Noikiriza Omubumbi Omukuru Kukubumba?
“Reeba, nk’oku eibumba riri omu ngaro z’omubumbi, naimwe nikwo muri omu ngaro zangye.”—YER. 18:6.
EKYESHONGORO: 23, 22
1, 2. Ahabw’enki Ruhanga yaareebire Danieli ‘nk’omushaija orikukundwa munonga,’ kandi nitubaasa kworoba tuta nka Danieli?
OBU Abayudaaya baatwarwa omu Babulooni eya ira, bakareeba orurembo rwijwiremu okuramya ebishushani kandi abantu bahindukire abahuuku b’emyoyo mibi. Kwonka nabwo, Abayudaaya abeesigwa nka Danieli n’Abagyenzi be bashatu, bakanga kubumbwa ensi ya Babulooni. (Dan. 1:6, 8, 12; 3:16-18) Danieli na bagyenzi be bakaba bamaririire kuheereza Yehova wenka nk’omubumbi waabo. Kandi bakasingura! Danieli akatuura omuri Babulooni haihi ebiro byona eby’amagara ge, kandi Maraika wa Ruhanga akagira ngu akaba ari “omushaija orikukundwa munonga.”—Dan. 10:11, 19.
2 Obu Baibuli yaabaire neehandiikwa, omubumbi akaba naabaasa kubumba eibumba kuriihamu eki arikwenda. Abakristaayo ab’amazima nibamanya ngu Yehova niwe mutegyeki w’ebintu byona, oine obushoboorozi bw’okubumba abantu n’amahanga. (Shoma Yeremia 18:6.) Kandi Ruhanga aine obushoboorozi bw’okubumba buri omwe ahariitwe. Kwonka, naamanya obugabe bwaitu bw’okwecweramu kandi naayenda ngu tumuheereze twekundiire. Ka tureebe emiringo eshatu oku turikubaasa kuguma turi eibumba eryorobi eri Yehova arikubaasa kubumba: (1) Nitubaasa kwerinda tuta emitwarize erikubaasa kuturemesa kwikiriza obuhabuzi bwa Yehova? (2) Nitubaasa kugira tuta emitwarize y’okutuhwera kuguma tworobi? (3) Abazaire Abakristaayo nibabaasa kworobera bata Ruhanga baaba nibabumba abaana baabo?
YETANTARE EMITWARIZE ERIKUBAASA KUGANGAAZA OMUTIMA
3. Ni mitwarize ki erikubaasa kugangaaza emitima yaitu? Ha eky’okureeberaho.
3 Omu Enfumu 4:23 nihagira hati: “Rinda omutima gwawe okukira ebindi byona ebi orikurinda, ahakuba nigwo gurugwamu enshuro z’amagara.” Ni mitwarize ki ei twine kwerinda? Neetwariramu okugira amaryo, omuze gw’okukora ebibi, n’okutagira okwikiriza. Emitwarize egi neebaasa kutureetera kuba abagomi nari engangaazi. (Dan. 5:1, 20; Heb. 3:13, 18, 19) Omugabe Uziya owa Yuda akaba aine amaryo. (Shoma 2 Obusingye 26:3-5, 16-21.) Omu kubanza, Uziya akakora “ebirikusiimwa” Yehova, kandi “akamariirira kusherura Ruhanga.” Kwonka “ku yaaherize kuhama, yaagira amaryo,” n’obu Ruhanga niwe yaabaire naamuha amaani! Akateeraho n’okwoterera obubaane omu hekalu, obujunaanizibwa obwabaire buhairwe Abanyamurwa beene Arooni. Abanyamurwa ku baateireho kumuzibira, omunyamaryo Uziya yaagira ekiniga! Niki ekyarugiremu? Yehova akamumara amaryo, kandi yaarwara ebibembe kuhitsya obu yaafa.—Enf. 16:18.
4, 5. Niki ekirikubaasa kubaho twaremwa kwetantara kugira amaryo? Ha eky’okureeberaho.
4 Twaremwa kwerinda amaryo, naitwe nitubaasa ‘kweteekateekaho okukira oku turi,’ nangwa kitureetere kwanga obuhabuzi oburi omu Byahandiikirwe. (Rom. 12:3; Enf. 29:1) Yetegyereze ekyabaire aha Mukristaayo omureeberezi orikwetwa Jim owaagizire obutaikirizana n’abareeberezi bagyenzi be aha nshonga y’ekibiina. Jim naagira ati: “Nkagambira ab’eishe-emwe ngu tibaine rukundo, bwanyima naatsigaho oruteerane naagyenda.” Bwanyima y’ameezi nka mukaaga, akaza omu kibiina ekindi ekiri haihi, kwonka taratoorainwe nk’omureeberezi omu kibiina ekyo. Naayegambaho ati: “Nkashaasha munonga. Nketeekateekaho kuba ohikiriire kukira abandi, kyandeetera kuruga omu mazima.” Jim akaguma atarikubuurira kumara emyaka ikumi. Naayongyeraho ati: “Nkagira amaryo naatandika kucwera Yehova orubanja. Okumara emyaka mingi, ab’eishe-emwe bakaguma nibaantayaayira kubaasa kumpwera, kwonka nkanga obuhwezi bwabo.”
5 Ekyahikire ahari Jim nikyoreka oku okugira amaryo kurikubaasa kutureetera kuteekateeka ngu ebi turikukora nibyo bihikire byonka, ekirikutureetera kuba eibumba rigumire. (Yer. 17:9) Jim naashoboorora ati: “Nkaba ntarikubaasa kureka kuteekateeka aha ku abandi baabaire nibareebeka nk’abagwire.” Omukristaayo mugyenzi waawe arakugwisizeho kubi nari okehurira kubi ahabw’okwihwaho obujunaanizibwa? Ku kiraabe nikwo kiri, okatwaza ota? Okagira amaryo? Nari ekigyendererwa kyawe kikaba kiri eky’okugaruka kugira obusingye n’ow’eishe-emwe, kandi okaguma ohamiire ahari Yehova?—Shoma Zaaburi 119:165; Abakolosai 3:13.
6. Niki ekirikubaasa kubaho twakora ekibi?
6 Omuntu okuguma naakora ekibi kandi akakikora bwesherekye, nikibaasa kumureetera kutaikiriza obuhabuzi. Obwo, okukora ekibi nikyoroba. Ow’eishe-emwe omwe akagira ngu akaba ataine kweshiinja kwona ahabw’emitwarize ye mibi. (Mub. 8:11) Ow’eishe-emwe ondiijo, owaagizire omucwe gw’okureeba ebirikwitsa enshoni, akagira ati: “Nkagira omuze gw’okwetomboitera abareeberezi.” Omuze gwe gukashiisha omukago gwe na Yehova. N’ekyarugiremu, omutwarize gwe gukamanywa, kandi yaatunga obuhwezi obu yaabaire naayetenga. Buzima, twena turi abatahikiriire. Kwonka, twatandika kugira omuze gw’okwetomboita nari kwekwatsakwatsa omu mwanya gw’okushaba Ruhanga obuhwezi n’okusaasirwa, omutima gwaitu niguba gwatandika kugangaara.
7, 8. (a) Abaisraeli bakagangaaza bata emitima yaabo ahabw’okutagira kwikiriza? (b) Nikitwegyesa ki?
7 Eky’okureeberaho ky’Abaisraeli abu Yehova yaacungwire kuruga omuri Misri, nikyoreka oku okutagira kwikiriza kirikubaasa kugangaaza emitima yaitu. Bakareeba Ruhanga arikukora eby’okutangaaza bingi kubaasa kubacungura, bimwe aharibyo buzima bikaba biri eby’amaani kandi ebirikutiinisa! Kwonka, abantu ku baabaire bari haihi kuhika omu Nsi Eyaaraganisiibwe, bakooreka ngu tibaine kwikiriza. Omu mwanya gw’okwesiga Yehova, bakatiina baatandika kwetomboitera Musa. Nangwa bakaba nibenda n’okugaruka Misri, ei baabaire bari abahuuku! Yehova akashaasha munonga. Akagira ati: “Abantu aba baryahitsya hi okungaya?” (Kub. 14:1-4, 11; Zab. 78:40, 41) Ahabw’okugira emitima egangaire n’okutagira okwikiriza, abantu abo bakacwekyerezibwa omu ihamba.
8 Obunaku obu, ahabw’okugira ngu nitwirira haihi ensi ensya, Okwikiriza kwaitu nikugyezibwa. Nikiba kiri kirungi okushwijuma okwikiriza kwaitu. Nk’eky’okureeberaho, nitubaasa kushwijuma oku turikuteekateeka aha bigambo bya Yesu ebiri omu Matayo 6:33. Yebuuze oti: ‘Ebigyendererwa byangye n’ebi ndi kucwamu nibyoreka ngu buzima niinyikiririza omu bigambo bya Yesu? Nimbaasa kucwamu kwosha enteerane nari kutaza kubuurira ahabw’okwenda kwongyera aha ntaasya yangye? Niinyija kukora ki omurimo gwangye gwaba nigwetengyesa obwire bwingi n’amaani maingi? Niinyija kwikiriza ensi kumbumba n’okundeetera kureka kuheereza Yehova?’
9. Ahabw’enki twine kuguma ‘nitweshwijuma’ kureeba yaaba tukiri omu kwikiriza, kandi nitubaasa kukikora tuta?
9 Nk’eky’okureeberaho ekindi, teekateeka aha muheereza wa Yehova orikweziringa kugyendera aha misingye ya Baibuli, obundi erikukwata aha mikago, okubingwa omu kibiina, nari aha by’okweshemeza. Yebuuze oti: ‘Eki ninkireeba nk’ekihikire?’ Twamanya ebintu nk’ebyo ebirikugangaaza emitima yaitu nituba twine kushwijuma okwikiriza kwaitu ahonaaho! Baibuli neetuha obuhabuzi obu: “Mweshwijume mureebe ku muraabe muri omu kwikiriza; kandi mwegyeze mwenka.” (2 Kor. 13:5) Yebeere ow’amazima, kandi butoosha ogume okorese Ekigambo kya Ruhanga kutereeza emiteekateekyere yaawe.
GUMA ORI NK’EIBUMBA ERYOROBI
10. Niki ekirikubaasa kutuhwera kuba nk’eibumba eryorobi omu ngaro za Yehova?
10 Ebi Ruhanga atuhaire kutuhwera kuguma turi nk’eibumba eryorobi nibitwariramu Ekigambo kye, ekibiina Ekikristaayo n’omurimo gw’okubuurira. Nk’oku amaizi garikworobya eibumba, okushoma Baibuli buri izooba n’okuteekateeka aha bi orikushoma nikibaasa kutuhwera kuguma tworobi kubumbwa. Yehova akaragiira abagabe ba Israeli kuhandiika ebiragiiro bye, kandi bakabishoma buri eizooba. (Bir. 17:18, 19) Entumwa za Yesu bakakyetegyereza ngu okushoma Ebyahandiikirwe buri izooba n’okubiteekateekaho kikaba kiri kikuru munonga omu buheereza bwabo. Bakaba nibajuriza kandi beegyesa barikukoresa Ebyahandiikirwe by’Oruheburaayo emirundi mingi, kandi bakahiga abu baabaire nibeegyesa kukora nikyo kimwe. (Byak. 17:11) Obunaku obu, nitureeba obukuru bw’okushoma Ekigambo kya Ruhanga buri izooba n’okumushaba kutuhwera kuguma nitukiteekateekaho. (1 Tim. 4:15) Okukora ekyo nikituhwera kuguma turi abacureezi omu maisho ga Yehova kandi twikirize ngu atubumbe oku arikwenda.
Koresa ebi Ruhanga arikutuha kuguma oyorobi kubumbwa (Reeba akacweka 10-13)
11, 12. Yehova naabaasa kukoresa ata ekibiina Ekikristaayo kutubumba kurugiirira aha byetengo byaitu? Ha eky’okureeberaho.
11 Yehova naabaasa kutubumba kurugiirira aha byetengo byaitu arikukoresa ekibiina Ekikristaayo. Jim, owaaba yaagambirweho, akatandika kugira emiteekateekyere mirungi
omureeberezi ku yaayorekire ngu naamufaho. Jim naagira ati: “Tarancwereire rubanja nari kungira ngu nyine enshobe. Omu mwanya gw’ekyo, akaguma aine emiteekateekyere mirungi kandi yaayoreka ngu buzima naayenda kumpwera.” Bwanyima y’ameezi nk’ashatu, omureeberezi akeeta Jim kwija omu nteerane. Jim naayongyeraho ati: “Ab’eishe-emwe omu kibiina bakanyakiira n’omuhimbo kandi rukundo ei baanyorekire ekampiga kuhindura emiteekateekyere yangye. Nkatandika kwetegyereza ngu enyehurira zangye ti kikuru. Abareeberezi omu kibiina n’omukazi wangye bakaguma nibangaruramu amaani kyampwera kugaruka omu mazima. Ekicweka ‘Yehova Tiwe Aine Kuteebwaho Orubanja’ na ‘Heereza Yehova omu Bwesigwa,’ ebiri omu Watchtower ya Novemba 15, 1992, nabyo bikangumya.”12 Bwanyima y’obwire, Jim akagaruka yaatooranwa kuba omureeberezi omu kibiina. Kuruga obwo, ahwereire ab’eishe-emwe abandi kusingura emitwarize mibi nk’egyo n’okugaruka kuhama omu by’omwoyo. Naahendera ati: “Nkaba ninteekateeka ngu nyine omukago guhami na Yehova kwonka buzima nkaba ntagwaine! Ninyefuuza ahabw’okwikiriza amaryo gakampumya okutareeba ebintu bikuru, kandi nkaguma ninteekateeka aha nshobe z’abandi.”—1 Kor. 10:12.
13. Okubuurira nikubaasa kutuhwera kugira mitwarize ki, kandi niharugamu birungi ki?
13 Okubuurira nikubaasa kutubumba kuta kuba abantu barungi? Okugambira abandi amakuru marungi nikibaasa kutuhwera kugira obucureezi n’okugira bimwe aha byana by’omwoyo gwa Ruhanga. (Gal. 5:22, 23) Teekateeka aha mitwarize mirungi ei oyorekire omu kubuurira. Twagira emitwarize nk’eya Yesu, abantu nibabaasa kukunda amakuru agu turikubabuurira kandi batugireho emiteekateekyere mirungi. Nk’eky’okureeberaho, Abajurizi ba Yehova babiri kuruga Australia bakahurikiza gye omukazi ou baabaire nibabuurira owaabagambiire kubi. Bwanyima, akeefuuza ahabw’ebi yaagambire reero yaahandiikira ofiisi y’eitaagi ebaruha. Omu bugufu akahandiika ati: “Niinyenda kushaba okusaasirwa ahabw’okwetwara nk’ohikiriire kandi nketunguurira aha bantu babiri abo abagumisiriza kandi abacureezi. Ndi omushema ahabw’okutwariza kubi abantu abarikubuurira Ekigambo kya Ruhanga kandi nkateeraho kubabinga ntyo.” Mbwenu shi omuntu ogwo akaba naaza kuhandiika ebigambo ebyo kuri noogira ngu ababuurizi bakamugirira ekiniga? Buzima ngaaha. Omurimo gwaitu gw’okubuurira nigutuhwera kugira emitwarize mirungi kandi guhwera n’abu turikubuurira.
MWOROBERE RUHANGA MWABA NIMUBUMBA ABAANA BANYU
14. Abazaire baine kukora ki kubaasa kuba abasinguzi omu kubumba abaana baabo?
14 Abaana bato baingi n’abacureezi kandi nibaba nibenda kwega. (Mat. 18:1-4) N’ahabw’ekyo, n’eky’obwengye abazaire kuhwera abaana baabo kwega amazima n’okugakunda bakiri bato. (2 Tim. 3:14, 15) Buzima, kubaasa kusingura, abazaire baine kubanza kuta amazima omu mitima yaabo, bakagahindura agaabo. Abazaire baakora eki, nikiija kworobera abaana baabo kukunda amazima. Kandi, abaana nibaija kwetegyereza ngu nibakundwa abazaire baabo na Yehova.
15, 16. Abazaire bashemereire kworeka bata ngu nibeesiga Ruhanga abaana baabo baabingwa omu kibiina?
15 N’obu abaana abamwe baraabe bakuriire omu mazima, nibahika banga amazima nari babingwa omu kibiina ekirikureetera ab’omuka kushaasha munonga. Munyaanyazi-itwe omwe kuruga South Africa akagira ati: “Munyaanyazi ku yaabingirwe omu kibiina, okaba nooshusha oti afiire. Kikampenda omutima!” Mbwenu shi munyaanyazi-itwe n’abazaire be bakatwaza bata? Bakakuratira obuhabuzi kuruga omu kigambo kya Ruhanga. (Shoma 1 Abakorinso 5:11, 13.) Abazaire be nibagira bati: “Tukacwamu kugyendera aha buhabuzi bwa Baibuli, turikumanya ngu okugyendera aha buhabuzi bwa Ruhanga nikirugamu ebirungi. Tukaba nitureeba okubingwa omu kibiina nk’okuhanwa okurikuruga ahari Ruhanga, kandi tukaba nituhamya ngu Yehova naahana arikubariirira kandi ahabwa rukundo. Tukaba tukwatanisa na mutabani waitu omu nshonga z’eka ezaabaire ziri nkuru zonka.”
16 Omutabani akeehurira ata? Naagira ati: “Nkaba nimmanya ngu ab’omuka bakaba batarikunyanga, kwonka bakaba niboorobera Yehova n’ekibiina kye. Waashanga ngu Yehova wenka niwe oine kushaba obuhwezi n’okusaasirwa, nooyetegyereza oku orikumwetenga buzima.” Teekateeka aha kushemererwa oku eka egi yaagizire, obu omwana waabo yaagaruka omu kibiina! Buzima, twasherura obuhwezi kuruga ahari Ruhanga omu miringo yoona, niharugamu ebirungi byonka.—Enf. 3:5, 6; 28:26.
17. Ahabw’enki twine kuguma nitworobera Yehova, kandi twakora tutyo nitwija kugasirwa tuta?
17 Nabi Isaaya akagamba aha bwire obu Abayudaaya baabaire nibaija kweteisa barikugira bati: “Ai Mukama, niiwe Tataitwe, itwe turi eibumba, niiwe mubumbi waitu; twena turi ebibumbirwe engaro zaawe.” Bakaba nibaija kweshengyereza bati: “Ai Mukama, otatugirira ekiniga, okarengyesereza, kandi otaijuka eby’okutahikiirira byaitu ebiro byona.” (Isa. 64:8, 9) Nikyo kimwe, naitwe twayorobera Yehova tukamweshengyereza tutyo, naija kutureeba nk’ab’omuhendo, nk’oku nabi Danieli yaabaire ari ow’omuhendo ahariwe. Okwongyera ahari ekyo, Yehova naija kuguma naatubumba arikukoresa Ekigambo kye, omwoyo gwe, n’ekibiina kye, kugira ngu omu biro by’omumaisho twije tube “abaana” be abahikiriire.—Rom. 8:21.