1. Yehova akoreire ki buri omwe ahariitwe?

YEHOVA atweyiriize haihi. (Yoh. 6:44) Teekateeka aha makuru g’eki. Yehova ku yaabaire naayetegyereza obuhumbi n’obuhumbi bw’abantu boona abari omu nsi, akabareebamu ekintu ky’omuhendo nigwo mutima gw’amazima ogurikubaasa kwongyera kumukunda. (1 Bus. 28:9) Yehova naakumanya, naakwetegyereza, kandi naakukunda. Buzima ka nikihuumuriza!

2. Yesu akaha ky’okureeberaho ki kworeka oku Yehova arikufayo aha buri ntaama?

² Yehova naakufaho munonga, kandi naafayo n’aha Bakristaayo bagyenzi baawe boona. Kubaasa kutuhwera kwetegyereza enshonga egi, Yesu akagyeragyeranisa Yehova n’omuriisa. Entaama emwe ahari igana yaahaba ekaruga omu zindi, omuriisa naakora ki? Naija ‘kutsigaho makumi mwenda na mwenda aha mugongo, aze kusherura egyo erazire.’ Omuriisa yaaheza kugitunga, tarikwija kugitwariza kubi ahabw’okurara. Naija kushemererwa. Enshonga n’eha? Buri ntaama n’ey’omuhendo ahari Yehova. Yesu akagira ati: ‘Na Tata ori omu iguru tarikwenda omwe ahari aba abato kuhwerekyerera.’​—Mat. 18:12-14.

3. Nituza kushwijuma ki omu kicweka?

³ Buzima titurikwenda kuba niitwe twamaramu ab’eishe-emwe na banyaanyazi-itwe amaani. Nitubaasa kwetantara tuta kuteeza abandi entsibo? Nitubaasa kukora ki omuntu yaatugwisa kubi? Ebibuuzo ebi nibiza kugarukwamu omu kicweka  eki. Kwonka, ka tubanze twetegyereze gye “abato” abarikugambwaho omuri Matayo eshuura 18.

4. “Abato” abu Yesu yaagambireho ni baahi?

⁴ “Abato” aba n’abeegi ba Yesu ab’emyaka yoona. Oyihireho emyaka ei baine, boona ‘n’abaana bato’ ahakuba nibaba beeteekateekire kwegyesibwa Yesu. (Mat. 18:3) N’obu baakuba nibaruga omu nganda zitarikushushana, kandi baine emitwarize y’omutaano, boona nibaikiririza omuri Kristo. Kandi nawe naabakunda munonga.​—Mat. 18:6; Yoh. 1:12.

5. Yehova naayehurira ata haagira owaateeza entsibo omwe aha baheereza be nari yaamukora kubi?

⁵ Abato boona n’ab’omuhendo ahari Yehova. Kubaasa kwetegyereza oku arikwehurira, teekateeka aha ku turikutwara abaana. Nitubareeba nk’ab’omuhendo. Nituba nitwenda kubarinda ahabw’okugira ngu tibaine maani, okumanya, n’obwengye nk’obw’abantu bakuru. Nangwa, n’obu turaabe tutarikwenda kureeba omuntu weena naatwarizibwa kubi, titurikwehurira gye haagira owaagwisa kuba omwana muto. Omu muringo nigwo gumwe, Yehova naayenda kuturinda, kandi nikimugwisa kubi haagira owaateeza entsibo omwe aha baheereza be nari yaamukora kubi!​—Isa. 63:9; Mak. 9:42.

6. Kurugiirira aha 1 Abakorinso 1:26-29, abantu b’ensi nibareeba bata abeegi ba Yesu?

⁶ Ni miringo ki endiijo ei abeegi ba Yesu bari nk’abaana bato? Ni baahi abarikureebwa nk’ab’omuhendo omu ensi egi? N’abagaiga, baaruranganwa, nari ab’amaani. Okutaana n’ekyo, abeegi ba Yesu nibatwarwa nk’abaana bato abataine mugasho. (Shoma 1 Abakorinso 1:26-29.) Kwonka Yehova tikwo arikubareeba.

7. Yehova naayenda ngu tutware tuta ab’eishe-emwe na banyaanyazi-itwe?

⁷ Yehova naakunda abaheereza be boona yaaba bamazire obwire bukye nari emyaka mingi omu mazima. Ab’eishe-emwe na banyaanyazi-itwe boona n’ab’omuhendo ahari Yehova, n’ahabw’ekyo naitwe twine kubatwara nk’ab’omuhendo. Nitwenda ‘kukunda ab’eishe-emwe’ boona batari bamwe. (1 Pet. 2:17) Twine kuba tweteekateekire kukora kyona ekirikubaasika kubarinda n’okubafaho. Twamanya ngu haine ou tugwisize kubi, titwine kukyehuzya, tukateekateeka ngu omuntu ogwo aine kutusaasira kandi akakyebwa. Ahabw’enki abantu abamwe nibarahuka kuguubwa kubi? Obundi n’ahabw’embeera ei baakuriiremu, kandi ab’eishe-emwe na banyaanyazi-itwe abamwe nibeereeba nk’ab’ahansi. Abandi nibasya omu mazima, tibakeegire gye kukwatanisa n’abandi n’obu baakuba batahikiriire. N’obu twakutunga obutaikirizana burikwingana ki, twine kuteeraho kugaruraho obusingye. Kandi, ogwo orikurahuka kugirira abandi ekiniga aine kumanya ngu omutwarize ogwo ti murungi, kandi aine kuteeraho kukora empinduka. Ekyo aine kukikora kubaasa kugira obusingye bw’omu biteekateeko n’enkoragana nungi n’abandi.

8. Abeegi ba Yesu bakaba nibabaasa kuhabisibwa miteekateekyere ki?

⁸ Niki ekyahigire Yesu kugamba ahari “abo abato”? N’ahabw’okuba abeegi be bakaba baamubuurize ekibuuzo eki: “Omukuru omu bukama bw’omu iguru n’oha?” (Mat. 18:1) Abayudaaya baingi bakaba nibakunda emyanya y’ahaiguru n’ebitiinisa. Omucondooza omwe akagira ati: “Okusherura ekitiinisa, okurangaanwa, okumanywa, n’okusiimwa, ekaba eri enshonga y’okufa n’okukira.”

9. Abeegi ba Yesu bakaba baine kukora ki?

 ⁹ Yesu akaba naamanya ngu abeegi be baine kukora n’amaani kubaasa kweihamu emiteekateekyere egwire. Akabagambira ati: “Omukuru omuriimwe abe nk’omuto; kandi [orikureeberera abandi] abe nk’orikuheereza.” (Luk. 22:26) Nituba turi ‘nk’abato’ twatwariza abandi ‘nk’abarikutukira.’ (Fil. 2:3) Ahu turikugarukira kuba nk’abato nitwija kwetantara kuteeza abandi entsibo.

10. Ni buhabuzi ki bwa Paulo obu twine kuguma nitwijuka?

¹⁰ Ab’eishe-emwe na banyaanyazi-itwe boona nibatukira omu miringo etari emwe n’emwe. Eki tikigumire kureeba twata omutima aha mitwarize yaabo mirungi. Twine kwijuka obuhabuzi bwa Paulo obu yaahaire Abakorinso arikugira ati: ‘N’oha orikukuhindura ow’omutaano aha bandi? Kandi oine ki eki otarahairwe? Mbwenu ku oraabe waakihairwe, ahabw’enki nooyehimbisa nk’otarakihairwe?’ (1 Kor. 4:7) Twine kukimanya ngu nitubaasa kwohibwa kwetaho omutima nari kuteekateeka ngu nitukira abandi. Ow’eishe-emwe yaaba naaha embazo nungi nari munyaanyazi-itwe yaaba aine ekiconco ky’okutandika abeegi ba Baibuli, bombi nibaba baine kuha Yehova ekitiinisa.

11. Nitwegyera ki aha ky’okureeberaho kya Yesu eky’omugabe n’omuhuuku?

¹¹ Ahonaaho Yesu aherize kurabura abeegi be kutateeza abandi entsibo, akaha eky’okureeberaho eky’omugabe n’omuhuuku. Omugabe akasaasira omuhuuku eibanja rihango eri yaabaire atarikubaasa kushashura. Bwanyima, omuhuuku niwe omwe akaba atarikwenda kusaasira omuhuuku mugyenzi we eibanja rikye. Aha muheru, omugabe akakwata omuhuuku ogwo otaine saasi yaamunaga omu kihome. Eky’okwega? Yesu akagira ati: “Nikwo Tata ow’omu iguru aribagira atyo, ku muriba mutasaasiire bagyenzi baanyu, mwihire aha mutima.”​—Mat. 18:21-35.

12. Twayanga kusaasira, nitukora kubi tuta abandi?

¹² Ebikorwa by’omuhuuku bikamureetera oburemeezi hamwe n’abandi. Eky’okubanza, taragiriire omuhuuku mugyenzi we esaasi, kureka akamukwata ‘yaamuta omu kihome, kuhitsya obu araaheze kushashura eibanja.’ Ekya kabiri, akagwisa kubi abahuuku abandi ahabw’eki yaakozire. Abahuuku “bagyenzi be, ku baareebire ebyabaho, baamugwerwa kubi munonga.” Omu muringo nigwo gumwe, ebi turikukora nibikwata aha bandi. Omuntu yaatukora kubi kandi tukanga kumusaasira, niki ekirikubaasa kubaho? Eky’okubanza, nitumureetera kwehurira kubi ahabw’okwanga kumusaasira, okumwetantara, n’okworeka ngu titurikumukunda. Ekya kabiri, nitureetera abandi omu kibiina kubura obusingye baareeba ngu titwine nkoragana nungi n’ondiijo.

13. Nooyegyera ki aha ky’okureeberaho kya payoniya omwe?

¹³ Twasaasira ab’eishe-emwe na banyaanyazi-itwe, nitwegasira hamwe n’abandi. Eki nikyo kyahikire ahari munyaanyazi-itwe ou turaayete Crystal. Munyaanyazi-itwe omwe akamugwisa kubi. Crystal naagira ati: “Ebigambo bye ebitari by’embabazi bikaba nibiincumita nk’omutsyo. Turikuza omu buheereza, nkaba mba ntarikwenda kugyenda nawe omu motoka emwe. Omujinya gwangye n’okushemererwa bikatandika kutuuba.” Crystal akaba naateekateeka ngu aine enshonga ehikire erikumureetera kuguubwa kubi. Kwonka akanga kuguma aine enziika nari kuguma ataire omutima aha nyehurira ye. Omu bucureezi akateeraho kukuratira obuhabuzi bw’ebyahandiikirwe  obwaiziire omu Watchtower ey’Okitoba 15, 1999, omu kicweka “Saasira Oyihire aha Mutima.” Kandi akasaasira mugyenzi we ogwo. Crystal naagira ati: “Hati nyetegyereize ngu twena nituteeraho kutaho omuntu musya kandi Yehova naatusaasirira busha buri izooba. Hati nyine oburuhuuko nk’omuntu owaatuura omugugu guremeire munonga. Hati ngarukire naatunga okushemererwa.”

14. Kurugiirira ahari Matayo 18:21, 22, entumwa Petero akaba aine buremeezi ki, kandi eki Yesu yaamugarukiremu nookyegyeraho ki?

¹⁴ Nitumanya ngu twine kusaasira, kandi ekyo n’ekintu kihikire. Kwonka nabwo nitubaasa kugumirwa kukikora. Entumwa Petero obumwe akaba naayehurira atyo. (Shoma Matayo 18:21, 22.) Niki ekirikubaasa kutuhwera? Eky’okubanza, teekateeka aha mirundi ei Yehova akusaasiire. (Mat. 18:32, 33) Yehova tashemereire kuba naatusaasira, kwonka naaatusaasirira busha. (Zab. 103:8-10) Ekindi, “naitwe tushemereire kukundana.” N’ahabw’ekyo okusaasira abandi n’ekiragiro. Twine eibanja ry’okusaasira ab’eishe-emwe na banyaanyazi-itwe. (1 Yoh. 4:11) Ekya kabiri, teekateeka aha birikubaasa kubaho twasaasirana. Nituhwera omuntu owaatushagiza, tureetaho obumwe omu kibiina, turinda omukago gwaitu na Yehova, kandi tutunga n’oburuhuuko. (2 Kor. 2:7; Kol. 3:14) Ekya muheru, shaba Ogwo orikutuhiga kusaasira abandi. Otaikiriza Sitaane kuteganisa obusingye obu twine n’ab’eishe-emwe bagyenzi baitu. (Efe. 4:26, 27) Yehova naaba aine kutuhwera kubaasa kwetantara kugwa omu mutego gwa Sitaane.

15. Nk’oku kiri omu Abakolosai 3:13, eki ow’eishe-emwe nari munyaanyazi-itwe akozire kyatuteganisa nitubaasa kukora ki?

¹⁵ Kandi shi ow’eishe-emwe ku yaakutwaza kubi kikatuteganisa? Oine kukora ki? Teeraho nk’oku kirikubaasika kugaruraho obusingye.  Gambira Yehova omu kushaba oku orikwehurira. Mushabe kuha omugisha omuntu owaakutuntuza n’okukuhwera kumureebamu emitwarize mirungi, ei Yehova arikukundira omuntu ogwo. (Luk. 6:28) Waaba otarikubaasa kwehuzya eki ow’eishe-emwe akukozire, teekateeka aha ku orikubaasa kukigaaniiraho nawe. Butoosha nikiba kiri kirungi kuteekateeka ngu ow’eishe-emwe naaba atagyendereire kukugwisa kubi. (Mat. 5:23, 24; 1 Kor. 13:7) Twakigaaniiraho nawe, ka tuteereho kumugiraho ebiteekateeko birungi. Kandi shi ku yaakuba atarikwenda kugarukana naiwe? Teeraho ‘kumugumisiririza.’ Otahemuka aha w’eishe-emwe mugyenzi waawe. (Shoma Abakolosai 3:13.) Ekirikukirayo obukuru, yetantare kubiika enziika, ahakuba ekyo nikibaasa kushiisha omukago gwawe na Yehova. Otaikiriza ekintu kyona kukuteeza entsibo. Waakora ekyo, noija kworeka butunu ngu nookunda Yehova kukira ekindi kintu kyona.​—Zab. 119:165.

16. Twena twine bujunaanizibwa ki?

¹⁶ Omugisha gw’okuheereza Yehova ‘nk’obusyo bumwe’ ahansi ‘y’omuriisa omwe’ nitugutwara nka mukuru! (Yoh. 10:16) Akatabo Organized to Do Jehovah’s Will, aha rupapura 165, nihagira hati: “Kubaasa kugasirwa omu bumwe bw’ekibiina, oine obujunaanizibwa bw’okuburinda.” N’ahabw’ekyo twine “kwetendeka kureeba ab’eishe-emwe na banyaanyazi-itwe nk’oku Yehova arikubareeba.” Ahari Yehova twena turi “abato” ab’omuhendo. Naiwe nikwo orikureeba ab’eishe-emwe na banyaanyazi-itwe? Yehova naareeba buri kimwe eki orikukora kubahwera n’okubafaho kandi naasiima.​—Mat. 10:42.

17. Twine kumariirira kukora ki?

¹⁷ Nitukunda boona abu turikuramya nabo. N’ahabw’ekyo nitumariirira “okutateeza mwene [waitu entsibo], nari okukora ekirikumugwisa.” (Rom. 14:13) Nitutwara ab’eishe-emwe na banyaanyazi-itwe nk’abarikutukira, kandi nitwenda kubasaasira twihire aha mutima. Ka tumariire kutaikiriza abandi kututeeza entsibo. Kureka, ka “tukuratire ebirikureeta obusingye n’okwombekana.”​—Rom. 14:19.