Yehova Naakufaho
AHABW’ENKI noobaasa kuhamya ngu ebigambo ebyo bihikire, kandi ngu buzima Yehova naakufaho? Enshonga emwe n’ahabw’okugira ngu Baibuli nikyo erikugamba. Ebiri omu 1 Petero 5:7 nibigira biti: ‘Mumwegyekyerere okushoberwa kwanyu kwona, ahabw’okuba naabataho omutima.’ Ni buhame ki obu oine oburikworeka ngu Yehova Ruhanga naakufaho?
RUHANGA NAAHA ABANTU EBI BARIKWETENGA
Yehova ataireho eky’okureeberaho, eky’embabazi n’okugaba
Buzima, Ruhanga aine emitwarize ei orikwenda ngu banywani baawe babe baine. Abo abarikutwarizana omu muringo gw’embabazi kandi bakagirirana obufura nibakira kukundanira kimwe. Yehova aine embabazi kandi naayoreka abantu obufura buri izooba. Yetegyereze eky’okureeberaho kimwe eki: “Eizooba rye arijwisiza ababi n’abarungi, kandi agwisiza enjura abahikiriire n’abatahikiriire.” (Mat. 5:45) Mbwenu shi enjura n’omushana biine mugasho ki? Oyihireho emigasho endiijo, Ruhanga ‘naahaazya abantu n’eby’okurya, naijuza emitima yaabo okushemererwa’ arikugwisa enjura n’omushana. (Ebyakozirwe 14:17) Buzima, Yehova naareetera ensi kweza eby’okurya bingi, kandi tihaine ekirikutureetera kushemererwa munonga okukira okurya eby’okurya birungi.
Mbwenu shi, ahabw’enki, abantu baingi bataine by’okurya? N’ahabw’okuba abategyeki b’abantu nibakira kuta omutima aha kugira amaani omu by’obutegyeki n’okutunga esente nyingi omu mwanya gw’okufayo kuhwera abantu. Juba Yehova naija kumaraho omururu arikureeta omu nsi gavumenti ye ey’omu iguru erikwebembwerwa Omwana we nk’Omugabe. Obwire obwo, tihaine orikwija kuburwa Zab. 37:25) Mbwenu shi ekyo tikirikworeka ngu naakufaho?
eby’okurya. Kwonka ekyo kitakabaireho, Ruhanga naareeberera abaheereza be abeesigwa. (YEHOVA NAAHA ABANTU OBWIRE BURIKUMARA
Yehova ataireho eky’okureeberaho, eky’okuha abantu obwire bwe
Munywani waawe omurungi naakuha obwire. Naabaasa kumara eshaaha nyingi arikugaaniira naiwe aha bi murikukunda. Kandi omunywani murungi naahurikiza gye waaba noomugambira oburemeezi bwawe n’ebirikukwerarikiriza. Mbwenu shi Yehova naahurikiza omu muringo nk’ogwo? Eego, buzima! Naahurikiza okushaba kwaitu. N’ahabw’ekyo, Baibuli neetuhiga ‘kugumizamu kushaba tuhamire’ kandi ‘tushabe obutoosha.’—Rom. 12:12; 1 Tes. 5:17.
Mbwenu shi Yehova ayeteekateekire kuhurira okushaba kwawe kumara bwire ki? Eky’okureeberaho ekiri omu Baibuli nikituha eky’okugarukamu. Yesu atakatooraine entumwa ze, akamara ‘ekiro kyona naashaba Ruhanga.’ (Luk. 6:12) Omu kushaba okwo, Yesu naabaasa kuba yaashwijumire baingi aha beegi be, emitwarize yaabo n’obweremwa bwabo, reero akashaba Ishe kumuhwera omu kubatoorana. Ku bwagiire kusheesha, Yesu akaba naamanya ngu atooraine abahikire gye kuba entumwa ze. Yehova “ohurira okushaba,” naakunda kuhurira okushaba okw’abo abarikumushaba baihire aha mutima. (Zab. 65:2) Omuntu n’obu yaakumara eshaaha nyingi naashaba aha kintu ekirikumwerarikiriza munonga, Yehova tarikuguma naabara obwire obu yaamara omu kushaba.
RUHANGA AYETEEKATEEKIRE KUSAASIRA
Yehova ataireho eky’okureeberaho, eky’okuba ayeteekateekire kusaasira
Ku kirikuhika aha kusaasira, nangwa n’abarikukundana nikibagumira. Obumwe, abantu nibafeerwa banywani baabo abu batwire baine ahabw’okugumirwa kubasaasira. Yehova tikwo ari atyo. Baibuli neehiga abantu b’emitima mirungi kumushaba okusaasirwa, ahakuba ‘naasaasirira kimwe.’ (Isa. 55:6, 7) Niki ekirikureetera Ruhanga kusaasirira kimwe?
N’ahabw’okuba Ruhanga aine rukundo mpango. Akakunda ensi munonga yaahika n’aha kuhayo Omwana we Yesu, kucungura abantu kuruga omu kibi n’akabi aku kyareetsire aha bantu. Yoh. 3:16) Buzima, ekitambo kiine emigasho mingi. Kurabira omu kitambo kya Kristo, Ruhanga naasaasirira kimwe abu arikukunda. Entumwa Yohaana akahandiika ati: “Ku twatura ebibi byaitu, niwe w’okwesigwa kandi ohikiriire kutusaasira ebibi.” (1 Yoh. 1:9) Ahabw’okusaasira kwa Yehova, abantu nibabaasa kuguma baine omukago murungi nawe, kandi okumanya eki nikitukwataho munonga.
(NAAKUHA OBUHWEZI WAABA NOOBWENDA
Yehova ataireho eky’okureeberaho, eky’okutuha obwire twaba nitumwenda
Munywani waawe owaabuzima naakuhwera waaba nooyenda obuhwezi. Yehova naakora nikyo kimwe? Ekigambo kye nikigira kiti: “N’obu [omwe aha muheereza wa Ruhanga] agwa, tagwera kimwe, ahakuba Mukama amuramira n’omukono gwe.” (Zab. 37:24) Yehova ‘naaramira’ abaheereza be omu miringo mingi. Yetegyereze eky’okureeberaho eki, ekyabaire aha kirwa Caribbean ekya St. Croix.
Omwishiki muto akaba naagyemeserezibwa abu arikushoma nabo ahabw’okugira ngu akaba naayanga kuteerera ebendera entamaamu. Bwanyima y’okushaba Yehova obuhwezi, akacwamu kushoboorora aha nshonga egyo. Omu kibiina akagamba aha nshonga ekwatiraine n’okuteerera ebendera entamaamu. Arikukoresa Ekitabo Kyangye eky’Ebitebyo by’Omu Baibuli, akashoboorora oku ebyahikire ahari Seduraaka, Mesaaki, na Abedeneego byamuhwereire kucwamu atyo. Akagira ati: “Yehova akarinda Abaheburaayo abo bashatu ahabw’okugira ngu bakaba batarikubaasa kuramya ekishushani.” Bwanyima akacwamu kuha abaabaire bariho ekitabo ekyo. Ikumi n’omwe aha beegi bagyenzi be bakaba nibenda ekitabo ekyo. Ku yaamanyire ngu Yehova amuhaire amaani n’obwengye bw’okubuurira aha nshonga egyo erikwetengyesa obwegyendesereza, omwishiki muto ogwo akashemererwa munonga.
Ku oraabe orabanganiiseho ngu Yehova naakufaho, teekateeka aha biri omu Zaaburi 34:17-19; 55:22; na 145:18, 19. Buuza Abajurizi ba Yehova abamazire obwire nibamuheereza oku Yehova atwire naabahwera. Kandi waaba nooyetenga obuhwezi bwa Ruhanga, mushabe orikumugambira kyenyine eki orikwetenga. Juba noija kureeba oku Yehova arikukufaho.