1. Omuri Zaaburi 18:​46, Daudi naagyeragyeranisa Yehova naki?

 TURI omu nsi ahu turikubaasa kuhikwaho oburemeezi kitaraariire, oburikubaasa kututeganisa nari kuhindurira kimwe embeera zaitu. Ka nikituhuumuriza kumanya ngu nitubaasa kushaba Yehova kutuhwera! Ekicweka ekihwaire, kitwijukize ngu Yehova ni Ruhanga ohuriire kandi butoosha naaba ayeteekateekire kutuhwera. Ku arikutuhwera, nikituhamiza ngu “[Yehova] n’ohuriire.” (Shoma Zaaburi 18:46.) Kwonka, Daudi ku yaaherize kugamba ebigambo ebyo, akagira ngu Ruhanga ‘n’Orukiri rwangye.’ Ahabw’enki yaagyeragyeraniise Yehova, Ruhanga ohurire n’ekintu ekitaine magara?

2. Nituza kugamba ahari ki omu kicweka eki?

² Omu kicweka eki, nituza kureeba ahabw’enki Yehova naagambwaho nk’orukiri, n’eki turikumwegaho omu kugyeragyeranisa okwo. Nituza n’okwega oku turikubaasa kumuhindura Orukiri rwaitu. Bwanyima tuhendere turikureeba emiringo oku turikubaasa kutooreza emitwarize ya Yehova eri nk’orukiri.

AHABW’ENKI YEHOVA ARI NK’ORUKIRI?

3. Ekigambo “orukiri” nikikira kukoresibwa kita omu Baibuli? (Reeba ekishushani aha .)

³ Baibuli neegyeragyeranisa Yehova ‘n’orukiri’ kutuhwera kwetegyereza emwe aha mitwarize ye. Ekigambo “orukiri” nikikira kukoresibwa omu kuhimbisa Ruhanga otaine orikumwingana. Yehova naabanza kugambwaho ‘nk’Orukiri’  omu Eky’Ebiragiro 32:4. Haana omu kushaba akagira ngu, “tihariho rukiri ori nka Ruhanga waitu.” (1 Sam. 2:2) Habakuuki akeeta Yehova ‘Orukiri.’ (Hab. 1:12) Omuhandiiki wa Zaaburi 73 akagira ngu Ruhanga ‘niwe rukiri rw’omutima gwangye.’ (Zab. 73:26) Kandi Yehova nawe akeegambaho nk’orukiri. (Isa. 44:8) Ka tugambe aha mitwarize eshatu ya Yehova eri nk’orukiri n’oku turikubaasa kumuhindura ‘orukiri rwaitu.’—Bir. 32:31.

4. Yehova n’obuhungiro mu muringo ki? (Zaaburi 94:22)

⁴ Yehova n’obuhungiro. Nk’oku orukiri ruhango rurikubaasa kuba obweshereko bw’omuntu omu bwire bwa ihunga ry’amaani, Yehova naaturinda twaba nituraba omu mbeera zigumire. (Shoma Zaaburi 94:22.) Naatuhwera kuguma twine omukago murungi nawe, kandi naatuhamiza ngu tihaine ekirikubaasa kutuhitsyaho akabi k’obutwire. Nangwa naaraganisa ngu, naija kumariraho kimwe ebirikuteganisa obusingye bwaitu n’oburinzi.—Ezk. 34:​25, 26.

5. Yehova nitumuhindura tuta obuhungiro bwaitu?

⁵ Omuringo gumwe oku turikuhindura Yehova orukiri rw’okuhungiramu n’okumushaba. Twashaba, nitutunga “obusingye bwa Ruhanga” oburikurinda emitima yaitu n’obwengye bwaitu. (Fil. 4:​6, 7) Teekateeka aha byahikire aha w’eishe-emwe Artem, owaakomirwe ahabw’okwikiriza kwe. Omuserukare otaine saasi akamubuuza emirundi mingi kana na kataano arikumugyemesereza kandi arikumuhemura. Akagira ati: “Omuserukare ogwo ku yaabaire anyeta nkaba ntiina munonga. . . . Butoosha nkaba nshaba Yehova kumpa obusingye bw’omu mutima n’obwengye. Obukoryo bw’omuserukare ogwo tiburakozire. . . . Ahabw’obuhwezi bwa Yehova nkaba ndi nk’oyemereire enyima y’orugo rw’amabaare.”

6. Ahabw’enki nitubaasa kwesiga Yehova obutoosha? (Isaaya 26:​3, 4)

⁶ Yehova n’orikwesigwa. Nk’oku orukiri rutarikubaasa kuhigwa, Yehova butoosha naaba ariho kutuhwera. Nitubaasa kumwesiga ahakuba “n’orukiri rutahwaho.” (Shoma Isaaya 26:​3, 4.) Ahabw’okugira ngu tarikuhwaho naahikiiriza ebi arikuragaanisa, naahurira okushaba kwaitu kandi naatushagika obu kirikwetengyesa. Nitubaasa kwesiga Yehova ahakuba naahamira aha barikumuheereza. (2 Sam. 22:26) Tarikubaasa kwebwa ebi turikukora, kandi naija kutushumbuusha.—Heb. 6:10; 11:6.

7. Nitugasirwa tuta twayesiga Yehova? (Reeba n’ekishushani.)

⁷ Nituhindura Yehova Orukiri rwaitu twaba nitumwesigira kimwe. Twine obwesigye ngu twamworobera n’omu mbeera zigumire nitugasirwa. (Isa. 48:​17, 18) Twareeba oku arikutushagika nitwongyera kumwesiga. Ahabw’obuhwezi bwa Yehova, nitwija kuba tweteekateekire kwemera oburemeezi bwona. Kaingi ku turikuhikwaho embeera egumire tutaine ow’okutuhwera, nitukira kureeba oku Yehova arikutuhwera. Vladimir naagira  ati: “Obwire obu naamazire omu kihome bukambaasisa kwongyera kuhamya omukago gwangye na Yehova, nkeega kwesigira kimwe Yehova ahabw’okuba nkaba ndi nyenka ntarikubaasa kuhindura embeera yangye.”

8. (a) Ahabw’enki nitubaasa kugira ngu Yehova tarikutegyetsibwa? (b) Nitugasirwa tuta ahabw’okugira ngu Ruhanga n’Orukiri rwaitu? (Zaaburi 62:​6, 7)

⁸ Yehova tarikutengyetsibwa. Yehova ahami nk’orukiri ruhango kandi tarikutengyetsibwa. Emitwarize ye n’ekigyendererwa kye tibirikuhinduka. (Mal. 3:6) Ku haabaireho obugomi omuri Edeni Yehova tarahindwire ekigyendererwa kye. Nk’oku entumwa Paulo yaahandiikire, Yehova “tabaasa kuhinduka.” (2 Tim. 2:13) Eki nikimanyisa ngu n’obu haakubaho ki, n’obu abantu baakukora ki, Yehova tarikwija kuhindura emitwarize, ekigyendererwa kye nari emitindo ye. Ahabw’okwesiga Ruhanga waitu otarikutengyetsibwa, hamya ngu naija kutujuna kandi atuhwere kuraba omu mbeera zigumire.—Shoma Zaaburi 62:​6, 7.

9. Nitwegyera ki ahari Tatyana?

⁹ Nituhindura Yehova Orukiri rwaitu twaguma nituteekateeka aha mitwarize ye n’ekigyendererwa kye. Twakora tutyo, nikituhwera kuguma twikaikaine turikugumisiriza oburemeezi. (Zab. 16:8) Ekyo nikyo munyaanyazi-itwe orikwetwa Tatyana owaakomiirwe owe ahabw’okwikiriza kwe, yaakozire. Akagira ati: “Nkaba ndi nyenka. Omu kubanza kikaba kigumire, kandi nkaba ninkira kugira amaganya.” Kwonka, ku yaateekateekire oku okugyezibwa kwe kwine akakwate n’ekigyendererwa kya Yehova, akabaasa kugumisiriza kandi yaagaruka yaayehurira gye. Akoongyeraho ati: “Okwetegyereza ahabw’enki ebi byabaire nibibaho, kikampwera kwijuka ngu ndi omu mbeera egi ahabwa Yehova. Ekyo kikampwera kurekyera aho kwetaho omutima.”

10. Yehova naabaasa kuba ata Orukiri rwaitu hati?

¹⁰ Omu biro by’omumaisho, nitwija kuhikwaho okugyezibwa okuraatwetengyese kwesiga Yehova okukira obundi bwona. Hati nibwo bwire bw’okuhamya obwesigye bwaitu ngu naija kutuha byona ebirikwetengyesa kugumisiriza omu bwesigwa. Eki nitubaasa kukikora tuta? Shoma aha barikugambwaho omu Baibuli n’eby’okureeberaho eby’obunaku obu eby’Abajurizi ba Yehova. Teeraho kureeba oku Yehova ayorekire emitwarize ye eri nk’orukiri. Teekateeka munonga aha bi waashoma. Okukora ekyo nikiija kukuhwera kuhindura Yehova Orukiri rwawe.

GIRA EMITWARIZE NK’EYA YEHOVA ERI NK’ORUKIRI

11. Ahabw’enki nitwenda kuteeraho kugira emitwarize ya Yehova eri nk’orukiri? (Reeba n’akabokusi “ Ekigyendererwa ky’Ab’eishe-emwe Abato.”)

¹¹ Twayetegyereza oku Yehova arikworeka ngu ari nk’orukiri. Hati ka tureebe oku turikubaasa kugira emitwarize ye eri nk’orukiri. Twakora tutyo, nitwija kuhamya ekibiina.  Nk’eky’okureeberaho, Yesu akaha Simooni eiziina Keefa (eririkuvunuurwa nka “Petero”), amakuru gaaryo “Orukiri.” (Yoh. 1:42) Eki kikoreka ngu akaba naija kuhuumuriza ab’eishe-emwe, kandi ahamye okwikiriza kwabo. Abareeberezi b’ekibiina bari ‘nk’ekicuucu ky’eibaare.’ Ekyo nikyoreka oku barikurinda abari omu kibiina. (Isa. 32:2) Amazima gari ngu, ekibiina nikigasirwa ab’eishe-emwe na banyaanyazi-itwe boona, baateeraho kugira emitwarize ya Yehova eri nk’orukiri.—Efe. 5:1.

12. Gamba emiringo oku turikubaasa kuba obuhungiro bw’abandi.

¹² Ba obuhungiro. Obumwe, nitubaasa kuha ab’eishe-emwe na banyaanyazi-itwe obuhungiro haabaho ebihikiirizi, obutabanguko n’entaro. Embeera ‘omu biro by’emperu’ ku ziraayongyere kuba mbi nitwija kuba twine kuhwerahwerana okukira obundi bwona. (2 Tim. 3:1) Nitubaasa n’okuhwera ab’eishe-emwe bagyenzi baitu omu by’omwoyo n’okuba gye omu nyehurira. Omuringo gumwe oku turikubaasa kukikora n’okubareetera kwehurira gye baija aha Kyombeko ky’Obukama, turikubooreka rukundo, kandi tukabagumya. Nitutuura mu nsi embi, kandi eijwire amaganya. N’ahabw’ekyo ab’eishe-emwe na banyaanyazi-itwe baija omu nteerane, nitwenda kukora kyona eki turikubaasa kubareetera kuhurira nibakundwa, kugira oburuhuuko n’oburinzi.

13. Abareeberezi nibabaasa kuhinduka bata obuhungiro bw’abandi? (Reeba n’ekishushani.)

¹³ Abareeberezi nibabaasa kuhinduka obuhungiro bw’ab’eishe-emwe abateirwe eihunga nari abaine oburemeezi obundi. Haabaho ebihikiirizi nari haayetengyesa obujanjabi obw’ahonaaho nibarahuka kutebeekanisa obuhwezi oburikwetengyesa. Kandi nibabahwera n’omu by’omwoyo. Ab’eishe-emwe na banyaanyazi-itwe nibooroberwa kushaba omureeberezi obuhwezi baaba nibamanya ngu naatwaza gye,  aine esaasi, kandi naahurira. Emitwarize egyo neehwera abandi kumanya ngu nibabafaho, kandi nikiboorobera kugyendera aha buhabuzi bwa Baibuli obu omureeberezi arikubaha.—1 Tes. 2:​7, 8, 11.

14. Nitubaasa kworeka tuta ngu turi abarikwesigwa?

¹⁴ Ba orikwesigwa. Nitwenda ngu abandi batwesigye, kukira munonga omu mbeera ezigumire. (Enf. 17:17) Nitubaasa kuba tuta abarikwesigwa? Turikuteeraho kugira emitwarize nk’eya Ruhanga nk’okuhikiiriza ebi turikuraganisa n’okukwata obwire. (Mat. 5:37) Kandi nitubaasa n’okugira ebi twakora kubahwera kyayetengyesa. Ekindi, nitubaasa kuteeraho kuhikiiriza obujunaanizibwa bwaitu omu kibiina turikukuratira obuhabuzi obu turikuheebwa.

15. Ekibiina nikigasirwa kita abareeberezi baaba abarikwesigwa?

¹⁵ Abareeberezi abarikwesigwa nibagasira ekibiina. Mu muringo ki? Ababuurizi nibahurira baine obushagiki baamanya ngu obwire bwona nibabaasa kugamba n’abareeberezi, nk’orikwebembera guruupu yaabo y’okubuurira.  Kandi nibahurira ngu abareeberezi nibabafaho bamanya ngu beteekateekire kubahwera. Abareeberezi baaha obuhabuzi barikwegamira ahari Baibuli n’ebitabo by’omwambari omwesigwa omu mwanya gw’okugamba ebi barikuteekateeka, ab’eishe-emwe bagyenzi baabo nibabeesiga. Kandi nibeesiga omureeberezi otarikugamba enshonga z’omubonano, kandi orikuhikiiriza ebi arikuraganisa.

16. Nitugasirwa tuta hamwe n’abandi twaba tutarikutengyetsibwa?

¹⁶ Otatengyetsibwa. Nitubaasa kuba eky’okureeberaho kirungi aha bandi turikuhamira aha kihikire, kandi tukacwamu turikwegamira aha misingye ya Baibuli. Ku turikwongyera kugira okwikiriza n’okumanya okuhikire, nituhamira kimwe omu mazima. Titurikweziringa kucwamu, titurikutengyetsibwa, kandi titurikutwarwatwarwa enyegyesa z’ebishuba n’emiteekateekyere y’ensi. (Efe. 4:14; Yak. 1:​6-8) Okwikiririza omuri Yehova n’ebiraganiso bye nikituhwera kuguma twikaikaine twatunga amakuru mabi. (Zab. 112:​7, 8) Kandi nitubaasa kuhwera n’abandi abarikuba baine oburemeezi.—1 Tes. 3:​2, 3.

17. Abareeberezi nibahamya bata ekibiina?

¹⁷ Abareeberezi baine kuba abeerinzi, abanyabwengye, abakwata mpora, kandi abarikutwaza gye. Abashaija aba nibahwera abandi, kandi bahamya ekibiina ‘barikuhamira aha kigambo ky’okwesigwa.’ (Tit. 1:9; 1 Tim. 3:​1-3) Ahabw’eky’okureeberaho kyabo kirungi, n’okugumya ab’eishe-emwe nibahwera ababuurizi kwija omu nteerane butoosha, kubuurira, n’okweyegyesa. Ab’eishe-mwe na banyaanyazi-itwe baahikwaho embeera zigumire, abareeberezi nibateeraho kubahwera kuguma bataire omutima ahari Yehova n’ebigyendererwa bye.

18. Ahabw’enki nitwenda kuhimbisa Yehova n’okwongyera kumwirira haihi? (Reeba n’akabokusi “ Oku Orikubaasa Kwongyera Kwirira Haihi Yehova.”)

¹⁸ Bwanyima y’okushwijuma emitwarize ya Yehova mingi nitubaasa kugamba nk’Omugabe Daudi owaagizire ati: “[Yehova] Orukiri rwangye ahimbisibwe.” (Zab. 144:1) Yehova tarikwija kurekyera aho kuba Ruhanga ou turikubaasa kwesiga. Omu mbeera zoona n’omu myaka ya bukuru nitubaasa kugira tuti: “Niwe Rukiri rwangye,” turikuhamiza kimwe ngu naija kutuhwera butoosha omu by’omwoyo.—Zab. 92:​14, 15.