EKICWEKA EKY’OKWEGA 6
EKYESHONGORO 18 Okusiima Ekitambo
Ekirikutureetera Kusiima Okusaasira kwa Yehova
“Nikwo Ruhanga yaakunzire atyo ensi, akahayo Omwana we omwe nyamunegyere.”—YOH. 3:16.
ENTIMA
Okwongyera kworeka okusiima ahabw’okusaasira kwa Yehova turikwetegyereza eki arikwihiriraho kutusaasira.
1-2. Embeera y’abantu eri nk’ey’omutsigazi owaagambwaho omu kacweka 1 mu muringo ki?
TEEKATEEKA aha mutsigazi okuriire omu ka engaiga. Eizooba rimwe agwerwa akagwe, abazaire be bafeera omuri butandu. Embeera egyo ereetera omutsigazi ogwo kugira obusaasi bwingi. Kandi amanya amakuru agandi mabi, ngu abazaire be bakashiishagura ebintu by’eka kyabareetera kugira amabanja maingi. Omu mwanya gw’okuhungura obugaiga bwabo, ahungura amabanja gaabo againe kushashurwa. Kwonka amabanja ago tarikubaasa kugashashura.
2 Nikyo kimwe, embeera yaitu eri nk’ey’omutsigazi ogwo. Abazaire baitu ab’okubanza, Adamu na Haawa, bakaba bahikiriire, kandi barikutuura omuri paradiso. (Kut. 1:27; 2:7-9) Bakaba baine amatsiko g’okutuuraho ebiro byona, kwonka buri kimwe kikahinduka. Bakafeerwa Paradiso eka yaabo nungi, n’omugisha gw’okutuuraho ebiro byona. Mbwenu shi bakaba nibaija kuhunguza ki abaana baabo? Baibuli neegira eti: “Nk’oku ekibi kyaizire omu nsi ahabw’okushiisha kw’omuntu omwe [Adamu], kandi kikarugamu okufa, nikwo n’okufa kwabugire omu bantu boona, ahakuba boona bakashiisha.” (Rom. 5:12) Adamu akatuhunguza ekibi, ekirikurugamu okufa. Ekibi eki twahungwire kiri nk’eibanja, eritutarikubaasa kushashura.—Zab. 49:8.
3. Ahabw’enki ebibi byaitu nibibaasa kugyeragyeranisibwa ‘n’amabanja’?
3 Yesu akagyeragyeranisa ebibi byaitu ‘n’amabanja.’ (Mat. 6:12; Luk. 11:4) Twashiisha nitugira eibanja ahari Yehova. Nituba twine kushashurira ekibi kyaitu. Eibanja eryo ryaba ritashashwirwe, nirisaasirwa twafa.—Rom. 6:7, 23.
4. (a) Ku ogire ngu tihariho buhwezi, niki ekyakubaire aha basiisi boona? (Zaaburi 49:7-9) (b) Omu Baibuli, ekigambo “ekibi” nikimanyisa ki? (Reeba akabokusi “ Ekibi.”)
4 Mbwenu shi nikibaasika kugaruka kutunga byona ebi Adamu na Haawa baafeereirwe? Eego, kwonka tikirikubaho ahabw’amaani gaitu. (Shoma Zaaburi 49:7-9.) Ku ogire ngu titwine buhwezi, ti twakubaire twine amatsiko g’okutuuraho ebiro byona nari kuzooka. Nangwa, okufa kwaitu kukaabaire nk’okw’enyamaishwa, ezaabaire zitahangirwe kutuuraho ebiro byona, kandi ezitaine matsiko g’okuzooka.—Mub.3:19; 2 Pet. 2:12.
5. Tataitwe owa rukundo akatuhwera ata aha eibanja ry’ekibi eritwahungwiire?(Reeba ekishushani .)
5 Garuka oteekateeke aha mutsigazi owaagambwaho aha kutandika, akaba naija kwehurira ata ku ogire ngu omushaija omugaiga akeehayo kushashura amabanja ge goona? Hatariho kubangaanisa omutsigazi ogwo akaba naija kusiima munonga ekiconco kihango ekyo. Nikyo kimwe, Yehova, Tataitwe owa rukundo akatuha ekiconco ky’okushashura eibanja ry’ekibi eki twahungwire ahari Adamu. Ekyo Yesu akakigambaho ati: “Nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Ekiconco ekyo nikitubaasisa kugira omukago murungi na Yehova.
Yesu akabuurira amakuru marungi agarikukwata aha kusaasira kwa Yehova okurikwegamira aha kitambo. (Yohaana 3:16) Reero akahayo amagara ge ayekundiire kubaasa kuhayo ekitambo ekyo (Reeba akacweka 5)
6. Ni bigambo ki by’omu Baibuli ebiraagambweho omu kicweka eki, kandi ahabw’enki?
6 Nitubaasa kugasirwa tuta omu kiconco ekyo, kandi tukasaasirwa ebibi, nari “amabanja” gaitu? Eky’okugarukamu ky’ekibuuzo ekyo nikishangwa omu bigambo ebi Baibuli erikukoresa nk’okugarukana na Ruhanga, okurihiirira ebibi, ekarabo, ekitambo, okucungurwa, n’okwetwa abahikiriire. Omu kicweka eki, nituza kureeba eki birikumanyisa. Twabiteekateekaho, nitwija kwongyera kusiima eki Yehova arikwihiriraho kutusaasira.
EKIGYENDERERWA: OKUGARUKANA NA RUHANGA
7. (a) Adamu na Haawa bakafeerwa ki ekindi? (b) Itwe baijukuru baabo, niki eki turikwenda munonga? (Abarooma 5:10, 11)
7 Adamu na Haawa bakafeerwa amatsiko g’amagara agatahwaho, n’omukago gwabo na Ishebo, Yehova. Omu kubanza, Adamu na Haawa bakaba bari omu ka ya Ruhanga. (Luk. 3:38) Kwonka ku baamugomeire, bakabingwa omu ka ye batakazaire baana. (Kut. 3:23, 24; 4:1) N’ahabw’ekyo, itwe baijukuru baabo twine kugarukana na Yehova. (Shoma Abarooma 5:10, 11.) Ekirikumanyisa ngu twine kuteeraho kugira omukago murungi na Yehova. Kurugiirira aha kucondooza kumwe, ekigambo ky’Orugriika “okugarukana” nikibaasa kumanyisa “okuhindura omuzigu waawe omunywani.” Ekirungi, Yehova niwe yaabandize kugira eki yaakora kubaasisa ekyo kubaho. Ata shi?
ENTEBEEKANISA: OKURIHIIRIRA EBIBI
8. (a) Okurihiirira ebibi nikimanyisa ki? (b) Ekarabo niki?
8 Okurihiirira ebibi n’entebeekanisa ei Yehova yaataireho kubaasisa abantu abasiisi kugaruka kugira enkoragana nungi nawe. Entebeekanisa egyo neetubaasisa kugaruka kutunga eki Adamu yaafeereirwe, ahakuba Yehova akahayo ekirikwinganisa nakyo omuhendo. Ebyahandiikirwe eby’Orugriika nibikoresa ekigambo ekarabo ekirikumanyisa “okurihiirira.” (Rom. 3:25) Ekarabo n’ekikorwa ekirikubaasisa omuntu kugira obusingye na Ruhanga n’enkoragana nungi nawe.
9. Ni ntebeekanisa ki ey’obwire bukye ei Yehova yaataireho kugira ngu Abaisraeli basaasirwe ebibi?
9 Yehova okubaasa kugira omukago murungi n’Abaisraeli akataho entebeekanisa y’obwire bukye y’okwihiriraho kubasaasira ebibi byabo. Omu bwire bw’Abaisraeli, Eizooba ry’Okurihiiriraho Ebibi rikaba ribaho rimwe omu mwaka. Aha izooba eryo, omunyamurwa omukuru akaba ahayo ebitambo by’enyamaishwa ahabw’abantu boona. Amazima gari ngu, ebitambo ebyo bikaba bitarikubaasa kurihiirira kimwe ebibi by’omuntu ahakuba abantu nibakira enyamaishwa. Kwonka Abaisraeli abaabaire beeteisa kandi bakahayo ebitambo ebi Yehova yaabaire abashabire, akaba abasaasira ebibi byabo. (Heb. 10:1-4) Ekindi, entebeekanisa egyo, n’ebitambo ebi Abaisraeli baabaire bahayo butoosha ahabw’ebibi, bikaba bibaijutsya ngu n’abasiisi, kandi nibeetenga ekitambo ky’okurihiirira kimwe ebibi byabo.
10. Ni ntebeekanisa ki y’obutwire ei Yehova yaataireho kusaasira ebibi?
10 Yehova akaba aine entebeekanisa y’okurihiirira kimwe ebibi. Akahayo Omwana we omukundwa “rimwe kwekorera ebibi bya baingi.” (Heb. 9:28) Yesu akahayo amagara ge nk’ekitambo “okucungura baingi.” (Mat. 20:28) Ekitambo niki?
OMUHENDO: EKITAMBO
11. (a) Kurugiirira ahari Baibuli, ekitambo nikimanyisa ki? (b) Niki ekyabaire nikyetengyesa kubaasa kuhayo ekitambo?
11 Kurugiirira ahari Baibuli, ekitambo n’omuhendo ogurikushashurwa kurihiirira n’okugarukanisa. a Omu maisho ga Yehova, ekitambo nikitaho ah’okwihirira kugaruraho ebitakiriho. Mu muringo ki? Ijuka ngu Adamu na Haawa bakafeerwa amagara agahikiriire n’amatsiko g’okutuuraho ebiro byona. N’ahabw’ekyo ekitambo kikaba kiine kuba nikiingana n’ebi twafeereirwe. (1 Tim. 2:6) Kikaba nikibaasa kushashurwa omushaija (1) ohikiriire; (2) owaabaire naabaasa kutuuraho ebiro byona omu nsi; kandi (3) owaabaire ayeteekateekire kuhayo amagara ge ahabwaitu. Obwo nibwo yaabaire naabaasa kugaruraho nari kurihiirira amagara agu twafeereirwe.
12. Ahabw’enki Yesu yaabaasize kuhayo omuhendo gw’ekitambo ogurikwetengyesa?
12 Teekateeka aha nshonga ishatu ahabw’enki Yesu yaabaasize kushashura omuhendo gw’ekitambo. (1) Akaba ahikiriire, kandi “tarakozire kibi.” (1 Pet. 2:22) (2) Ahabw’enshonga egyo, akaba naabaasa kutuuraho ebiro byona omu nsi. (3) Akeehayo kutufeera, kandi yaahayo amagara ge ahabwaitu ayekundiire. (Heb. 10:9, 10) Ahabw’okugira ngu Yesu akaba ahikiriire, amagara ge gakaba nigaingana n’aga Adamu, obu yaabaire atakasiisire. (1 Kor. 15:45) Okufa kwe kukarihiirira ekibi kya Adamu kwagaruraho ebi twafeereirwe. (Rom. 5:19) N’ahabw’ekyo akahinduka “Adamu owa bwanyima.” Hakaba hatarikwetengyesa omuntu ondiijo ohikiriire kushashurira eki Adamu yaafeereirwe. Yesu akafa “rimwe yaaheza.”—Heb. 7:27; 10:12.
13. Entebeekanisa y’okurihiirira neetaana eta n’ekitambo?
13 Ni ntaaniso ki eri ahagati y’okurihiirira ebibi n’ekitambo? Okurihiirira ebibi n’entebeekanisa ei Yehova yaataireho kubaasisa abantu kugaruka kugira enkoragana nungi nawe. Ekitambo n’omuhendo ogurikushashurwa kurihiirira n’okugarukanisa. Omuhendo ogwo nigujwekyera eshagama ya Yesu eyaasheeshekire ahabwaitu.—Efe. 1:7; Heb. 9:14.
EKIRIKURUGAMU: OKUCUNGURWA N’OKWETWA ABAHIKIRIIRE
14. Twaza kugamba ahari ki, kandi ahabw’enki?
14 Entebeekanisa y’okurihiirira ekarugamu ki? Baibuli neekoresa ebigambo bitari bimwe kworeka ebirungi by’entebeekanisa egyo. N’obu amakuru g’ebigambo ebyo garikwenda kushushana, buri kigambo nikyoreka ahabw’enki entebeekanisa y’okurihiirira erikubaasisa Yehova kusaasira. Nituza kureeba oku ebigambo ebyo, birikutukwataho.
15-16. (a) Omu Baibuli ekigambo “okucungurwa” nikimanyisa ki? (b) Ekyo nikitukwataho kita?
15 Omu Baibuli, okucungurwa nikimanyisa okurekurwa, nari okwihwaho orubanja ahabw’okuhayo ekitambo. Entumwa Petero akakigambaho ati: “Nimumanya ku mutaracunguziibwe bintu ebihwaho nk’efeeza n’ezaabu okuruga omu micwe yaanyu etaine mugasho ei mwahungwire ahari baashwenkuriimwe. Kureka Kristo akabacungura n’eshagama ye ey’obuguzi bwingi, nk’ey’omwana gw’entaama ogutaine kamogo n’obu ryakuba eibara.”—1 Pet. 1:18, 19.
16 Ahabw’ekitambo, nitubaasa kucungurwa kuruga omu kutegyekwa ekibi n’okufa. (Rom. 5:21) Buzima, twine eibanja ahari Yehova na Yesu ahabw’okucungurwa oku twatungire ahabw’eshagama y’omuhendo eya Yesu.—1 Kor. 15:22.
17-18. (a) Okwetwa abahikiriire nikimanyisa ki? (b) Ekyo nikitukwataho kita?
17 Okwetwa abahikiriire nikimanyisa ngu twihirweho orubanja, kandi ebibi byaitu byaragazibwa. Yehova okukora atyo tikirikumanyisa ngu ahindwire emitindo ye y’oburingaaniza. Tarikutweta abahikiriire ahabw’okugira ngu kitushemereire, nari ngu naashagika ebibi byaitu. Kureka, Yehova naatusaasira amabanja gaitu ahabw’okugira ngu nitwikiririza omu ntebeekanisa y’okurihiirira ebibi, n’ekitambo ekyahairweyo.—Rom. 3:24; Gal. 2:16.
18 Ekyo nikikwata kita ahari buri omwe ahariitwe? Abatoorainwe kutegyeka na Yesu omu iguru nibeetwa abahikiriire, kandi abaana ba Ruhanga. (Tit. 3:7; 1 Yoh. 3:1) Ebibi byabo nibisaasirwa, kandi Yehova naabareeba nk’abatarakozire ebibi ebyo, n’ahabw’ekyo nibaba bahikire kuba omu Bukama. (Rom. 8:1, 2, 30) Abaine amatsiko g’okutuura omu nsi nibeetwa abahikiriire kandi banywani ba Ruhanga, n’ebibi byabo nibisaasirwa. (Yak. 2:21-23) Omutwe muhango gw’abantu, abaraahonokeho ahari Haramagedoni nibaija kuba baine amatsiko g’okutafa na kakye. (Yoh. 11:26) ‘Abahikiriire n’abatahikiriire’ abagwejegyereire omu kufa nibaija kuzoorwa. (Byak. 24:15; Yoh. 5:28, 29) Empereruka, abaheereza ba Yehova boona omu nsi abarikumworobera, nibaija kugira “obusingye bw’abaana ba Ruhanga obw’ekitiinisa.” (Rom. 8:21) Buzima entebeekanisa y’okurihiirira ebibi, neetubaasisa kugira omugisha gw’okugarukanira kimwe na Tataitwe, Yehova.
19. Embeera yaitu ehindukire eta kuba nungi? (Reeba n’akabokusi “ Oku Turikugasirwa.”)
19 Embeera yaitu ekaba eri nk’ey’omutsigazi owaagambwaho omu kutandika owaafeereirwe buri kimwe, reero akahungura eibanja eri yaabaire atarikubaasa kushashura. Ekirungi, twine obuhwezi bwa Yehova. Embeera yaitu ehindukire ahabw’ekitambo n’entebeekanisa y’okurihiirira ebibi. Okwikiririza omuri Yesu nikitubaasisa kucungurwa kuruga omu kibi n’okufa. Kandi ebibi byaitu nibibaasa kushazibwamu nari biragazibwe. Ekikuru munonga, nitubaasa kugira omukago murungi na Tataitwe ow’omu iguru owa rukundo, Yehova.
20. Nituza kugamba ahari ki omu kicweka ekirikukurataho?
20 Twateekateeka aha ki Yehova na Yesu baatukoreire nitwija kwongyera kubasiima. (2 Kor. 5:15) Ku ogire ngu titwine buhwezi bwabo, tukaabaire tutaine matsiko. Kwonka shi niki ekirikutwarirwa omu kusaasira kwa Yehova? Ekibuuzo eki nikiza kugarukwamu omu kicweka ekirikukurataho.
EKYESHONGORO 10 Himbisa Yehova, Ruhanga Waitu!
a Omu ndimi ezimwe ekigambo “ekitambo,” nikimanyisa “omuhendo gw’amagara” nari “okushashurira ekintu.”
