Noijuka?
Oshomire gye ebicweka ebihererukire kwizira omu Munaara gw’Omurinzi? Reeba ku oraabe noobaasa kugarukamu ebibuuzo ebi:
Ahabw’enki Yehova yaikiriize eihanga rya Israeli erya ira kurwana entaro?
Yehova aine rukundo. Kwonka, obumwe akaba aikiriza abaheereza be kwejumba omu ntaro haagira abaabatwariza kubi. Ruhanga wenka niwe yaabaire acwamu abaraaze omu ntaro n’obu orutaro ruraabeho.—w15 11/1, rup. 4-5.
Abazaire nibabaasa kukora bintu ki ebikuru kutendeka abaana baabo emishogoyo kuheereza Yehova?
Ni kikuru ngu abazaire bakunde abaana baabo emishogoyo kandi bateho eky’okureeberaho omu kworeka obucureezi. Kandi ni kikuru abazaire kukoresa obwengye kandi bakateeraho kwetegyereza abaana baabo emishogoyo.—w15 11/1, rup. 14-16.
Ahabw’enki Paapa atashemereire kutwarwa nk’owaahunguriire Petero?
Matayo 16:17, 18 tiharikugira ngu entumwa Petero niwe yaabaire naija kuba omutwe gw’ekibiina Ekikristaayo. Omu mwanya gw’ekyo, Baibuli neeyoreka ngu Yesu niwe yaabaire ari eibaare ry’enshonda ery’ekibiina. (1 Pet. 2:4-8)—w15-E 12/1, rup. 12-14.
Tushemereire kuteekateeka ha bintu ki tutakagambire?
Kubaasa kukoresa gye orurimi rwaitu, tushemereire kumanya (1) obu turaagambe (Mub. 3:7), (2) eki turaagambe (Enf. 12:18), hamwe (3) n’oku turaakigambe (Enf. 25:15).—w15 12/15, rup. 19-22.
Ni bintu ki ebitari by’obwesigwa ebi Abakristaayo baine kwetantara?
Abakristaayo ab’amazima nibeetantara okubeiha n’okugambuura abandi. Tibarikugamba ebitahikire ebirikushiisha abandi, kandi tibarikuryangatanisa nari kwiba.—wp16.1, rup. 5.
“Abanyamurwa abakuru” abarikugambwaho omu Baibuli bakaba bari baahi?
“Abanyamurwa abakuru” hatariho kubanganisa ni bamwe aha baabaire nibakora omurimo gw’obunyamurwa, otwariiremu n’abanyamurwa abaabaire bahuumwire.—wp16-E 1, rup. 10.
Tushemereire kutwariza tuta omuntu yaarya kandi akanywa aha bumanyiso bw’Ekiijutsyo?
Abakristaayo tibarikuhimbisiriza abarikurya kandi bakanywa aha bumanyiso. Ogwo buzima orikuba ashukirweho omwoyo gurikwera naba atarikwenda kuhimbisibwa, kandi naaba atarikwenda kugyenda naarangirira omukago ogu aine na Ruhanga. (Mat. 23:8-12)—w16.01, rup. 23-24.
Nitubaasa kwega ki aha ku Abrahamu yaanywanire Ruhanga?
Abrahamu akamanya ebirikukwata ahari Ruhanga, obundi kuruga ahari Sheemu. Kandi Abrahamu akamanya bingi ebirikukwata ahari Ruhanga ahabw’oku Ruhanga yaakoragaine nawe n’eka ye. Naitwe nitubaasa kukora nikyo kimwe.—w16.02, rup. 9-10.
Eshuura n’emishororongo bikaza bita omu Baibuli?
Omu kyasha kya 13 omunyadiini orikwetwa Stephen Langton niwe yaataire emishororongo omu Baibuli. Omuhandiiki Omuyudaaya akabanza kuta emishororongo omu Byahandiikirwe eby’Oruheburaayo, omu kyasha kya 16, omucondooza orikwetwa Robert Estienne nawe yaata emishororongo omu Byahandiikirwe eby’Orugriika.—wp16.3, rup. 26-27.
Mbwenu shi Sitaane akatwara Yesu butunu aha hekalu kumugyeza?
Ekyo titurikubaasa kukihamya. Ebiri omuri Matayo 4:5 na Luka 4:9 nibibaasa kumanyisa ngu Yesu akatwarwayo omu kworekwa nari akeemerera omu mwanya muraingwa omu hekalu.—w16-E 03, rup. 31-32.
Obuheereza bwaitu bw’Ekikristaayo nibubaasa kuba buta nk’orume?
Orume nirutonda mporampora, nirugarura busya kandi niruha amagara. Buzima orume n’omugisha kuruga ahari Ruhanga. (Bir. 33:13) Nikyo kimwe n’abaheereza ba Ruhanga boona hamwe ku barikwejumba omu buheereza.—w16.04, rup. 4.