1. Niki ekirikuhwera abaheereza ba Yehova kugumizamu nibamuramya n’obu baraabe nibahikwaho oburemeezi?

 BAIBULI neegira ngu turi omu ‘biro by’akabi kaingi.’ (2 Tim. 3:1) Oyihireho oburemeezi oburikuhika ahari buri omwe omu ntebeekanisa y’obusingye obu, abaheereza aba Yehova baine n’okwemera okuhakanisibwa n’okuhiiganisibwa. Niki ekirikutuhwera kugumizamu nituramya Yehova n’obu haraabe hariho oburemeezi obwo? N’ahabw’okumanya ngu Yehova ni “Ruhanga ohuriire.”—Yer. 10:10; 2 Tim. 1:12.

2. Yehova ni Ruhanga ohuriire mu muringo ki?

² Yehova n’owaabuzima, naatureeberera twaba nituraba omu mbeera zigumire kandi naasherura oburyo bw’okutushagika. (2 Bus. 16:9; Zab. 23:4) Okumureeba nka Ruhanga ohuriire nikibaasa kutuhwera kusingura oburemeezi bwona oburikutuhikaho. Yetegyereze oku ekyo kyahikire aha Mugabe Daudi.

3. Daudi akaba naamanyisa ki obu yaagira ngu “[Yehova] n’ohuriire”?

³ Daudi akaba naamanya Yehova, kandi arikumwesiga. Akashaba Yehova kumuhwera, obu abazigu be otwariiremu n’Omugabe Saulo baabaire nibenda kumwita. (Zab. 18:6) Ruhanga ku yaagarukiremu okushaba kwe kandi akamujuna, Daudi akagira ati: “[Yehova] n’ohuriire.” (Zab. 18:46) Daudi okugira atyo, akaba atarikworeka ngu naamanya ngu Ruhanga ariho kyonka. Okucondooza kumwe nikworeka ngu Daudi akaba aine obwesigye ngu Yehova ni “Ruhanga ohuriire butoosha orikuhwera abaheereza be.” Buzima, Daudi akaba  ayereebiire n’age ngu Ruhanga n’ohuriire, kandi ekyo kikamuhwera kumariirira kumuheereza n’okumuhimbisa.—Zab. 18:​28, 29, 49.

4. Nitugasirwa tuta twaba nituhamiza kimwe ngu Yehova ni Ruhanga ohuriire?

⁴ Twahamiza kimwe ngu Yehova ni Ruhanga ohuriire nikituhwera kumuheereza twine omujinya. Nitugira amaani g’okwemera oburemeezi n’ekihika ky’okugumizamu nitukora n’amaani turikumuheereza. Kandi nitwija kumariirira kuhamira ahari Yehova.

RUHANGA OHURIIRE NAIJA KUKUGUMYA

5. Niki ekiraatubaasise kugira obumanzi bw’okwemera oburemeezi? (2 Abakorinso 4:7)

⁵ Nitwija kubaasa kwemera oburemeezi bw’emiringo yoona, yaaba bukye nari buhango, twaijuka ngu Yehova n’ohuriire kandi ngu ariho kutuhwera. Ahakuba tihariho buremeezi oburikumukiza amaani. Niwe w’Obushoboorozi Bwona, kandi naabaasa kutuha amaani g’okugumisiriza. (Shoma Abafilipi 4:13.) N’ahabw’ekyo, twine obwesigye ngu nitubaasa kubwemera bwona. Twareeba oku Yehova arikutushagika twaba twine oburemeezi bukye, nikituhamiza ngu naija kutuhwera twahikwaho obw’amaani.

6. Ni mbeera ki ezi Daudi yaarabiremu akiri omunyeeto ezaamuhweraire kwongyera kwesiga Yehova?

⁶ Teekateeka aha bintu bibiri ebyahikire ahari Daudi ebyamuhweraire kwongyera kwesiga Yehova. Obu yaabaire ari omuriisa muto, edubu ekatwara emwe aha ntaama za ishe, kandi omurundi ogundi entare ekakwata entaama emwe. Emirundi egyo yombi, Daudi akairuka aha nyamaishwa ezo yaajuna entaama. Kwonka, tarayehimbiise ahabw’obusinguzi obwo. Akaba naamanya ngu Yehova niwe yaabaire amuhaire amaani ago. (1 Sam. 17:​34-37) Daudi akaguma naijuka ebintu ebyo ebyabaireho. Ekyo kikamuhwera kugira obwesigye ngu Ruhanga ohuriire naija kumugumya omu biro by’omumaisho.

7. Daudi okureeba embeera omu muringo oguhikire kikamuhwera kita kurwanisa Goliasi?

⁷ Kandi obu Daudi yaabaire ari omutsigazi, akaza omu rusiisira rw’eihe ry’Abaisraeli. Akashanga abaserukare batiinire Omufilistia ekikaaka orikwetwa Goliasi owaabaire aizire kurwanisa ‘eihe rya Israeli.’ (1 Sam. 17:​10, 11) Abaserukare bakatiina ahabw’okugira ngu bakata omutima aha buhango bw’omushaija ogwo n’ebi yaabagambiire. (1 Sam. 17:​24, 25) Kwonka Daudi, akareeba embeera egyo omu muringo ogundi. Akaba naareeba ebyabaire nibibaho nk’ekijumo ahari “Ruhanga ohuriire,” beitu ritari eihe ry’Abaisraeli ryonka. (1 Sam. 17:26) Akaba naateekateeka ahari Yehova. Akaba naamanya ngu Ruhanga owaamuhweraire arikuriisa entaama naija kumuhwera n’omu mbeera egyo. N’ahabw’ekyo akarwanisa Goliasi kandi yaamusingura.—1 Sam. 17:​45-51.

8. Niki ekirikubaasa kuhamya obwesigye bwaitu ngu Yehova naija kutuhwera twahikwaho oburemeezi? (Reeba n’ekishushani.)

⁸ Naitwe nitubaasa kusingura oburemeezi twaijuka ngu Ruhanga ohuriire ayeteekateekire kutuhwera. (Zab. 118:6) Ekyo nitubaasa kwongyera kukihamya turikuteekateeka aha bi yaakozire ira. Shoma ebiri omu Baibuli ebirikukwijutsya oku Yehova yaahweraire abaheereza be. (Isa. 37:​17, 33-37) Kandi shoma nari oreebe ripoota eziri aha mukura gwaitu jw.org ezirikworeka oku Yehova arikushagika ab’eishe-emwe na banyaanyazi-itwe obunaku obu. Ekindi, ijuka obu Yehova yaakuhwera. Otahwamu amaani eki orikwijuka kyaba kitari ky’amaani nk’okurwanisa edubu nari entare. Ahabw’enki? Ahakuba Yehova akuhwereire omu miringo mingi. Akweyiriize haihi. (Yoh. 6:44) Kandi ahabw’obuhwezi  bwe okiri omu mazima. Mushabe kukuhwera kwijuka obu yaagarukamu okushaba kwawe, obu yaakushagika omu bwire obuhikire, nari obu yaakuhwera kuraba omu mbeera egumire. Okuteekateeka aha bintu nk’ebyo, nikikuhwera kwongyera kugira obwesigye ngu Yehova naija kugumizamu naakuhwera.

9. Twine kwijuka ki twahikwaho oburemeezi? (Enfumu 27:11)

⁹ Okureeba Yehova nk’owaabuzima nikiija kutuhwera kugira emiteekateekyere eringaniire aha buremeezi bwaitu. Tuta shi? Nitwija kuta omutima aha nshonga enkuru eri aha gati ya Yehova na Sitaane. Omuregi naagira ngu twagira oburemeezi, nituruga ahari Yehova. N’ahabw’ekyo, oku turikutwaza twahikwaho oburemeezi nikukwata aha ku Yehova arikwehurira. (Yob. 1:​10, 11; shoma Enfumu 27:11.) Kwonka twaguma tumuhamiireho nitworeka ngu nitumukunda, kandi ngu Omuregi n’omubeihi. Mbwenu shi noohakanisibwa gavumenti, oine oburemeezi omu by’entaatsya, abu orikubuurira tibarikukunda amakuru marungi, nari oine oburemeezi obundi? Ku kiraabe nikwo kiri, ijuka ngu embeera ei orimu neekuha omugisha gw’okureetera Yehova kushemererwa. Kandi tarikwija kukwikiriza kugyezibwa eki otarikubaasa. (1 Kor. 10:13) Naija kukuha amaani g’okugumisiriza.

RUHANGA OHURIIRE NAIJA KUKUSHUMBUUSHA

10. Niki eki Ruhanga ohuriire araakorere abarikumuramya?

¹⁰ Yehova niwe arikuha ebihembo abarikumuramya. (Heb. 11:6) Naatuha obusingye n’okumarwa hati, kandi naija kutuha amagara agatahwaho omu biro by’omumaisho. Nitubaasa kugira amatsiko omuri Yehova, turikwesigira kimwe ngu aine ekihika n’amaani g’okutushumbuusha. Kandi obwesigye obwo nibutuhiga kwehenenga omu kuramya kwaitu, nk’abaheereza ba Ruhanga abeesigwa aba ira oku bakozire. Ekyo nikyo Timoseo ow’omu kyasha ky’okubanza yaakozire.—Heb. 6:​10-12.

11. Niki ekyahigire Timoseo kukora n’obweziriki omu kibiina? (1 Timoseo 4:10)

 ¹¹ Shoma 1 Timoseo 4:10. Timoseo akeesiga Ruhanga ohurire. N’ahabw’ekyo, akabaasa kukora n’obweziriki kuheereza Yehova n’abandi. Mu miringo ki? Entumwa Paulo akamuhiga kutunguuka omu kwegyesa n’okuba omugambi murungi. Timoseo akaba aine kuba eky’okureeberaho kirungi aha Bakristaayo bagyenzi be, abakuru n’abato. Kandi akaheebwa obujunaanizibwa bugumire, obwabaire nibutwariramu okuhana ahu kyabaire nikyetengyesa kwonka omu muringo gwa rukundo. (1 Tim. 4:​11-16; 2 Tim. 4:​1-5) Timoseo akaba naahamiza kimwe ngu Yehova naija kumushumbuusha, n’obu abamwe baabaire batarikureeba nari batarikusiima ebi yaabaire naakora.—Rom. 2:​6, 7.

12. Niki ekirikubaasa kuhiga abareeberezi kwehenenga barikuhikiriza obujunaanizibwa bwabo? (Reeba n’ekishushani.)

¹² Obunaku obu, abareeberezi nabo nibabaasa kugira obwesigye ngu Yehova naareeba ebi barikukora, kandi naabasiima. N’obu abareeberezi baraabe baine obujunaanizibwa bw’okugumya ab’eishe-emwe, kwegyesa, n’okubuurira, baingi ahari bo nibahwera omu kwombeka n’okwirukangirira abahikirweho ebihikiirizi. Abandi bari omu Guruupu z’Okutaayaayira Abarwaire nari bari aha Bukiiko Oburikuhikaanisa Abarwaire n’Eirwariro. Abareeberezi abarikwehayo kuhwera omu mirimo egyo, nibareeba ekibiina nk’entebeekanisa ya Yehova etari y’abantu. N’ekirikurugamu, nibahikiiriza obujunaanizibwa bwabo n’omutima gwabo gwona, barikwesigira kimwe ngu Ruhanga naija kubashumbuusha ahabw’ebi barikukora.—Kol. 3:​23, 24.

13. Yehova naayehurira ata twateeraho kumuheereza?

¹³ Ti buri omwe ngu naabaasa kuba omureeberezi. Kwonka twena twine eki turikubaasa kuha Yehova. Ruhanga waitu naatusiima  twamuha ekirikukirayo oburungi omu kumuheereza. Naareeba ebi turikuhayo kushagika omurimo ogurikukorwa omu nsi yoona, n’obu byakuba biri bikye. Naashemererwa twateeraho kusingura enshoni tukaimustya omukono kugarukamu omu nteerane, kandi nikimushemeza twayehuzya enshobe tukasaasira. N’obu waakuba nooyereeba nk’otarikukora bingi ebi waakwenzire kukora, gira obwesigye ngu Yehova naasiima ebi orikukora, kandi naija kukushumbuusha.—Luk. 21:​1-4.

GUMA OHAMIIRE AHARI RUHANGA

14. Okugira omukago guhami na Yehova nikituhwera kita kuguma turi abeesigwa? (Reeba n’ekishushani.)

¹⁴ Yehova yaaba ari owaabuzima ahariitwe, nikiija kutworobera kuguma turi abeesigwa ahariwe. Ekyo nikyo Yosefu yaakozire. Akanga kushambana. Ruhanga akaba ari owaabuzima ahariwe, kandi atarikwenda kumugwisa kubi. (Kut. 39:9) Twaba nitwenda ngu Yehova abe owaabuzima ahariitwe, twine kugira obwire tukashaba kandi tukeega Ekigambo kye. Twakora tutyo, omukago gwaitu nawe nigwija kwongyera kuhama. Nka Yosefu, twaba twine omukago guhami na Yehova, nitwija kuba tutarikwenda kukora ekintu kyona ekirikumugwisa kubi.—Yak. 4:8.

15. Nitwegyera ki aha byahikire aha Baisraeli bari omu ihamba? (Abaheburaayo 3:12)

¹⁵ Abarikwebwa ngu Yehova ni Ruhanga ohuriire nibarahuka kumurugaho. Teekateeka aha kyahikire aha Baisraeli omu ihamba. Bakaba nibamanya ngu Yehova ariho, kwonka bakatandika kubangaanisa yaaba naabaasa kubareeberera. Bakabuuza bati: “[Yehova] ari aha gati omuriitwe nari tariho?” (Kur. 17:​2, 7) N’ekyarugiremu, bakagomera Ruhanga. Buzima oku n’okurabura ahariitwe, twine kwetantara kutooreza obugomi bwabo.—Shoma Abaheburaayo 3:12.

16. Niki ekirikubaasa kugyeza okwikiriza kwaitu?

¹⁶ Ensi neereetera kyaguma kuguma twine omukago murungi na Yehova. Abantu baingi  tibarikwikiriza ngu Ruhanga ariho. Obumwe, abarikwehuzya ebiragiro bya Yehova nibareebeka nk’abari gye. Twareeba ebyo nibibaho, okwikiriza kwaitu nikubaasa kugyezibwa. N’obu turaabe nitwikiriza ngu Ruhanga ariho, nitubaasa kutandika kubangaanisa yaaba naija kutuhwera. Omuhandiiki wa Zaaburi 73 akeeshanga omu mbeera nk’egyo. Akareeba abaabaire bamwetoroire barikwehuzya ebiragiro bya Ruhanga kandi bari gye. N’ahabw’ekyo, akatandika kubangaanisa yaaba kyabaire kiine omugasho kuheereza Ruhanga.—Zab. 73:​11-13.

17. Niki ekiraatuhwere kuguma twine omukago guhami na Yehova?

¹⁷ Niki ekyahweraire omuhandiiki wa zaaburi kuhindura emiteekateekyere ye? Akateekateeka aha kyabaire nikiza kuhika ahari abo abarikuruga ahari Yehova. (Zab. 73:​18, 19, 27) Kandi akateekateeka aha birungi ebirikuruga omu kuheereza Ruhanga. (Zab. 73:24) Naitwe nitubaasa kuteekateeka aha migisha ei Yehova atuhaire. Reero tugyeragyeranise oku twakubaire turi, kuri noogira ngu titurikuheereza Yehova. Okukora ekyo nikiija kutuhwera kuguma turi abeesigwa kandi tumariirire nk’omuhandiiki wa zaaburi, owaagizire ati: “Ekirungi ahariinye n’okwirira haihi Ruhanga.”—Zab. 73:28.

18. Ahabw’enki tutaine kutiina ebiraabeho omu biro by’omumaisho?

¹⁸ Nitubaasa kwemera oburemeezi bwona oburaatuhikeho omu biro ebi eby’emperu ahakuba ‘nituheereza Ruhanga ogwo ohuriire, ow’amazima.’ (1 Tes. 1:9) Ruhanga waitu n’owaabuzima, kandi naahwera abarikumuramya. Akaba ari hamwe n’abaheereza be aba ira, kandi ari naitwe obunaku obu. Juba nituza kuhikwaho okubonabona kwingi okuraabeho omu nsi. Kwonka nituza kuba tutari twenka, Yehova naija kuba ari naitwe. (Isa. 41:10) Twena ka tugambe tutarikubangaanisa tuti: “[Yehova] niwe muhwezi wangye, tinditiina.”—Heb. 13:​5, 6.