EKICWEKA EKY’OKWEGA 26
Oku Rukundo Erikutuhwera Kusingura Okutiina
‘[Yehova] ari aha rubaju rwangye, tindi kwija kutiina.’—Zab. 118:6.
EKYESHONGORO 105 ‘Ruhanga ni Rukundo’
EBIRAAGAMBWEHO *
1. Ni mbeera ki ezirikukira kututiinisa?
TEEKATEEKA aha mbeera ezi ezaabaireho. Nestor n’omukazi we, bakaba nibenda kuza kuheereza omu kicweka ahu ababuurizi barikwendwa munonga. * Kubaasa kuhikiiriza ekyo, bakaba baine kukora empinduka omu mbeera zaabo. Kwonka bakaba nibatiina ngu tibarikubaasa kushemererwa buzima baaba bataine sente zirikumara. Biniam ku yaahindukire Omujurizi wa Yehova omu ihanga ei omurimo gw’okubuurira gwabaire niguhakanisibwa, akaba naamanya ngu naabaasa kuhiiganisibwa. Ekyo kikamutiinisa. Kwonka akoongyera kutiina ku yaateekateekire oku ab’eka ye baaramutwarize baamanya ngu agiire omu diini endiijo. Valérie bakamucebera bashanga aine ekookoro, kandi kikaba kitoorobi kutunga omushaho w’okumushemeza orikuha ekitiinisa enyikiriza ze ezirikwegamira aha Baibuli ezirikukwata aha shagama. Nikyetegyerezibwa kureeba ngu akatiina ngu naabaasa kufa.
2. Ahabw’enki twine kuteeraho kusingura okutiina kwaitu?
2 Oragizireho okutiina nk’okwo? Baingi ahariitwe twaraakugizireho. Twaba tutategyekire okutiina kwaitu, nitubaasa kucwamu kubi, kandi n’omukago gwaitu na Yehova gusiisikare. Ekyo nikyo Sitaane arikwenda ngu kitubeho. Kandi naakoresa okutiina okwo kutureetera kwanga kworobera ebiragiro ebya Yehova, otwariiremu n’ekiragiro ky’okubuurira amakuru murungi. (Kush. 12:17) Sitaane n’omwinazi, otaine esaasi, kandi aine amaani. Kwonka noobaasa kumwerinda. Ota?
3. Niki ekiraatuhwere kusingura okutiina kwaitu?
3 Twaba nituhamiza kimwe ngu Yehova naatukunda, kandi ngu ari aha rubaju rwaitu, nitubaasa kusingura okuteeraho kwa Sitaane. (Zab. 118:6) Nk’eky’okureeberaho, omuhandiiki owa Zaaburi 118 akahikwaho embeera ezaamureeteire kwerarikirira munonga. Akaba aine abazigu baingi, otwariiremu n’abamwe abaabaire baine emyanya y’ahaiguru (omushororongo 9, 10). Obumwe, akaba naagyemeserezibwa munonga (omushororongo 13). Kandi akatunga okuhanwa kw’amaani kuruga ahari Yehova (omushororongo 18). Kwonka nabwo, omuhandiiki wa zaaburi akabaasa kweshongora ati: ‘Tindikwija kutiina.’ Niki ekyamureeteire kuhurira aine oburinzi atatiinire? Akaba naamanya ngu n’obu Yehova araabe yaamuhanire, akaba naamukunda munonga. Omuhandiiki wa zaaburi akaba naamanya ngu n’obu yaakuhikwaho mbeera ki, Ruhanga we owa rukundo naija kuba ayeteekateekire kumuhwera.—Zab. 118:29.
4. Nitubaasa kusingura kutiina ki twaba nituhamya ngu Ruhanga naatukunda?
4 Twine kwehamiza ngu Yehova naatukunda. Eki nikiija kutuhwera kusingura okutiina kw’emiringo eshatu oku: (1) okutiina ngu titurikwija kubaasa kureebera amaka gaitu; (2) okutiina abantu, (3) n’okutiina okufa. Ab’eishe-emwe na banyaanyazi-itwe abaagambwaho aha kutandika kw’ekicweka eki bakabaasa kusingura okutiina ahabw’okuhamiza kimwe ngu Ruhanga naabakunda.
OKUTIINA NGU TORIKWIJA KUREEBERERA EKA YAAWE
Ow’eishe-emwe naajuba eby’enyanja kubaisaho eka ye, omutabani amuri haihi (Reeba akacweka 5)
5. Ni mbeera ezirikubaasa kwerarikiriza munonga omutwe gw’eka? (Reeba ekishushani ekiri aha kipampagare.)
5 Omutwe gw’eka Omukristaayo naatwara obujunaanizibwa bw’okureeberera eka ye omu by’omubiri nka bukuru. (1 Tim. 5:8) Ku oraabe ori mutwe gw’eka, obundi omu bwire bw’ekigwererezi okaba nooyerarikirira ngu noija kufeerwa omurimo gwawe. Noobaasa kuba waayerarikiriire ngu noija kugumirwa kutunga esente z’okugura eby’okurya, nari ez’okupangisa enju y’okuraaramu. Kandi noobaasa kuba waabaire otiinire ngu waafeerwa omurimo gwawe, toraatungye ogundi. Nari nka Nestor na María abaaba baagambirweho, noobaasa kuba nootiina ngu waahindura omurimo gwawe, torikwija kutunga esente zirikumara ez’okwebaisaho. Sitaane abaasize kuba omusinguzi arikukoresa okutiina nk’oku.
6. Sitaane naateeraho kutureetera kwikiriza ki?
6 Sitaane naateeraho kutureetera kuteekateeka ngu Yehova tarikutufaho, kandi ngu tarikwija kutuhwera kyahika aha nshonga y’okureeberera amaka gaitu. N’ekirikurugamu, nikibaasa kutwetengyesa kukora kyona ekirikubaasika kuhamira aha murimo ogu twine hati, n’obu kyakuba nikitwariramu okwehuzya emisingye y’Ebyahandiikirwe.
7. Niki eki Yesu arikutuhamiza?
7 Yesu, naamanya gye Ishe kukira omuntu ondiijo weena, n’ahabw’ekyo naatuhamiza ngu Ruhanga naaba ‘naamanya ebi tukyenire tutakabimushabire.’ (Mat. 6:8) Kandi Yesu naamanya ngu Yehova naaba ayeteekateekire kutuha ebirikwetengyesa. Abakristaayo twena, turi omu ka ya Ruhanga. Nitubaasa kugira obwesigye ngu Yehova Omutwe gw’eka yaitu naija kuhamira aha musingye oguri omu 1 Timoseo 5:8.
Yehova naija kuhamya ngu twatunga ebirikwetengyesa. Naabaasa kuhiga ab’eishe-emwe bagyenzi baitu kutuhwera (Reeba akacweka 8) *
8. (a) Niki ekiraatuhwere kusingura okutiina ngu titurikwija kubaasa kureeberera amaka gaitu? (Mat. 6:31-33) (b) Nitubaasa kutooreza tuta omushaija n’omukazi we omu kishushani abariyo nibabagana na munyaanyazi-itwe eby’okurya?
8 Twaikiriza ngu Yehova naatukunda n’ab’amaka gaitu, titurikwija kubangaanisa aha kutunga ebirikwetengyesa. (Shoma Matayo 6:31-33.) Yehova naayenda kutureeberera, ahakuba ni Ruhanga owa rukundo kandi efura! Obu yaahanga ensi, akakora ekirikukira aha kugitamu ebintu ebirikubaisaho amagara gaitu. Kureka akagijuzamu n’ebintu ebirikushemeza munonga. (Kut. 2:9) N’obu turaabe obumwe nitutunga eby’okutubaisaho byonka, nikiba kiri eky’obwengye kuta omutima aha nshonga egi ngu twine ebintu ebyo eby’okutubaisaho. Yehova tarikubaasa kuremwa kutureeberera. (Mat. 6:11) Twine kuguma nitwijuka ngu ebintu byona eby’omubiri ebi twefeerereize tibirikubaasa kwingana n’ebi Ruhanga waitu owa rukundo arikutuha hati, n’ebi arikwija kutuha omu biro by’omumaisho. Ekyo nikyo Nestor na María baayetegyereize.—Isa. 65:21, 22.
9. Nitubaasa kwegyera ki ahari Nestor na María?
9 Nestor na María bakaba bari omu mbeera nungi omuri Colombia. “Tukaba nitwenda kworobya embeera zaitu kugira ngu twongyere aha buheereza bwaitu, kwonka tukaba nitwerarikirira ngu titurikwija kutunga okushemererwa twaba twine esente nkye,” nikwo barikugira. Niki ekyabahwereire kusingura okutiina kwabo? Bakateekateeka aha miringo mingi ei Yehova yaayorekire ngu naabakunda. Bakatsigaho emirimo yaabo baine obwesigye ngu Yehova naija kubareeberera. Bakaguza enju yaabo baaza omu kicweka ky’eihanga ahu ababuurizi b’Obukama barikwendwa munonga. Nibeehurira bata ahabw’okucwamu batyo? Nestor naagira ati: “Tureebire okuhikiirira kw’ebigambo ebiri omu Matayo 6:33. Tihaine ekyatuburiire omu by’omubiri. Kandi hati twongyeire kushemererwa.”
OKUTIINA ABANTU
10. Ahabw’enki kitarikutangaaza kureeba ngu abantu nibatiina bagyenzi baabo?
10 Abantu batwire nibakora kubi bagyenzi baabo. (Mub. 8:9) Nk’eky’okureeberaho, abantu nibakoresa kubi obushoboorozi bwabo, enkozi z’ebibi nibakora eby’obushaarizi, abarahuzi nibarahura abandi aha ishomero kandi babatiinatiinisa, kandi abandi nibatwariza kubi ab’omu maka gaabo. Tikirikutangaaza kureeba ngu abantu nibatiina bagyenzi baabo! Mbwenu shi Sitaane naateeraho ata kukoresa omutego gw’okutiina abantu?
11-12. Sitaane naakoresa ata okutiina abantu kututega?
11 Sitaane naakoresa okutiina abantu kutureetera kurekyera aho kubuurira. Sitaane naareetera gavumenti kuzibira omurimo gwaitu gw’okubuurira n’okutuhiiganisa. (Luk. 21:12; Kush. 2:10) Sitaane naakoresa abarikumushagika kujanjaaza pokopoko etahikire n’ebishuba aha Bajurizi ba Yehova. Abantu abarikwikiriza ebishuba ebyo nibatujuma, nari nibabaasa n’okututaahirira butunu. (Mat. 10:36) Obukoryo bwa Sitaane shi nibututangaaza? Ngaaha buzima. Akabukoresaho omu kyasha ky’okubanza.—Byak. 5:27, 28, 40.
N’obu ab’eka yaitu baakutuhakaanisa, nitubaasa kugira obwesigye ngu Yehova naatukunda (Reeba akacweka 12-14) *
12 Okutiina kuhakanisibwa gavumenti tikyo kirwaniso kyonka eki Sitaane arikukoresa. Abamwe nibatiina oku abanyabuzaare baraabatwarize baahinduka Abajurizi ba Yehova. Nibakunda munonga abanyabuzaare baabo, kandi nibaba nibenda ngu nabo bamanye Yehova kandi bamukunde. Nibashaasha baahurira nibagamba kubi ahari Ruhanga ow’amazima n’abarikumuramya. Kwonka obumwe, abanyabuzaare abaabandize kuba abahakanisa bwanyima bakaija omu mazima. Kwonka shi abanyabuzaare baitu ku baakugira ngu tibaakyenda kukwatanisa naitwe ahabw’enyikiriza zaitu ensya? Nitwija kutwaza tuta?
13. Okugira obwesigye ngu Ruhanga naatukunda nikituhwera kita ab’eka yaitu baatutsigaho? (Zaaburi 27:10)
13 Nitubaasa kuhuumurizibwa ebigambo birungi ebiri omu Zaaburi 27:10. (Kishome.) Twaijuka ngu Yehova naatukunda munonga, nitwija kuhurira twine oburinzi n’omu kuhiiganisibwa. Kandi nitubaasa kugira obwesigye ngu naija kutushumbuusha ahabw’okugumisiriza kwaitu. Yehova naija kutureeberera omu by’omubiri, enyehurira, n’omu by’omwoyo okukira omuntu ondiijo weena! Eki nikyo Biniam, owaaba yaagambirweho, yaayetegyereize.
14. Nitubaasa kwegyera ki ahari Biniam?
14 Biniam akaba omwe aha Bajurizi ba Yehova n’obu araabe yaabaire naamanya ngu naabaasa kuhikwaho okuhiiganisibwa kw’amaani. Yetegyereze oku Biniam yaabaasize kusingura okutiina abantu ahabw’okumanya ngu Yehova naamukunda. “Okuhiiganisibwa kukaba okw’amaani kukira oku naabaire ninteekateeka,” Biniam nikwo arikugira. “Kwonka nkaba ntiinire munonga kuhakaanisibwa ab’eka yangye, okukira okuhiiganisibwa gavumenti. Nkaba ntiinire ngu okucwamu kwangye kuba Omujurizi wa Yehova nikiija kugwisa kubi tata otari omu mazima, kandi ab’omu ka yangye bakaba nibaija kundeeba nk’embura mukoro.” Kwonka, Biniam akaba naahamiza kimwe ngu butoosha Yehova naareeberera abarikumukunda. Biniam naashoboorora ati: “Nkateekateeka aha ku Yehova atwire naahwera abaine oburemeezi omu by’entaatsya, abarikushoroorwa, n’abarikutwarizibwa kubi. Nkaba niimanya ngu naahamira ahari Yehova, naija kumpa emigisha. Emirundi yoona ei naateirwe omu kihome kandi nkabonabonesibwa, nketegyereza gye oku Yehova arikutuhwera omu mbeera zigumire twaguma turi abeesigwa ahariwe.” Yehova akaba omuzaire owaabuzima ahari Biniam, kandi abaheereza be baaba eka ye eyaabuzima.
OKUTIINA OKUFA
15. Ahabw’enki n’ekya butoosha kutiina okufa?
15 Baibuli neegira ngu rufu n’omuzigu. (1 Kor. 15:25, 26) Nitubaasa kutiina twateekateeka aha kufa, na munonga twarwara nari omukundwa waitu yaaba niwe arwaire. Ahabw’enki nitutiina okufa? N’ahabw’okugira ngu Yehova akatuhanga n’ekyetengo ky’okwesiimira amagara ebiro byona. (Mub. 3:11) Kwonka okutiina okufa okuringaniire nikubaasa kutuhwera kurinda amagara gaitu. Nk’eky’okureeberaho, nikibaasa kutuhiga kucwamu gye aha bikwatiraine n’ebi turikurya, okutendeka omubiri, okusherura obuhwezi aha bashaho n’okuragurirwa kyaba nikyetengyesa, otwariiremu n’okwetantara kuta amagara gaitu omu kabi.
16. Sitaane naateeraho kukoresa ata okutiina kwaitu kw’okufa kututega?
16 Sitaane naamanya ngu nitutwara amagara nk’ag’omuhendo. N’ahabw’ekyo naagira ngu kubaasa kuguma twine amagara nitwija kwefeerereza buri kimwe eki twine, otwariiremu n’omukago gwaitu na Yehova. (Yob. 2:4, 5) Sitaane ka agwire! Kwonka, ahabw’okugira ngu Sitaane ‘aine oburyo bw’okureetaho okufa,’ naateeraho kukoresa okutiina kwaitu kw’okufa kutwiha ahari Yehova. (Heb. 2:14, 15) Obumwe, abarikushagika Sitaane nibatiinatiinisa abaheereza ba Yehova ngu nibaija kubaita baayanga kwehakana okwikiriza kwabo. Omu mbeera ezindi, Sitaane yaareeba twine endwara y’amaani, naateeraho kutureetera kuhenda emitindo Yehova. Abashaho nari abanyabuzaare abatari omu mazima nibabaasa kutugyemesereza kwikiriza kuteebwamu eshagama, ekirikuhenda ekiragiro kya Ruhanga. Nari nihabaasa kugira owaatushendashenda kwikiriza omuringo gw’okuragurirwa ogundi ogurikuhenda emisingye y’Ebyahandiikirwe.
17. Kurugiirira aha Abarooma 8:37-39, ahabw’enki tutaine kutiina okufa?
17 N’obu turaabe tutarikwenda kufa, nitumanya ngu n’obu twakufa Yehova tarikwija kurekyera aho kutukunda. (Shoma Abarooma 8:37-39.) Banywani ba Yehova baafa, naaguma naabaijuka nk’abaakihuriire. (Luk. 20:37, 38) Aine ekihika ky’okubazoora. (Yob. 14:15) Yehova akeefeerereza ekintu ky’omuhendo kugira ngu tutungye amagara agatahwaho. (Yoh. 3:16) Ekyo nikyoreka ngu Yehova naatukunda munonga kandi naatufaho. N’ahabw’ekyo omu mwanya gw’okuruga ahari Yehova twaba turwaire nari turi omu ncwamba za rufu, nitumushaba kutuhuumuriza, kutuha obwengye, n’amaani. Eki nikyo kyenyini eki Valérie na iba baakozire.—Zab. 41:3.
18. Nitubaasa kwegyera ki ahari Valérie?
18 Obu Valérie yaabaire aine emyaka 35, bakamucebera baashanga eine ekookoro y’akabi munonga. Yetegyereze oku rukundo yaamuhwereire kusingura okutiina okufa. Naashoboorora ati: “Okushanga nyine endwara egi kikahindura embeera zaitu ahonaaho. Nkaba nyine kushemezibwa kubaasa kuguma mpuriire. Nkeebuuza aha bashaho baingi kwonka boona bakanga kunshemeza ntatairwemu shagama. Nkatiina munonga, kwonka ahabw’okumanya ekiragiro kya Ruhanga, nkaba ntarikubaasa kwikiriza kuteebwamu eshagama! Omu bwire obu bwona, Yehova ayorekire ngu naankunda munonga. Hati naanye nyine omugisha gw’okworeka ngu niimukunda. Buri murundi ogu naabaire ntunga amakuru mabi, kikaba kimpwera kwongyera kumariirira kushemeza Yehova, n’okutaikiriza Sitaane kusingura. Nkarugaho naashemezibwa gye ntatairwemu shagama. N’obu ndaabe nkiine amagara mabi, Yehova atwire naatuha ebirikwetengyesa. Nk’eky’okureeberaho, omu ruteerane rw’ekibiina omu wiikenda ntakagiire kucebeza, tukashwijuma ekicweka ‘Okworekyerera Oburemeezi Hati n’Obumanzi.’ * Ekicweka eki kikatuhuumuriza munonga. Nitukigarukamu emirundi mingi kweijutsya. Ebicweka nk’ebi n’okugira entebeekanisa nungi ey’eby’omwoyo bituhweraire nyowe na ibanyi kuguma twikaikaine n’okucwamu gye.”
OKUSINGURA OKUTIINA KWAITU
19. Niki ekiri haihi kubaho?
19 Abakristaayo omu nsi yoona babaasize kusingura embeera zigumire, n’okurwanisa Omuregi barikuhwerwa Yehova. (1 Pet. 5:8, 9) Naiwe noobaasa kusingura. Juba, Yehova naija kwohereza Yesu n’abarikutegyeka nawe “kuhwerekyereza emirimo ya Sitaane.” (1 Yoh. 3:8) Bwanyima y’ebyo, abantu abaraabe nibaheereza Ruhanga omu nsi tiharikwija kugira ‘ekyabatiinisa, nari ekyabaitsya obwoba.’ (Isa. 54:14; Mik. 4:4) Kwonka ekyo kitakabaireho, twine kukora n’amaani kusingura okutiina oku twine hati.
20. Niki ekiraatuhwere kusingura okutiina kwaitu?
20 Twine kwongyera kuhamya obwesigye bwaitu omuri Yehova ngu naakunda abaheereza be kandi naabarinda. Ekiraatuhwere kukora ekyo n’okuteekateeka aha ku Yehova atwire naahwera abaheereza be, kandi tukakigambiraho abandi. Kandi nitubaasa kuguma nitwijuka oku Yehova abaasize kutuhwera kuraba omu mbeera ezirikwerarikiriza. Ahabw’obuhwezi bwa Yehova, nitubaasa kusingura okutiina kwaitu!—Zab. 34:4.
EKYESHONGORO 129 Nitwija Kugumizamu Nitugumisiriza
^ Okutiina n’enyehurira ya butoosha erikubaasa kuturinda kutagwa omu kabi. Kwonka ti kirungi okutiina ekirenga ahakuba nikibaasa kukunaga omu kabi. Mu muringo ki? Sitaane naabaasa kututegyesa okutiina okwo. Buzima twine kukora n’amaani kutegyeka okutiina nk’okwo. Niki ekiraatuhwere? Nk’oku ekicweka eki kirikuza kworeka, nitubaasa kusingura okutiina twaba nituhamiza kimwe ngu Yehova ari aha rubaju rwaitu, kandi ngu naatukunda.
^ Amaziina agamwe gahindwirwe.
