EKICWEKA EKY’OKWEGA 27
Ahabw’enki Twine Kutiina Yehova?
“Emibonano ya [Yehova] emanywa abarikumutiina.”—Zab. 25:14.
EKYESHONGORO 8 Yehova n’Obuhungiro Bwaitu
EBIRAAGAMBWEHO a
1-2. Kurugiirira ahari Zaaburi 25:14, twine kukora ki kubaasa kugira omukago murungi na Yehova?
NOOTEEKATEEKA ngu oine kugira mitwarize ki kubaasa kuguma oine enkoragana nungi n’omuntu? Noobaasa kugira ngu abanywani barungi baine kukundana kandi bakashagikana. Noobaasa kuteekateeka ngu okutiina ti mutwarize mukuru ogu oine kugira kubaasa kuba omunywani murungi. Kwonka nk’oku omutwe gw’ekicweka eki gurikworeka, abarikwenda kugira mukago murungi na Yehova baine ‘kumutiina.’—Shoma Zaaburi 25:14.
2 N’obu twakuba tumazire bwire ki nituheereza Yehova, twine kumuha kitiinisa ekimushemereire. Kwonka shi okutiina Ruhanga nikimanyisa ki? Nitubaasa kwega tuta kutiina Yehova? Kandi nitubaasa kwegyera ki ahari Obadia, Omunyamurwa Omukuru Yehoyaada, n’Omugabe Yoasi aha bikwatiraine n’okutiina Ruhanga?
OKUTIINA RUHANGA NIKIMANYISA KI?
3. Shoboorora ekirikutureetera kutiina n’oku kirikutuhwera.
3 Nitutiina twamanya ngu nitubaasa kuhikwaho akabi. Okutiina oku ni kurungi kandi nikubaasa kutuhiga kutwaza omu muringo gw’obwengye. Okutiina kugwa nikutuhwera kwetantara kugyendera haihi n’eneengo. Okutiina kuhutaara nikubaasa kutuhiga kwetantara emyanya y’akabi. Okutiina kushiisha omukago gwaitu na munywani waitu nikutuhwera kutagamba nari kukora ekintu ekirikumugwisa kubi.
4. Sitaane naayenda ngu abantu batiine Yehova mu muringo ki?
4 Sitaane naayenda ngu abantu batiine Ruhanga omu muringo ogutahikire. Sitaane naashagika emiteekateekyere nk’eya Elifaazi owaagizire ngu Yehova ni Ruhanga orikuhoora enzigu, omunyakiniga kandi ngu kigumire kumushemeza. (Yob. 4:18, 19) Sitaane naayenda ngu tutiine Ruhanga ekirenga turekyere aho kumuheereza. Kubaasa kwetantara omutego ogwo, twine kutiina Ruhanga omu muringo oguhikire.
5. Okutiina Ruhanga nikimanyisa ki?
5 Omuntu orikutiina Ruhanga omu muringo murungi naaba naamukunda kandi arikwetantara kukora ekintu ekirikubaasa kushiisha omukago gwe nawe. Nikwo kutiina oku Yesu yaabaire aine. (Heb. 5:7) Akaba atarikutiina Yehova omu muringo mubi. (Isa. 11:2, 3) Kureka, akaba naamukunda kandi arikwenda kumworobera. (Yoh. 14:21, 31) Nka Yesu, nituha Yehova ekitiinisa ahakuba aine rukundo, n’omunyabwengye, omuringaaniza kandi aine amaani. Kandi nitumanya ngu Yehova naatukunda munonga kandi naakwatwaho oku turikutwaza. Nitubaasa kucwamu kumugwisa kubi nari kumureetera kushemererwa.—Zab. 78:41; Enf. 27:11.
YEGA KUTIINA RUHANGA
6. Ni muringo ki gumwe oku turikubaasa kwega kutiina Ruhanga? (Zaaburi 34:11)
6 Titurikuzaarwa nitutiina Yehova, kureka nituba twine kukyega. (Shoma Zaaburi 34:11.) Omuringo gumwe oku turikubaasa kukikora n’okushwijuma ebyahangirwe. Ku turikwongyera kureeba obwengye bwa Ruhanga, amaani ge, na rukundo mpango ei atwiniire erikureebekyera “aha bi yaahangire,” nitwongyera kumukunda n’okumuha ekitiinisa. (Rom. 1:20) Munyaanyazi-itwe Adrienne naagira ati: “Obwengye bwa Yehova oburikureebekyera omu byahangirwe nibuntangaaza kandi nibumpwera kwetegyereza ngu naamanya ekirungi ekinshemereire.” Okuteekateeka aha nshonga egyo kikamureetera kwebuuza ati: “Ahabw’enki niinyenda kukora ekintu ekiraashiishe omukago gwangye na Yehova, owaampaire amagara?” Saabiiti egi, teeraho kumara obwire orikuteekateeka ahari kimwe aha byahangirwe. Okukora ekyo nikiija kukuhwera kwongyera kukunda Yehova n’okumuha ekitiinisa.—Zab. 111:2, 3.
7. Okushaba nikubaasa kutuhwera kuta kutiina Yehova omu muringo oguhikire?
7 Omuringo ogundi oku turikubaasa kutiina Ruhanga n’okushaba obutoosha. Ku turikwongyera kushaba, Yehova naayongyera kuba owaabuzima ahariitwe. Buri kumushaba amaani kugumisiriza okugyezibwa, nitwijuka ngu aine amaani maingi. Twasiima Yehova ahabw’okutuha ekiconco ky’Omwana we, nikitwijutsya rukundo ei atwiniire. Kandi twamweshengyereza kutuhwera twaba twine oburemeezi, nikituhamiza ngu Yehova n’omunyabwengye. Okushaba nk’okwo nikutuhwera kwongyera kuha Yehova ekitiinisa. Kandi nikutuhwera kwongyera kumariirira kwetantara kukora ekintu kyona ekirikubaasa kushiisha omukago gwaitu nawe.
8. Nitubaasa kukora ki kuguma nitutiina Ruhanga?
8 Nitubaasa kugumizamu nitutiina Ruhanga twayeyegyesa Baibuli twine ekigyendererwa ky’okwegyera aha by’okureeberaho ebirungi n’ebibi ebirimu. Ka tugambe aha baheereza ba Yehova abeesigwa babiri, Obadia owaabaire ari omubiiki omu ka y’Omugabe Ahabu n’Omunyamurwa Omukuru Yehoyaada. Kandi nituza n’okureeba eki turikubaasa kwegyera aha Mugabe Yoasi owa Yuda, owaatandikire gye kwonka bwanyima akaruga ahari Yehova.
BA EMANZI NKA OBADIA OWAABAIRE NAATIINA RUHANGA
9. Okutiina Yehova kukahwera kuta Obadia? (1 Abagabe 18:3, 12)
9 Obu Baibuli yaabanza kugamba ahari Obadia b ekagira eti: ‘Obadia akaba naatiina munonga [Yehova].’ (Shoma 1 Abagabe 18:3, 12.) Okutiina okuhikire kukahwera kuta Obadia? Kukamuhwera kuba omwesigwa kandi ow’amazima, n’ekyarugiremu omugabe akamuha obujunaanizibwa bw’okureeberera eby’omu ka ye. (Gyeragyeranisa Neh. 7:2) Ahabw’okugira ngu Obadia akaba naatiina Ruhanga akabaasa kugira n’omutwarize gw’obumanzi ogwabaire nigwetengyesa. Akaba ariho omu butegyeki bw’Omugabe mubi Ahabu, ‘owaakozire ebirikwangwa [Yehova] okukira [abagabe] boona abaamubandiize.’ (1 Bag. 16:30) Kandi, Yezebeeli muka Ahabu owaabaire naaramya Baali, akaba naayangira kimwe Yehova, ekyamureeteire kuteeraho kumariraho kimwe okuramya okw’amazima omu nganda ikumi za Israeli. Nangwa akaita baanabi ba Ruhanga baingi. (1 Bag. 18:4) Buzima, Obadia akaba naaramya Yehova omu bwire obwabaire bugumire.
10. Obadia akooreka ata obumanzi?
10 Obadia akooreka ata obumanzi? Obu Yezebeeli yaatandika kusherura baanabi ba Ruhanga kubaita, Obadia akatwara baanabi 100 yaabashereka ‘makumi ataano-ataano omu nyanga, kandi yaaguma naabaheeramu eby’okurya n’amaizi.’ (1 Bag. 18:13, 14) Ku ogire ngu Yezebeeli akakimanya, Obadia omushaija emanzi akaba naija kwitwa. Amazima gari ngu, Obadia naabaasa kuba yaatiinire, kandi yaabaire atarikwenda kufeerwa amagara ge. Kwonka Obadia akaba naakunda Yehova n’abaheereza be kukira oku yaabaire naayekunda.
Ow’eishe-emwe naayoreka obumanzi arikutwarira Abakristaayo bagyenzi be eby’okurya by’omwoyo ahu omurimo gwaitu guzibiirwe (Reeba akacweka 11) d
11. Abaheereza ba Yehova obunaku obu nibatooreza bata Obadia? (Reeba n’ekishushani.)
11 Obunaku obu abaheereza ba Yehova baingi nibatuura omu mahanga ahu omurimo gwaitu guzibiirwe. Nibaha ab’obushoboorozi ekitiinisa ekibashemereire, kwonka nka Obadia ab’eishe-emwe na banyaanyazi-itwe abo ab’omuhendo tibarikurekyera aho kuramya Yehova. (Mat. 22:21) Nibooreka ngu nibatiina Ruhanga barikumworobera okukira abantu. (Byak. 5:29) Ekyo nibakikora barikugumizamu nibabuurira amakuru marungi kandi barikuteeranira hamwe bwesherekye. (Mat. 10:16, 28) Nibafayo kuhamya ngu ab’eishe-emwe na banyaanyabo baatunga eby’okurya by’omwoyo ebirikwetengyesa. Teekateeka aha ky’okureeberaho kya Henri, orikutuura omuri Africa omu ihanga ahu omurimo gwaitu gwazibiirwe kumara obwire. Omu bwire obwo, Henri akeehayo kutwarira Abakristaayo bagyenzi be eby’okurya by’omwoyo. Akahandiika ati: “Ndi omuntu oine enshoni. Ningira ngu ekyampweraire kugira obumanzi n’ahabw’okutiina Yehova.” Mbwenu shi naiwe noobaasa kugira obumanzi nka Henri? Nikibaasika waateeraho kutiina Ruhanga omu muringo oguhikire.
HAMIRA AHARI YEHOVA NK’OMUNYAMURWA OMUKURU YEHOYAADA
12. Omunyamurwa Omukuru Yehoyaada n’omukazi we bakooreka bata ngu bakaba bahamiire ahari Yehova?
12 Omunyamurwa Omukuru Yehoyaada akaba naatiina Yehova, kandi okutiina okwo kukamuhiga kuba omwesigwa n’okushagika okuramya okw’amazima. Ekyo akakyoreka butunu obu muhara wa Yezebeeli Atalia yaayehindura omugabekazi wa Yuda. Abantu bakaba baine enshonga nungi eyaabaire neebareetera kutiina Atalia. Akaba ari enshaarizi, aine omururu gw’okutegyeka ekyamureeteire kuteeraho kwita baijukuru be boona kugira ngu ategyekye. (2 Bus. 22:10, 11) Omwe aha abaijukuru abo, Yoasi akahonokaho ahabw’okugira ngu muka Yehoyaada, Yehoshabeasi akamushereka. We na iba bakamurinda kandi baaguma nibamureeberera. Omu muringo ogwo, Yehoyaada na Yehoshabeasi bakarinda orunyiriri orwa Daudi orw’abagabe. Yehoyaada akahamira ahari Yehova kandi taratiinire Atalia.—Enf. 29:25.
13. Yehoyaada akooreka ata ngu akaba ahamiire ahari Yehova, obu Yoasi yaabaire aine emyaka mushanju?
13 Obu Yoasi yaabaire aine emyaka mushanju, Yehoyaada akagaruka yaayoreka ngu ahamiire ahari Yehova. Akakora entebeekanisa. Okuhikiirira kwayo kukaba nikwija kubaasisa Yoasi kuba omugabe kuruga omu runyiriri rwa Daudi. Kwonka entebeekanisa egyo kuri etarahikiirire, Yehoyaada akaba naabaasa kwitwa. Ahabw’obuhwezi bwa Yehova, entebeekanisa egyo ekahikiirira. Yehoyaada, arikuhwerwa abakuru n’Abaleevi, akeemeka Yoasi nk’omugabe kandi Atalia akaitwa. (2 Bus. 23:1-5, 11, 12, 15; 24:1) Bwanyima Yehoyaada ‘akaragaanisa omugabe n’abantu endagaano na [Yehova] kuba abantu be.’ (2 Bag. 11:17) Yehoyaada akata ‘abarinzi b’amarembo aha marembo g’enju ya [Yehova], ngu omuntu weena otashemeire omu muringo gwona arekye kutaahamu.’—2 Bus. 23:19.
14. Ni mu muringo ki oku Yehova yaahaire Yehoyaada ekitiinisa?
14 Yehova akaba yaagizire ngu, “abarikumpa ekitiinisa, nibo ndikiha.” Buzima, akashumbuusha Yehoyaada. (1 Sam. 2:30) Nk’eky’okureeberaho, akareetera ebikorwa birungi by’omunyamurwa kuhandiikwa kugira ngu tubyegyereho. (Rom. 15:4) Kandi Yehoyaada ku yaafiire, akaheebwa ekitiinisa ky’omutaano yaaziikwa “omu bagabe omu rurembo rwa Daudi, ahabw’okuba akakora gye omuri Israeli ahari Ruhanga n’aha b’enju ye.”—2 Bus. 24:15, 16.
Nka Yehoyaada Omunyamurwa Omukuru, okutiina Ruhanga nikubaasa kutuhiga kuhamira aha b’eishe-emwe bagyenzi baitu kandi tubahwere (Reeba akacweka 15) e
15. Nitubaasa kwegyera ki aha birikukwata ahari Yehoyaada? (Reeba n’ekishushani.)
15 Ebirikukwata ahari Yehoyaada nibibaasa kutuhwera twena kuteeraho kutiina Ruhanga. Abareeberezi nibabaasa kutooreza Yehoyaada barikuguma nibarinda obusyo bwa Ruhanga. (Byak. 20:28) Abakuzire omu myaka nibabaasa kwegyera ahari Yehoyaada barikutiina Yehova kandi bakaguma bamuhamiireho. Naabaasa kubakoresa kuhikiiriza ekigyendererwa kye. Naabatwara nk’ab’omuhendo. Abato nabo nibabaasa kwegyera aha ku Yehova yaatwariize Yehoyaada, kandi bamutooreze barikuha ekitiinisa abakuzire, na munonga abamazire obwire buraingwa nibamuheereza omu bwesigwa. (Enf. 16:31) Twena nitubaasa kwegyera aha bakuru n’Abaleevi abaashagikire Yehoyaada. Ka tumariire kushagika abarikutureeberera turikuboorobera.—Heb. 13:17.
OTABA NK’OMUGABE YOASI
16. Niki ekirikworeka ngu Omugabe Yoasi akaba ahindukire mubi?
16 Yehoyaada akahwera Omugabe Yoasi kuba omuntu murungi. (2 Bag. 12:2) N’ekyarugiremu, obu omugabe yaabaire ari muto akaba naayenda kushemeza Yehova. Kwonka Yehoyaada ku yaafiire, Yoasi akahurikiza abanyiginya abaabaire batarikutiina Ruhanga. Hakarugamu ki? Omugabe n’abu yaabaire naayebembera ‘bakaheereza Ashera n’ebishushani ebirikuramibwa.’ (2 Bus. 24:4, 17, 18) N’obu kiraabe kyagwisize kubi Yehova “akaguma naabatumaho baanabi kubagarura. . . , kwonka baayanga kuhurira.” Tibaraahurikiize na Zekaria mwene Yehoyaada c, owaabaire ari nabi, omunyamurwa kandi omunyabuzaare wa Yoasi. Omugabe Yoasi akeebwa n’embabazi ezi eka egyo yaamugiriire, yaitisa Zekaria.—2 Bus. 22:11; 24:19-22.
17. Niki ekyahikire ahari Yoasi?
17 Yoasi ku yaarekyeire aho kutiina Yehova ebintu tibiramugyendereire gye. Yehova akaba agizire ngu, ‘abarikumugaya, nibaija kugaywa.’ (1 Sam. 2:30) Bwanyima, eihe rikye rya Siria rikasingura “eihe rihango munonga” rya Yoasi kandi “baatsiga ahutaire munonga.” Abasiria ku baagarukireyo, abaheereza be bakamwita barikuhoorera eshagama ya Zekaria. Kandi omugabe mubi ogwo akaba atahikire n’okuziikwa omu “bituuro by’abagabe.”—2 Bus. 24:23-25.
18. Kurugiirira ahari Yeremia 17:7, 8, nitubaasa kwetantara tuta kuba nka Yoasi?
18 Nitubaasa kwegyera ki ahari Yoasi? Akaba ari nk’omuti ogwine emizi etahami ogurikushagikwa enyomyo. Enyomyo akaba ari Yehoyaada, n’ahabw’ekyo ku yaafiire, Yoasi akahurikiza abaabaire beehagwire aha mazima, kyamureetera kugwa. Eky’okureeberaho eki nikyoreka gye ngu okutiina Ruhanga tikwine kurugiirira aha Bakristaayo bagyenzi baitu otwariiremu n’ab’eka yaitu. Kubaasa kuguma tuhami omu by’omwoyo, twine kuhamya omukago gwaitu na Ruhanga kandi tukamutiina turikweyegyesa obutoosha, tukateekateeka kandi tukashaba.—Shoma Yeremia 17:7, 8; Kol. 2:6, 7.
19. Yehova naatwenza ki?
19 Yehova tarikutushaba kukora ebi tutarikubaasa. Ebi arikutwenza biri omu Omubuurizi 12:13, aharikugira hati: “Tiina Ruhanga, oyorobere ebiragiro bye, ahakuba ekyo kyonka nikyo omuntu ashemereire kukora.” Twaba nitutiina Yehova, nitwija kubaasa kuguma tumuhamiireho nka Obadia na Yehoyaada. Kandi tihaine ekiraashiishe omukago gwaitu nawe.
EKYESHONGORO 3 Amaani Gaitu, Amatsiko Gaitu, Obwesigye Bwaitu
a Ekigambo “okutiina” kiine amakuru maingi kyakoresibwa omu Byahandiikirwe. Nikibaasa kumanyisa okugira obwoba, okuha ekitiinisa nari okukangarana. Ekicweka eki nikiza kutuhwera kugira okutiina okurikubaasa kutuhiga kuba emanzi n’okuhamira ahari Tataitwe ow’omu iguru.
b Obadia ogu, tiwe nabi Obadia owaabaireho ebyasha bingi bwanyima kandi owaahandiikire ekitabo ekirikwetererwa eiziina rye.
c Matayo 23:35, nihooreka ngu Zekaria akaba ari mwene Barakia. Nikigambwa ngu Yehoyaada naabaasa kuba yaabaire aine amaziina abiri, nka bamwe abarikugambwaho omu Baibuli (gyeragyeranisa Mat. 9:9 na Mak. 2:14), nari Barakia naabaasa kuba yaabaire ari ishenkuru wa Zekaria nari ishenkuruza.
d ENSHOBOORORA Y’EBISHUSHANI: Ow’eishe-emwe naatwarira Abakristaayo bagyenzi be eby’okurya by’omwoyo ahu omurimo gwaitu guzibiirwe.
e ENSHOBOORORA Y’EBISHUSHANI: Munyaanyazi-itwe omuto naayegyera ahari munyaanyazi-itwe okuzire kukoresa esimu kubuurira, ow’eishe-emwe okuzire naayoreka obumanzi arikubuurira aha kagaari, ow’eishe-emwe omukugu naatendeka abandi kuhunduuza Ekyombeko ky’Obukama.
