Nibajwekyera amahe g’omu iguru agaabaire geejumbire omu kucwekyereza Yerusaalemu, kandi agarikwija kwejumba omu kucwekyereza ensi ya Sitaane embi ahari Haramagedoni. Ahabw’enki enyetegyereza egi ehindwirwemu ehikire?

Bwanyima ya Ezekieli kureeba ebintu bibi birikukorwa abantu abagomi omuri Yerusaalemu etakacwekyereziibwe omuri 607 Y.A., akoorekwa ebintu ebirikukwata aha kucwekyerezibwa okwo. Akareeba abashaija mukaaga baine eby’okurwanisa by’okucwekyereza. Akareeba omushaija omuribo owaabaire ajwaire “ebijwaro bya kitaani” kandi akaba “aine eihembe rya bwino.” (Ezk. 8:6-12; 9:2, 3) Omushaija ogwo akagambirwa ati: “Irooko orabarabe omu rurembo, . . . ote akamanyiso aha buso bw’abantu abarikutsinda nibaborooga ahabw’ebihagaro byona ebirikukorerwamu.” Reero abashaija abaine eby’okurwanisa by’okucwekyereza bakagambirwa kwita boona abari omu rurembo abaabaire bataine kamanyiso. (Ezk. 9:4-7) Okworekwa oku nikutwegyesa ki, kandi omushaija owaabaire aine eihembe rya bwino n’oha?

Obunabi obu bukaheebwa omuri 612 Y.A., kandi bukabanza kuhikiirizibwa obu Yerusaalemu yaacwekyerezibwa eihe ry’Ababulooni bwanyima y’emyaka etaano buherize kugambwa. Yehova niwe yaikiriize Ababulooni abakaafiire kucwekyereza Yerusaalemu. (Yer. 25:9, 15-18) Eki kikaba kiri kityo ahakuba Yehova akabakoresa kufubira abantu be abagomi. Kwonka, bakaba batarikucwekyereza abarungi n’ababi hamwe. Abahikiriire bakaba batarikwija kucwekyerezibwa hamwe n’ababi. Yehova akataho entebeekanisa kujuna Abayudaaya abaabaire batarikukunda ebintu bibi ebyabaire nibikorwa omu rurembo.

Ezekieli akaba ateejumbire omu murimo gw’okutaho akamanyiso nari ogw’okucwekyereza. Omu mwanya gw’ekyo, omurimo gw’okucwekyereza gukaba gwebembeirwe baamaraika. N’ahabw’ekyo kurabira omu bunabi obu, nituhwerwa kureeba ebyabaireho omu iguru ebyabaire bitarikureebwa na maisho. Yehova akaba ahaire baamaraika omurimo gw’okutebeekanisa okucwekyerezibwa kw’ababi n’okushoroora abahikiriire kuhonokaho. *

Enyima, tubaire nitushoboorora ngu omushaija oine bwino naajwekyera abashukirweho amajuta abakiri omu nsi. Tubaire nituteekateeka ngu abo abarikusiima obutumwa bwaitu obu turikubuurira nibaba nibateebwaho akamanyiso k’okwija kuhonokaho. Kwonka omu myaka egi, kyeyorekire gye ngu enshoboorora egi eine kuhindurwamu. Kurugiirira aha biri omuri Matayo 25:31-33, Yesu niwe muramuzi w’abantu. Naija kuramura ogw’aha muheru omu bwire bw’okubonabona kwingi, arikushoroora abari nk’entaama abaraacungurwe arikubashoroora omu bari nk’embuzi abaraacwekyerezibwe.

Mbwenu shi kurugiirira aha nshoboorora egi ensya ehindwirwemu, nitwega ki omu kworekwa kwa Ezekieli? Nitwegamu amashomo nk’ataano:

1.  Yerusaalemu eri haihi kucwekyerezibwa, Ezekieli akakora nk’omurinzi omu bunaku bumwe na Yeremia nk’oku Isaaya yaabaire yaakozire enyima. Obunaku obu, Yehova naakoresa abaheereza be bakye abashukirweho amajuta kuriisa abantu be n’okurabura abandi okubonabona kwingi kutakatandikire. Kandi, n’abakuratsi ba Kristo abaine amatsiko g’okutuura omu nsi nibeejumba omu kurabura oku.​—Mat. 24:45-47.

2.  Ezekieli akaba atari mu murimo gw’okutaho abantu akamanyiso k’okucungurwa, nikyo kimwe  n’abaheereza ba Ruhanga obunaku obu. Eki barikukora kyonka n’okubuurira obutumwa bwa Yehova, barikwebemberwa baamaraika.​—Kush. 14:6.

3.  Omu bunaku bwa Ezekieli, tihaine n’omwe owaatairweho akamanyiso aha buso akarikureebwa. Na hati nikwo kiri. Abantu baine kukora ki kutunga omugisha gw’okwija kuteebwaho akamanyiso omu muringo gw’akamanyiso? Twababuurira nibaba bashemereire kwikiriza ebi baahurira, bakagira emitwarize y’Ekikristaayo, bakeehayo ahari Yehova, kandi bakashagika beene-ishe Kristo. (Mat. 25:35-40) Abo abarikukora ekyo nibaija kuteebwaho akamanyiso k’okucungurwa omu kubonabona kwingi okuri haihi kubaho.

4.  Omu biro ebi, omushaija oine bwino naajwekyera Yesu Kristo otarikureebwa orikwija kuta akamanyiso aha baine amatsiko g’okuhonokaho. Ab’omutwe omuhango nibaija kuteebwaho akamanyiso ku baraashoroorwe nk’entaama omu kubonabona kwingi. Eki nikiija kubabaasisa kugira obuhame bw’okutunga amagara agatahwaho omu nsi.​—Mat. 25:34, 46. *

5.  Obunaku obu, abashaija mukaaga abaine eby’okurwanisa by’okucwekyereza nibajwekyera eihe ry’omu iguru eryebembeirwe Yesu. Obwire butari bwa hare nibaija kucwekyereza amahanga baiheho n’obubi bwona.​—Ezk. 9:2, 6, 7; Kush. 19:11-21.

Okwetegyereza amashomo makuru aga, nikyongyera kutuhamiza ngu Yehova tarikubaasa kucwekyereza abahikiriire n’ababi hamwe. (2 Pet. 2:9; 3:9) Kandi nikyongyera n’okutwijutsya obukuru bw’okubuurira omu bunaku obu. Buri omwe ashemereire kuhurira okurabura oku, emperu etakahikire!​—Mat. 24:14.