1. Ahabw’enki abaheereza ba Yehova obumwe nibagira eihamba?

BAINGI ahariitwe obumwe nitugira eihamba. Abamwe, eihamba nirirahuka kuhwa. Abandi, nibamara obwire bwingi bariine. Nitubaasa n’okugira eihamba nangwa n’obu twakuba turi n’abantu abandi. Hariho n’abarikugumirwa kuhurira baijwire omu kibiina. Abamwaija nibaruga omu maka agarikukwatanisa, kwonka ku barikuza hare n’abanyabuzaare baabo ekyo nikibareetera kuba emboijana. Kandi abamwe nibaba bainiire orushusho omukundwa waabo owaafiire. Kandi Abakristaayo abamwe, na munonga abaherize kwega amazima, nibabaasa kwehurira nk’abatsigirweho baaba nibahakanisibwa abanyabuzaare nari banywani baabo ab’okubanza.

2. Nituza kugarukamu bibuuzo ki?

² Yehova naamanya kandi naayetegyereza buri kimwe ekirikutukwataho. Twaba turi emboijana, naakimanya, kandi naaba naayenda kutuhwera kusingura enyehurira ezo. Yehova naatuhwera ata? Nitubaasa kukora ki kwehwera? Kandi nitubaasa kuhwera tuta abandi omu kibiina abaine eihamba? Ka tureebe eby’okugarukamu by’ebibuuzo ebyo.

3. Yehova akooreka ata ngu naayetegyereza Eliya?

³ Yehova naafayo munonga aha mbeera z’abaheereza be. Ari haihi na buri omwe ahariitwe, kandi naatumanya gye enyehurira z’okutamwa zaatureetera kushoberwa. (Zab. 145:18, 19) Yetegyereze oku Yehova yaamanyire ebirikukwata ahari nabi Eliya. Omushaija ogwo omwesigwa akabaho omu bwire bugumire omu byafaayo. Abarikuramya Yehova bakaba nibahiiganisibwa  kubi munonga, kandi abazigu bakaba nibasherura Eliya kumwita. (1 Bag. 19:1, 2) Kandi ekindi ekyateganiise Eliya n’okuteekateeka ngu niwe nabi wenka owaabaire naakiheereza Yehova. (1 Bag. 19:10) Yehova ahonaaho akeetegyereza Eliya. Akoohereza maraika kuhamiza Eliya ngu akaba atari wenka, kureka ngu hakaba hakiriho Abaisraeli abandi abarikutiina Ruhanga!​—1 Bag. 19:5, 18.

4. Mako 10:29, 30 nihooreka hata ngu Yehova naafayo aha baheereza be abaatsigireho abantu baabo?

⁴ Yehova naayetegyereza gye ngu bamwe ahariitwe nitwefeerereza bingi kucwamu kumuheereza. Ebi nibibaasa kutwariramu abanyabuzaare baitu abatari mu mazima n’abanywani. Obundi ahabw’okugira ngu entumwa Petero akaba ayerarikiriire ahari eki, akabuuza Yesu ati: ‘Itwe tukatsigaho byona, twakukuratira. Mbwenu nitwija kutunga ki?’ (Mat. 19:27) Yesu akahamiza abeegi be omu muringo gwa rukundo ngu nibaija kutunga eka mpango ey’eby’omwoyo. (Shoma Mako 10:29, 30.) Kandi Yehova, omutwe gw’eka yaitu ey’eby’omwoyo, naaraganisa kushagika abarikwenda kumuheereza. (Zab. 9:10) Yetegyereze ebintu bimwe ebi orikubaasa kukora kutunga obuhwezi bwa Yehova waaba nooteeraho kurwanisa eihamba.

5. Ni birungi ki ebirikuruga omu kuta omutima aha ku Yehova arikukubangira?

⁵ Ta omutima aha ku Yehova arikukubangira. (Zab. 55:22) Eki nikiija kukuhwera kugira emiteekateekyere eringaniire aha mbeera yaawe. Munyaanyazi-itwe Carol, * otari mu bushwere, kandi ou abanyabuzaare be batari mu mazima, naagira ati: “Ku ndikureeba enyima nkateekateeka aha ku Yehova atwire naanshagika omu kugyezibwa kwangye, buzima nikindeetera kuhurira ngu tindi nyenka. Kandi eki nikimpamiza ngu Yehova naija kumbangira omu biro by’omumaisho.”

6. Ebiri omu 1 Petero 5:9, 10 nibihiga bita abarikuhurira baine eihamba?

⁶ Teekateeka aha ku Yehova arikuhwera ab’eishe-emwe abaine eihamba. (Shoma 1 Petero 5:9, 10.) Hiroshi, ow’eishe-emwe  omazire emyaka mingi ari Omujurizi wa Yehova omu ka yaabo wenka, naagira ati: “Omu kibiina, kyorobi kureeba ngu tihaine oine embeera zihikiriire. Twamanya ngu twena nituteeraho kuheereza Yehova, nikibaasa kutugumya itwe abataine banyabuzaare omu mazima.”

7. Okushaba nikukuhwera kuta?

⁷ Guma oine entebeekanisa nungi y’eby’omwoyo. Eki nikitwariramu okugambira Yehova butunu oku orikwehurira. (1 Pet. 5:7) “Kimwe aha bintu bikuru ebyampweraire kwemera eihamba n’okushaba Yehova obutaruha,” Massiel nikwo arikugira. Ogu ni munyaanyazi-itwe muto owaabaire naahurira atakiijura omu ka yaabo ahabw’okuba wenka omu mazima. “Yehova akaba Tata owaabuzima, kandi nkaba niimushaba emirundi mingi buri izooba, ndikumugambira oku ndikwehurira.”

8. Okushoma Ekigambo kya Ruhanga n’okukiteekateekaho kikuhweraire kita?

⁸ Shoma Ekigambo kya Ruhanga butoosha, teekateeka aha byahandiikirwe ebirikworeka butunu ngu Yehova naakukunda. Bianca, orikugumira ab’eka ye abarikugamba ebigambo ebirikumaramu amaani, naashoboorora ati: “Okushoma aha byafaayo by’abaheereza ba Yehova abaabaire bari omu mbeera nk’eyangye n’okubiteekateekaho buzima nikimpwera.” Abakristaayo abamwe nibakwata omu mutwe ebyahandiikirwe ebirikuhuumuriza munonga, nka Zaaburi 27:10 na Isaaya 41:10. Abandi nibashanga ngu okuhurikiza eby’okwega ebikwatsirwe omu maraka, nikibahwera kutagira eihamba baaba nibatebeekanisa enteerane nari baaba nibashoma Baibuli.

9. Okuza omu nteerane nikukugasira kuta?

⁹ Teeraho kuza omu nteerane otarikwosha. Entebeekanisa y’oruteerane neija kukugumya, kandi noija kwongyera kwetegyereza gye ab’eishe-emwe na banyaanyako. (Heb. 10:24, 25) Massiel, owaaba yaagambirweho, naagira ati: “N’obu ndaabe naabaire nyine enshoni, nkamariirira kuguma ninza omuri buri ruteerane rw’ekibiina, n’okugira eki naagarukamu. Eki kikampwera kuhurira nyijwire omu kibiina.”

10. Ahabw’enki ni kikuru kunywana Abakristaayo abeesigwa?

¹⁰ Nywana Abakristaayo abeesigwa. Sherura abanywani omu kibiina abu orikubaasa kwegyeraho, nangwa n’abu otarikwingana nabo omu myaka nari abarikuruga omu mbeera ezitari nk’ezaawe. Baibuli neetwijutsya ngu “abagurusi nibo [baine] obwengye.” (Yob. 12:12) N’abakuru nibabaasa kwegyera  aha bato abeesigwa. Daudi akaba ari muto ahari Yonasaani, kwonka ekyo tikirabaremeise kugira omukago murungi. (1 Sam. 18:1) Daudi na Yonasaani bakahwerahwerana kuheereza Yehova n’obu baraabe baabaire baine emirabanamu. (1 Sam. 23:16-18) “Ab’eishe-emwe buzima nibabaasa kuba abazaire baitu nari beene waitu ab’eby’omwoyo,” Irina nikwo arikugira, munyaanyazi-itwe ori wenka omu mazima omu ka yaabo. Kandi “Yehova naabaasa kubakoresa kuhikiiriza obujunaanizibwa nk’obw’eka yaitu.”

11. Oine kukora ki kubaasa kutunga abanywani barungi?

¹¹ Okutunga abanywani abasya nikibaasa kutooroba, na munonga waaba oine enshoni. Ratna, orikwetiina owaayegire amazima arikuhiiganisibwa, naagira ati: “Nkaba nyine kwikiriza ngu niinyendera kimwe obuhwezi n’obushagiki bw’eka yangye ey’eby’omwoyo.” Nikibaasa kuguma kugambira omuntu ondiijo oku orikwehurira, kwonka okugambirana mutarikusherekana nigubaasa kuba omusingi gw’obunywani burungi. Banywani baawe nibaba nibenda kukugumya n’okukushagika, kwonka nibenda ngu obamanyise oku barikubaasa kukikora.

12. Obuheereza nibubaasa kukuhwera buta kugira abanywani barungi?

¹² Gumwe aha miringo mirungi y’okutunga abanywani n’okwejumba omu buheereza n’Abakristaayo bagyenzi baawe. Carol, owaaba yaagambirweho, naagira ati: “Ntungire abanywani baingi barungi ahabw’okumara obwire n’abakazi Abakristaayo bagyenzi bangye omu buheereza n’omu zindi ntebeekanisa z’eby’omwoyo. Yehova atwire naampwera emyaka egi yoona kurabira omu banywani aba.” Okugira emikago n’Abakristaayo abeesigwa buzima nikirugamu ebirungi bingi kukirira kimwe okuteeraho kwaitu. Yehova naakoresa emikago nk’egyo kukuhwera kusingura enyehurira mbi, nk’okugira eihamba.​—Enf. 17:17.

13. Boona abari omu kibiina baine bujunaanizibwa ki?

¹³ Twena omu kibiina twine obujunaanizibwa bw’okureeta rukundo n’obusingye omu kibiina ahu buri omwe ataine kuhurira ari wenka. (Yoh. 13:35) Ebi turikukora n’ebi turikugamba nibireetaho entaaniso mpango! Yetegyereze eki munyaanyazi-itwe omwe yaagambire: “Ku naayegire amazima, ekibiina kikahinduka eka yangye. Nkaba ntarikubaasa kuba omwe aha Bajurizi ba Yehova ntaine bushagiki bwabo.” Noobaasa kukora ki kuhwera abari bonka omu mazima kuhurira ngu baijwire omu kibiina?

14. Noobaasa kukora ki kunywana abakiri basya omu mazima?

¹⁴ Ba niiwe waabanza kwehayo kunywana abandi. Nitubaasa kutandika turikwakiira gye abasya omu kibiina. (Rom. 15:7) Kwonka, nitwenda kukora ekirikukira aha kubaramusya omu muringo murungi kyonka. Nitwenda kugira obunywani bw’obwire buraingwa nabo. N’ahabw’ekyo, yoreka ngu buzima noobafaho. N’obu oraabe otaine kwetaatsya omu nshonga zaabo ez’omubonano, teeraho kwetegyereza ebi barikubaasa kuba nibarabamu. Abamwe nibabaasa kuba nibagumirwa kworeka enyehurira zaabo, mbwenu yetantare kubagyemesereza kugamba. Kureka, omu muringo gw’embabazi kandi ogw’obwengye babuuze ebibuuzo, reero otegyereze bakugarukyemu. Nk’eky’okureeberaho, noobaasa kubabuuza oku baamanyire amazima.

15. Abakristaayo abakuzire omu by’omwoyo nibabaasa kuhwera bata abandi omu kibiina?

¹⁵ Boona omu kibiina nibaija kutunguuka na munonga abakuzire omu by’omwoyo  nk’abareeberezi baayoreka ngu nibabafaho. Melissa, owaakuriire omu mazima arikwororwa nyina, naagira ati: “Buzima ninsiimira kimwe ab’eishe-emwe abatwire nibeehayo kuba baatata ab’eby’omwoyo kumara emyaka. Naaba niinyenda kugira eki naagamba, nimba nyine ou ndikubaasa kukigambira.” Mauricio, ow’eishe-emwe owaayereebire nk’otsigirweho bwanyima y’omwegyesa we wa Baibuli kuruga omu mazima, naagira ati: “Abareeberezi okunfaho, kikakora kihango omu magara gangye. Bakaba nibakira kugamba naanye. Bakaba nibagyenda naanye omu buheereza, baangambira aha by’omuhendo ebi beegire omu Baibuli, kandi bazaana naanye emizaano.” Bombi Melissa na Mauricio bakagumizamu baaza omu buheereza obw’obutwire.

16-17. Nitubaasa kuhwera tuta abandi omu miringo erikugasha?

¹⁶ Hwera omu miringo erikugasha. (Gal. 6:10) “Eki orikuba nooyenda kyonka, n’okukorerwa eby’embabazi omu bwire obuhikire,” Leo nikwo arikugira ori omu bumiisani hare n’owaabo. “Ninyijuka eizooba rimwe obu naatunga butandu y’emotoka. Kuza kuhika omuka, amaganya gakaba gari ag’okunyita. Kwonka omushaija n’omukazi we baakanyeta kugira eki twarya. Tindikwijuka n’eky’okurya eki twariire, kwonka niinyijuka ngu bakampurikiza omu muringo gw’embabazi. Aha muheru, nkahendera nyehuriire gye!”

¹⁷ Twena nitukunda eby’omwoyo, nk’enteerane empango ez’ekiro kimwe nari bishatu, ahabw’okugira ngu nizitubaasisa kuba n’abandi, n’okugaaniira nabo aha byaba biri omu ruteerane orwo. Kwonka, Carol owaaba yaagambirweho, naagira ati: “Nyowe okukira munonga ningumirwa kuba omu nteerane empango ez’ekiro kimwe nari bishatu.” Ahabw’enki? “N’obu ndaabe nimba nyetooroirwe enkumi n’enkumi z’ab’eishe-emwe na banyaanyazi-itwe, nibakira kuba bari hamwe n’ab’amaka gaabo. Nyowe ku ndikubareeba, nyongyera kugira eihamba.” Abamwe nibagumirwa kuza omu nteerane empango ez’ekiro kimwe nari bishatu baaba baherize kufeerwa abakundwa baabo. Haine ou orikumanya ori omu mbeera egumire egi? Ka kyakubaire eky’obwengye kweta omuntu ogwo kubeegaitaho  omu ka yaanyu omu ntebeekanisa y’eby’omwoyo!

18. Twaba efura nitworeka tuta ngu nitugyendera aha 2 Abakorinso 6:11-13?

¹⁸ Mugire obwire bw’okuba hamwe. Teeraho kushashaanuka n’ab’eishe-emwe na banyaanyako batari bamwe na bamwe, na munonga abaine eihamba. Nitwenda ‘kushashaanura emitima yaitu,’ na munonga ahabw’abantu nk’abo. (Shoma 2 Abakorinso 6:11-13.) “Butoosha tukaba nitushemererwa munonga abanywani baatweta kubataayaayira omu maka gaabo nari kuza kurambura nabo,” Melissa owaaba yaagambirweho nikwo arikwijuka. Omu kibiina kyanyu harimu ou orikubaasa kugirira obufura nk’obwo?

19. Ni ryari obu kirikubaasa kuhwera munonga kuba hamwe n’Abakristaayo bagyenzi baitu?

¹⁹ Hariho obwire obu Abakristaayo bagyenzi baitu barikuba nibenda kubaho hamwe naitwe. Abamwe nibagumirwa kuba n’abanyabuzaare baabo abatari mu mazima omu bwire bw’ebiro bikuru eby’ensi. Abamwe nibatunga obusaasi bw’amaani munonga aha biro by’okwezi ebimwe, nk’ebi omukundwa waabo yaafeereireho. Twayehayo kuba n’Abakristaayo abari omu mbeera nk’egi, nitworeka ngu nitubataho “omutima munonga.”​—Fil. 2:20.

20. Ebigambo bya Yesu ebiri omuri Matayo 12:48-50 nibibaasa kutuhwera bita twaba twine eihamba?

²⁰ Hariho enshonga nyingi ezirikubaasa kureetera Omukristaayo obumwe kugira eihamba. Kwonka, titwine kwebwa ngu Yehova naamanya gye enyehurira nk’ezo. Naatuha ebirikwetengyesa, okukira munonga kurabira omu Bakristaayo bagyenzi baitu. (Shoma Matayo 12:48-50.) Kandi naitwe nitworeka ngu nitusiima Yehova ahabw’entebeekanisa ye ya rukundo egi, twakora kyona ekirikubaasika kushagika eka yaitu ey’eby’omwoyo. Nangwa n’obu twakuba nitwehurira tuta obumwe, tituri twenka, Yehova naaba ari aha rubaju rwaitu butoosha!