijuka ngu omuntu orikukunda Yehova “ku arahira, n’obu afeerwa tahinduka.” (Zab. 15:4) Yonasaani tarahindwire eki yaabaire aragaaniise Daudi, naitwe titwine kuhindura eki turaganiise. Nk’eky’okureeberaho, twakora endagaano omu by’obushuubuzi, kwonka bikanga kugyenda gye nk’oku tubaire nituteekateeka, okuhamira ahari Ruhanga n’okuha ekitiinisa Baibuli bishemereire kutuhiga kukora eki tugambire. Kandi shi obushwere bwaitu bwabamu embeera zigumire kukira oku twabaire nituteekateeka? Rukundo ei twiniire Ruhanga eshemereire kutuhiga kuhamira aha muntu ou tushweraine nawe.​—Shoma Malaki 2:13-16.

17. Ebi twayega omu kicweka eki byakuhwera bita?

¹⁷ Twateekateeka ahari Yonasaani, nituhurira twayenda kumutooreza ahabw’okuba omwesigwa ahari Ruhanga. Ka tuteereho kutagira omutima gw’okweyendeza. Kandi naitwe nka Yonasaani, ka tuteereho kuhamira ahari Yehova turikuhamira aha baheereza be nangwa n’obu baakutureebya. Twahamira ahari Yehova Ruhanga omu mbeera ezigumire, nitumushemeza, kandi nitutunga okumarwa. (Enf. 27:11) Ku turaagume tuhamiire ahari Yehova, naija kuguma naatuha ebirungi kandi naatureeberera. Omu kicweka ekirikukurataho, nituza kureeba eki turikubaasa kwegyera ahari bamwe abaahamiire ahari Yehova n’abo abataramuhamiireho omu bunaku bwa Daudi.