Baibuli terikukigambaho butunu. Kwonka erimu obushonshorekye oburikubaasa kutuhwera kumanya ahabw’enki baacwiremu batyo.

Maraika akagambira Mariamu ngu akaba naija kugira enda azaare omwana. Obu maraika yaareeta obutumwa obwo, Mariamu na Yosefu bakaba nibatuura omuri Nazareesi tauni ya Galilaaya. (Luk. 1:26-31; 2:4) Ku baarugire Misri, bakagaruka Nazareesi. Yesu niyo yaakuriire kandi akahinduka owa Nazareesi. (Mat. 2:19-23) Niyo nshonga ahabw’enki baagamba ahari Nazareesi nituteekateeka ahari Yesu, Yosefu, na Mariamu.

Mariamu akaba aine omunyabuzaare orikwetwa Elizaabeesi owaabaire naatuura omuri Buyudaaya. Elizaabeesi akaba ari muka Zaakaria omunyamurwa kandi niwe yaabaire nyina wa Yohaana Omubatizi. (Luk. 1:5, 9, 13, 36) Mariamu akataayaayira Elizaabeesi kandi yaaguma nawe kumara ameezi ashatu. Bwanyima Mariamu akagaruka Nazareesi. (Luk. 1:39, 40, 56) N’ahabw’ekyo Mariamu akaba naamanya gye ekicweka kya Buyudaaya.

Bwanyima, Yosefu akoorobera ekiragiro ky’okuza “kwehandiikisa.” N’ahabw’ekyo Yosefu akaruga Nazareesi yaaza Betelehemu, “omu rurembo rwa Daudi” ahu Mesia yaabaire naija kuzaarirwa. (Luk. 2:3, 4; 1 Sam. 17:15; 20:6; Mik. 5:2) Mariamu ku yaaherize kuzaara Yesu, Yosefu akaba atarikwenda ngu agyende orugyendo ruraingwa kugaruka Nazareesi n’omwereere. Bakaguma Betelehemu, mahiro nka mwenda kuruga Yerusaalemu. N’ahabw’ekyo bakaba nibabaasa kutwara omwereere waabo aha hekalu kuhayo ekitambo nk’oku ebiragiro byabaire biri.—Lev. 12:2, 6-8; Luk. 2:22-24.

Maraika wa Ruhanga akagambira Mariamu ngu omutabani naija kuza aha “kitebe ky’obugabe bwa ishenkuru Daudi, ategyekye” nk’omugabe. Obundi Yosefu na Mariamu bakareeba ngu ni kikuru Yesu okuzaarirwa omu rurembo rwa Daudi. (Luk. 1:32, 33; 2:11, 17) Nibabaasa kuba baateekateekire ngu n’eky’obwengye kugumayo okuhitsya obu Ruhanga araabamanyise ekiraakurateho.

Titurikumanya obwire obu baabaire bamazire omuri Betelehemu obu abanyabwengye baaza kubareeba. Kwonka nitumanya ngu, omu bwire obwo bakaba nibatuura omu nju kandi mutabani waabo akaba ari “omwana,” beitu atari mwereere. (Mat. 2:11) Nikireebeka ngu omu mwanya gw’okugaruka Nazareesi, bakaguma Betelehemu kumara akaire.

Heroode akaragiira ngu ‘abaana b’aboojo boona abaabaire bari Betelehemu abahikize emyaka ebiri, n’abatakagihikize’ baitwe. (Mat. 2:16) Maraika ku yaarabwire Yosefu na Mariamu bakahungira Misri na Yesu kuhitsya obu Heroode yaafiire. Bwanyima Yosefu akatwara eka ye Nazareesi. Ahabw’enki bataragarukire Betelehemu? N’ahabw’okugira ngu mutabani wa Heroode, Arukelao owaabaire naategyeka Buyudaaya akaba ari mubi, kandi Yosefu akaba naayorobera okuraburwa kwa Ruhanga. Nazareesi gukaba guri omwanya murungi gw’okukurizamu Yesu arikuramya Ruhanga.—Mat. 2:19-22; 13:55; Luk. 2:39, 52.

Yosefu naabaasa kuba yaafiire Yesu atakataireho omuhanda gw’okubaasisa abandi kuza omu iguru. N’ahabw’ekyo Yosefu naija kuzooka kutuura omu nsi. Kandi baingi nibaija kumureeba, abagambire ahabw’enki we na Mariamu baagumire Betelehemu bwanyima y’okuzaara Yesu.