EKICWEKA EKY’OKWEGA 26
“Mungarukire”
“Mungarukire, naanye niinyija kubagarukira.”—MAL. 3:7.
EKYESHONGORO 102 ‘Hwera Abataine Maani’
EBIRAAGAMBWEHO *
1. Yehova naayehurira ata omwe aha ntaama ze yaamugarukira?
NK’OKU tureebire omu kicweka eky’enyima, Yehova naayegyeragyeranisa n’omuriisa murungi orikureeberera gye entaama ze. Kandi naasherura weena orikuba ahabire. Yehova akagambira Abaisraeli abaabaire bamutsigireho ati: “Mungarukire, naanye niinyija kubagarukira.” Nitumanya ngu naayehurira atyo na hati ahakuba naagira ati: “Timpinduka.” (Mal. 3:6, 7) Yesu akagira ngu Yehova na baamaraika nibashemererwa munonga omwe aha baheereza be ohabire yaamugarukira.—Luk. 15:10, 32.
2. Nituza kushwijuma ki omu kicweka eki?
2 Ka tureebe eby’okureeberaho bishatu ebi Yesu yaakoreise ebirikworeka oku turikubaasa kuhwera abahabire bakaruga ahari Yehova. Nituza kureeba emitwarize ei twine kugira kuhwera entaama ehabire kumugarukira. Kandi nituza kwetegyereza ahabw’enki kiri kikuru kuteeraho kushagika abahwairemu amaani.
SHERURA EKINUSHU EKYABUZIRE
3-4. Ahabw’enki omukazi orikugambwaho omuri Luka 15:8-10, yaateireho kusherura ekinushu kye n’obwegyendesereza?
3 Twine kukora n’amaani kusherura abarikwenda kugarukira Yehova. Omu nfumu eri omu kitabo ky’engiri ya Luka, Yesu naashoboorora oku omukazi arikusherura ekinushu kye eky’omuhendo ekirikwetwa rupiiha. Omu ky’okureeberaho eki okusherura niyo nshonga nkuru.—Shoma Luka 15:8-10.
4 Yesu naashoboorora oku omukazi yaayehuriire bwanyima y’okubona ekinushu kye ekyabaire kibuzire. Omu bunaku bwa Yesu, abakazi Abayudaaya bakaba nibakira kuha abahara baabo ebinushu ikumi baaba nibagaitwa. Obundi ekinushu ekyo kikaba kiri kimwe ahari ebyo. Omukazi akaba naateebereza ngu ekinushu kye haine ahu kigwire omu nju. N’ahabw’ekyo akacwamu kuhemba etaara yaakisherura kwonka kyamuburira. Etaara y’amajuta neebaasa kutamurika gye kubaasa kureeba ahu ekinushu kiri. Aha muheru, akacwamu kweyerera enju yoona. Omu mucuucu ogu yaarundaine akashangamu ekinushu kye, eki yaareebire nikyengyengyeta ahabw’ekyererezi ky’etaara ye. Omukazi ogwo akaruhuuka. Akeeta banywani be n’abataahi kubagambira amakuru marungi.
5. Ahabw’enki nikibaasa kuguma kusherura abatakikwatanisa n’ekibiina?
5 Nk’oku turikureeba omu ky’okureeberaho kya Yesu, nikyetengyesa okukora n’amaani kusherura ekintu ekibuzire. Nikyo kimwe, nikitwetengyesa okukora n’amaani kusherura abatakikwatanisa n’ekibiina. Nihabaasa kuba hahingwireho emyaka mingi kuruga obu baarekyera aho kukwatanisa n’ekibiina. Nibabaasa kuba baafurukire bakaza omu mwanya ogundi ahu ab’eishe-emwe batarikubamanya. Kwonka, nitubaasa kuhamya ngu bamwe aharibo buzima baine ekihika ky’okugarukira Yehova. Nibenda kuheereza Yehova n’eka ye ey’abarikumuramya, kwonka twine kubahwera.
6. Boona omu kibiina nibabaasa kwejumba bata omu kusherura abatakibuurira?
6 N’oha orikubaasa kwejumba omu kusherura abatakibuurira? Twena otwariiremu abareeberezi, baapayoniya, ab’amaka gaabo, n’abandi omu kibiina nitubaasa kuhwera. Oine omunywani nari omunyabuzaare otakibuurira? Oine ou orikumanya otakibuurira ou waashangire omu kubuurira enju aha nju nari omu mwanya gw’orweteeraine? Shoboororera omuntu ogwo ngu yaaba naayenda hagire owaamutaayaayira naabaasa kukuha endagiriro ye ei oraije kuha abareeberezi.
7. Ebi omureeberezi Thomas yaagambire nitubyegyeraho ki?
7 Ni bintu ki ebi abareeberezi barikubaasa kukora kusherura abatakibuurira kugarukira Yehova? Yetegyereze ebi omureeberezi omwe orikwetwa Thomas * orikutuura omuri Spain yaagambire. Ahweraire ababuurizi abarikurenga 40 kugaruka omu kibiina. Thomas naagira ati: “Eky’okubanza, nimbuuza ab’eishe-emwe na banyaanyazi-itwe yaaba haine otakibuurira ou barikumanya ahu arikutuura. Nari nimbabuuza yaaba nibamanya ow’eishe-emwe otakiija omu nteerane. Baingi omu kibiina nibaba bashemereirwe kwejumba omu kusherura oku. Bwanyima, ku ndikutaayaayira ow’eishe-emwe otakibuurira, nimubuuza ebirikukwata aha baana be nari abanyabuzaare. Bamwe aharibo nibabaasa kuba baabaire nibakira kwija n’abaana baabo omu nteerane, kandi abaana nibabaasa kuba baabaireho ababuurizi. Nabo nibabaasa kuhwerwa kugarukira Yehova.”
MUGARURE ABOOJO N’ABAHARA BA YEHOVA ABAABUZIRE
8. Ishe w’omwana omuri Luka 15:17-24, akatwariza ata omutabani owaarazire bwanyima akeeteisa?
8 Twine kugira mitwarize ki kubaasa kuhwera abarikwenda kugarukira Yehova? Yetegyereze amashomo agu turikwega omu ky’okureeberaho kya Yesu eky’omwana owaarazire. (Shoma Luka 15:17-24.) Yesu naashoboorora oku omwana ogwo yaayetaire omu kifuba akagaruka omu ka. Ishe akairuka yaamubugana yaamugwa omu kifuba, yaamuhamiza ngu naamukunda. Omwana owaarazire akaba naayeshinja kandi arikwehurira ngu ishe tahikire kumweta omutabani. Ishe akagirira omutabani esaasi, owaagambire oku arikwehurira. Reero yaagira eki yaakora kuhamiza omutabani ngu naayaakiirwa omu ka ye, nk’omwana orikukundwa beitu atari mukozi. Kubaasa kukyoreka, akatebeekanisiza omutabani owaayeteisize obugyenyi, kandi yaamuha ebijwaro birungi by’okujwara.
9. Twine kugira mitwarize ki kuhwera abatakibuurira kugarukira Yehova? (Reeba akabokusi “ Oku Orikubaasa Kuhwera Abarikwenda Kugaruka.”)
9 Yehova ni nk’omuzaire omu ky’okureeberaho eki. Naakunda ab’eishe-emwe na banyaanyazi-itwe abatakibuurira, kandi naayenda ngu bamugarukire. Twatooreza Yehova nitubaasa kubahwera kugaruka. Eki nikyetengyesa ngu tugire okugumisiriza, esaasi, na rukundo. Ahabw’enki twine kugira emitwarize egi, kandi nitubaasa kukikora tuta?
10. Ahabw’enki twine kugumisiriza twaba nituhwera omuntu kugarukira Yehova?
10 Twine kugumisiriza ahakuba nikitwara obwire omuntu kukira omu by’omwoyo. Baingi abaabaire batakibuurira nibagira ngu bakagaruka baatandika kubuurira bwanyima y’okutaayaayirwa abareeberezi n’abandi omu kibiina emirundi mingi. Munyaanyazi-itwe orikwetwa Nancy, kuruga Asia akahandiika ati: “Munywani wangye ow’aha mara akampwera munonga. Akaba naankunda orikushusha ngu ni mukuru wangye. Akanyijutsya obwire burungi obu twagizire ira. Akaba naampurikiza naaba nimugambira oku ndikwehurira kandi atarikweziringa kumpa obuhabuzi. Akaba omunywani owaabuzima, oyeteekateekire kuhwera obwire bwona.”
11. Ahabw’enki twine kugira esaasi kubaasa kuha obuhuumure abaine enyehurira mbi?
11 Esaasi ni nk’omubazi gw’amaani ogw’okwesiimuura ogurikuhwera omuntu oine obusaasi kwehurira gye. Abamwe abatakibuurira nibabaasa kuba nibateganisibwa enyehurira mbi ezi baine aha muntu omu kibiina. Enyehurira ezi nizibaremesa kugarukira Yehova. Abamwe nibabaasa kuba nibateekateeka ngu bakatwarizibwa kubi. Nibabaasa kuba nibenda omuntu w’okubahurikiza kandi orikwetegyereza enyehurira zaabo. (Yak. 1:19) María, owaamazire obwire atarikubuurira naagira ati: “Nkaba niinyenda omuntu w’okumpurikiza, akangumya, kandi akampa n’obuhabuzi.”
12. Ha eky’okureeberaho kworeka oku Yehova arikuhwera abatakibuurira kugaruka omu kibiina.
12 Baibuli neegyeragyeranisa rukundo ei Yehova ainiire abantu be n’omurunga nari omuguha. Ni muringo ki ogu rukundo ya Ruhanga eri nk’omuguha? Teekateeka aha ky’okureeberaho eki: Teera akashushani ngu oriyo nootobera omu nyanja reero omuntu akutambikira ekijwaro ky’okwibira. Buzima noija kusiima obuhwezi obwo ahakuba nikiza kukuhwera kuguma aha mutwe gw’amaizi. Ekijwaro ekyo kyonka tikirikumara kukuhwera kuguma ohuriire. Amaizi gaaba nigafuka, torikwija kuguma ohuriire okwihaho waaza omu bwato. Nikyetengyesa omuntu kukutambikira omuguha kandi akakunyurira kukwiriza haihi n’obwato. Yehova akagambira Abaisraeli abaabaire bamutsigireho ati: ‘Nkabairiza haihi n’emigoye ya rukundo.’ (Hos. 11:4) Yehova nikwo arikwehurira atyo yaareeba abarekyeire aho kumuheereza, abaine oburemeezi n’amaganya maingi. Naayenda bamanye ngu naabakunda, kandi naayenda kubairiza haihi. Yehova naabaasa kurabira omuriiwe kubooreka rukundo ye.
13. Gamba eky’okureeberaho ekirikworeka amaani ga rukundo y’Ekikristaayo.
13 Ni kikuru kuhamiza abatakibuurira ngu Yehova naabakunda kandi ngu naitwe nitubakunda. Pablo, orikugambwaho omu kicweka eky’enyima, akamara emyaka erikurenga 30 atarikubuurira. Naagira ati: “Omu kasheeshe kamwe, nkaba ninduga omuka, munyaanyazi-itwe omwe okuzire ow’embabazi yaambugana kandi yaagaaniira naanye omu muringo gwa rukundo. Nkatandika kurira nk’omwereere. Nkamugira ngu nikireebeka Yehova niwe yaamutuma kugamba naanye. Omu kaire ako nibwo naacwamu kugarukira Yehova.”
FAYO KUSHAGIKA ABAHWAIREMU AMAANI
14. Kurugiirira ahari Luka 15:4, 5, omuriisa akakora ki ku yaaboine entaama ye eyaabaire ebuzire?
14 Abatakibuurira nituba twine kugumizamu nitubashagika. Nk’omwana owaarazire omu ky’okureeberaho kya Yesu, nibabaasa kuba baine enkojo omu nyehurira. Kandi nibabaasa kuba bahwairemu amaani omu by’omwoyo ahabw’ebi barabiremu omu nsi ya Sitaane. Twine kubahwera kugaruka kwombeka okwikiriza kwabo omuri Yehova. Yesu omu ky’okureeberaho ky’entaama eyaabuzire, naayoreka oku omuriisa arikuta entaama aha mabega ge, akagigarura omu zindi. Omuriisa naaba amazire obwire bwe n’amaani arikusherura entaama ebuzire. Kwonka naayetegyereza ngu aine kugikiriza kugigarura omu zindi ahakuba teine maani g’okwegarurayo.—Shoma Luka 15:4, 5.
15. Nitubaasa kuhwera tuta abahwairemu amaani abarikwenda kugarukira Yehova? (Reeba akabokusi “ Akatabo k’Omuhendo.”)
15 Nikibaasa kutwetengyesa kwefeerereza obwire n’amaani kuhwera abahwairemu amaani kugarukira Yehova. Twine obushagiki bw’omwoyo gurikwera, nitubaasa kubahwera kugaruka kuhama omu by’omwoyo, turikukoresa Ekigambo kya Yehova, n’ebitabo by’ekibiina. (Rom. 15:1) Nitubaasa kukikora tuta? Omureeberezi oheereize emyaka mingi naagira ati: “Abatakibuurira abaingi baine kwegyesibwa Baibuli baaheza kucwamu ngu buzima nibenda kugarukira Yehova.” * Waashabwa kwegyesa Baibuli otakibuurira, ahabw’enki otarikwikiriza obujunaanizibwa obwo oshemereirwe? Omureeberezi naayongyeraho ati: “Omubuurizi orikumwegyesa Baibuli aine kuba ari omunywani murungi, ou arikubaasa kugambira ebihama bye.”
OKUSHEMERERWA OMU IGURU N’OMU NSI
16. Nitumanya tuta ngu nitubaasa kutunga obushagiki bwa baamaraika?
16 Hariho eby’okureeberaho bingi ebirikworeka oku baamaraika barikukorera hamwe naitwe omu kusherura abatakibuurira abarikwenda kugarukira Yehova. (Kush. 14:6) Nk’eky’okureeberaho, Silvio, okuruga Ecuador, akashaba ngu abaase kugaruka omu kibiina. Ku yaabaire naashaba, akahurira abarikwiguza aha rwigi rwe. Bakaba bari abareeberezi babiri. Omu kutaayaaya kwabo, bakaba baine ekihika ky’okumuha obuhwezi oburikwetengyesa.
17. Nitutunga birungi ki twayejumba omu kuhwera abatakibuurira?
17 Nitwija kutunga okushemererwa twayejumba omu kuhwera abahwairemu amaani omu by’omwoyo kugarukira Yehova. Yetegyereze eki payoniya orikwetwa Salvador, orikukira kuta omutima aha kuhwera abatakibuurira, arikugamba, naagira ati: “Obumwe, nikiingumira kwezibira kurira ahabw’okushemererwa. Nikinshemeza munonga kureeba oku Yehova arikucungura emwe aha ntaama ze kuruga omu nsi ya Sitaane, n’okureeba ngu nyine omugisha gw’okukwatanisa nawe omu murimo ogu.”—Byak. 20:35.
18. Waaba otakibuurira, noobaasa kugira buhame ki?
18 Waaba otakikwatanisa n’abaheereza ba Yehova, noobaasa kuhamya ngu naakikukunda. Naayenda ngu omugarukire. Kwonka oine kugira eki waakora kumugarukira. Nka ishe w’omwana omu ky’okureeberaho kya Yesu, Yehova aine ekihika ky’okureeba noogaruka, kandi ayeteekateekire kukwakiira.
EKYESHONGORO 103 Abareeberezi—n’Ebiconco omu Bantu
^ kacw. 5 Yehova naayenda ngu abatakikwatanisa n’ekibiina kye bamugarukire. Nitubaasa kukora kihango omu kuhwera abo abarikwenda kwikiriza okwetwa kwa Yehova oku: “Mungarukire.” Omu kicweka eki, nituza kureeba oku turikubaasa kubahwera kukikora.
^ kacw. 7 Amaziina agamwe gahindwirwe.
^ kacw. 15 Abamwe abatakibuurira nibabaasa kuhwerwa barikwega eshuura zimwe omu kitabo Oku Oine Kuguma Omuri Rukundo ya Ruhanga, kandi abandi eshuura z’ekitabo Draw Close to Jehovah. Akakiiko k’Ekibiina ak’Obuheereza nikaija kutoorana ohikire kwegyesa ogwo obaire atakibuurira.
^ kacw. 68 ENSHOBOORORA Y’EBISHUSHANI: Ab’eishe-emwe bashatu nibahwera ow’eishe-emwe orikwenda kugarukira Yehova. Nibakikora barikuteeraho kuguma nibahurizana nawe, barikumuhamiza ngu nibamukunda, kandi barikumuhurikiza.
