AHA RWAKASHATU, Jenwari 18, 2023, ekirango ky’omutaano kikateebwa aha jw.org, ekyabaire nikigira ngu Ow’eishe-emwe Gage Fleegle na Jeffrey Winder batoorainwe kuheereza aha Kakiiko Akareeberezi ak’Abajurizi ba Yehova. Ab’eishe-emwe bombi batwire nibaheereza Yehova omu bwesigwa kumara obwire buraingwa.

Ow’eishe-emwe Fleegle akakurira omu burengyerwa eizooba bwa Pennsylvania, U.S.A., arikwororwa abazaire abarikutiina Ruhanga. Obu yaabaire ari omunyeeto, abazaire be bakafurukira omu tauni nkye ahu ababuurizi baabaire nibendwa munonga. Bwanyima y’obwire bukye, Novemba 20, 1988 akabatizibwa.

Abazaire b’ow’eishe-emwe Fleegle butoosha bakaba nibamuhiga kuza omu buheereza obw’obutwire. Bakaba nibakira kutaayaayisa abareeberezi ba saketi, n’Ababeseeli omu ka yaabo, kandi ow’eishe-emwe Fleegle akaba naareeba oku baabaire bashemereirwe. Bwanyima y’obwire bukye aherize kubatizibwa, akaba payoniya w’obutwire Seputemba 1, 1989. Bwanyima y’emyaka ebiri, akahikiiriza ekigyendererwa kye eki yaabaire ataireho aine emyaka 12, eky’okuheereza aha Beseeli. Akatandika obuheereza bwe aha Beseeli omuri Brooklyn, Okitoba 1991.

Aha Beseeli, Ow’eishe-emwe Fleegle akakora omu kukwatanisa ebitabo kumara emyaka munaana, bwanyima akaheebwa obujunaanizibwa bw’okukora omu Ofiisi y’Obuheereza. Omu bwire obwo, akaba naaheereza omu kibiina ekirikukoresa Orurasha kumara emyaka mikye. Omu 2006 akataaha omu bushwere na Nadia, owaamwegaitsireho omu buheereza bwa Beseeli. Bombi, baheereize omu kibiina ekirikukoresa Orupotuguezi, kandi baahereize n’omu kirikukoresa Orusipania kumara emyaka erikurenga omuri ikumi. Bwanyima y’emyaka mingi, Ow’eishe-emwe Fleegle arikukora aha by’Obuheereza, akaheebwa obujunaanizibwa bw’okukora omu Ofiisi y’Akakiiko k’Okwegyesa,  bwanyima akaheereza omu Ofiisi y’Akakiiko k’Obuheereza. Omuri Maaci 2022 akatooranwa kuba omuhwezi aha Kakiiko k’Obuheereza ak’Akakiiko Akareeberezi.

Ow’eishe-emwe Winder akakurira omuri Murrieta, California, U.S.A. Akoororwa abazaire be abari omu mazima, kandi akabatizibwa Maaci 29, 1986. Okwezi okwakuratsireho, akacwamu kuba payoniya omuhwezi. Akakunda munonga obuheereza obwo yaayenda kugumizamu. Bwanyima y’ameezi arikuheereza nka payoniya omuhwezi, akaba payoniya ow’obutwire Okitoba 1, 1986.

Obu Ow’eishe-emwe Winder yaabaire akiri omunyeeto akataayaayira bakuru be babiri abaabaire nibaheereza aha Beseeli omu bwire obwo. Okutaayaaya okwo kukamureetera kugira ekyetengo ky’okuheereza aha Beseeli yaakura. Kandi Mei 1990, akeetwa kuheereza aha Beseeli omuri Wallkill.

Aha Beseeli, Ow’eishe-emwe Winder akaheebwa obujunaanizibwa butari bumwe na bumwe, otwariiremu okukora omu by’Okuboneza, aha Faamu, n’omu Ofiisi erikukora aha nshonga za Beseeli. Omuri 1997, akaza omu bushwere na Angela, kandi kuruga obwo batwire nibaheereza hamwe aha Beseeli. Omu 2014 bakeetwa Warwick, ahu Ow’eishe-emwe Winder yaabaire naahwera omu kwombeka ofiisi enkuru. Omu 2016 bakaza aha Watchtower Educational Center omuri Patterson, ahu Ow’eishe-emwe Winder yaabaire naakora omu Kukwata Amaraka na Vidiyo. Bwanyima y’emyaka ena, bakagaruka Warwick ahu Ow’eishe-emwe Winder yaatoorainwe kuheereza omu Ofiisi y’Akakiiko k’Enshonga z’Ababeseeli. Omuri Maaci 2022 akatooranwa kuba omuhwezi w’Akakiiko k’Enshonga z’Ababeseeli ak’Akakiiko Akareeberezi.

Nitushaba ngu Yehova ahe omugisha “ebiconco” ebi omu bantu, barikugumizamu nibakora n’amaani kwenegyeza emirimo y’Obukama.—Efe. 4:8.