WAAYETEGYEREIZE ngu abantu baingi omu nsi nibateekateeka ngu baine kugira ebi baaheebwa nari kutwarizibwa omu muringo gw’omutaano? N’obu baakuheebwa ebintu birikwingana ki, nibaba nibenda ebindi. Emiteekateekyere nk’egyo etsimbire emizi omu bantu abarikweyendeza kandi entasiima, ekirikworeka ngu turi omu biro by’emperu.—2 Tim. 3:2.

Amazima gari ngu, abantu batwire nibeeyendeza. Adamu na Haawa bakaba nibenda kwecweramu ekirungi n’ekibi, kandi ekyo kikabarugiramu akabi k’amaani. Bwanyima y’ebyasha, Omugabe Uziya owa Yuda, akaba naateekateeka ngu aine kwoterera obubaane aha hekalu, kwonka ekyo kikaba kigwire. (2 Bus. 26:​18, 19) Nikyo kimwe, Abafarisaayo n’Abasadukaayo bakaba nibateekateeka ngu Ruhanga aine kubatwariza omu muringo gw’omutaano ahabw’okugira ngu bakaba bari baijukuru ba Abrahamu.—Mat. 3:9.

Twetooroirwe abantu abarikweyendeza, abarikwetunguura, kandi emitwarize yaabo neebaasa kutukwataho. (Gal. 5:26) Nitubaasa kutandika kuteekateeka ngu tushemereire kugira ebi twaheebwa, nari kutwarizibwa omu muringo gw’omutaano. Nitubaasa kwetantara tuta emiteekateekyere egyo? Twine kubanza kureeba enshonga nk’oku Yehova arikuzireeba. Emisingye ebiri ya Baibuli neeza kutuhwera.

Yehova niwe arikucwamu eki buri omwe aine kuheebwa. Yetegyereze bimwe aha by’okureeberaho ebi.

•   Omu ntebeekanisa y’eka, omushaija aine kuhurira ngu omukazi we naamuha ekitiinisa, kandi omukazi nawe akeehurira ngu naakundwa iba. (Efe. 5:33) Abari omu bushwere baine kugirirana enyehurira z’omutaano. (1 Kor. 7:3) Abaana nibahigwa kworobera abazaire baabo, kandi abazaire baine kukunda abaana baabo, bakabareeberera.—2 Kor. 12:14; Efe. 6:2.

• Omu kibiina, abareeberezi abarikukora munonga bashemereire kuheebwa ekitiinisa. (1 Tes. 5:12) Kwonka, tibaine kutegyekyesa eikama ab’eishe-emwe na banyaanyazi-itwe.—1 Pet. 5:​2, 3.

• Ruhanga ahaire gavumenti z’abantu obugabe bw’okushorooza emishoro, n’okuheebwa ekitiinisa abantu abari ahansi y’obushoboorozi bwazo.—Rom. 13:​1, 6, 7.

Yehova naatuha ebirikukira ebitushemereire. Ahabw’okugira ngu turi abasiisi, tushemereire kufa. (Rom. 6:23) Kwonka Yehova naatuha emigisha mingi ahabwa rukundo ye etarikuhinduka. (Zab. 103:​10, 11) Naatuha emigisha n’ebiconco ahabw’embabazi ze ezitatushemereire.—Rom. 12:​6-8; Efe. 2:8.

Yegyendesereze emiteekateekyere y’ensi. Nitubaasa kutandika kuteekateeka ngu tushemeire kugira bingi ebirikukira eby’abandi tutakimanyire. Yesu akooreka oku kyorobi kugira emiteekateekyere nk’egyo obu yaakoresa eky’okureeberaho ky’abakozi abaashashwirwe edenaari. Abakozi abamwe bakatandika kukora akasheeshe kare munonga, kandi baamara eizooba ryona barikuteerwa omushana, kwonka abandi baakoraho eshaaha emwe yonka. Abakozi abaabandize bakateekateeka ngu bakaba bashemereire kushashurwa esente nyingi ahabw’omurimo ogu baabaire bakozire. (Mat. 20:​1-16) Yesu akashoboorora eky’okureeberaho ekyo, arikworeka ngu abakuratsi be bashemereire kumarwa n’eki Ruhanga arikusiima kubaha.

Ba orikusiima omu mwanya gw’okwetenga bingi. (1 Tes. 5:18) Tooreza entumwa Paulo, otarashabire ab’eishe-emwe b’omuri Korinso kumuha ebintu by’okumubaisaho n’obu araabe yaabaire ahikire kubibashaba. (1 Kor. 9:​11-14) Tushemereire kusiima buri mugisha ogurikutuheebwa, kandi tukeetantara kwetenga bingi.

 Gira obucureezi. Omuntu ku arikweteekateekaho munonga, naakira kutandika kwereeba nk’oshemereire kutunga ebirikukira ebi aine. Obucureezi nibutuhwera kwetantara emiteekateekyere nk’egyo.

Nabi Danieli akataho eky’okureeberaho kirungi ky’okuba omucureezi. Eka ei yaabaire naarugamu, endeebeka ye, obwengye bwe, n’okubaasa kwe bikaba nibibaasa kumureetera kuteekateeka ngu kikaba kimushemereire kutwarizibwa omu muringo gw’omutaano n’okuheebwa ebi yaatungire. (Dan. 1:​3, 4, 19, 20) Kwonka Danieli akaguma ari omucureezi, kandi omutwarize ogwo gukamureetera kuba ow’omuhendo munonga ahari Yehova.—Dan. 2:30; 10:​11, 12.

Ka tuteereho kwangira omuze gw’okweyendeza n’okwetunguura, oguhangire omu nsi ebiro ebi. Omu mwanya gw’ekyo, ka tugume nitwesiimira buri mugisha ogu Yehova arikutuha ahabw’embabazi ze ezitatushemereire.