Abazaire bangye bakaruga Estonia omu Rutaro rw’Ensi Yoona II baaza Germany, ahu naazaariirwe. Bwanyima bakatebeekanisa kufurukira Canada. Ahu twabandize kutuura haihi na Ottawa, Canada, hakaba hariho ekyombeko kikye kirimu omwanya gw’okurisiizamu enkoko. Tukaba turi abooro munonga, kwonka tukaba twine amahuri g’okurya aha kyantsya.

Eizooba rimwe, Abajurizi ba Yehova bakashomera maawe Okushuuruurwa 21:3, 4. Ebi yaayegire bikamukwataho yaatandika kurira. Embibo y’amazima ekakura, kandi tata na maawe bakarahuka kutunguuka baabatizibwa.

Abazaire bangye bakaba batarikumanya gye Orungyereza, kwonka bakatwara amazima nk’ag’omuhendo. Haihi buri Rwamukaaga, tata akaba ntwara omu kubuurira na munyaanyazi Sylvia, n’obu yaabaire aba yaaruga kukora ekiro kyona omu ikorero ry’okuheesha omuri Sudbury, Ontario. Buri saabiiti tukaba twega Omunaara gw’Omurinzi nk’eka. Maawe na tata bakanyegyesa kukunda Ruhanga. Ekyo kikampiga kwehayo ahari Yehova aha myaka ikumi omuri 1956. Rukundo mpango ei baabaire bainiire Yehova empweraire kugumizamu ndikumuheereza.

Ku naaherize siniya, hariho ebyampugize. Nkateekateeka ngu naaba payoniya tindaakore esente zirikumara kubaasa kuhika aha kigyendererwa kyangye ky’okugyendera omu nyonyi kurambura ensi. Nkatunga omurimo ogu naabaire ninkunda, ogw’okuteera ebyeshongoro aha radiyo. Kwonka ahabw’okukora omu mwabazyo, nkaguma ninyosha enteerane kandi ndikukwatanisa n’abatarikukunda Ruhanga. Bwanyima, omuntu wangye w’omunda otendekirwe Baibuli akampiga kukora empinduka.

Nkaza Oshawa, Ontario. Okwo niyo naashangire Ray Norman, munyaanya Lesli, na baapayoniya abandi. Boona bakanyakiira gye. Ku naareebire oku baabaire bashemereirwe kikandeetera kushwijuma ebigyendererwa bangye. Bakampiga kuba payoniya kandi nkatandika Seputemba 1966. Nkaba nshemereirwe kandi buri kimwe kiri gye. Kwonka, haine ebyabaireho kitaraariire ebyahindwire embeera yangye.

Obu naabaire nkiri omu siniya, nkaijuza foomu y’okuheereza aha Beseeli omuri Toronto, Canada. Ku naabaire ndi payoniya, nkeetwa kuheereza aha Beseeli emyaka ena. Kwonka nkaba ninkunda Lesli, kandi  nyerarikiriire ngu naaza aha Beseeli tindagarukye kumureeba. Bwanyima y’okushaba munonga, nkacwamu kuza aha Beseeli kandi nkasiibura Lesli nyine obusaasi.

Aha Beseeli nkaba ninkora omu kwozya emyenda kandi bwanyima nkaba karaani. Omu bwire obwo, Lesli akaba payoniya ow’omutaano omuri Gatineau, Quebec. Nkaba ninkira kwebuuza eki yaabaire naakora kandi yaaba naacwiremu gye. Bwanyima hariho ebyantangaarize munonga. Ray, munyaanya wa Lesli akeetwa kuheereza aha Beseeli. Tukaba nituraara omu kishengye kimwe. Ekyo kikandeetera kugaruka kuteekateeka aha omukago gwangye na Lesli. Tukataaha hamwe omu bushwere—Febwari 27, 1971 aha izooba obu naahendera emyaka ena aha Beseeli.

Nyowe na Lesli tukashabwa kuheereza omu kibiina ekirikukoresa Orufaransa omuri Quebec. Bwanyima y’emyaka mikye, nkatangaara ku naayetsirwe kuba omureeberezi wa Saketi nyine emyaka 28. Nkaba ninyereeba nka muto kandi nk’otarikubaasa, kwonka ebiri omuri Yeremia 1:7, 8 bikangumya. Ekindi, Lesli akaba naagumirwa kubyama kandi akaba atungire butandu z’emotoka emirundi mingi. N’ahabw’ekyo tukateekateeka ngu tituraabaase obuheereza bwa saketi. Kwonka nabwo Lesli, akagira ati: “Mbwenu shi Yehova yaatushaba kukora ekintu, titushemeire kukikora.” Tukaikiriza kuza omu buheereza bwa saketi kandi tukabumaramu emyaka 17 tushemereirwe.

Omu buheereza bwa saketi butoosha nkaba mba nyine bingi by’okukora, ntaine bwire bw’okuba na Lesli. Nkeega eishomo. Orwokubanza rumwe omu kasheeshe, nkahurira akade k’aha rwigi. Kwonka tihaine owaabaire ariho, nkashangaho ekiibo kiriho ekitambaara ky’aha meeza, ebijuma, ciizi, omugaati, ecupa ya viinyo, amagiraasi, n’akabaruha karikugira ngu, “Twara omukazi waawe aha kahuumuro.” Rikaba riri eizooba rirungi, akashana karikwaka. Kwonka nkashoboororera Lesli ngu tindagyende ahakuba nkaba nyine embazo z’okutebeekanisa. Akeetegyereza kwonka tarashemereirwe. Kwonka bwanyima, omuntu wangye ow’omunda akanshinja. Nkateekateeka aha Abaefeso 5:25, 28, ahu Yehova arikumpiga kufayo aha nyehurira z’omukazi wangye. Bwanyima y’okushaba nkagambira Lesli ngu, “ka tugyende,” kandi ekyo kikamushemeza. Tukavuga, twaza omu mwanya murungi haihi n’omugyera, twayara ahansi ekitambaara, tukashemererwa okukira obundi bwona. Kandi bwanyima nkabaasa n’okutebeekanisa embazo zangye.

Tukashemererwa turikuheereza omu saketi nyingi kuruga British Columbia kuhika Newfoundland. Ekigyendererwa eki naabaire nyine eky’okurambura ensi kikaba kiriyo nikihikiirira. Nkaba naateekateekire aha kuza omu ishomero rya Gileadi kwonka nkaba ntarikwenda kuba omumiisani omu ihanga erindi. Okaba nooshusha ngu abamiisani n’abantu b’omutaano, kandi nkaba ninyereeba nk’otarikukibaasa.  Okukira munonga nkaba nintiina ngu nibabaasa kutwohereza Africa omu ihanga eririmu orutaro nari endwara. Nkaba ndi gye omuri Canada.

Omuri 1992, Abajurizi ba Yehova ku baikiriziibwe kugaruka kubuurira omu mahanga agaabaire gari omu kicweka kya Soviet Union, tukashabwa kuba abamiisani omuri Estonia. Ekyo kikatutangaaza, kwonka tukashaba aha bikwatiraine n’enshonga egyo. Tukagaruka twayebuuza tuti: ‘Mbwenu shi Yehova yaatushaba kukora ekintu, titushemereire kukikora?’ Tukaikiriza, kandi nkehurira gye ahabw’okugira ngu tukaba tutarikuza omuri Africa.

Ahonaaho tukatandika kwega Orustonia. Bwanyima y’ameezi makye omu ihanga eryo, tukaza omu buheereza bwa saketi. Tukaba nitutaayaayira ebibiina nka 46 na guruupu eziri omu mahanga nka Estonia, Latvia, Lithuania na Kaliningrad erikushangwa omuri Russia. Ekyo kikaba nikitwariramu okwega endimi ezirikugambwa omu mahanga ago. Kwonka kikaba kitoorobi. Okuteeraho kwaitu kukakwata aha b’eishe-emwe, kandi bakabaasa kutuhwera. Omuri 1999, Estonia ekaba ofiisi y’eitaagi, kandi nkatooranwa kuheereza aha kakiiko k’eitaagi hamwe na Toomas Edur, Lembit Reile, na Tommi Kauko.

Tukamanya ab’eishe-emwe baingi abaabaire bagarwirwe omuri Siberia emyaka y’enyima. N’obu baatwariziibwe kubi omu kihome kandi bakataanisibwa n’eka zaabo tibaragwirwe kubi. Bakaguma baine okushemererwa n’obweziriki omu kubuurira. Eky’okureeberaho kyabo kikatuhwera kumanya ngu nitubaasa kugumisiriza kandi tugire okushemererwa omu mbeera zigumire.

Bwanyima y’okukora emyaka mingi tutarikuhuumuraho, Lesli akaruha munonga. Tukakimanya hahingwireho obwire ngu oburuhe bwe bukaba nibureetwa endwara erikureetera enyama z’omubiri kutonekara. Tukateekateeka kugaruka Canada. Ku twayetsirwe kuza omu ishomero ry’abari aha kakiiko k’eitaagi n’abakazi baabo omuri Patterson, New York, U.S.A., tukaba tutarikuhamya yaaba turaazeyo. Kwonka bwanyima y’okushaba munonga tukazayo. Yehova akatuha emigisha ahabw’okucwamu tutyo. Ku twabaire turi omu ishomero, Lesli akatunga obujanjabi obwabaire nibwetengyesa. N’ekyarugiremu, tukabaasa kugaruka kukora ebi twabaire nitukora obutoosha.

Omwabazyo gumwe omu 2008, ku twabaire turi omuri Estonia, ofiisi enkuru ekanteerera esimu barikumbuuza yaaba nitubaasa kuza kuheereza omuri Congo. Kikaantangaaza munonga, ahakuba nkaba nyine kugarukamu eizooba eririkukurataho. Eizooba eryo tindagambiire Lesli ahakuba nkaba niimanya ngu ekiro ekyo taraagwejegyere. Kwonka niinye ntaraagwejegyeire, nkaba ninshaba Yehova ndikumugambira ebyabaire nibinyerarikiiriza ahari Africa.

Eizooba eryakuratsireho ku naagambiire Lesli, tukateekateeka tuti: “Yehova naatushaba kuza omuri  Africa. Nitumanya tuta ngu tituraahabaase nari ngu tiharaatushemeze twaba tutagiireyo?” N’ahabw’ekyo bwanyima y’okumara emyaka 16 omuri Estonia, tukaza Kinshasa, Congo. Ofiisi y’eitaagi ekaba eri omu mwanya murungi kandi gucureire. Kimwe aha bintu ebi Lesli yaabandize kukora n’okuhanika kaada ei yaarugire nayo omuri Canada. Ekaba eriho ebigambo ebirikugira ngu “Shemererwa hoona ahu oraaze.” Bwanyima y’okuba n’ab’eishe-emwe baingi, tukeegyesa abantu Baibuli, kandi tukatunga ebirungi bingi omu bumiisani, tukoongyera kushemererwa. Bwanyima y’obwire, tukaheebwa obujunaanizibwa bw’okutaayaayira ofiisi z’eitaagi nka 13 omuri Africa. Ekyo kikatubaasisa kureeba abantu baingi barungi batarikushushana. Okutiina oku naabaire nyine kukahwaho, kandi tukasiima Yehova ahabw’okutwohereza omuri Africa.

Omuri Congo, tukashangayo eby’okurya bisya nk’obukooko, obu naabaire ninteekateeka titurikubaasa kurya. Kwonka ku twareebire ab’eishe-emwe nibabirya tukaryaho kandi bikatunirira.

Tukabaasa kutwara eby’okurya by’omwoyo n’eby’omubiri burugwa-izooba bwa Congo ahu abaheekyera baabaire nibataahirira ebyaro bakabonabonesa abakazi n’abaana. Ab’eishe-emwe baingi bakaba bari abooro. Kwonka, ku twareebire baine amatsiko gahami omu kuzooka, barikukunda Yehova, kandi barikuhamira aha kibiina kye kikatukwataho. Kikatuhiga kugaruka kweshwijuma n’okuhamya okwikiriza kwaitu. Ab’eishe-emwe abamwe bakafeerwa amaka gaabo n’ebihingwa. Ekyo kikampwera kureeba oku ebintu by’omubiri birikubaasa kuhwaho ahonaaho n’oku eby’omwoyo biri eby’omuhendo. N’obu ab’eishe-emwe abo baabaire baine oburemeezi bw’amaani, bakaba batarikwetomboita. Emiteekateekyere yaabo ekatuhiga kugira obumanzi bw’okwemera oburemeezi bwaitu.

Hariho ekindi ekyatutangaarize. Tukashabwa kuza kuheereza aha ofiisi y’eitaagi eya Hong Kong. Tukaba tutarikuteekateeka ngu nitubaasa kutuura omuri Asia. Kwonka ku twareebire oku Yehova yaatuhweraire enyima omu buheereza bwaitu bwona, tukaikiriza kuzayo. Omu 2013, tukatsigaho banywani baitu,  n’ebirungi by’omuri Africa twine obusaasi bwingi, tutarikumanya ekiraakurateho.

Okuza Hong Kong ekaba eri empinduka y’amaani, ahakuba orurembo orwo rurimu abantu kuruga omu nsi yoona. Kikaba kigumire kwega orurimi rwa Cantonese. Ab’eishe-emwe bakatwakiira gye kandi tukakunda eby’okurya byayo. Emirimo aha ofiisi y’eitaagi ekeeyongyera, kandi n’omuhendo gw’eitaka n’ebyombeko gukaba niguguma nigweyongyera. N’ahabw’ekyo Akakiiko Akareeberezi kakacwamu kuguza ebyombeko bimwe bya ofiisi y’eitaagi n’eitaka. Bwanyima, omu 2015 tukooherezibwa South Korea, ahu tukirikuheereza. Hati twine kwega orurimi orundi orugumire, kwonka nikitugumya kumanya ngu n’obu tukiine bingi by’okwega, ab’eishe-emwe nibareeba ngu tutunguukire omu kugamba Orukorea.

Obutoosha tikyorobi kutunga abanywani basya, kwonka twetegyereize ngu okweta abandi kututaayaayira, nikituhwera kurahuka kubamanya. Tureebire ngu ab’eishe-emwe boona nibashushana kandi Yehova akatuhanga turikubaasa kushashaanuka kandi tukatunga abanywani baingi abu turikukunda.—2 Kor. 6:11.

Twetegyereize ngu nikyetengyesa kureeba abantu nk’oku Yehova arikubareeba, tukaikiriza ebirikuhamya ngu naatukunda kandi naatuhabura. Ku twabaire tuhwamu amaani turikwebuuza yaaba abandi nibatusiima, tukaba tugaruka tushoma kaada n’amabaruha ga banywani baitu. Twereebiire butunu oku Yehova arikugarukamu okushaba kwaitu, arikutuhuumuriza kandi akatuha amaani.

Omu myaka egyo yoona, nyowe na Lesli twegire obukuru bw’okugirirana obwire n’obu turikuba twine bingi by’okukora. Kandi twetegyereize ngu tikiine nshonga kweshekyerera twakora enshobe, na munonga twaba nitwega orurimi rusya. Buri kiro, nitufayo kuteekateeka aha kyatushemeza eki turikubaasa kusiimira Yehova.

Nkaba ninteekateeka ngu tindibaasa kuba omumiisani nari kutuura omu mahanga agandi. Kwonka, ntungire okushemererwa ahabw’okumanya ngu ebintu byona nibibaasika ahabw’obuhwezi bwa Yehova. Ninyijuka ebigambo bya nabi Yeremia ebirikugira biti: “Ai [Yehova] okambeiha.” (Yer. 20:7) Atukoreire ebintu bingi ebirikutangaaza kandi yaatuha n’emigisha mingi, otwariiremu n’okuhikiiriza ekigyendererwa kyangye ky’okugyendera omu nyonyi kurambura ensi. Tugiire omu mahanga maingi kukira agu naabaire ninteekateeka kuzamu ndi muto, otwariiremu n’okutaayaaya omu ofiisi z’amataagi omu bicweka by’ensi bitaano. Ninsiima munonga Lesli ahabw’okunshagika omu bujunaanizibwa bwona obu tutungire.

Butoosha nitweijutsya ou turikuheereza n’ahabw’enki nitumuheereza. Emigisha ei turikutunga obunaku obu n’endozo ye ebi turaatungye ebiro byona obu Yehova ‘araashashanure engaro ze, akahaazya ekintu kyona ekihuriire ebi kirikwetenga.’—Zab. 145:16.