1-2. Nka Looti, Abakristaayo obunaku obu baine buremeezi ki?

 KU TURIKUREEBA emitindo y’emicwe eri omu nsi, nitwehurira nk’oku Looti omushaija omwesigwa yaayehuriire. Akaba “ashobeirwe ahabw’emicwe mibi y’abashambani,”arikumanya ngu Tataitwe ow’omu iguru naayanga ebikorwa bibi. (2 Pet. 2:7, 8) Ahabw’okugira ngu Looti akaba naatiina Ruhanga kandi arikumukunda akanga emicwe mibi ey’abantu abaabaire bamwetoroire. Naitwe nitutuura n’abantu abatarikuha kitiinisa emitindo ya Yehova ey’emicwe. Kwonka nabwo, nitubaasa kuguma tushemeire omu micwe twagumizamu nitukunda Ruhanga kandi turikumutiina omu muringo oguhikire.—Enf. 14:2.

² N’ahabw’ekyo, Yehova naatuhabura omu muringo gwa rukundo arikukoresa ekitabo ky’Enfumu. Abakristaayo boona, abashaija n’abakazi, abakuru n’abato nibabaasa kugasirwa omu buhabuzi bw’obwengye oburi omu kitabo eki.

3. Kurugiirira aha Enfumu 17:3, ni nshonga ki emwe erikutureetera kurinda omutima gwaitu? (Reeba n’ekishushani.)

³ Enshonga nkuru erikutureetera kurinda omutima gwaitu ogw’akamanyiso n’ahabw’okugira ngu Yehova naagukyaaka. Eki nikimanyisa ngu naareeba ekirikukira aha ki abandi barikureeba kandi naatumanya gye. (Shoma Enfumu 17:3.) Yehova naatukunda twaguma nituteekateeka aha buhabuzi bwe bw’obwengye. (Yoh. 4:14) N’ahabw’ekyo titurikwija kushiishwa emicwe mibi n’ebishuba bya Sitaane n’ensi ye. (1 Yoh. 5:18, 19) Twirira haihi Yehova nitwongyera kumukunda n’okumuha ekitiinisa. Nitwetantara kushiisha ahabw’okugira ngu titurikwenda  kugwisa kubi Tataitwe. Waayohibwa kukora ekibi, noobaasa kwebuuza oti: ‘Nimbaasa nta kugwisa kubi nkana owaayorekire ngu naankunda munonga?’—1 Yoh. 4:9, 10.

4. Okutiina Yehova kukarinda kuta Munyaanyazi-itwe obu yaayohibwa?

⁴ Marta, munyaanyazi-itwe kuruga Croatia owaayohibwe kushambana, akahandiika ati: “Kikaba nikingumira kuteekateeka gye n’okwangira ekyetengo ky’okukora ekibi. Kwonka okutiina Yehova kukandinda.” b Kukamurinda kuta? Marta akagira ngu akateekateeka aha bintu bibi ebyabaire nibibaasa kumuhikaho yaacwamu kubi. Naitwe nitubaasa kumutooreza. Ekibi ekirikukirayo n’okugwisa kubi Yehova kandi tutagarukye kumuheereza ebiro byona.—Kut. 6:5, 6.

5. Nooyegyera ki ahari Leo?

⁵ Twaba nitutiina Yehova titurikwija kugira rwekwatso y’okwejumba omu micwe mibi. Leo, orikutuura omuri Congo, akeega eishomo eryo. Bwanyima y’emyaka ena aherize kubatizibwa, akanywana abaabaire nibakora ebintu bibi. Akaba naateekateeka ngu obu atarikwejumba omu bikorwa bibi byabo, tihaine kibi eki arikukora. Kwonka omu bwire bukye, banywani be abo ababi bakamureetera kukoresa kubi amaarwa n’okwejumba omu bushambani. Bwanyima akateekateeka aha bi abazaire be Abakristaayo baabaire bamwegyeise, n’okushemererwa oku yaabaire afeereirwe. Hakarugamu ki? Akagaruka yaakora ebihikire. Arikuhwerwa abareeberezi, akabaasa kugarukira Yehova. Hati naaheereza ashemereirwe nk’omureeberezi kandi payoniya ow’omutaano.

6. Ni bakazi ki babiri ab’akamanyiso abu turikuza kugambaho?

⁶ Ka tushwijume eki Enfumu eshuura 9, erikugamba aha bakazi babiri ab’akamanyiso,  ow’obwengye n’omukazi omushema. c Twaba nitushwijuma ebiri omu shuura egyo, guma noijuka ngu ensi ya Sitaane eijwiremu ebikorwa by’obushambani n’ebirikwitsa enshoni. (Efe. 4:19) N’ahabw’ekyo ni kikuru kugumizamu nitutiina Ruhanga kandi turikwanga ebikorwa bibi. (Enf. 16:6) Twakora tutyo, twena nitubaasa kugasirwa omu bihandiikirwe omu shuura egi. Abakazi bombi nibagambwaho nk’abarikweta “abataine bwengye.” Buri omwe naayeta arikugira ngu, ‘mwije omu nju murye aha by’okurya byangye.’ (Enf. 9:1, 5, 6, 13, 16, 17) Kwonka ebirikuhika aha barikwikiriza okwetwa okwo, tibirikushushana.

7. Kurugiirira aha Enfumu 9:13-18, niki ekirikuhika aha barikwikiriza okweta kw’omukazi omushema? (Reeba n’ekishushani.)

⁷ Yetegyereze okweta kw’omukazi omushema. (Shoma Enfumu 9:13-18.) Naayeta n’obumanzi abataine bwengye arikugira ngu ‘mwije aha’ turye. Niki ekirikubahikaho? Nibahendera baafiire. Ebigambo nk’ebi eby’akamanyiso nibikoresibwa n’omu shuura ez’okubanza omu kitabo ky’Enfumu. Eshuura ezo niziturabura aha ‘mukazi enshambani’ kandi “owaariire enshoni.” Nitugambirwa tuti: “Enju ye neeza omu kufa.” (Enf. 2:11-19) Enfumu 5:3-10 erimu okurabura okurikukwata aha ‘mukazi’ ondiijo enshambani ou “ebigyere bye bishuuma omu kufa.”

8. Twine kucwamu ahari ki?

⁸ Abarikuhurira “omukazi”omushema nibaba baine kucwamu yaaba baikiriza okweta kwe nari bakwanga. Naitwe haine obu kirikutwetengyesa kucwamu. Noija kukora ki waayohibwa kwejumba omu bikorwa by’obushambani nari kureeba ebirikwitsa enshoni ebiri aha mikura y’empurizana?

9-10. Ahabw’enki twine kwetantara ebikorwa by’obushambani?

⁹ Hariho enshonga nungi ahabw’enki twine kwetantara ebikorwa by’obushambani. “Omukazi” omushema naagambwaho nk’orikugira ati: “Amaizi g’enyibano ganura.” “Amaizi g’enyibano” niki? Baibuli neegyeragyeranisa okuteerana kw’omushaija n’omukazi we n’amaizi agarikuruhuura. (Enf. 5:15-18) Omushaija n’omukazi we abari omu bushwere obuhikire nibo barikubaasa kwesiimira omu bikorwa by’okuteerana ebishemeire. Ekyo nikitaanira kimwe ‘n’amaizi g’enyibano.’ Ekirikubaasa kumanyisa  ebikorwa by’obushambani. Abarikwejumba omu bikorwa ebyo nibabikora bwesherekye nk’omushuma. “Amaizi g’enyibano” nigabaasa kureebeka nk’aganuzire abarikutwarirwamu bateekateeka ngu eki barikukora tihaine oraakimanye. Ka nibaba nibeebeiha! Yehova naareeba buri kimwe. N’ahabw’ekyo okufeerwa omukago murungi na Yehova, tiharimu kanuzi koona. (1 Kor. 6:9, 10) Kandi hariho oburemeezi obundi.

¹⁰ Obushambani nibureetera omuntu kuhemuka, kwereeba nk’otaine mugasho, kugira enda ezi ateteekateekiire, kandi nibusheenya amaka. Buzima, n’eky’obwengye kwetantara kuza omu “nju” y’omukazi omushema n’okurya eby’okurya bye. Oyihireho okufa omu by’omwoyo, abantu baingi enshambani nibakwatwa endwara ezirikubareetera kufa juba. (Enf. 7:23, 26) Omushororongo 18 omu shuura 9 nigugira guti: ‘Abagyenyi be bari okuzimu owa Nyamuteza.’ Kwonka shi ahabw’enki baingi nibaikiriza okweta okurikubareetera kutunga oburemeezi?—Enf. 9:13-18.

11. Ahabw’enki okureeba ebirikwitsa enshoni n’eky’akabi munonga?

¹¹ Ebirikwitsa enshoni biri buri hamwe. Bamwe nibateekateeka ngu okureeba ebirikwitsa enshoni tiky’akabi. Okutaana n’ekyo, ebirikwitsa enshoni n’eby’akabi aha bantu, nibibareetera kutagira kitiinisa, n’okugumirwa kucwa omuze ogwo. Kigumire kwiha omu biteekateeko ebishushani ebirikwitsa enshoni. Ekindi, nibireetera omuntu kwongyera kugira ebyetengo bibi by’okuteerana. (Kol. 3:5; Yak. 1:14, 15) Baingi abarikureeba ebirikwitsa enshoni nibeejumba omu bikorwa by’obushambani.

12. Nitubaasa kworeka tuta ngu nitwetantara ebishushani ebirikwimutsya ekyetengo ky’okuteerana?

¹² Itwe Abakristaayo twine kukora ki haija ebishushani ebirikwitsa enshoni aha byoma byaitu? Twine kubiihaho ahonaaho. Ekyo nitubaasa kukikora, twijuka ngu okugira omukago murungi na Yehova nikyo kikuru. Nangwa, ebishushani ebirikureebeka nk’ebitarikwitsa enshoni nibibaasa kwimutsya ekyetengo ky’okuteerana. Ahabw’enki twine kubyetantara? Ahakuba titurikwenda kukora ekintu kyona ekirikutureetera kushambana omu mutima. (Mat. 5:28, 29) David omureeberezi kuruga Thailand naagira ati: “N’obu ebishushani birikuba bitarikwitsa enshoni, niinyebuuza yaaba nikishemeza Yehova naagumizamu nimbireeba? Ku ndikwebuuza ntyo nikimpwera kutwaza omu muringo gw’obwengye.”

13. Niki ekirikutuhwera kutwaza omu muringo gw’obwengye?

¹³ Nitutwaza omu muringo gw’obwengye twaba nitutiina Ruhanga. Okutiina okwo niyo ‘ntandikiro y’obwengye.’ (Enf. 9:10) Eki nikyorekwa gye omu mishororongo ey’okubanza omu Enfumu eshuura 9, aharikugamba aha mukazi ow’akamanyiso orikujwekyera obwengye obwabuzima.

14. Ni kweta kwa muringo ki okurikugambwaho omu Enfumu 9:1-6?

¹⁴ Shoma Enfumu 9:1-6. Emishororongo egi neegamba aha kweta okurikuruga aha Bukomooko bw’obwengye obwabuzima, niwe Muhangi waitu omunyabwengye. (Enf. 2:6; Rom. 16:27) Emishororongo egyo neegamba n’aha nju mpango eine enyomyo mushanju. Eki nikyoreka ngu Yehova n’efura kandi naayakiira boona abarikwenda kugyendera aha bwengye bwe omu mbeera zaabo.

15. Ruhanga naatweta kukora ki?

¹⁵ Yehova n’efura kandi naaha omu bwingi. Emitwarize egi neereebekyera omu bwengye obwabuzima oburikugambwaho nk’omukazi  omu Enfumu eshuura 9. Emishororongo neegira ngu omukazi ow’akamanyiso ateekire gye enyama, yaatabura viinyo ye, kandi yaatebeekanisa emeeza ye. (Enf. 9:2) Kandi, kurugiirira aha mushororongo 4 n’ogwa 5 omukazi ogwo orikujwekyera obwengye “naagambira abataine bwengye ati: Mwije murye aha by’okurya byangye.” Ahabw’enki twine kwija omu nju y’omukazi orikujwekyera obwengye obwabuzima kurya eby’okurya? Yehova naayenda ngu abaana be batungye obwengye n’oburinzi. Tarikwenda ngu twegye omu muringo gugumire ogurikutureetera obusaasi n’okwefuuza. Niyo nshonga ahabw’enki “abaine emitima egororokire naababiikira obwengye obuhikire.” (Enf. 2:7) Twaba nitutiina Yehova omu muringo oguhikire, nitwija kumushemeza. Nituhurikiza obuhabuzi bwe obw’obwengye kandi nikitushemeza kubugyenderaho.—Yak. 1:25.

16. Okutiina Ruhanga kukahwera kuta Alain kucwamu gye, kandi niki ekyarugiremu?

¹⁶ Yetegyereze oku okutiina Ruhanga kwahweraire Alain kucwamu omu muringo gw’obwengye. Omureeberezi ogu kandi omushomesa akagira ati: “Baingi aha bu ndikukora nabo nibareeba vidiyo ezirimu ebirikwitsa enshoni nk’omuringo gw’okwega aha kuteerana.” Kwonka Alain akaba naamanya ngu ekyo tikihikire. Naagira ati: “Nkanga kureeba vidiyo ezo ahabw’okugira ngu nkaba nintiina Ruhanga. Kandi nkashoboororera abu ndikukora nabo ahabw’enki ntarikuzireeba.” Akaba naata omu nkora obuhabuzi bw’obwengye obwabuzima ‘obw’okugyendera omu muhanda gw’okwetegyereza.’ (Enf. 9:6) Bamwe aha bashomesa bakakwatwaho ahabw’oku Alain yaacwiremu, hati nibeega Baibuli baza n’omu nteerane.

17-18. Abarikwikiriza okweta kw’obwengye obwabuzima baine migisha ki, kandi baine ekihika ky’okutunga ki omu biro by’omumaisho? (Reeba n’ekishushani.)

¹⁷ Yehova arikukoresa eby’okureeberaho by’abakazi babiri ab’akamanyiso naatworeka emigisha ei turaatungye omu biro by’omumaisho. Abarikwikiriza okweta kw’omukazi omushema nibata omutima aha kwesiimira ebikorwa bibi bwesherekye. Kandi nibateeraho kugira okushemererwa okw’akaanya bwanya, beehuzya ekiraabeho omu biro by’omumaisho. Muheru yaabo ‘n’okuzimu owa Nyamuteza.’—Enf. 9:13, 17, 18.

¹⁸ Ekyo ka nikitaanira kimwe n’ekirikuhika ahari abo abarikwikiriza okweta kw’omukazi orikujwekyera obwengye obwabuzima! Abagyenyi be nibarya eby’okurya ebitebeekanisiibwe gye kandi eby’ekiriisa, nibyo by’okurya by’omwoyo. (Isa. 65:13) Kurabira omuri nabi Isaaya, Yehova akagira ati: “Mumpurire mutaireho omutima, mubone kurya ebirungi, amagara  gaanyu gashemerererwe ebirimu ebishaju.” (Isa. 55:1, 2) Nitwega kukunda ebi Yehova arikukunda n’okwanga ebi arikwanga. (Zab. 97:10) Kandi nitutunga okumarwa twayeta abandi kugasirwa omu bwengye obwabuzima. Turi ‘nk’abarikweta n’eiraka rihango, twemereire omu myanya mikuru y’omu irembo etunguukire nitugira tuti: Weena otaine bugobya, aije aha!’ Itwe n’abarikutuhurikiza nitutunga emigisha erikutugasira hati n’omu biro by’omumaisho. Emigisha egyo n’ey’obutwire, neetuhwera “kugumaho” ebiro byona ‘turikugyendera omu muhanda gw’okwetegyereza.’—Enf. 9:3, 4, 6.

19. Kurugiirira aha Omubuurizi 12:13, 14, twine kumariirira kukora ki? (Reeba n’akabokusi “ Nitugasirwa Twatiina Ruhanga.”)

¹⁹ Shoma Omubuurizi 12:13, 14. Okutiina Ruhanga ka kurinde omutima gwaitu, kandi kutuhwere kuguma tushemeire omu micwe n’omu by’omwoyo omu biro ebi eby’emperu. Okutiina okwo nikwija kutuhiga kugumizamu nitweta baingi nk’oku kirikubaasika kusherura obwengye obwabuzima kandi babugasirwemu.