1. Kurugiirira ahari 1 Petero 5:2, abareeberezi baine bujunaanizibwa ki?

 ABAREEBEREZI bahairwe obujunaanizibwa bw’okureeberera entaama za Yehova ez’omuhendo. Abashaija aba abatarikweganda nibashemererwa kuheereza ab’eishe-emwe na banyaanyabo, kandi nibateeraho ‘kuriisa gye obusyo obu baakwatsiibwe.’ (Yer. 23:4; shoma 1 Petero 5:2.) Ka nitushemererwa kugira abashaija nk’abo omu kibiina!

2. Abareeberezi abamwe nibatunga kugyezibwa ki?

² Abareeberezi ku barikuba nibahikiiriza obujunaanizibwa bwabo, nibatunga oburemeezi bwingi. Enshonga emwe eri ngu, okureeberera ekibiina n’omurimo gw’amaani. Tony, omureeberezi omuri United States, akeega kumanya obugarukiro bwe aha bwingi bw’emirimo ei yaabaire aine kwikiriza kukora. Naashoboorora ati: “Aha kutandika kw’ekigwererezi kya COVID-19, nkatunga emirimo endiijo oyihireho okutebeekanisa enteerane n’obuheereza. N’obu ndaabe naataireho kukora munonga, butoosha hakaba hariho bingi by’okukora. N’ekyarugiremu, nkabura obwire bw’okushoma Baibuli, okweyegyesa, n’okushaba.” Ilir, omureeberezi omuri Kosovo, akatunga oburemeezi bw’omutaano. Obu yaabaire ari omu kicweka ekyabaire kirimu orutaro, akaba naagumirwa kworobera obuhabuzi bw’ekibiina. Naagira ati: “Obumanzi bwangye bukagyezibwa, ofiisi y’eitaagi ku yaampaire obujunaanizibwa bw’okuhwera ab’eishe-emwe na banyaanyazi-itwe omu kicweka ekyo. Nkatiina, kandi nkareeba obuhabuzi Obwo nk’obutarikukora.” Tim, omumiisani omuri Asia, akaba naagumirwa kuhikiiriza ebi yaabaire aba aine kukora buri izooba. Naagira ati: “Obumwe, nkaba mpurira nduhire omu biteekateeko n’omu nyehurira.” Niki ekirikubaasa kuhwera abareeberezi abaine oburemeezi nk’obwo?

3. Twena nitubaasa kugasirwa tuta twateekateeka aha ky’okureeberaho ky’Omuramuzi Gideoni?

 ³ Abareeberezi nibabaasa kwegyera aha Muramuzi Gideoni. (Heb. 6:12; 11:32) Akaba ari omurinzi kandi omureeberezi w’abantu ba Ruhanga. (Bar. 2:16; 1 Bus. 17:6) Nka Gideoni, abareeberezi bahairwe obujunaanizibwa bw’okureeberera abaheereza ba Ruhanga omu bwire bugumire. (Byak. 20:28; 2 Tim. 3:1) N’ahabw’ekyo, abareeberezi nibabaasa kwegyera ahari Gideoni kuba abarikwetwara, abacureezi, abarikworoba kandi abarikugumisiriza. Okugumisiriza kwe kukagyezibwa obu yaabaire naahikiiriza obujunaanizibwa bwe. Yaaba turi abareeberezi nari tutabari, nitubaasa kuteeraho kusiima abareeberezi baitu. Nitubaasa kushagika abashaija aba ab’eby’omwoyo abarikukora n’amaani.—Heb. 13:17.

4. Gideoni akooreka ata ngu n’omucureezi kandi naayetwara?

⁴ Gideoni akaba ari omushaija omucureezi kandi orikwetwara. b Obu maraika wa Yehova yaagambira Gideoni ngu atoorainwe kujuna Abaisraeli kuruga omu mikono y’Abamidiani, akagira ati: “Ab’omuryango gwaitu n’abooro okukira boona ab’omu ruganda rwa Manaase, kandi omu nju ya tata niinye muto.” (Bar. 6:15) Akeereeba nk’otarikubaasa, kwonka Yehova akaba naamanya ngu naabaasa. Gideoni arikuhwerwa Yehova akahikiiriza obujunaanizibwa bwe.

5. Omureeberezi naabaasa kugumirwa ata kwetwara nari kuba omucureezi?

⁵ Abareeberezi nibateeraho nk’oku barikubaasa kworeka omutwarize gw’okwetwara n’obucureezi omu bintu byona. (Mik. 6:8; Byak. 20:18, 19) Tibarikwehimbisa ahabw’okubaasa kwabo n’ebi barikuhikiiriza, nari kwegaya ahabw’enshobe zaabo nari obweremwa bwabo. Kwonka nabwo, omureeberezi naabaasa kugumirwa kuba omucureezi nari kwetwara. Nk’eky’okureeberaho, naabaasa kwikiriza obujunaanizibwa bwingi kandi aremwe kubuhikiiriza. Nari nibabaasa kumuhimbisa ahabw’oku yaahikiiriza obujunaanizibwa obumwe nari bamucwere orubanja ahabw’oku yaahikiiriza obundi. Abareeberezi nibeegyera ki ahari Gideoni ekirikubaasa kubahwera omu mbeera ezo?

6. Abareeberezi nibabaasa kwegyera ki ahari Gideoni kuba abarikwetwara? (Reeba n’ekishushani.)

⁶ Shaba obuhwezi. Omuntu orikwetwara naamanya obugarukiro bwe. Gideoni akooreka  ngu naayetwara arikushaba abandi kumuhwera. (Bar. 6:27, 35; 7:24) Abareeberezi abanyabwengye nibakora nikyo kimwe. Tony, owaagambwaho, naagira ati: “Ahabw’oku naakuziibwe, ninkira kwikiriza obujunaanizibwa bwingi kukira obu ndikubaasa. N’ahabw’ekyo nkacwamu ngu tugambe aha kwetwara omu kuramya kwaitu kw’eka kandi nkashaba omukazi wangye kugamba eki arikuteekateeka. Kandi nkareeba vidiyo Tendeka, Yesigye, Kandi Ha Abandi Obujunaanizibwa nka Yesu aha jw.org.” Tony akatandika kushaba abandi kumuhwera aha bujunaanizibwa bwe. Hakarugamu ki? Tony naagira ati: “Emirimo omu kibiina neekorwa, kandi naanye nyine obwire bw’okweyegyesa.”

7. Abareeberezi baabacwera orubanja nibabaasa kutooreza bata Gideoni? (Yakobo 3:13)

⁷ Otagarukamu kubi baakucwera orubanja. Abareeberezi nibagyezibwa omu muringo ogundi baacwerwa orubanja. Eky’okureeberaho kya Gideoni nabwo nikibaasa kubahwera. Ahabw’okugira ngu Gideoni akaba naamanya ngu tahikiriire, Abaefuraimu ku baamucwereire orubanja akabagarukamu aikaikaine. (Bar. 8:1-3) Tarabagarukiremu n’ekiniga. Akooreka obucureezi arikuhurikiza ebi baabaire nibagamba kandi omu muringo gw’obwengye akaikaikanisa embeera. Abareeberezi abanyabwengye nibatooreza Gideoni barikuhurikiza gye kandi bakagarukamu baikaikaine baacwerwa orubanja. (Shoma Yakobo 3:13.) Omu muringo ogwo nibongyera kureetaho obusingye omu kibiina.

8. Abareeberezi n’abaheereza baine kutwaza bata baahimbisibwa? Ha eky’okureeberaho.

⁸ Himbisisa Yehova. Ku baahimbiise Gideoni ahabw’okusingura Abamidiani, akacwamu kuhimbisisa Yehova. (Bar. 8:22, 23) Abareeberezi n’abaheereza nibabaasa kutooreza bata Gideoni? Baine kuhimbisisa Yehova ahabw’ebi barikuhikiiriza. (1 Kor. 4:6, 7) Nk’eky’okureeberaho, omureeberezi baamusiima ahabw’okwegyesa gye, naaba aine kworeka ngu obukomooko bw’obuhabuzi, n’Ekigambo kya Ruhanga, kandi ngu twena nitwegyesibwa ekibiina kya Yehova. Abareeberezi obumwe baine kweshwijuma kureeba yaaba nibeetaho omutima omu mwanya gw’okuhimbisisa Yehova. Teekateeka aha ky’okureeberaho ky’ow’eishe-emwe Timothy. Obu Timothy yaabaire aherize kutooranwa kuba omureeberezi, akaba naakunda kuha embazo za boona. Naagira ati: “Nkaba ntebeekanisa enyanjura ndaingwa n’eby’okureeberaho bigumire. Ebyo bikaba bireetera abantu kumpimbisa. Eky’obusaasi, niinye baabaire nibataho omutima omu mwanya gw’okuguta ahari Baibuli nari Yehova.” Timothy akeetegyereza ngu aine kukora empinduka omu myegyeseze ye kubaasa kwetantara kwetaho omutima. (Enf. 27:21) Niki ekyarugiremu? Naashoboorora ati: “Hati, ab’eishe-emwe na banyaanyazi-itwe nibangira ngu embazo ezi ndikuha nizibahwera kusingura oburemeezi, kwemera okugyezibwa, n’okwirira haihi Yehova. Ebigambo ebyo nibindeetera okushemererwa, okurikukira oku naabaire nintunga emyaka mingi enyima ahabw’okuhimbisibwa.”

9. Okworoba n’obumanzi bwa Gideoni bikagyezibwa bita? (Reeba ekishushani ekiri aha kipampagare.)

⁹ Gideoni ku yaatoorainwe kuba omuramuzi, okworoba n’obumanzi bwe bikagyezibwa. Akaheebwa obujunaanizibwa bugumire, obw’okucwekyereza eitambiro eri ishe yaabaire naaramizaho Baali. (Bar. 6:25, 26) Gideoni ku yaaherize kurundaana eihe, Yehova akamugambira emirundi ebiri kurituubya. (Bar. 7:2-7) Bwanyima, akagambirwa kutaahirira orusiisira rw’abazigu aha gati y’ekiro.—Bar. 7:9-11.

10. Okworoba kw’omureeberezi nikubaasa kugyezibwa kuta?

 ¹⁰ Abareeberezi baine kuba beteekateekire kworoba. (Yak. 3:17) Omureeberezi orikworoba naaba ayeteekateekire kugyendera aha buhabuzi bw’Ebyahandiikirwe n’obw’ekibiina kya Yehova. Yaakora atyo naateeraho abandi eky’okureeberaho kirungi. Kwonka, okworoba kwe nikubaasa kugyezibwa. Nk’eky’okureeberaho, naabaasa kutunga obuhabuzi bwingi agumirwe kubworobera bwona. Obumwe, naabaasa kubangaanisa yaaba obuhabuzi obwaheebwa nibukora nari n’obw’obwengye. Nari naabaasa kuheebwa obujunaanizibwa oburikubaasa kutaahataaha omu bugabe bwe. Abareeberezi nibabaasa kutooreza bata Gideoni omu mbeera nk’ezo?

11. Niki ekirikubaasa kuhwera abareeberezi kworoba?

¹¹ Hurikiza gye obuhabuzi kandi obugyendereho. Ruhanga akagambira Gideoni oku araacwekyereze eitambiro rya ishe, n’ahu araayombekyere Yehova eitambiro erisya, n’enyamaishwa ei yaabaire naaza kuhayo. Gideoni taraabangaaniise aha buhabuzi obwo, kureka akabukuratira. Hati, abareeberezi nibatunga obuhabuzi kuruga ahari Yehova kurabira omu mabaruha, ebirango, n’eby’okukuratira ebirikukwata ahaby’omwoyo n’eby’omubiri. Nitukunda abareeberezi baitu ahabw’okworobera eby’okukuratira ebi ekibiina kirikutuha. Ekibiina kyona nikigasirwa.—Zab. 119:112.

12. Abareeberezi nibabaasa kugyendera bata aha biri omu Abaheburaayo 13:17 haabaho empinduka omu by’okukuratira omu kibiina?

¹² Ba oyeteekateekire kukora empinduka. Ijuka ngu Yehova akagambira Gideoni kutuubya ihe rye ebicweka ebirikurenga 99 ahari igana. (Bar. 7:8) Naabaasa kuba yaayebuurize ati: ‘Buzima eki nikyetengyesa? Eki nikiija kukora?’ Kwonka nabwo, Gideoni akooroba. Abareeberezi nibatooreza Gideoni barikworoba ekibiina kyabagambira kukora empinduka. (Shoma Abaheburaayo 13:17.) Nk’eky’okureeberaho, omu 2014 Akakiiko Akareeberezi kakahindura omu muringo ogu Ebyombeko by’Obukama n’eby’okugiriramu enteerane empango birikushagikwa. (2 Kor. 8:12-14) Buri kibiina hati tirikushashura esente ezirikukoresibwa kwombeka Ekyombeko ky’Obukama ekyakyo. Kureka, ebibiina omu nsi yoona nibirundaana esente kugira ngu haaba hariho ahu ebyombeko by’ekibiina birikwendwa bibaase kwombekwa, n’obu ekibiina omu kicweka ekyo kirikuba kitaine esente zirikumara. José ku yaamanyire empinduka egyo, akabangaanisa arikuteekateeka ati: ‘Tihariho Kyombeka ky’Obukama ekiraayombekwe. Tikwo ebintu birikukorwa omu kicweka kyaitu.’ Niki ekyahweraire José kwikiriza empinduka egyo? Naagira ati: “Ebiri omu Enfumu 3:5, 6 bikanyijutsya kwesiga Yehova. Kandi ebirugiremu ni birungi. Tubaasize kwombeka Ebyombeko by’Obukama bingi kandi twegire kuhayo omu miringo etari emwe kugira ngu twena twingaigane.”

13. (a) Gideoni akaba naahamya ki? (b) Abareeberezi nibabaasa kumutooreza bata? (Reeba n’ekishushani.)

 ¹³ Kora n’obumanzi ebi Yehova arikukunda. Gideoni akoorobera Yehova n’obu araabe yaabaire atiinire kandi arikubaasa kufeerwa amagara ge. (Bar. 9:17) Kwonka bwanyima ya Yehova kumuhamiza akagira obwesigye ngu Ruhanga naija kumushagika yaaba naarinda abaheereza be. Abareeberezi abarikutuura omu myanya ahu omurimo gwaitu gwemereziibwe nibatooreza Gideoni. Abareeberezi nibooreka obumanzi barikwebembera enteerane n’okubuurira n’obu barikumanya ngu nibabaasa kukwatwa, babuuzibwe, bafeerwe emirimo yaabo nari batwarizibwe kubi. c Omu kubonabona kwingi, abareeberezi nikiija kubeetengyesa kugira obumanzi kworobera obuhabuzi obu baraaheebwe n’obu kirabe nikibaasa kubarugiramu akabi. Obuhabuzi obwo nibubaasa kuba bwine akakwate n’oku turaabuurire obutumwa oburi nk’orubaare n’eki twine kukora kubaasa kuhonokaho twataahirirwa Googi owa Magoogi.—Ezk. 38:18; Kush. 16:21.

14. Okugumisiriza kwa Gideoni kukagyezibwa kuta?

¹⁴ Obujunaanizibwa bwa Gideoni nk’omuramuzi bukaba nibutwariramu okukora n’amaani. Obu Abamidiani baahunga nyekiro, Gideoni akabakuratira kuruga omu ruhanga rwa Yezereeli kuhika aha Mugyera Yorudaani, omwanya ogurikubaasa kuba gwabaire guri eihamba ry’amaani. (Bar. 7:22) Mbwenu shi Gideoni akagarukira aha Mugyera Yorudaani? Ngaaha! N’obu araabe yaabaire aruhire, akambuuka omugyera ogwo n’abashaija be 300 baagumizamu babairukireho. N’ekyarugiremu bakasingura Abamidiani.—Bar. 8:4-12.

15. Ni ryari obu okugumisiriza kw’omureeberezi kurikubaasa kugyezibwa?

¹⁵ Obumwe omureeberezi naabaasa kuruha munonga, omu biteekateeko n’omu nyehurira, ahabw’okureeberera ekibiina n’eka ye. Omu mbeera nk’ezo, abareeberezi nibabaasa kutooreza bata Gideoni?

16-17. Niki ekyahweraire Gideoni kugumisiriza, kandi abareeberezi nibabaasa kugira bwesigye ki? (Isaaya 40:28-31) (Reeba n’ekishushani.)

 ¹⁶ Gira obwesigye ngu Yehova naija kukuha amaani. Gideoni akaba aine obwesigye ngu Yehova naija kumuha amaani kandi taramureebize. (Bar. 6:14, 34) Eizooba rimwe Gideoni n’abashaija be bakaba bari aha bigyere bairukire aha bagabe babiri Abamidiani obundi bo barikugyendera aha ngamira. (Bar. 8:12, 21) Kwonka, Abaisraeli barikuhwerwa Ruhanga bakarugaho basingura. Abareeberezi nabo nibabaasa kwesiga Yehova, ‘otarikugwa nshazi, n’obu kwakuba okuruha.’ Naija kubaha amaani agarikwetengyesa.—Shoma Isaaya 40:28-31.

¹⁷ Teekateeka aha ky’okureeberaho kya Matthew, ori aha Kakiiko Akarikuhikaanisa Abarwaire n’Eirwariro. Niki ekirikumuhwera kugumisiriza? Matthew naagira ati: “Ndeebire ebiri omu Abafilipi 4:13 birikuhikiirira. Emirundi mingi ku ndikuba nduhire mpwireyo, ninshaba Ruhanga ndikumweshengyereza kumpa amaani kubaasa kuhwera ab’eishe-emwe bagyenzi bangye. Omu mbeera ezo, omwoyo gwa Yehova gumpweraire kugira amaani agarikumbaasisa kugumisiriza.” Nka Gideoni, abareeberezi baitu abarikukora n’amaani nibabaasa kuhikwaho oburemeezi barikuteeraho kureeberera obusyo. Kwonka, baine kumanya obugarukiro bwabo, reero bakakora ebi barikubaasa. Baine kugira obwesigye ngu Yehova naahurira okutaka kwabo baamushaba kubahwera kandi naabaha amaani g’okugumisiriza.—Zab. 116:1; Fil. 2:13.

18. Omu bugufu, abareeberezi nibabaasa kutooreza bata Gideoni?

¹⁸ Hariho bingi ebi abareeberezi barikubaasa kwegyera ahari Gideoni. Abareeberezi baine kworeka omutwarize gw’okwetwara n’obucureezi aha bujunaanizibwa obu barikwikiriza na baacwerwa orubanja nari baahimbisibwa. Baine kworoba kandi bakagira obumanzi, na munonga obu emperu y’entebeekanisa y’obusingye obu eri haihi. Kandi baine kugira obwesigye ngu n’obu baakuhikwaho buremeezi ki, Ruhanga naija kubaha amaani. Buzima, nitusiima abareeberezi abarikukora n’amaani, kandi ‘nitubaha ekitiinisa.’—Fil. 2:29.