Tata na Maawe bakaba bari abakaturiki enkomba. Kwonka ku baayegire omu Baibuli ngu eiziina rya Ruhanga ni Yehova, bombi bakahinduka Abajurizi ba Yehova abeeziriki. Tata akarekyera aho kubaija ebishushani bya Yesu. Omu mwanya gw’ekyo, akakoresa obukugu bwe obw’okubaija kuhindura ah’okubandiza omuri kaanyina yaitu kuba Ekyombeko ky’Obukama eky’okubanza omuri San Juan del Monte, haihi na Manila, orurembo rukuru orwa Philippines.

Ku naaherize kuzaarwa omuri 1952, abazaire bangye bakatandika kunyegyesa eby’omwoyo ndi na bakuru bangye bana na banyaanyazi bashatu. Omu kukura kwangye, tata akaba ampiga kushoma eshuura emwe ya Baibuli buri izooba, kandi akanyegyesa ebitabo bingi by’ekibiina. Obumwe, abazaire bangye bakaba beeta abareeberezi ba saketi n’abarikujwekyera ofiisi y’eitaagi kutaayaaya omuka. Twena nk’eka tukaba tutunga okushemererwa, tugumibwa eby’okureeberaho ebi ab’eishe-emwe abo baabaire batugambira, kandi ekyo kikatuhiga kwebembeza okuheereza Yehova.

Abazaire bangye nkabeegyeraho bingi ebirikukwata aha kwikiriza. Maawe omukundwa ku yaafiire ahabw’okurwara, nyowe na tata tukaba baapayoniya omuri 1971. Kwonka omuri 1973 obu naabaire nyine emyaka 20, tata nawe akafa. Okufeerwa abazaire bangye bombi, kikaandeetera kwehurira nk’otsigaize busha kandi nk’ori wenka. Kwonka amatsiko agari omu Baibuli ‘agahamire kandi agatarikunyiganyigibwa’ gakampwera kuguma mpami omu by’omwoyo n’omu nyehurira. (Heb. 6:19) Bwanyima y’obwire bukye tata aherize kufa, nkaikiriza kuheereza nka payoniya ow’omutaano aha kirwa ekyehereire ekya Coron omu kyanga kya Palawan.

Obu naaza Coron nkaba nyine emyaka 21. Ahabw’okugira ngu nkaba nkuriire omu rurembo, nkatangaara ku naamanyire ngu aha kirwa ekyo amaju agarimu amashanyarazi n’amaizi ni makye, kandi ngu n’ebiiruka ni bikye. N’obu haabaire hariho ab’eishe-emwe bakye aha kirwa ekyo, nkaba  ntaine payoniya w’okubuurira nawe. N’ahabw’ekyo obumwe nkaba mbuurira nyenka. Omu kwezi okwabandize, nkagirira orushusho ab’eka yaitu n’abanywani bangye. Omu kiro, nkaba ndaanzya ahaiguru ndeeba enyonyoozi obwo ndikurira. Nkaba nimpurira ndikwenda kureka obuheereza bwangye ngu ngaruke omuka.

Ku naabaire ngira enyehurira ezo, nkaba ngambira Yehova buri kimwe omu kushaba. Nkaba nyijuka ebigambo ebirikugaruramu amaani ebi naabaire nshomire omu Baibuli n’ebitabo byaitu. Nkaba ninkira kuteekateeka ahari Zaaburi 19:14. Nketegyereza ngu Yehova akaba naija kuba ‘Orukiri rwangye, kandi Omucunguzi wangye,’ naaguma ninteekateeka aha bintu ebirikumushemeza, nk’emirimo ye n’emitwarize ye. Ekicweka ky’Omunaara gw’Omurinzi “You Are Never Alone” a kikampwera munonga. Nkakishoma emirundi mingi. Omu bwire obwo nkehurira nk’ori na Yehova wenka, kandi ekyo kikambaasisa kutunga omugisha gw’okushaba, kweyegyesa, n’okuteekateeka.

Bwanyima y’obwire bukye mperize kuhika Coron, nkatooranwa kuba omureeberezi. Ahabw’okugira ngu niinye naabaire ndi omureeberezi wenka, nkatandika kwebembera Eishomero ry’Obuheereza, Oruteerane rw’Obuheereza, Okwega Ekitabo okw’Ekibiina, hamwe n’okwega Omunaara gw’Omurinzi. Kandi nkaba mpa orubazo rwa boona buri saabiiti. N’ahabw’ekyo nkaba ntakiine bwire bw’okugira eihamba!

Okubuurira omuri Coron kukarugamu ebirungi, kandi bamwe aha bu naayegyeise Baibuli bakabatizibwa. Kwonka nabwo nkaba mpikwaho embeera zigumire. Obumwe, nkaba mba nyine kumara ekicweka ky’eizooba ndikugyenda aha bigyere kuhika omu kicweka ky’okubuuriramu, obwo ntarikumanya ahu ndaraare naahikayo. Ekicweka eky’okubuuriramu eky’ekibiina kyaitu kikaba nikitwariramu n’ebirwa bitari bihango, kandi bingi. Kaingi nkaba ngyendera omu ryato rya ingini aha nyanja eziriho eihunga kubaasa kuhikayo, n’obu ndaabe naabaire ntarikumanya kuziha! Omu mbeera ezo zoona, Yehova akaba andinda kandi andeeberera. Bwanyima, nketegyereza ngu Yehova akaba naantebeekanisa kuraba omu mbeera ezigumire munonga, omu buheereza bwangye obwakuratsireho.

Omuri 1978, nkooherezibwa Papua New Guinea, bukiizi bwa bumosho bwa Australia. Papua New Guinea n’eihanga ry’enshozi. Nkatangaara kumanya ngu abantu nk’obukaikuru bushatu nibagamba endimi ezirikurenga 800. Ekirungi, baingi bakaba nibabaasa kugamba orurimi rwa Melanesian Pidgin, orurikumanywa nka Tok Pisin.

Nkashabwa kuza omu kibiina ekyabaire nikikoresa Orungyereza omu rurembo orukuru, Port Moresby. Kwonka bwanyima nkaza omu kibiina ekyabaire nikikoresa Tok Pisin, kandi nkatandika kwegyesibwa orurimi orwo. Omu kubuurira, nkaba nkoresa ebi naabaire niinyega. Ekyo kikampwera kwega orurimi juba. Omu bwire bukye, nkabaasa kuha orubazo rwa boona omu rurimi rwa Tok Pisin. Bwanyima y’omwaka gumwe mperize kuhika Papua New Guinea, nkashabwa kuheereza nk’omureeberezi wa saketi omu byanga bingi ebirimu ebibiina ebirikukoresa Tok Pisin.

Ahabw’okugira ngu ebibiina bikaba bitahikaine, nkaba nyine kutebeekanisa enteerane empango nyingi eza saketi, kandi nkaba ngyenda munonga.  Omu kubanza, nkehurira nk’ori wenka omu mbeera egi ei naabaire ntamanyiriire, nk’okuba omu ihanga risya, orurimi rusya, n’entwaza nsya. Nkaba ntarikubaasa kugyendera aha nguuto kutayaayaayira ebibiina ahakuba omwanya ogwo gukaba guri ogw’enshozi kandi hatatereire. N’ahabw’ekyo nkaba nyine kugyendera omu nyonyi haihi buri saabiiti. Obumwe, niinye naabaire mba ndi omushabaazi nyenka omu nyonyi nkye erikutetema eya ingini emwe. Engyendo nk’ezo zikaba nizeerarikiriza nk’okugyendera omu ryato!

Abantu bakye nibo baabaire baine amasimu, n’ahabw’ekyo nkaba mpurizana n’ebibiina ndikukoresa amabaruha. Obwire obwingi, nkaba mpikayo amabaruha gangye gatakahikireyo, n’ahabw’ekyo nkaba mbuuza abantu b’omu kicweka ekyo kunyoreka ab’eishe-emwe. Buri murundi ogu naabaire mbona ab’eishe-emwe, bakaba banyakiira na rukundo, kandi ekyo kikaba kindeetera kushemererwa. Nkareeba obushagiki bwa Yehova omu miringo mingi, kandi omukago gwangye nawe gukongyera kuhama.

Aha ruteerane rwangye rw’okubanza aha kirwa Bougainville, omushaija n’omukazi we bakampikaho bashemereirwe bambuuza bati: “Nootwijuka?” Nkaijuka ngu nkababuurira obu naaza omuri Port Moresby omurundi gw’okubanza. Niinye naabandize kubeegyesa Baibuli ntakabahaire ow’eishe-emwe ow’omu kicweka ekyo. Bombi hati bakaba babatiziibwe! Ogwo ni gumwe aha migisha ei naatungire omu myaka eshatu ei naamazire omuri Papua New Guinea.

Ntakarugire Coron omuri 1978, nkabugana Adel, munyaanyazi-itwe murungi, kandi orikwefeerereza. Omu bwire obwo, akaba ari payoniya ow’obutwire arikworora abaana be babiri, Samuel na Shirley. Kandi, akaba naareeberera nyina owaabaire akuzire. Omuri Mei 1981, nkagaruka Philippines kutaaha omu bushwere na Adel. Ku twaherize kugaitwa, tukaba baapayoniya ab’obutwire kandi twareeberera hamwe eka.

N’obu twabaire twine eka, omuri 1983 nkagaruka naatooranwa kuba payoniya ow’omutaano aha kirwa Linapacan, omu kyanga kya Palawan. Eka yoona tukaza omu kicweka ekyo ekyehereire. Bwanyima y’omwaka gumwe, nyina wa Adel akafa. Kwonka, okwejumbira kimwe omu buheereza kikatuhwera kugumisiriza amaganya. Tukatunga abeegi baingi ba Baibuli abarikutunguuka omuri Linapacan, kandi omu bwire bukye tukaba nitwetenga Ekyombeko ky’Obukama kikye. N’ahabw’ekyo tukakyombeka. Bwanyima y’emyaka eshatu yonka, tukashemererwa kureeba abantu 110 abaizire aha kiijutsyo, kandi baingi aharibo bakatunguuka baabatizibwa twarugireyo.

Omuri 1986, nkashabwa kuza aha kirwa Culion, kandi okwo hakaba hariyo abarwaire b’ebibembe. Bwanyima, Adel nawe akatooranwa kuba payoniya ow’omutaano. Omu kubanza, tukaba nitutiina kubuurira abantu abaabaire bamugiibwe ebibembe. Kwonka ab’eishe-emwe baayo bakatuhamiza ngu abaabaire baine endwara egi bakaba baatungire obujanjabi, n’ahabw’ekyo kikaba kigumire kuturira abandi. Bamwe aha barwaire abo bakaba baza  omu nteerane omu ka ya munyaanyazi-itwe. Omu bwire bukye tukamanyiira kandi twatandika kubuurira abantu abo abaabaire nibeereeba nk’abarikwangwa Ruhanga n’abantu. Kikaba nikishemeza kureeba abantu abaabaire barwaire munonga bashemereirwe ahabw’amatsiko g’okwija kutunga amagara marungi omu biro by’omumaisho.—Luk. 5:​12, 13.

Abaana baitu bakamanyiira bata embeera omuri Culion? Nyowe na Adel tukeeta banyaanyazi-itwe abato babiri kuruga Coron kutwegaitaho kugira ngu abaana baitu batungye emikago mirungi. Samuel, Shirley, na banyaanyazi-itwe abo babiri bakashemererwa kwejumba omu buheereza barikwegyesa abaana, nyowe na Adel turikwegyesa abazaire baabo. Nangwa hariho obu twabaire nitwegyesa amaka 11. Omu bwire bukye tukaba twine abeegi baingi ba Baibuli abarikutunguuka, ekyatubaasiise kutandikaho ekibiina kisya!

Omu kubanza niinye omureeberezi wenka owaabaire ari omu kicweka ekyo. N’ahabw’ekyo, ofiisi y’eitaagi ekanshaba kwebembera enteerane z’ababuurizi munaana omuri Culion, n’okukora nikyo kimwe ahabw’ababuurizi mwenda omu kyaro kya Marily ahu naabaire niingyendera eshaaha ishatu omu ryato. Bwanyima y’enteerane, tukaba tugyenda nk’eka omu mwanya gw’enshozi kumara eshaaha nyingi, kuza kwegyesa abeegi ba Baibuli omu kyaro Halsey.

Bwanyima, hakabaho entunguuka y’amaani omuri Marily na Halsey, kandi tukombekayo Ebyombeko by’Obukama. Omuri Linapacan, ab’eishe-emwe n’abeegi ba Baibuli bakahayo eby’okukoresa, kandi baayehayo kwombeka. Ekyombeko ky’Obukama omuri Marily kikaba nikibaasa kuzamu abantu 200, kandi kirikubaasa kuhangutsibwa kutubaasisa kugiriramu enteerane empango.

Omuri 1993, abaana baitu ku baakuzire, nyowe na Adel tukaza omu buheereza bwa saketi omuri Philippines. Reero omu 2000, nkaza omu Ishomero ry’Okutendeka Abaheereza n’Abareeberezi kutendekwa kuryegyesa. Nkaba niinyereeba nk’otashemereire obujunaanizibwa obwo, kwonka Adel akaba angumya obutoosha. Akanyijutsya ngu Yehova naaza kumpa amaani agarikwetengyesa kuhikiiriza obujunaanizibwa obusya. (Fil. 4:13) Adel  akagamba arikwihirira aha mbeera ei yaabaire naarabamu, ahabw’okuba akaba naahikiiriza obuheereza bwe n’obu araabe yaabaire aine amagara mabi.

Omu 2006 obu naabaire ninyegyesa, Adel bakamukwatamu oburwaire bwa Parkinson. Tukatunga ekyekango! Ku naagambiire Adel ngu tuhendere obuheereza bwaitu kubaasa kumureeberera, akangira ngu, “nyabura ‘we ntungira omushaho orikubaasa kumpwera aha burwaire bwangye, niimanya ngu Yehova naija kutuhwera kugumizamu.” Emyaka mukaaga eyakuratsireho, Adel akagumizamu naaheereza Yehova atarikwetomboita. Obu yaabaire atakibaasa kugyenda, akaba abuurira ashutami omu kagaari ke. Obu yaabaire atakibaasa kugamba munonga, akaba agarukamu omu kigambo kimwe nari bibiri omu nteerane. Adel butoosha akaba atunga obutumwa bw’okumusiima ahabw’okuba eky’okureeberaho kirungi ky’okugumisiriza kuhitsya obu yaafa omu 2013. Nkaba mmazire emyaka erikurenga 30 ndi n’omukundwa wangye omwesigwa kandi oine rukundo, n’ahabw’ekyo ku yaafiire, nkagaruka naarengwa amaganya n’eihamba.

Adel akaba naayenda ngu ngumizemu omu buheereza bwangye, kandi nikyo naakozire. Nkateeraho kugira bingi by’okukora, ekyampweraire kwemera eihamba. Kuruga 2014 kuhika 2017, nkashabwa kutaayaayira ebibiina ebirikugamba orurimi rwa Tagalog omu mahanga ahu omurimo gwaitu gwabaire guzibiirwe. Bwanyima, nkataayaayira ebibiina ebirikukoresa Tagalog omuri Taiwan, United States, na Canada. Omu 2019, nkeegyesa Amashomero g’Ababuurizi b’Obukama agarikukoresa Orungyereza omuri India na Thailand. Ntungire okushemererwa kwingi omu bujunaanizibwa obwo. Ninshemererwa munonga naaba nyine bingi by’okukora omu buheereza bwa Yehova.

Nyongyeire kukunda ab’eishe-emwe na banyaanyazi-itwe abu ndikubugana naatunga obuheereza busya, kandi okubasigaho nikiba kitoorobi. Omu mbeera nk’ezo, nyegire kwesigira kimwe Yehova. Butoosha ndeebire oku arikunshagika, kandi ampweraire kwikiriza empinduka zoona ezirikubaho n’omutima gwangye gwona. Hati, ndi payoniya ow’omutaano omuri Philippines. Mbaasize kumanyiira ekibiina kyangye ekisya, ekirimu ab’eishe-emwe abarikunshagika kandi bakanfaho. Ninshemererwa kureeba Samuel na Shirley barikutooreza okwikiriza kwa nyinabo.—3 Yoh. 4.

Buzima, ntungire oburemeezi bwingi otwariiremu n’okureeba omukazi wangye omukundwa arikubonabona, kandi arikufa ahabw’endwara y’amaani. Kwonka nabwo nyegire kumanyiira embeera nyingi ensya. Mbaasize kureeba ngu Yehova ‘tari hare n’omuntu weena omuriitwe.’ (Byak. 17:27) Omukono gwa Yehova ‘ti mugufu’ gw’okutashagika n’okugumya abaheereza be n’obu bakuba bari omu myanya eyehereire. (Isa. 59:1) Yehova, Orukiri rwangye, atwiire ari hamwe naanye kandi ekyo ninkimusiimira. Tinkabaga nyenka.