Omutwarize gwa Ruhanga Ogurikukira Eibaare ry’Obuguzi Bwingi
Diamandi niryo eibaare ry’obuguzi bwingi eririkukira kuheebwa abantu nk’ekiconco. Daimandi ezimwe nizibariirirwamu obukaikuru bwa doora. Kwonka shi, hariho ebintu ebindi ebi Ruhanga arikutwara nk’eby’omuhendo kukira daimandi?
Haykanush, omubuurizi otakabatiziibwe kuruga Armenia, akatoorotoora paasipoota haihi n’eka ye. Akashanga erimu kaada za banka ezindi n’esente nyingi. Akagambira iba, nawe owaabaire ari omubuurizi otakabatiziibwe.
Bombi bakaba baine oburemeezi bw’esente kandi baine eibanja, kwonka bakacwamu kutwara esente ezo aha ndagiriro ei bashangire omu paasipoota. Omushaija owaabaire anagire paasipoota egyo akatangaara munonga n’ab’eka ye. Haykanush na iba bakabashoboororera ngu n’abeesigwa ahabw’ebi baabaire nibeega omu Baibuli. Bakaba nibamanya ngu baine kuba abeesigwa, kandi bakakoresa omugisha ogwo kugamba aha Bajurizi ba Yehova, reero baatsigira eka egyo ebitabo by’okushoma.
Eka egyo ekaba neeyenda kuha Haykanush ekiconco ky’esente, kwonka akazanga. Eizooba eryakuratsireho, omukazi w’omushaija owaabaire anagire paasipoota akaza omu ka ya Haykanush kworeka okusiima kwe, kandi yaamugyemesereza kwikiriza ekiconco ky’empeta ekozirwe omu diamandi.
Nk’eka egyo, abantu baingi nibabaasa kutangaara ahabw’obwesigwa obu Haykanush na iba baayorekire. Kwonka shi ekyo nikitangaaza Yehova? Akareeba ata obwesigwa bwabo? Mbwenu shi okuba abeesigwa kikaba nikikira ebi baayefeerereize?
EMITWARIZE ERI EY’OMUHENDO KUKIRA EBY’OBUTUNGI
Eby’okugarukamu eby’ebibuuzo ebyo tibigumire. Ahakuba abaheereza ba Ruhanga nibaikiriza ngu okugira emitwarize nk’eya Yehova n’eky’omuhendo omu maisho ge okukira diamandi, efeeza, nari eby’obutungi ebindi. Buzima, emiteekateekyere ya Yehova aha kirikutwarwa nk’eky’omuhendo n’ekitari ky’omuhendo neetaanira kimwe n’ey’abantu. (Isa. 55:8, 9) Kandi abaheereza ba Yehova okugira emitwarize nk’eye omuri byona, n’obusinguzi bw’amaani.
Eki nitubaasa kukireebera aha ku Baibuli erikugamba aha kwetegyereza n’obwengye. Enfumu 3:13-15 nihagira hati: “Ohiiriirwe n’omuntu ozoora obwengye, kandi n’omuntu otunga okwetegyereza; ahabw’okuba omugasho ogurimu nigukira ogw’omu feeza, kandi n’amagoba gaabwo nigakira ag’ezaabu; n’obw’obuguzi bwingi okukira amabaare g’omuhendo, kandi omu bi waakwetenga byona, tihaine kirikwingana nabwo.” Buzima, hatariho kubanganisa, Yehova naasiima emitwarize egyo kukira ebintu eby’obuguzi bwingi.
Kandi shi obwesigwa?
Nitumanya ngu Yehova n’omwesigwa, “otabaasa kubeiha.” (Tit. 1:2) Kandi akahwera entumwa Paulo kuhandiikira Abakristaayo Abaheburaayo ab’omu kyasha ky’okubanza ati: “Mutushabire ahakuba nitumanya ngu twine omutima ogutarikweshinja, nitwetenga kutwaza gye omuri byona.”—Heb. 13:18.
Yesu Kristo akatuteeraho eky’okureeberaho kirungi ky’obwesigwa. Nk’eky’okureeberaho, obu omunyamurwa omukuru Kayaafa yaamugambira ati: “Ninkurahiza Ruhanga ohuriire, otugambire ku oraabe ori Kristo Omwana wa Ruhanga!” Yesu akagamba amazima ngu niwe Mesia, n’obu okugamba ekyo kyabaire nikibaasa kureetera ab’omu ishengyero kugira ngu yaarogota, reero ekyo kikamurugiramu okwitwa.—Mat. 26:63-67.
Kandi shi itwe? Mbwenu shi nitwija kuguma turi abeesigwa okuhindahindura kakye omu bigambo kyaba nikibaasa kuturugiramu kutunga eby’obugaiga?
OKUBA ABEESIGWA TIKYOROBI
Amazima gari ngu kigumire okuba abeesigwa omu biro ebi eby’emperu obu abantu baingi bari ‘abarikwekunda, n’abakunzi b’empiiha.’ (2 Tim. 3:2) Oburemeezi omu by’esente nari eibura ry’emirimo nibikwata munonga aha bwesigwa. Baingi nibateekateeka ngu nibaba bahikire kwiba, kubaiha, nari kwejumba omu bikworwa ebindi ebitari by’obwesigwa. Emiteekateekyere nk’egyo ekanyire munonga, na munonga kyaba nikitwariramu okutunga eby’obugaiga, baingi nibateekateeka ngu obwesigwa baine kubuta aha rubaju. Nangwa n’Abakristaayo abamwe bacwiremu kubi omu nshonga nk’ezo, kandi ‘ahabw’okwetenga enshaagi’ baafeereirwe omukago gwabo murungi omu kibiina.—1 Tim. 3:8; Tit. 1:7.
Kwonka, Abakristaayo abaingi nibatooreza Yesu. Nibamanya ngu okugira emitwarize nk’eya Ruhanga ni kikuru munonga okukira eby’obugaiga byona nari ebindi. N’ahabw’ekyo, Abakristaayo eminyeeto tibarikwiba kugira ngu bakore gye aha ishomero. (Enf. 20:23) Buzima, okuba omwesigwa nikubaasa kutarugamu kutunga ebihembo, nk’oku kyabaire ahari Haykanush. Kwonka, okuba omwesigwa nikyo kihikire omu maisho ga Ruhanga kandi eky’omuhendo, ekirikutuhwera kuguma twine omutima ogutarikweshinja.
Eky’okureeberaho kya Gagik nikishoboorora gye enshonga egyo. Naagira ati: “Ntakabaire Mukristaayo, nkaba ninkora omu kitongore kihango kwonka mukama waakyo akaba naashashura omushoro mukye arikworeka ngu ekitongore nikikora amagoba makye. Nkaba ninkora nka manegya w’ekitongore ekyo, kandi mukama wangye akaba naayenda ngu nyikirizane n’orikubariirira emishoro mmureetere kwehuzya ebikorwa by’okunyaga omushoro eby’ekitongore ekyo. N’ekyarugiremu, nkaba nimmanywa nk’otari mwesigwa. Ku naayegire amazima, nkanga kugumizamu ninkora omurimo ogwo, n’obu guraabe gwabaire guri ogw’esente nyingi. Eki naakozire, nkatandikaho ekitongore ekyangye. Aha kiro ky’okubanza nkahandiikisa ekitongore kyangye kandi naaguma ninshashura emishoro yoona.”—2 Kor. 8:21.
Gagik naashoboorora ati: “Entaasya yangye, ekakyendera nka kimwe kya kabiri, n’ahabw’ekyo kikaba kigumire kureeberera eka yangye. Kwonka hati, nimpurira nyine okushemererwa. Omutima gwangye gushemeire omu maisho ga Yehova. Ndi eky’okureeberaho kirungi ahari batabani bangye babiri, kandi ntungire obujunaanizibwa omu kibiina. Abarikubariirira emishoro n’abu ndikukoragana nabo omu by’obushuubuzi, hati nibammanya nk’omushaija omwesigwa.”
OBUHWEZI NIBURUGA AHARI YEHOVA
Yehova naakunda abo abarikusiimisa enyegyesa ye barikugira emitwarize mirungi nk’eye, otwariiremu n’obwesigwa. (Tit. 2:10) Akahwera Omugabe Daudi kugamba ati: “Nkaba ndi omutsigazi, mbwenu ndi omugurusi; kwonka tinkareebaga ohikiriire atsigirweho, n’obu baakuba abaana be nibashaba ak’okurya.”—Zab. 37:25.
Eky’okureeberaho kya Ruusi nikihamya ebigambo ebyo. Akahamira ahari nyinazaara, Naomi, omu mwanya gw’okumutsigaho omu myaka ye ya bukuru. Ruusi akaza Israeli, ahu yaabaire naabaasa kuramiza Ruhanga ow’amazima. (Rus. 1:16, 17) Ruusi obu yaabaire ari omuri Israeli, akaba ari omwesigwa kandi akaba naakora n’amaani, butoosha arikuhumba eby’okurya omu musiri nk’oku ebiragiro byabaire nibigira. Okuhikaana n’ebi Daudi yaagambire, Yehova taratsigireho Ruusi na Naomi. (Rus. 2:2-18) Yehova akakora ekirikukira aha kureeberera Ruusi omu by’omubiri. Akamutoorona kuba nyinenkuru w’Omugabe Daudi n’owa Mesia owaabaire araganisiibwe!—Rus. 4:13-17; Mat. 1:5, 16.
Bamwe aha Bajurizi ba Yehova nibabaasa kweshanga bari omu mbeera zigumire batarikubaasa kutunga ebi barikwetenga Enf. 12:24; Efe. 4:28.
ebirikumara. Omu mwanya gw’okubisherura omu muringo gutari gw’obwesigwa, nibateeraho kukora munonga kandi baba abeeziriki. N’ahabw’ekyo nibooreka ngu nibasiima emitwarize mirungi ya Ruhanga, otwariiremu obwesigwa, okukira ekintu kyona eky’obutungi.—Nka Ruusi owa ira, Abakristaayo omu nsi yoona boorekire ngu nibaikiririza omu maani ga Yehova ag’okuhwera. Nibeesiga ogwo owaaraganiise ebigambo ebi: “Tindikutsigaho, kandi tindikuhemukaho na kakye.” (Heb. 13:5) Yehova atwire naayoreka ngu naabaasa, kandi naija kuhwera boona abatarikwebaasa abarikuguma bari abeesigwa obwire bwona. Buzima atwire naahikiiriza ekiraganiso kye eky’okutuha ebi turikwetenga.—Mat. 6:33.
Eego, abantu nibabaasa kuha ebiconco bya diamandi n’ebindi bintu by’omuhendo. Kwonka nitubaasa kuhamya ngu Tataitwe ow’omu iguru naatwara okuba abeesigwa n’okugira emitwarize nk’eye, nka kikuru munonga!
Okuba abeesigwa nikituhwera kugira omutima ogutarikweshinja n’okugamba tutarikwekyengyera omu kubuurira