ORAGIZIREHO oburemeezi okateekateeka ngu oine kubwemera wenka? Turi omu “ebiro by’akabi kaingi” ebirikutureetera kwetamwa n’okweshoroora aha bandi. (2 Tim. 3:1) Kwonka, titwine kwemera oburemeezi ahabwaitu twenka. Baibuli neeyoreka obukuru bw’okugira abanywani abaabuzima omu bwire bw’obusaasi.—Enf. 17:17.

Abanywani abu entumwa Paulo yaabaire aine bakamuhwera munonga omu buheereza bwe bw’obumiisani. (Kol. 4:​7-11) Obu Paulo yaabaire akomiirwe Rooma, banywani be bakamuhwera kuhikiiriza emirimo ei yaabaire atarikubaasa kukora. Nk’eky’okureeberaho, Epafura, akamureetera ebintu ebyabaire nibyetengyesa ebi ab’eishe-emwe na banyaanyazi-itwe kuruga Filipi baamwoherereize. (Fil. 4:18) Tutiko akatwara ebaruha za Paulo omu bibiina bitari bimwe. (Kol. 4:7) Paulo arikuhwerwa banywani be, akabaasa kuhikiiriza obuheereza bwe obu yaabaire akomiirwe omu nju, n’obu yaabaire atairwe omu kihome wenka. Noobaasa kuhinduka ota omunywani owaabuzima?

Eby’okureeberaho by’obunaku obu nibyoreka obukuru bw’okuba omunywani owaabuzima. Yetegyereze oku munyaanyazi-itwe yaayorekire ngu n’omunywani owaabuzima ahari Elisabet, payoniya omuri Spain. Nyina ku yaashangirwe aine endwara y’ekookoro, munyaanyazi-itwe akooherereza Elisabet obutumwa oburikugumya kuruga omu Baibuli. Elisabet naagira ati: “Obutumwa obwo bukampwera kugira amaani g’okuraba omu izooba nteehuriire nk’ori wenka.”—Enf. 18:24.

Nitubaasa kuhamya omukago gwaitu n’Abakristaayo bagyenzi baitu turikubashagika omu mirimo y’ekibiina. Nk’eky’okureeberaho, mbwenu shi noobaasa kwehayo kutwara munyaanyazi-itwe nari ow’eishe-emwe okuzire omu nteerane, n’omu buheereza? Waakora otyo, nimubaasa kutunga omugisha gw’okugumyana. (Rom. 1:12) Kwonka, Abakristaayo abamwe tibarikubaasa kuruga omu maka gaabo. Nitubaasa kworeka tuta ngu turi banywani baabo abaabuzima?

Abakristaayo abamwe baine amagara mabi, n’embeera ezirikubaremesa kuza omu nteerane butunu. Teekateeka aha ky’okureeberaho kya David, owaashangirwe aine ekookoro y’enturugunyu. Akamara ameezi agarikurenga mukaaga, arikutunga obujanjabi bw’endwara egyo. Obwire obu David yaamazire naaragurirwa, akaba abaho omu nteerane n’omukazi we Lidia barikukoresa esimu.

Ni buhwezi ki obu baatungire kuruga ahari banywani baabo omu kibiina? Bwanyima ya buri ruteerane kuhwa, bamwe aha baabaire baba bari  aha Kyombeko ky’Obukama bakaba bateeraho kugamba na David na Lidia barikukoresa vidiyo. Kwongyera ahari ekyo, David na Lidia ku baabaire baha eby’okugarukamu, Abakristaayo bagyenzi baabo bakaba baboherereza obutumwa aha simu bari kubasiima. Niki ekyarugiremu? David na Lidia tibaragizire eihamba ringi.

Nitubaasa kwejumba omu buheereza n’abatarikubaasa kuruga omu ka? Twakora empinduka nkye omu mbeera zaitu, nitubaasa kworeka ngu nitwijuka abaine oburemeezi nk’obwo. (Enf. 3:27) Ahabw’enki otarikutaho obwire bw’okubuurira nabo murikuhandiika amabaruha nari murikuteera esimu? Abatarikubaasa kuruga omu ka nibabaasa kuba aha nteerane z’okuza kubuurira kurabira aha simu. David na Lidia bakasiima entebeekanisa egyo. David naashoboorora ati: “Okwegaita aha guruupu yaitu y’okubuurira kandi tukashaba nabo, kikatugaruramu amaani.” Ekindi, embeera zaaba nizikubasiisa kandi kirikukworobera kukikora, ahabw’enki otarikukora entebeekanisa y’okuguma nooreeta omwegi wa Baibuli omuka y’Omukristaayo otarikubaasa kuruga omu ka okaba niyo waamwegyeseza?

Twakora n’ab’eishe-emwe na banyaanyazi-itwe abatarikubaasa kuruga omu ka kandi tukareeba emitwarize yaabo mirungi, nikituhwera kwongyera kubairira haihi. Nk’eky’okureeberaho, waaza omu buheereza n’ababuurizi nk’abo okareeba oku barikukoresa gye Ekigambo kya Ruhanga kuhika omuntu aha mutima, noobaasa kuhurira waayendera kimwe kuba munywani waabo. Waashagika Abakristaayo bagyenzi baitu omu mirimo y’eby’omwoyo, noobaasa kwongyera aha banywani abu aine.—2 Kor. 6:13.

Paulo akatunga okuhuumurizibwa, munywani we Tito ku yaizire kumureeba. (2 Kor. 7:​5-7) Ekyo nikitwijutsya ngu nitubaasa kuhuumuriza ab’eishe-emwe na banyaanyazi-itwe turikubagirira esaasi, turikumara obwiire nabo, kandi tukakora kyona eki turikubaasa kubashagika.—1 Yoh. 3:18.

Ab’eishe-emwe na banyaanyazi-itwe omuri Russia bataireho eky’okureeberaho kirungi ky’okushagika ab’eishe-emwe bagyenzi baabo. Teekateeka aha kyahikire ahari Sergey n’omukazi we, Tatyana. Abaserukare ku baaherize kucaaka enju yaabo, bakabatwara kubabuuza ebibuuzo. Tatyana niwe baabandize kurekura yaagaruka omu ka. Sergey akagira ati: “Tatyana ku yaahikire ati omu ka, munyaanyazi-itwe omwe emanzi akaija kumureeba. Banywani baitu abandi bakaija baatuhwera kugaruza enju yaitu omu buteeka.”

Sergey naayongyeraho ati: “Ntwire ninkunda Enfumu 17:​17, aharikugira hati: “Munywani w’omuntu amukunda ebiro byona, kandi ow’eishe-emwe azaarirwa okuhwera abantu omu bihikiirizi.” Nyongyeire kwetegyereza amakuru g’ebigambo ebyo omu bwire bw’okuhiiganisibwa obu mbaire ninyetenga obuhwezi bw’abandi kubaasa kugumisiriza. Yehova ampaire abanywani emanzi ababaasize kuguma naanye.” a

Nitwenda abanywani abaraatuhwere, obu embeera zirikwongyera kuba mbi. Kandi nitwija kubeetengyera kimwe omu kubonabona kwingi. N’ahabw’ekyo, ka tuteereho nk’oku turikubaasa kuba abanywani abaabuzima hati!—1 Pet. 4:​7, 8.