1. Ahabw’enki Yehova niwe mubumbi orikukirayo?

OMURI Novemba 2010, abantu omuri England bakahayo esente ezirikwingana doora obukaikuru 70 barikutangatangana kugura ekibumbirwe omu ibumba. Nikitangaaza kureeba ngu omunogoozi naabaasa kubumba ekintu ky’obuguzi bwingi kuruga omu ibumba eritari ry’omuhendo. Kwonka, tihariho munogoozi orikubaasa kugyeragyeranisibwa na Yehova. Ira omu biro mukaaga eby’okuhangwa, Ruhanga akabumba “omuntu omu mucuucu gw’ahansi” nari eibumba kandi yaamuha obushoboorozi bw’okworeka emitwarize nk’eye. (Kut. 2:7) Adamu owaabaire ahikiriire kandi akozirwe omu itaaka, akaba naayetwa omwana wa Ruhanga.​—Luk. 3:38.

2, 3. Nitubaasa kugira tuta emiteekateekyere nk’ey’Abaisraeli abayeteisize?

² Kwonka, Adamu ku yaagomire akafeerwa omugisha gwe ogw’okwetwa omwana wa Ruhanga. Beitu kumara ebyasha bingi “omutwe muhango” gw’abaijukuru ba Adamu bacwiremu kushagika Ruhanga nk’ohikire kutegyeka. (Heb. 12:1) Omu bucureezi ku barikucwamu kworobera Omuhangi waabo, nibooreka ngu nibenda ngu abe Ishebo kandi Omubumbi waabo. (Yoh. 8:44) Okuhamira kwabo ahari Ruhanga nikutwijutsya ebi Abaisraeli abaabaire beeteisize baagambire obu baagira ngu ai Yehova “niiwe Tataitwe. Itwe turi eibumba,  niiwe mubumbi waitu; twena turi ebibumbirwe engaro zaawe.”​—Isa. 64:8.

³ Obunaku obu, boona abarikuramya Yehova omu mwoyo n’omu mazima nibateeraho kumworobera n’okuba abacureezi. Nibagutwara nk’omugisha gw’amaani kweta Yehova Ishebo, kandi bakamworobera nk’Omubumbi waabo. Mbwenu shi nooyereeba nk’eibumba ryorobi omu ngaro za Ruhanga, oyeteekateekire kubumbwamu ekintu ekirikusiimwa omu maisho ge? Kandi nooreeba buri omwe aha b’eishe-emwe nk’ekintu ekikiriyo nikibumbwa Ruhanga, beitu kitari ekyaherize kubumbwa? Kutuhwera kugira emiteekateekyere mirungi, nituza kureeba oku Yehova arikutoorana abu araabumbe, ahabw’enki naababumba, n’oku arikukikora.

4. Yehova naatoorana ata abu arikweyiriza haihi? Ha eby’okureeberaho.

⁴ Yehova ku arikureeba abantu, tarikuta omutima aha ndeebeka yaabo ey’aha ruguru. Omu mwanya gw’ekyo, naashwijuma omutima, niyo ndeebeka y’omuntu ey’omunda. (Shoma 1 Samueli 16:7b.) Eki Yehova akakyoreka obu yaatandikaho ekibiina Ekikristaayo. We n’Omwana we bakeeyiriza haihi abantu abarikureebeka nk’abatashemeire kurugiirira aha ndeeba y’abantu. (Yoh. 6:44) Omwe owaabaire ari atyo n’Omufarisaayo orikwetwa Saulo, akagira ngu akaba ari omurogotsi, omujumi, kandi omuntu enshaarizi. (1 Tim. 1:13) Kwonka Yehova orikushwijuma “emitima,” tarareebire Saulo nk’eibumba eritaine mugasho. (Enf. 17:3) Omu mwanya gw’ekyo, akareeba ngu naabaasa kubumbwamu ekintu ky’omuhendo kubuurira “omu maisho g’Abanyamahanga n’abagabe n’Abaisraeli.” (Byak. 9:15) Abandi abu Ruhanga areebire ngu nibabaasa ‘kukoresibwa eby’ekitiinisa’ nibatwariramu abaabaire bari abasinzi, abashambani, n’abashuma. (Rom. 9:21; 1 Kor. 6: 9-11) Ku baatungire okumanya okuhikire okuri omu Kigambo kya Yehova kandi bakagira okwikiriza, bakaikiriza Yehova kubabumba.

5, 6. Okwesiga Yehova nk’Omubumbi nikikwata kita aha miteekateekyere ei twine aha (a) bantu omu kicweka kyaitu? (b) b’eishe-emwe bagyenzi baitu?

⁵ Okumanya ngu Yehova naatoorana abantu nk’abo nikituhwera kita? Okwikiriza ngu Yehova naabaasa kureeba ekiri omu mitima y’abantu, kandi akeiriza haihi abu arikutoorana, kishemereire kutureetera kutacwera abandi orubanja, omu kicweka kyaitu n’omu kibiina. Teekateeka aha ky’okureeberaho ky’omushaija orikwetwa Michael. Naagira ati: “Abajurizi ba Yehova ku baabaire baija kumbuurira, nkaba mbehuzya oshusha ngu tibariho. Buzima nkaba nitwaza kubi munonga! Bwanyima omu mbeera y’omutaano, nkabugana eka ei naayegombire ahabw’okutwaza gye. Kwonka eizooba rimwe nkatangaara ku naamanyire ngu n’Abajurizi ba Yehova! Emitwarize yaabo mirungi ekampiga kweshwijuma kureeba ahabw’enki naabaire ninshoroora omu bantu. Ahonaaho nkamanya ngu emiteekateekyere yangye ekaba neeyegamira aha butamanya n’orugambo, beitu gatari mazima.” Kubaasa kumanya ebihikire ebirikubakwataho, Michael akaikiriza kwega Baibuli. Bwanyima, akaija omu mazima kandi yaaza omu buheereza obw’obutwire.

⁶ Okwikiriza Yehova nk’omubumbi waitu nikibaasa kukwata aha miteekateekyere ei twine aha b’eishe-emwe bagyenzi baitu. Nooreeba ab’eishe-emwe nk’abariyo nibakibumbwa nk’oku Ruhanga arikubareeba, beitu batari abaaherize kubumbwa? Ruhanga naabaasa kureeba omutima gw’omuntu n’oku arikubaasa kuhinduka yaaheza kumubumba. N’ahabw’ekyo Yehova aine emiteekateekyere mirungi aha bantu kandi tarikuta omutima aha butahikiirira bwabo. (Zab. 130:3) Nitubaasa kumutooreza twagira emiteekateekyere mirungi aha baheereza be. Nitubaasa kukora hamwe n’Omubumbi turikushagika  ab’eishe-emwe baaba nibateeraho kutunguuka omu by’omwoyo. (1 Tes. 5:14, 15) Nk’ebiconco omu bantu, abareeberezi nibo bashemereire kwebembera omu nshonga egi.​—Efe. 4:8, 11-13.

7. Ahabw’enki oshemereire kusiima okuhana kwa Yehova?

⁷ Noobaasa kuba orahuriireho omuntu naagira ati: ‘Tindasiimire okuhana kw’abazaire bangye kuhitsya obu naazaara abaana abangye.’ Ku turikweyongyera kumanya bingi, nitubaasa kutandika kukunda okuhanwa, tutandikye kukureeba nk’oku Yehova arikukureeba, tumanye ngu omuntu naatuhana ahabw’okutukunda. (Shoma Abaheburaayo 12:5, 6, 11.) Buzima, Yehova naagumisiriza yaaba naatubumba nk’abaana be, ahabw’okugira ngu naatukunda. Naayenda ngu tugire obwengye n’okushemererwa, kandi naitwe tumukunde. (Enf. 23:15) Tarikushemererwa twaba nitubonabona, kandi tarikwenda ngu tufe nk’abaana “ab’okugirirwa ekiniga” abatarikubaasa kweteisa.​—Efe. 2:2, 3.

8, 9. Obunaku obu Yehova naatwegyesa ata, kandi naija kugumizamu naatwegyesa ata omu biro by’omumaisho?

⁸ Nk’abaana “ab’okugirirwa ekiniga,” ira tukaba twine emitwarize etarikushemeza Ruhanga, obundi eri nk’ey’enyamaishwa! Kwonka, nitusiima Yehova ahabw’okutubumba, tukahinduka, hati turi nk’abaana b’entaama. (Isa. 11:6-8; Kol. 3:9, 10) N’ahabw’ekyo, embeera ei Yehova arikutubumbiramu neetwarwa nka paradiso y’eby’omwoyo ei atuteereireho obunaku obu. Nituhurira twine oburinzi n’obu turaabe twetooroirwe ensi embi. Abo abaakuriire omu maka agatarimu rukundo hati nibahurira nibakundwa ab’eishe-emwe na banyaanyabo omu paradiso y’eby’omwoyo. (Yoh. 13:35) Kandi twegire kworeka abandi rukundo. Ekikuru munonga, tumanyire Yehova kandi hati naatworeka rukundo nk’ey’omuzaire.​—Yak. 4:8.

⁹ Omu nsi ensya, nitwija kutunga emigisha ya paradiso y’eby’omwoyo omu bwijwire. Kandi nitwija kushemererwa kutuura omu paradiso y’omu nsi eraabe neetegyekwa Obukama bwa Ruhanga. Omu bwire obwo obw’okuboneza ensi yoona, Yehova naija kugumizamu naabumba abantu abaraagituuremu, arikubeegyesa aha rurengo oru hati tutarikubaasa kuteeberezaho. (Isa. 11:9) Okwongyerera ahari ekyo, Ruhanga naija kuhindura ebiteekateeko byaitu n’emibiri yaitu bibe ebihikiriire, kugira ngu tubaase kwetegyereza gye enyegyesa ze, kandi tukore ebi arikukunda omu muringo oguhikire gye. N’ahabw’ekyo, ka tumariirire kugumizamu nitworobera Yehova, tworekye ngu nitusiima oku arikutubumba ahabw’okutukunda.​—Enf. 3:11, 12.

10. Yesu akooreka ata okugumisiriza n’okwetegyereza nk’ebya Yehova Omubumbi Orikukirayo?

¹⁰ Nk’oku omubumbi murungi arikuba naamanya gye eibumba eri arikunogoora, Omubumbi waitu Yehova naatumanya gye. (Shoma Zaaburi 103:10-14.) Buzima, buri omwe naamutwariza okwe, arikwijuka obweremwa bwaitu, obugarukiro bwaitu, n’okutunguuka kwaitu omu by’omwoyo. Emiteekateekyere ei aine aha baheereza be abatahikiriire ekoorekwa Omwana we. Yetegyereze omuringo ogu Yesu yaakwatsiremu obweremwa bw’entumwa ze, na munonga obu baabaire nibahakanira obukuru. Mbwenu shi kuri waareebire okuhakana kw’entumwa, okaba noija kubareeba nk’abacureezi abarikubaasa kubumbwa? Yesu tarabagizireho emiteekateekyere egwire. Akaba naamanya ngu entumwa ze abeesigwa nibabaasa kubumbwa yaaba naabahana omu bucureezi, omu kugumisiriza, kandi akabateeraho n’eky’okureeberaho ky’obucureezi. (Mak. 9:33-37; 10:37, 41-45; Luk. 22: 24-27) Bwanyima ya Yesu kuzooka kandi entumwa ze bakashukwaho omwoyo gurikwera, bakata omutima aha murimo ogu yaabaire  abahaire omu mwanya gw’okuguta aha bukuru nari okumanywa.​—Byak. 5:42.

11. Ni mu muringo ki ogu Daudi yaayorekire ngu ari nk’eibumba ryorobi, kandi nitubaasa kumutooreza tuta?

¹¹ Yehova naabumba abaheereza be obunaku obu okukira munonga arikukoresa Ekigambo kye, omwoyo gurikwera, n’ekibiina Ekikristaayo. Ekigambo kya Ruhanga nikibaasa kutubumba twakishoma twine ekigyendererwa, tukakiteekateekaho, kandi tukashaba Yehova kutuhwera kukigyenderaho. Daudi akahandiika ati: ‘Ninkwijuka ndi aha kitanda kyangye, nkuteekateekaho omu kusiisimuka kwa nyekiro.’ (Zab. 63:6) Kandi akoongyera yaahandiika ati: “Ninsiima Mukama ompa obwengye, kandi nyekiro omutima gwangye guunyegyesa.” (Zab. 16:7) Buzima, Daudi akaikiriza okuhanwa kuruga ahari Ruhanga kumutaahamu, kubumba ebiteekateeko bye n’enyehurira ze, n’obu okuhana okwo kwabaire kuri okw’amaani. (2 Sam. 12:1-13) Daudi ka yaatutereireho eky’okureeberaho kirungi eky’obucureezi n’okworoba! Naiwe nooteekateeka aha Kigambo kya Ruhanga, oyikiriza ngu kikutaahemu? Noobaasa n’okwongyera kukikora?​—Zab. 1:2, 3.

12, 13. Yehova naatubumba ata arikukoresa omwoyo gurikwera n’ekibiina Ekikristaayo?

¹² Omwoyo gurikwera nigubaasa kutubumba omu miringo mingi. Nk’eky’okureeberaho, nigubaasa kutuhwera kugira emitwarize nk’eya Kristo, n’endiijo mitwarize ei gurikutuhwera kugira. (Gal. 5:22, 23) Gumwe aha mitwarize y’omwoyo ni rukundo. Nitukunda Ruhanga kandi nitwenda kumworobera tukaikiriza kutubumba, turikumanya ngu ebiragiro bye tibiremeire. Omwoyo gurikwera nigubaasa kutuha amaani g’okwangira omwoyo gw’ensi kandi twangye ngu ensi etatubumba. (Efe. 2:2) Entumwa Paulo, owaabaire aine omwoyo gw’abeebembezi b’ediini y’Ekiyudaaya kuruga omu buto, akahandiika ati: “Amaani agarikukirira kimwe n’aga Ruhanga, ti gaitu.” (Kor. 4:7) N’ahabw’ekyo nka Paulo, ka tugume nitushaba kuheebwa omwoyo gurikwera. Yehova tarikwija kwebwa okweshengyereza kw’abacureezi abarikumushaba baihire aha mutima.​—Zab. 10:17.

¹³ Yehova naakoresa n’ekibiina Ekikristaayo  n’abarikukireeberera kutubumba. Nk’eky’okureeberaho, abareeberezi ku barikumanya ngu twine oburemeezi bw’eby’omwoyo, nibateeraho kutuhwera kwonka batarikukoresa obwengye bw’abantu. (Gal. 6:1) Omu mwanya gw’ekyo, nibashaba Yehova ngu abahe okwetegyereza n’obwengye. Barikuteekateeka aha mbeera yaitu, nibacondooza omu Kigambo kya Ruhanga n’omu bitabo byaitu by’Ekikristaayo. Eki nikibabaasisa kutuha obuhwezi oburikuhikaana n’ebyetengo byaitu. Mbwenu shi ku baraije kukuhwera omu muringo gwa rukundo n’embabazi aha bikwatiraine n’oku orikujwara, noija kwikiriza okuhanwa okwo okureebe nk’okurikworeka rukundo ya Ruhanga? Waakora otyo, nooyoreka ngu oyorobi nk’eibumba omu ngaro za Yehova, oyeteekateekire kubumbwa, kandi okagasirwa.

14. N’obu Yehova araabe atwineho obushoboorozi, naayoreka ata ngu naaha ekitiinisa ekiconco kyaitu eky’okwecweramu?

¹⁴ Twayetegyereza oku Ruhanga arikubaasa kuba ariyo naatubumba, nikibaasa kutuhwera omu mukago gwaitu n’ab’eishe-emwe bagyenzi baitu n’emiteekateekyere ei twine aha bantu omu kicweka kyaitu, otwariiremu n’abeegi baitu ba Baibuli. Obu Baibuli yaabaire neehandiikwa, omubumbi akaba atatiimba eibumba akatandikiraho kurinogoora. Akaba abanza aritebeekanisa, arikwihamu amabaare n’ebindi ebitarikwetengyesa. Omu muringo gw’eby’omwoyo, Ruhanga naatebeekanisa abantu abaine omutima gwekundiire kugira ngu ababumbe. Tarikubagyema kukora empindahinduka, kwonka naabooreka emitindo ye ehikiriire kugira ngu bahindure emitwarize yaabo, kandi bakore n’empindahinduka ezindi beekundiire.

15, 16. Abeegi ba Baibuli nibabaasa kworeka Yehova bata ngu nibenda ababumbe? Ha eky’okureeberaho.

¹⁵ Teekateeka aha ky’okureeberaho kya Tessie, omukazi Omukristaayo kuruga Australia. Munyaanyazi-itwe owaamwegyeise naagira ati: “Tessie akaba atarikuteganisa omu kwega amazima ga Baibuli. Kwonka, akaba atarikukora mpindahinduka omu by’omwoyo, kandi akaba atarikwija n’omu nteerane! N’ahabw’ekyo bwanyima y’okushaba aha bikwatiraine n’enshonga egi, nkacwamu kurekyera aho kwega nawe. Kwonka bwanyima hakabaho ekintu kirikushemeza. Obu naabaire ninteekateeka ngu turiyo nituza kwega Baibuli ogw’aha muheru, Tessie nibwo yaigura omutima gwe. Tessie akagira ngu akaba naayereeba nk’endyarya ahakuba akaba naakunda okuteera zaara. Kwonka hati akaba acwiremu kucwa omuze ogwo.”

¹⁶ Ku haahingwireho obwire bukye, Tessie akatandika kwija omu nteerane z’Ekikristaayo n’okugira emitwarize y’Ekikristaayo, n’obu bagyenzi be baabaire nibamujuma. Munyaanyazi-itwe ogwo naayongyeraho ati: “Bwanyima, Tessie akabatizibwa yaija yaaba payoniya ow’obutwire, n’obu araabe yaabaire aine abaana bato.” Buzima, abeegi ba Baibuli ku barikutandika kuhindura emitwarize yaabo kushemeza Ruhanga, naabairira haihi kandi ababumba kuba ekintu ky’omuhendo.

17. (a) Niki ekirikukushemeza ahabw’okugira ngu Yehova n’Omubumbi waawe? (b) Ni bintu ki ebiine akakwate n’okubumbwa ebirikuza kugambwaho omu kicweka ekirikukurataho?

¹⁷ N’omu bunaku obu, hakiriho abanogoozi abarikubumba ebintu by’eibumba barikukoresa engaro. Nikyo kimwe, Yehova naatubumba arikutuhana omu kugumisiriza, reero akareeba oku turaatwaze. (Shoma Zaaburi 32:8.) Iwe nk’omuntu nooreeba ngu Yehova naakufaho? Nooreeba oku Yehova ariyo naakubumba n’obwegyendesereza? Ku kiraabe nikwo kiri, ni mitwarize ki erikubaasa kukuhwera kuguma oyorobi nk’eibumba kugira ngu Yehova akubumbe? Ni mitwarize ki ei oshemereire kwetantara, kugira ngu otaba nk’eibumba rigumire eritarikubaasa kubumbwa? Kandi shi abazaire nibabaasa kukora bata na Yehova kubumba abaana baabo? Ekicweka ekirikukurataho nikiija kushoboorora aha nshonga ezi.