EKICWEKA EKY’OKWEGA 7
EKYESHONGORO 15 Himbisa Omwana wa Yehova Omujigaijo!
Ekirikutwarirwa omu Kusaasira kwa Yehova
“Ah’ori hariho okusaasirwa [okwabuzima].”—ZAB. 130:4.
ENTIMA
Okushwijuma eby’okureeberaho ebi Baibuli erikukoresa nikiija kutuhwera kwongyera kusiima Yehova ahabw’okutusaasira.
1. Ahabw’enki omuringo ogu abantu barikusaasiramu gutarikwetegyerezibwa gye?
EKIGAMBO “naakusaasira” nikikureetera kwehurira gye na munonga waaba noomanya ngu haine eki ogambire, nari eki okozire kikagwisa kubi mugyenzi waawe. Kwonka shi ekigambo ekyo buzima nikimanyisa ki? Mbwenu shi nikimanyisa ngu omukago gwawe n’omuntu ou ogwisize kubi gwagarukaho? Nari naaba naamanyisa ngu tarikwenda kugaruka kugamba aha nshonga egyo? Okusaasira kw’abantu kugumire kwetegyerezibwa.
2. Ebyahandiikirwe nibigamba ki aha kusaasira kwa Yehova? (Reeba n’obugambo obw’ahansi.)
2 Oku Yehova arikusaasira abantu abatahikiriire nikutaana aha ku turikusaasirana. Yehova naasaasira omu muringo gw’omutaano. Omuhandiiki wa zaaburi akagamba ahari Yehova ati: “Ah’ori hariho okusaasirwa [okwabuzima] ngu obone kutiinwa.” a (Zab. 130:4) Eego, okusaasira kwa Yehova n’okwabuzima. Niwe arikutaho omutindo gw’ekirikutwarirwa omu kusaasira okwabuzima. Obumwe, abahandiiki ba Baibuli bakaba bakoresa ekigambo ky’Oruheburaayo okusaasira, ekitarikukoresibwa kumanyisa okusaasira kw’abantu.
3. Okusaasira kwa Yehova nikutaana kuta n’okwaitu? (Isaaya 55:6, 7)
3 Yehova yaasaasira omuntu, ekibi kye nikiragazibwa. Naagaruka agira omukago murungi nawe. Nitusiima Yehova ahabw’okutusaasirira kimwe, kandi emirundi mingi.—Shoma Isaaya 55:6, 7.
4. Yehova naatuhwera ata kwetegyereza okusaasira okwabuzima?
4 Mbwenu shi obu okusaasira kwa Yehova kurikutaana n’okwaitu abantu abatahikiriire, nitubaasa kukwetegyereza tuta? Yehova naatuhwera arikukoresa eby’okureeberaho ebi Baibuli erikukoresa kushoboorora oku arikusaasira. Omu kicweka eki, nituza kushwijuma bimwe aha bigambo ebyo. Nitwija kwetegyereza oku Yehova arikwihaho ekibi, kandi akagaruraho enkoragana nungi erikuba esiisirwe ekibi. Eby’okureeberaho ebi Baibuli erikukoresa nibiija kutuhwera kwongyera kusiima Tataitwe omunyambabazi, orikusaasira omu miringo mingi.
YEHOVA NAIHAHO EKIBI
5. Niki ekirikubaho Yehova ku arikutusaasira ebibi byaitu?
5 Omu Baibuli, ebibi nibikira kugyeragyeranisibwa n’emigugu erikuremeera. Omugabe Daudi akagamba aha bibi bye ati: “Eby’okushiisha byangye bindengyeire aha mutwe, bindemire nk’omutwaro guremeire.” (Zab. 38:4) Kwonka Yehova naasaasira ebibi by’abarikweteisa. (Zab. 25:18; 32:5) Ekigambo ky’Oruheburaayo ekirikuvunuurwa “okusaasira” nikimanyisa “okukiriza” nari “okwekorera.” Yehova ari nk’omushaija w’amaani maingi orikukiriza omugugu gw’ekibi akagwiha aha mabega gaitu akagwekorera akagutwara.
‘Okansaasira’ (Zab. 32:5)
6. Yehova naatwara ebibi byaitu hare munonga kwingana ki?
6 Eky’okureeberaho ekindi eki Baibuli erikukoresa nikyoreka ahu Yehova arikutwara ebibi byaitu. Zaaburi 103:12 neegira eti: “Nk’oburugwa-izooba oku eri hare n’oburengyerwa-izooba, nikwo atwaire atyo hare eby’okushiisha byaitu.” Burugwa-izooba eri ahare munonga na burengyerwa-izooba. Embaju zombi tizirikubaasa kubugana. Ekirikumanyisa ngu Yehova naatwara ebibi byaitu hare munonga naitwe. Ekyo nikituhamiza ngu Yehova naatusaasirira kimwe.
“Nk’oburugwa-izooba oku eri hare n’oburengyerwa-izooba” (Zab. 103:12)
7. Baibuli neeshoboorora eta eki Yehova arikukorera ebibi byaitu? (Miika 7:18, 19)
7 N’obu Yehova araabe naatwara ebibi byaitu hare munonga naitwe, tarikuguma abyekoreire. Omugabe Hezekia akahandiika ati: “Ebibi byangye byona obyenagire enyima.” (Isa. 38:9, 17) Ebigambo ebyo nibyoreka ngu Yehova naatwara ebibi by’abarikweteisa abitambika ahu atarikubaasa kureeba. Kandi ebigambo ebyo nibabaasa kuhandiikwa biti: “Oreeteire [ebibi byangye] kuba nk’ebitariho.” Baibuli neeyongyera kuhamisiriza enshonga egi omu ky’okureeberaho ekindi ekiri omuri Miika 7:18, 19. (Kishome.) Omu kyahandiikirwe ekyo, Yehova naagambwaho nk’orikunaga ebibi byaitu aha gati omu nyanja. Ira, kikaba kitarikubaasika kugaruka kubona ekintu ekinagirwe aha gati y’enyanja.
“Ebibi byangye byona obyenagire enyima” (Isa. 38:17)
‘Noija kunaga ebibi byaitu byona omu maizi maingi agari ahagati y’enyanja’ (Mik. 7:19)
8. Twayega ki?
8 Eby’okureeberaho ebyo, nibituhwera kumanya ngu Yehova yaatusaasira, naaba atwihireho omugugu gw’ebibi byaitu. Buzima, nk’oku Daudi yaagizire, “baine [okushemererwa] abasaasiirwe eby’okushiisha byabo, n’ebibi byabo bikashwekwa. Aine [okushemererwa] omuntu ou [Yehova] ataribarira kibi.” (Rom. 4:7, 8) Okwo nikwo kusaasira okwabuzima!
YEHOVA NAASIIMUURA EKIBI
9. Ni by’okureeberaho ki ebi Yehova arikukoresa kushoboorora okusaasira kwe?
9 Yehova naakoresa eby’okureeberaho ebindi kutuhwera kwetegyereza oku arikusiimuura ebibi by’abarikweteisa arikwihirira aha kitambo. Yehova naagambwaho nk’orikwozya, kandi akabanyumunguzaho ebibi. Eki nikireetera omusiisi kuba orikwera. (Zab. 51:7; Isa. 4:4; Yer. 33:8) Yehova naagamba ekirikurugamu ati: ‘Ebibi byanyu n’obu biraabe nibitukura nka karari, nibiija kwera nk’orubaare, n’obu biraabe nibitukura tuku-tuku, nibiija kuba nk’ebyoya by’entaama ebirikwera.’ (Isa. 1:18) Kigumire munonga kwiha omu mwenda eibara rya karari nari eririkutukura. Kwonka, Yehova naatuhamiza omu ky’okureeberaho ekyo ngu ebibi byaitu nibibaasa kwogibwa byere bibe bitakireebeka.
‘Ebibi byanyu n’obu biraabe nibitukura nka karari, nibiija kwera nk’orubaare’ (Isa. 1:18)
10. Ni by’okureeberaho ki ebindi ebi Yehova arikukoresa kworeka okusaasira kwe?
10 Nk’oku kirikworekwa omu kicweka eky’enyima, ebibi nibigyeragyeranisibwa “n’amabanja.” (Mat. 6:12; Luk. 11:4) N’ahabw’ekyo buri murundi ogu turikucumura ahari Yehova, nituba turi nk’abarikwongyera aha eibanja. Ka twine eibanja rihango munonga! Kwonka Yehova ku arikutusaasira, naaba ari nk’orikushazamu eibanja ryaitu. Tarikutushaba kushashurira ebibi ebi yaaherize kutusaasira. Buzima ekyo ka n’eky’okureeberaho kirungi ekirikworeka oku turikwehurira gye Yehova yaatusaasira!
“Otusaasire amabanja gaitu” (Mat. 6:12)
11. Baibuli neemanyisa ki yaagira ngu ebibi byaitu ‘nibiragazibwa’? (Ebyakozirwe 3:19)
11 Yehova tarikushazamu eibanja ryaitu nari ebibi byaitu kyonka, kureka naabiragaza. (Shoma Ebyakozirwe 3:19.) Eibanja ryashazibwamu nooba nooshusha ngu baataho enyuguta mpango eya X aha nyuguta z’eibanja ryawe. Kwonka enyuguta ezo niziba nizikireebeka. Kwonka okuragaza ekintu nikutaana n’okushazamu. Kubaasa kwetegyereza eky’okureeberaho ekyo, twine kwijuka ngu ira bwino eyaabaire neekoresibwa ekaba erimu carbon, gaamu, n’amaizi. Omuntu akaba naabaasa kukoresa ekyangu ekirimu amaizi kuragaza ebihandiikirwe. N’ahabw’ekyo eibanja ku ryabaire ‘riragazibwa,’ rikaba rihweraho kimwe. Tihaine ekyabaire kiguma nikireebeka. Okaba nooshusha ngu eibanja eryo tirikiriho. Ka nikitureetera kwehurira gye kumanya ngu Yehova tarikushazamu ebibi byaitu kyonka, kureka naabiragariza kimwe!—Zab. 51:9.
“Ebibi byanyu biragazibwe” (Byak. 3:19)
12. Eky’okureeberaho ky’ekicu nitukyegyeraho ki?
12 Yehova naakoresa eky’okureeberaho ekindi kworeka oku arikuragaza ebibi. Naagira ati: “Nkwerwireho ebicumuro byawe nk’ekicu, n’ebibi byawe nk’oruho.” (Isa. 44:22) Yehova ku arikusaasira naaba ari nk’orikukoresa oruho kushweka ebibi, kugira ngu bitagaruka kureebeka.
“Nkwerwireho ebicumuro byawe nk’ekicu” (Isa. 44:22)
13. Nitwehurira tuta Yehova yaatusaasira ebibi byaitu?
13 Ekyo nitukyegyeraho ki? Yehova yaatusaasira ebibi byaitu, titwine kuguma nituteekateeka ngu nituza kuguma n’eibara ry’ekibi ekyo ebiro byona. Ahabw’eshagama ya Yesu Kristo, amabanja gaitu nigashashurirwa kimwe. Nooba nooshusha ngu titukakoraga ekibi. Oku nikwo turikugasirwa omu kusaasira kwa Yehova okwabuzima twayeteisa ebibi byaitu.
YEHOVA NAAGARURAHO ENKORAGANA NUNGI
Okusaasira kwa Tataitwe ow’omu iguru nikutubaasisa kugaruka kugira enkoragana nungi nawe (Reeba akacweka 14)
14. Ahabw’enki nitubaasa kugira obwesigye omu kusaasira kwa Yehova? (Reeba n’ebishushani.)
14 Okusaasira okwa Yehova okwabuzima nikutubaasisa kugira omukago murungi nawe. Eki nikituhwera kuteeshinja ekirenga. Titwine kutiina ngu Yehova abiikire enziika, kandi naasherura oburyo bw’okutufubira. Ekyo tarikubaasa kukikora. Ahabw’enki turikubaasa kugira obwesigye ngu Yehova naatusaasirira kimwe? Nabi Yeremia akajuriza ebigambo bya Yehova arikugira ati: ‘Ninyija kubasaasira eby’okushiisha byabo, n’ekibi kyabo tindikiijuka bundi.’ (Yer. 31:34) Entumwa Paulo nawe akajuriza ebigambo nibyo bimwe. (Heb. 8:12) Kwonka ekyo buzima nikimanyisa ki?
“N’ekibi kyabo tindikiijuka bundi” (Yer. 31:34)
15. Yehova tarikwijuka ebibi byaitu mu muringo ki?
15 Omu Baibuli, ebigambo “tindibiijuka bundi” obumwe tibirikumanyisa omuntu okwijuka ekintu nari kukiteekateekaho. Kureka, nibibaasa kutwariramu okugira ekyakorwa. Enkozi y’ebibi owaabaire ahanikirwe aha muti haihi na Yesu akamweshengyereza ati: “Yesu, ku oriija omu Bukama bwawe, onyijukye.” (Luk. 23:42, 43) Akaba atarikumugambira kumwijuka kyonka. Ebi Yesu yaagambiire enkozi y’ebibi bikooreka ngu akaba naija kumuzoora. N’ahabw’ekyo, Yehova ku arikugira ngu taraije kwijuka ebibi byaitu, nikyoreka ngu omu biro by’omumaisho taraatufubire ahabw’ebibi ebi yaatusaasiire.
16. Baibuli neekoresa ky’okureeberaho ki kworeka obusingye obu turikugira ahabw’okusaasirwa okwabuzima?
16 Baibuli neekoresa eby’okureeberaho ebindi kutuhwera kwetegyereza obusingye obu turikugira ahabw’okusaasirwa okwabuzima. Ahabw’embeera yaitu y’obutahikiirira, turi ‘nk’abahuuku b’ekibi.’ Kwonka ahabw’okusaasira kwa Yehova, turi nk’abahuuku ‘abacungwirwe okuruga omu butegyeki bw’ekibi.’ (Rom. 6:17, 18; Kush. 1:5) Buzima, okusaasira kwa Yehova nikutureetera kwehurira gye ahabw’okumanya ngu tucungwirwe kuruga omu bukwatwa.
‘Mukacungurwa kuruga omu butegyeki bw’ekibi’ (Rom. 6:18)
17. Nitukira mu muringo ki ahabw’okusaasirwa? (Isaaya 53:5)
17 Shoma Isaaya 53:5. Eky’okureeberaho ky’aha muheru nikitugyeragyeranisa n’abantu abarwaire endwara erikwita. Ahabw’okugira ngu Yehova akahayo Omwana we nk’ekitambo, nitugambwaho omu muringo gw’akamanyiso nk’abarikukizibwa. (1 Pet. 2:24) Ekitambo nikitubaasisa kugaruka kugira omukago murungi na Yehova, ogwasiisirwe ekibi. Nk’oku omuntu okizire endwara y’amaani arikwehurira gye, naitwe nitushemererwa twakira omu by’omwoyo, kandi tukagaruka kusiimwa Yehova ahabw’okutusaasira.
“Emihiririzi ye niyo etukiza” (Isa. 53:5)
OKU TURIKUKWATWAHO OKUSAASIRA KWA YEHOVA
18. Twayega ki bwanyima y’okushwijuma eby’okureeberaho by’omu Baibuli bitari bimwe ebirikukwata aha kusaasira kwa Yehova? (Reeba n’akabokusi “Oku Yehova Arikusaasira.”)
18 Twayegyera ki aha eby’okureeberaho ebi Baibuli erikukoresa ebirikugamba aha kusaasira kwa Yehova? Ku arikutusaasira, naatusaasirira kimwe. Ekyo nikitubaasisa kugira enkoragana nungi na Tataitwe ow’omu iguru. Kandi, twine kwijuka ngu okusaasira okwabuzima n’ekiconco eki Yehova arikutuha ahabwa rukundo ye n’embabazi ezitatushemereire, ezi arikugirira abantu abasiisi.—Rom. 3:24.
19. (a) Ahabw’enki twine okushemererwa? (Abarooma 4:8) (b) Nituza kugamba ahari ki omu kicweka ekirikukurataho?
19 Shoma Abarooma 4:8. Twine okushemererwa ahabw’okugira ngu Yehova ni Ruhanga ‘w’okusaasirwa’ okwabuzima. (Zab. 130:4) Kwonka, kubaasa kusaasirwa hariho ekintu kikuru eki twine kukora. Yesu akagira ati: “Ku muriba mutarikusaasira bantu eby’okushiisha byabo, naimwe Shoimwe taribasaasira by’okushiisha byanyu.” (Mat. 6:14, 15) N’ahabw’ekyo, ni kikuru kutooreza Yehova tukasaasira abandi. Kwonka ekyo nitubaasa kukikora tuta? Ekicweka ekirikukurataho nikyoreka oku turikubaasa kukikora.
EKYESHONGORO 46 Nitukwebaza Yehova
a Ebyahandiikirwe by’Oruheburaayo nibikoresa ekigambo “okusaasira,” ekirikumanyisa ngu n’obu haraabe hariho emiringo endiijo y’okusaasira, hariho okusaasira kumwe okwabuzima. Envunuura nyingi za Baibuli tizirikworeka entaaniso egyo, kwonka Baibuli eya New World Translation of the Holy Scriptures neeyoreka entaaniso egyo, omu Zaaburi 130:4.
