Mary n’omushaija we John, a nibatuura omu ihanga ahu barikubaasa kubuurira amakuru marungi abakozi baingi abashuhuuki abarikuruga Philippines. Omu bwire bw’ekigwererezi kya COVID-19, Mary akabaasa kutandika kwegyesa abantu Baibuli ab’eihanga eri yaabaire arimu, n’ab’amahanga agandi. Akabaasa kukikora ata?

Mary akaba abuuza abeegi be ati, “Haine omuntu ondiijo ou orikumanya owaakwenzire kwega Baibuli?” Ku baabaire baagarukamu ngu eego, akaba ababuuza yaaba nibabaasa kumuhwera kubahikaho. Okubuuza ekibuuzo kyorobi nk’ekyo nikirugamu ebirungi. Ahabw’enki? N’ahabw’okugira ngu abantu abarikusiima Ekigambo kya Ruhanga nibakira kugambira abanyabuzaare n’abanywani baabo ebi beegire. Niki ekirugire omu kubuuza ekibuuzo kyorobi ekyo?

Omwegi ou Mary yaabaire naayegyesa Baibuli orikwetwa Jasmin akamuhwera kuhika aha beegi bana basya ba Baibuli. Okwega Baibuli kukashemeza munonga omwe aha beegi abo orikwetwa Kristine, yaashaba Mary kuguma naamwegyesa emirundi ebiri omu saabiiti. Mary ku yaamubuurize yaaba hariho ondiijo orikwenda kwega Baibuli, Kristine akamugarukamu ati: “Eego, ninza kukwanjurira banywani bangye.” Omu saabiiti nkye, Kristine akaanjurira Mary banywani be bana abaabaire nibenda kwega Baibuli. Bwanyima, Kristine akamwanjurira banywani be abandi, kandi nabo bakamwanjurira bagyenzi baabo.

Kristine akaba naayenda ngu n’ab’eka ye omuri Philippines beegye Baibuli. N’ahabw’ekyo akagambira muhara we Andrea ebi yaabaire naayega. Andrea akabanza kuteekateeka ati: ‘Abajurizi ba Yehova n’akadiini, tibarikwikiririza omuri Yesu, kandi nibakoresa Endagaano Enkuru yonka.’ Kwonka bwanyima y’okwega Baibuli omurundi gw’okubanza gwonka, emiteekateekyere ye ekahinduka. Ku yaabaire aba naayega Baibuli, akaba akira kugira ati: “Baibuli yaaba nikwo erikugira, kishemereire kuba kihikire!”

Bwanyima Andrea akanjurira Mary banywani be babiri n’omukozi mutaahi we abaatandikire kwega Baibuli. Kandi, Mary akaba atarikumanya ngu ishe-enkazi wa Andrea orikwetwa Angela owaabaire ari empumi, akaba aba ahurikiize Andrea arikwega Baibuli. Eizooba rimwe, Angela akashaba Andrea kumwanjurira Mary, kandi yaamushaba kumwegyesa Baibuli. Angela akakunda munonga ebi yaabaire naayega. Omu kwezi kumwe, akakwata ebyahandiikirwe bingi omu mutwe, kandi akaba naayenda kwega emirundi ena omu saabiiti! Arikuhwerwa Andrea akatandika kubaho omu nteerane obutoosha arikukoresa vidiyo.

 Mary ku yaayetegyereize ngu Joshua, iba wa Kristine akaba naarabaraba haihi n’ahu baabaire nibeegyera, akamubuuza yaaba naabaasa kubeegaitaho omu kwega. Joshua akagarukamu ati: “Ninza kuhurikiza kyonka, otambuuza ekibuuzo kyona. Ku oraambuuze, ninza kurugaho ngyende.” Omu dakiika itaano ezaabandize barikwega, akabuuza ebibuuzo bingi ebirikukira ebi Kristine yaabuurize, kandi akaba naayenda kugumizamu naayega Baibuli.

Ekibuuzo kyorobi eki Mary yaabuurize kikamuhitsya aha kutunga abeegi ba Baibuli baingi. Akakora entebeekanisa ngu ababuurizi bagyenzi be bamuhwere aha beegi ba Baibuli abo. Abantu abu Mary yaatandikire kwegyesa Baibuli boona hamwe bakahika 28, kandi bakaba nibaruga omu mahanga ana agatarikushushana.

Jasmin, omwegi owaabanza kugambwaho omu ky’okureeberaho eki, akabatizibwa omuri Apuri 2021. Kristine akabatizibwa omuri Mei 2022, kandi akagarukayo omuri Philippines kuba n’ab’eka ye. Abeegi babiri abandi abu Kristine yaayanjuriire Mary nabo bakabatizibwa. Bwanyima y’ameezi makye Angela akabatizibwa kandi hati naaheereza nka payoniya ow’obutwire. Joshua iba wa Kristine, na muhara waabo Andrea, otwariiremu n’abandi beegi baingi bariyo nibatunguuka omu kwega Baibuli kwabo.

Omu kyasha ky’okubanza, amakuru marungi gakajanjaara juba omu banywani n’abanyabuzaare. (Yoh. 1:​41, 42a; Byak. 10:​24, 27, 48; 16:​25-33) Ahabw’enki otarikubuuza abeegi baawe ba Baibuli n’abarikukunda kumanya ebirikukiraho oti: “Haine ondiijo ou orikumanya orikwenda kwega Baibuli?” Obundi tokaamanya omuhendo gw’abantu abarikubaasa kutandika kwega Baibuli ahabw’ekibuuzo kyorobi ekyo, eki buri omwe arikubaasa kubuuza.