Emishororongo egyo neegamba aha mitwarize y’Ekikristaayo mwenda eti: ‘Ekyana ky’omwoyo n’okukunda, okushemererwa, obusingye, okugumisiriza, embabazi, oburungi, [okwikiriza], obucureezi, n’okwerinda.’ Kwonka titwine kuteekateeka ngu emitwarize egi niyo yonka ei omwoyo gurikwera gurikubaasa kutuhwera kugira.

Yetegyereze ebi entumwa Paulo yaahandiikire omu mishororongo ey’enyima: ‘Emirimo y’obuzaarwa bw’omubiri niyo egi; obushambani, ebirikwitsa enshoni, okurigira okubi, okuramya ebishushani, okuroga, okurwana, eihari, ekiniga, empaka, okwebaganisamu, okurwanira orubaju, okwangirana, obusinzi, okuraara enkyera, n’ebindi nk’ebyo.’ (Gal. 5:19-21) N’ahabw’ekyo Paulo taragambire byona ebirikutwarirwa omu ‘mirimo y’obuzaarwa bw’omubiri’ nk’ebyo ebiri omu Abakolosai 3:5. Nikyo kimwe, bwanyima y’okugamba emitwarize mwenda emirungi, akagira ati: ‘Ebiri nk’ebyo tihariho kiragiro ekindi ekirikubizibira.’ N’ahabw’ekyo Paulo akaba atariyo naateeraho kugamba emitwarize mirungi yoona ei turikubaasa kugira ahabw’okuhwerwa omwoyo gurikwera.

Eki kihikire twagyeragyeranisa n’ebi Paulo yaahandiikiire ekibiina ky’omuri Efeso: ‘Ekyana ky’omushana nikireeberwa omu burungi bwona n’omu kuhikiirira n’omu mazima.’ (Efe. 5: 8, 9) Eego, “oburungi” hamwe n’okuhikiirira n’amazima, n’emitwarize ‘y’ekyana ky’omushana,’ kandi nabwo ‘n’ekyana ky’omwoyo gurikwera.’

Nikyo kimwe, Paulo akahiga Timoseo kugira emitwarize mukaaga mirungi erikutwariramu “okuhikiirira n’okutiina Ruhanga, okwikiriza, okukunda, okugumisiriza, n’obucureezi.” (1 Tim. 6:11) Eshatu yonka ahari egi (okwikiriza, okukunda, n’obucureezi) niyo erikugambaho nk’ekyana ky’omwoyo gurikwera. Kwonka, Timoseo akaba aine kugira omwoyo gurikwera kubaasa kugira emitwarize mirungi endiijo erikugambwaho, nk’okuhikiirira, okutiina Ruhanga, n’okugumisiriza.​—Gyeragyeranisa Abakolosai 3:12; 2 Petero 1:5-7.

N’ahabw’ekyo, Abagalatia 5:22, 23 tiharikworeka emitwarize yoona ei Abakristaayo bashemereire kugira. Omwoyo gurikwera nigubaasa kutuhwera kugira emitwarize mwenda erikugambwaho ‘nk’ekyana ky’omwoyo gurikwera.’ Kwonka hariho emitwarize mingi ei turikubaasa kugira twaguma nitukura omu by’omwoyo, kandi tukajwara “omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.”​—Efe. 4:24.