Paulo akahandiika ngu kurabira omu ‘biragiro nkafa ahabw’ebiragiro, ngu mbone kuba ohuriire ahari Ruhanga.’​—Gal. 2:19.

Eki Paulo yaahandiikire kikaba nikihikaana n’enshonga nkuru ei yaabaire naahamiza ab’ebibiina bya Galatia omu matware ga Rooma. Abakristaayo abamwe bakaba nibahabisibwa abeegyesa b’ebishuba. Abashaija aba bakaba nibeegyesa ngu kubaasa kujunwa omuntu aine kworobera Ekiragiro kya Musa eky’okusharwa. Kwonka Paulo akaba naamanya ngu tikyakyetengyesa baheereza ba Ruhanga kusharwa. Akashoboorora gye, arikworeka butunu ngu enyegyesa ezo zigwire, kandi yaahwera n’ab’eishe-emwe kwikiririza omu kitambo kya Yesu Kristo.​—Gal. 2:4; 5:2.

Baibuli neeyoreka butunu ngu omuntu yaafa, naaba ataine ki arikumanya nari kukwatwaho ebimwetooroire. (Mub. 9:5) Entumwa Paulo okugira ngu: ‘Akafa ahabw’ebiragiro,’ akaba atarikumanyisa ngu takitegyekwa ebiragiro bya Musa. Kureka, Paulo akaba naahamiza kimwe ngu ahabw’okwikiririza omu kitambo, akaba ari “ohuriire ahari Ruhanga.”

Embeera za Paulo zikahinduka “ahabw’ebiragiro.” Mu muringo ki? Akaba yaashobooroire ngu ‘omuntu tarikwihwaho rubanja ahabw’okuhikiiriza ebiragiro, kureka ahabw’okwikiriza Yesu Kristo.’ (Gal. 2:16) Kwonka, Ebiragiro bikaba bihikiriize ekintu kikuru. Paulo akashoboororera Abagalatia ati: “Bikongyerwaho ahabw’okushiisha, okuhitsya aha kwija kw’Omwijukuru ogwo owaaraganisiibwe omu ndagaano.” (Gal. 3:19) Eego, Ebiragiro bikooreka gye ngu abantu abatahikiriire, tibarikubaasa kworobera gye ebiragiro byona omu muringo oguhikire, kandi ngu kikaba nikyetengyesa ekitambo ekihikire eky’aha muheru. N’ahabw’ekyo Ebiragiro bikahitsya abantu aha ‘mwijukuru,’ niwe Kristo. Omuntu yaikiririza omu kitambo kya Yesu Kristo, Ruhanga naabaasa kumureeba nk’ohikiriire. (Gal. 3:24) Paulo akaba ohikiriire ahabw’okworobera ebiragiro, kandi akaikiririza omuri Yesu. Obwo nibwo Paulo yaafa ‘ahabw’ebiragiro’ kandi akaba “ohuriire ahari Ruhanga.” Ebiragiro bikaba bitakimwineho bushoboorozi kureka Ruhanga.

Paulo akagamba aha nshonga niyo emwe omu baruha ei yaahandiikiire Abarooma. “B’eishe-emwe, mukafa aha Biragiro ahabw’okufeera hamwe na Kristo omu mubiri gwe. . . . Hati tukomoroirwe, titwakitegyekwa Biragiro ahabw’okufa ahari ekyo ekyabaire kitukwatsire.” (Rom. 7:4, 6) Ekyahandiikirwe eki hamwe n’ebiri n’omu Abagalatia 2:19, nibyoreka ngu Paulo akaba atarikugamba aha kufa nk’omusiisi ahabw’ebiragiro. Kureka, akaba naagamba butunu aha kucungurwa. Kandi we n’abandi abari omu mbeera nk’eye bakaba batakiri hansi y’ebiragiro. Bakakomoororwa ahabw’okwikiririza omu kitambo kya Kristo.