1. Twine kukora ki kubaasa kuhonokaho aha kiro kya Yehova?

 BAIBULI ku erikugamba aha “kiro kya” Yehova, neemanyisa obu Yehova araacwere abazigu be orubanja kandi akajuna abaheereza be. Ira, Yehova akaba afubira amahanga agamwe. (Isa. 13:1, 6; Ezk. 13:5; Zef. 1:8) Obunaku obu, “ekiro kya” Yehova nikiija kutandika n’okucwekyerezibwa kwa Babulooni Orukuru reero kihendere n’orutaro rwa Haramagedoni. Kubaasa kuhonokaho aha “kiro” ekyo, twine kwetebeekanisa hati. Yesu akeegyesa ngu twine kwetebeekanisiza “okubonabona kwingi” kandi ‘tukaguma tukweteekateekiire.’—Mat. 24:21; Luk. 12:40.

2. Nitubaasa kugasirwa tuta omu Abatesalonika ebaruha y’okubanza?

² Omu baruha y’okubanza ei entumwa Paulo yaahandiikiire Abatesalonika, akakoresa eby’okureeberaho bingi kuhwera Abakristaayo kuguma beeteekateekiire ekiro kikuru kya Yehova eky’okucwa orubanja. Paulo akaba naamanya ngu ekiro kya Yehova kikaba kitarikwija kuhika omu bwire obwo. (2 Tes. 2:1-3) Kwonka nabwo, akahiga ab’eishe-emwe bagyenzi be kwetebeekanisiza ekiro ekyo nk’ekyabaire nikiza kuhika eizooba eririkukurataho, kandi naitwe nitubaasa kugyendera aha buhabuzi obwo. Ka twetegyereze oku Paulo yaagambire: (1) aha kwija kw’ekiro kya Yehova, (2) aha abaraije kuhonokaho, (3) n’oku twine kwetebeekanisa kubaasa kuhonokaho.

3. Ekiro kya Yehova nikiza kwija kita nk’omushuma wa nyekiro? (Reeba n’ekishushani.)

³ “Nk’omushuma wa nyekiro.” (1 Tes. 5:2) Eki nikyo ky’okureeberaho ky’okubanza aha by’okureeberaho bishatu ebirikukoresibwa kushoborora okwija kw’ekiro kya Yehova. Kaingi abashuma  nibakora ebintu n’obwira kandi omu mwirima abantu batakimanyire. N’ekiro kya Yehova nikiza kwija kitaraariire, abantu baingi batakimanyire. Nangwa n’Abakristaayo abaabuzima nibaija kutangaara kureeba oku embeera eziraahinduke ahonaaho. Kwonka okutashushana n’ababi titurikwija kucwekyerezibwa.

4. Ni mu muringo ki oku ekiro kya Yehova kiri nk’ebisha?

⁴ “Nk’oku ebisha bikwata omukazi orikurumwa kuzaara.” (1 Tes. 5:3) Omukazi okurize tarikubaasa kumanya obu araakwatwe ebisha by’okuzaara. Kwonka, naaba naamanya ngu nibiza kumukwata. Ebisha ku birikumukwata, naarumwa kitaraariire, agira obusaasi bwingi, kandi naaba atarikubaasa kubizibira. Nikyo kimwe, titurikumanya eizooba n’eshaaha obu ekiro kya Yehova kiraatandikye. Kwonka nituhamiza kimwe ngu nikiza kwija kandi Ruhanga naija kucwekyereza ababi kitaraariire abamareho.

5. Okubonabona kwingi kuri nk’obwire burikusheesha mu muringo ki?

⁵ Nk’obwire burikusheesha. Omu ky’okureeberaho kya kashatu eki Paulo yaakoreise akagamba aha bashuma abarikwiba nyekiro. Kwonka aha murundi ogu akagyeragyeranisa ekiro kya Yehova n’obwire burikusheesha. (1 Tes. 5:4) Abashuma aba nyekiro nibabaasa kuhugibwa bingi baremwe kumanya ahu eshaaha zaahika. Ekyererezi ky’omu kasheeshe nikibaasa kubagwaho kitaraariire kibasheeshuure. Okubonabona kwingi nikwija kusheeshuura abari nk’abashuma abarikuguma omu mwirima barikukora ebitarikushemeza Ruhanga. Okutashushana nabo, nitubaasa kwetebeekanisa turikwanga ebitarikushemeza Yehova, reero tukakora ‘ebirungi byona omu kuhikiirira n’omu mazima.’ (Efe. 5:8-12) Paulo akakoresa eby’okureeberaho ebindi bibiri ebiine akakwate arikugamba aha bataraahonokeho.

6. Abantu baingi bagwejegyeire mu muringo ki? (1 Abatesalonika 5:6, 7)

⁶ ‘Abarikugwejegyera.’ (Shoma 1 Abatesalonika 5:6, 7.) Paulo akagyeragyeranisa abataraahonokeho aha kiro kya Yehova n’abantu abagwejegyeire. Nibaba batarikumanya ebirikubaho nari eshaaha ahu zaahika. N’ahabw’ekyo, nibaba batarikumanya ebintu bikuru ebirikubaho kandi batarikubaasa kugira eki baakora. Abantu baingi bagwejegyeire omu by’omwoyo. (Rom. 11:8) Tibarikwikiriza obuhame oburikworeka ngu turi omu ‘biro by’emperu’ kandi ngu okubonabona kwingi kuri haihi kubaho. Empinduka z’amaani ezirikubaho omu nsi nizibaasa kureetera bamwe kusisiimuka omu by’omwoyo, n’okufayo kakye aha butumwa bw’Obukama. Kwonka, baingi nibagaruka bagwejegyera omu mwanya gw’okuguma nibareeba. Nangwa n’abo abarikwikiriza ngu hariho ekiro ky’okucwa orubanja nibateekateeka ngu tikikabaire kuhika. (2 Pet. 3:3, 4) Kwonka, obuhabuzi oburikugira ngu mugume nimureeba nibwongyera kuba bukuru ahariitwe buri izooba.

7. Abaraahikweho ekiniga kya Ruhanga nibagyeragyeranisibwa bata n’abasinzi?

⁷ ‘Abarikusinda.’ Entumwa Paulo akagyeragyeranisa abaraahikweho ekiniga kya Ruhanga n’abasinzi. Abantu abarikuba basinzire tibarikurahuka kugira eki baakora haagira ekyabaho, kandi nibacwamu kubi. Nikyo kimwe, ababi tihaine eki barikukora ku barikuhurira okurabura kwa Ruhanga. Nibacwamu kutwaza omu muringo oguraabahitsye omu kucwekyerezibwa. Kwonka Abakristaayo nibagambirwa kutasinda, nari kuguma nibateekateeka gye. (1 Tes. 5:6) Omucondooza omwe wa Baibuli naagamba aha kuguma nooteekateeka gye “nk’embeera, y’okuguma oikaikaine kandi otebeekaine kubaasa kucwamu gye.” Ahabw’enki twine kuguma twikaikaine kandi tutarikutengyesibwa? Kugira ngu tutakeejwanzya omu nshonga z’eby’obutegyeki nari ez’abantu. Nitwija kwongyera kugyemeserezibwa kwejwanzya omu nshonga ezo ekiro kya Yehova kyaguma nikiirira haihi. Kwonka nabwo, titwine kwerarikirira aha ku turatwaze. Omwoyo gurikwera nigubaasa kutuhwera kwikaikana, kuteekateeka gye n’okucwamu omu muringo gw’obwengye.—Luk. 12:11, 12.

8. Emitwarize eri omu 1 Abatesalonika 5:8 eraatuhwere kuguma nitureeba kandi tweteekateekire neegyeragyeranisibwa naki? (Reeba n’ekishushani.)

⁸ ‘Jwara eky’okwekingiza omu kifuba . . . n’enkofiira.’ Paulo naatugyeragyeranisa n’abaserukare abarikuguma nibareeba kandi beeteekateekire kurwana. (Shoma 1 Abatesalonika 5:8.) Obwire bwona omuserukare aine kuba ayeteekateekire kurwana haaba hariho orutaro. Nikyo kimwe naitwe. Nituguma twetebeekanisiize ekiro kya Yehova turikujwara eky’okwekingiza omu kifuba eky’okwikiriza na rukundo hamwe n’enkofiira y’amatsiko. Emitwarize egi neebaasa kutuhwera munonga.

9. Okwikiriza nikuturinda kuta?

⁹ Eky’okwekingiza omu kifuba kikaba nikirinda omutima gw’omuserukare. Okugira okwikiriza na rukundo nikirinda omutima gwaitu ogw’akamanyiso. Emitwarize egi neija kutuhwera kugumizamu nituheereza Ruhanga n’okukuratira Yesu. Okwikiriza nikutuhamiza ngu Yehova naija kutushumbuusha ahabw’okumusherura n’omutima gwaitu gwona. (Heb. 11:6) Nikwija kutuhiga kuguma tuhamiire aha mwebembezi waitu Yesu, n’obu twakuba twine oburemeezi obu turikwemera. Nitubaasa kuhamya okwikiriza kwaitu turikwegyera aha  bahamiire ahari Yehova obunaku obu, barikwemera okuhiiganisibwa n’oburemeezi omu by’entaatsya. Nitubaasa kwetantara omutego gw’okukunda ebintu turikutooreza aboorobize embeera zaabo kwebembeza eby’Obukama. b

10. Rukundo ei twiniire Ruhanga n’abataahi neetuhwera eta kugumisiriza?

¹⁰ Okugira rukundo nakyo ni kikuru twaba nitwenda kuguma nitureeba kandi tweteekateekire. (Mat. 22:37-39) Rukundo ei twiniire Ruhanga neetuhwera kugumisiriza oburemeezi obu turikutunga omu kubuurira. (2 Tim. 1:7, 8) Ahabw’okugira ngu nitukunda abantu, nituguma nitubuurira omu kicweka kyaitu, otwariiremu okukoresa esimu n’amabaruha. Nituguma twine amatsiko ngu eizooba rimwe bataahi baitu nibaija kuhinduka batandikye kukora ebirungi.—Ezk. 18:27, 28.

11. Rukundo ei twiniire ab’eishe-emwe bagyenzi baitu neetuhwera eta? (1 Abatesalonika 5:11)

¹¹ Nitukunda abataahi n’Abakristaayo bagyenzi baitu. Nitworeka ngu nitukundana ‘turikugumyana, kandi tukombekana.’ (Shoma 1 Abatesalonika 5:11.) Nk’oku abaserukare barikuhwerahwerana omu rutaro, naitwe nitugumyana. N’eky’amazima, omuserukare naabaasa kuhutaaza mugyenzi we omu rutaro, kwonka ekyo tarikukikora akigyendereire. Nikyo kimwe, titurikugwisa kubi ab’eishe-emwe na banyaanyazi-itwe tukigyendereire nari kubaihura ekibi ahabw’ekibi. (1 Tes. 5:13, 15) Kandi nitworeka rukundo turikuha ekitiinisa ab’eishe-emwe abarikureeberera ekibiina. (1 Tes. 5:12) Obu Paulo yaahandiika ebaruha egi, ekibiina kya Tesalonika kikaba kitakahikize mwaka. Abashaija abaabaire nibareeberera ekibiina obwire obwo nibabaasa kuba baabaire batarikumanya bingi kandi barikukora n’enshobe. Kwonka nabwo, bakaba bahikire kuheebwa ekitiinisa. Obu okubonabona kwingi kuri haihi kubaho, nikiija kwetengyesa kwongyera kukuratira obuhabuzi bw’abareeberezi. Nitubaasa kutatunga obuhabuzi kuruga aha ofiisi enkuru nari eitaagi, n’ahabw’ekyo ni kikuru hati kwega kukunda abareeberezi n’okubaha ekitiinisa. N’ahabw’ekyo, ka tugume nitureeba, tutarikuta omutima aha butahikirira bw’abareeberezi,  kureka tugume nitwijuka ngu Yehova arikukoresa Kristo niwe arikubeebembera!

12. Amatsiko nigarinda gata ebiteekateeko byaitu?

¹² Amatsiko g’okujunwa nigarinda ebiteekateeko byaitu, nk’oku enkofiira erikurinda omutwe gw’omuserukare. Ahabw’okugira ngu twine amatsiko gahami, nitumanya ngu ebi ensi egi erikuha tibiine mugasho. (Fil. 3:8) Amatsiko gaitu nigatuhwera kuguma twikaikaine kandi tutebeekaine. Eki nikyo Wallace na Laurinda, abarikuheereza omuri Africa baayetegyereize. Buri omwe aharibo akafeerwa omuzaire omu bwire bwa saabiiti nka ishatu. Ahabw’ekigwererezi kya COVID-19, bakaba batarikubaasa kugaruka owaabo kuba hamwe n’ab’amaka gaabo. Wallace akahandiika ati: “Amatsiko g’okuzooka nigampwera kubateekateekaho, ti nk’oku baabaire bari batakafiire, kureka oku baraabe bari omu biro byabo eby’okubanza omu nsi ensya. Amatsiko nigampwera kwikaikana naaba ninteganisibwa enyehurira z’okuguubwa kubi nari ez’okufeerwa.”

13. Nitubaasa kukora ki kutunga omwoyo gurikwera?

¹³ ‘Mutaraaza [omuriro] gw’omwoyo.’ (1 Tes. 5:19) Paulo akagyeragyeranisa omwoyo gurikwera n’omuriro oguri omuriitwe. Twaba twine omwoyo ogurikwera, nituba twine omujinya n’omuhimbo gw’okukora ekihikire n’amaani g’okuheereza Yehova. (Rom. 12:11) Nitubaasa kukora ki kutunga omwoyo gurikwera? Turikugushaba Yehova, tukeeyegyesa Baibuli, kandi tukakwatanisa n’ekibiina kya Yehova ekirikwebemberwa omwoyo gurikwera. Okukora ekyo nikiija kutuhwera kugira “[emitwarize] y’omwoyo gurikwera.”—Gal. 5:22, 23.

14. Twine kwetantara ki kubaasa kuguma nituheebwa omwoyo gurikwera? (Reeba n’ekishushani.)

¹⁴ Ruhanga ku arikutuha omwoyo gurikwera, twine kwegyendesereza ‘kutaraaza [omuriro] gw’omwoyo’ ogwo. Ruhanga naaha omwoyo gwe abo bonka abarikuguma baine emiteekateekyere n’ebikorwa ebishemeire. Tarikugumizamu kutuha omwoyo gurikwera twaguma nituteekateeka aha bintu bitashemeire  kandi tukabikora. (1 Tes. 4:7, 8) Kandi kubaasa kuguma nituheebwa omwoyo gwe, titwine ‘kugaya ebya baanabi.’ (1 Tes. 5:20) “Ebya baanabi” nibimanyisa obutumwa obu Yehova arikuha arikukoresa omwoyo gurikwera, otwariiremu n’oburikukwata aha kiro kye n’obukuru bw’obwire obuturimu. Titurikwehuzya ekiro ekyo turikuteekateeka ngu tikiraabeho omu bunaku bwaitu. Kureka, nituguma nitukijuka turikwejumba omu by’okukirahutsya, turikutwaza gye, kandi buri izooba turikukora ebirikworeka ngu ‘nitutiina Ruhanga.’—2 Pet. 3:11, 12.

15. Nitubaasa kwetantara tuta kubeihwabeihwa obutumwa butahikire na pokopoko ya baadaimoni? (1 Abatesalonika 5:21)

¹⁵ Omu bwire butari bwa hare, abazigu ba Ruhanga nibaija kurangirira ngu, “n’obusingye, tihariho kabi.” (1 Tes. 5:3) Pokopoko ya baadaimoni neija kujanjaara omu nsi, ehabise baingi. (Kush. 16:13, 14) Kandi shi itwe? Titurabeihwabeihwe ‘twagyeza byona.’ (Shoma 1 Abatesalonika 5:21) Ekigambo ky’Orugriika ekirikuvunuurwa nka “mugyeze byona” kikaba nikikoresibwa kushoboorora omuringo oku abantu baabaire nibagyeza ebyoma nk’ezaabu n’efeeza kuhamya ngu bishemeziibwe. N’ahabw’ekyo, twine kugyezesa ebi turikuhurira nari ebi turikushoma kuhamya ngu bihikire. Ekyo kikaba kiri kikuru aha Batesalonika, kandi ahariitwe kiine kuba kikuru munonga obu okubonabona kwingi kuri haihi. Omu mwanya gw’okwikiriza byona ebi abandi barikugamba, nitukoresa okubaasa kwaitu kw’okuteekateeka turikugyeragyeranisa ebi turikushoma nari ebi turikuhurira n’obuhabuzi bw’ekibiina kya Yehova n’ebi Baibuli erikwegyesa. Twakora tutyo, titurikwija kubeihwabeihwa pokopoko ya baadaimoni.—Enf. 14:15; 1 Tim. 4:1.

16. Twine matsiko ki agaabuzima, kandi tumariire kukora ki?

¹⁶ Abaheereza ba Ruhanga nibaija kuhonokaho nka guruupu omu kubonabona kwingi. Kwonka buri omwe ahariitwe, tarikumanya ekirikwija kubaho. (Yak. 4:14) Yaaba tuhonokaho omu kubonabona kwingi nari tufa kutakabaireho, nitwija kutunga ekiconco ky’amagara agatahwaho twaguma turi abeesigwa. Abashukirweho omwoyo gurikwera nibaija kutuura na Kristo omu iguru. Ab’entaama ezindi nibaija kutuura omuri paradiso omu nsi. Twena ka tugume tutaire omutima aha matsiko g’omuhendo kandi tugume twetebeekanisiize ekiro kya Yehova!