Nkazaarwa Desemba 22, 1929, omuri Noville, akaaro kakye akaabaire karimu faamu mwenda haihi na Bastogne, omu Belgian Ardennes. Hariho ebintu birungi bingi ebi ndikwijuka ebi naakozire nkiri muto ndi n’abazaire bangye aha faamu. Nyowe na murumuna wangye Raymond, tukaba tukama ente buri izooba, kandi tuhwera omu kwekorera emishaaruro. Omu kyaro kyaitu twena tukaba twine obumwe kandi turikuhwerahwerana.

Abazaire bangye, Emile na Alice, bakaba bari Abakaturiki enkomba. Bakaba nibaza omu Misa buri Sande. Kwonka, nka 1939, baapayoniya kuruga England bakaija omu kyaro kyaitu baaha Tata magaziini y’okushashurira eya Consolation (hati neeyetwa Awake!). Tata akahika naamanya ngu ago nigo mazima, kandi akatandika kushoma Baibuli. Ku yaarekiire aho kuza omu Misa, abataahi abaabaire nibatutwariza gye bakatandika kutuhakanisa. Bakagyemesereza tata kuguma ari Omunyakaturiki, ekyarugiremu okuguma nibateera empaka.

Nkashaasha munonga kureeba tata arikutwarizibwa atyo. Ekyo kikampiga kushaba Ruhanga obuhwezi, omu kushaba oku naagambaho aha kutandika kw’ekicweka eki. Okuhakanisibwa abataahi ku kwatuubire, nkagira okushemererwa kwingi omu mutima. Nkahamiza kimwe ngu Yehova ‘naahurira okushaba.’

Abanazi aba Germany bakataahirira Belgium Okwakataano 10, 1940, ekyarugiiremu abantu baingi kuhuga omu ihanga. Eka yaitu ekahungira bukiizi-bwa-buryo bwa France. Ku twabaire nitugyenda, tukeeshanga aha gati y’eihe rya Germany n’erya France.

Ku twagarukire aha faamu, tukashanga baibire ebintu byaitu bingi. Embwa yaitu Bobbie, niyo  yaatwakiire. Ebyabaireho bikandeetera kwebuuza, ‘Ahabw’enki hariho entaro n’okubonabona?’

Omu bwire obwo, tukagasirwa omu kutaayaaya kw’ow’eishe-emwe Emile Schrantz, a payoniya omwesigwa kandi omureeberezi. Akakoresa Baibuli kunshoboororera ahabw’enki hariho okubonabona kandi yaagarukamu n’ebibuuzo byangye ebindi. Nkatandika kukunda Yehova, kandi naahamiza kimwe ngu ni Ruhanga wa rukundo.

Orutaro rutakahendeire eka yaitu ekatunga omugisha gw’okuba n’ab’eishe-emwe butoosha. Omuri Agusto 1943, Ow’eishe-emwe José-Nicolas Minet akataayaaya aha faamu yaitu kuha orubazo. Akabuuza ati: “N’oha orikwenda kubatizibwa?” Nyowe na tata tukaimusya omukono. Twembi tukabatizibwa omu mugyera mukye haihi na faamu yaitu.

Omuri Desemba 1944 eihe rya Germany rikataahirira burugwa izooba bwa Europe omurundi gw’aha muheru omu Rutaro rw’Ensi Yoona II orurikumanywa nk’orutaro rwa Bulge. Tukaba nitutuura haihi n’ahu orutaro rwabaire ruri, kandi tukeshereka omu kishengye ekiri ahansi y’enju kumara nk’okwezi. Eizooba rimwe ku naashohoire kuza kuriisa amatungo, bomu ekateera faamu yaitu, yaashiisha n’eibaati ry’ekiraaro. Omuserukare wa Amerika owaabaire ari omu kiraaro ekyabaire kiri haihi naanye, akagamba n’eiraka rihango ati: “Juumara ahansi!” Nkairuka naajumara haihi nawe, reero yaanjweka enkofiira ye kundinda.

Bwanyima y’orutaro, tukabaasa kuhurizana n’ekibiina omuri Liège, nka kiromita 90 (mahiro 56) bukiizi bwa bumosho. Ku hahingwireho obwire, tukabaasa kutandikaho guruupu nkye omuri Bastogne. Nkatandika kukora omu ofiisi ey’abarikukora aha by’emishoro kandi nkatunga omugisha gw’okwega eby’ebiragiro. Bwanyima nkakora omu ofiisi ya gavumenti. Omuri 1951 tukatebeekanisa oruteerane rwa saketi omuri Bastogne orwabaireho abantu bakye. Abantu nka igana nibo baabaire bariho, otwariiremu munyaanyazi-itwe payoniya omweziriki, Elly Reuter. Akavuga egaari kiromita 50 (mahiro 31) kwija aha ruteerane. Bwanyima tukakundana kandi naamugamba obugyenyi. Elly akaba ayetsirwe omu Ishomero rya Gileadi omuri United States.  Akahandiikira ofiisi enkuru arikushoboorora ahabw’enki yaabaire ataraabaase kuza omu Ishomero eryo. Ow’eishe-emwe Knorr, owaabaire naareeberera abantu ba Yehova omu bwire obwo, akamugarukamu omu muringo gw’embabazi ngu shana obundi eizooba rimwe we na iba nibaza kuza omu ishomero rya Gileadi hamwe. Tukaza omu bushwere Febwari 1953.

Omu mwaka ogwo, Nyowe na Elly tukaza aha ruteerane oruhango orwa New World Society omuri Yankee Stadium, New York. Aha ruteerane orwo, nkabugana ow’eishe-emwe owaampaire omurimo murungi kandi akangambira kufurukira United States. Bwanyima y’okugambira Yehova enshonga egyo omu kushaba, nyowe na Elly tukacwamu kutazayo, kandi twagaruka Belgium kushagika guruupu ey’omuri Bastogne eyaabaire erimu ababuurizi nka ikumi. Omwaka ogwakuratsireho tukashemererwa, Elly ku yaazaire omwojo waitu Serge. Eky’obusaasi, bwanyima y’ameezi mushanju, Serge akarwara yaafa. Tukagambira Yehova amaganya gaitu omu kushaba, kandi amatsiko g’okuzooka gakatugumya.

Omuri Okitoba 1961, nkabaasa kutunga omurimo ogwabaire nigumbaasisa kuba payoniya. Eizooba eri naagutungiireho, ow’eishe-emwe ow’aha kakiiko k’eitaagi erya Beligium akanteerera esimu. Akambuuza yaaba naabaire nimbaasa kutandika kuheereza nk’omuheereza wa saketi (hati orikwetwa omureeberezi wa saketi). Nkabuuza nti: “Nitubaasa kubanza twaba baapayoniya tutakaikiriize obujunaanizibwa obu?” Ab’eishe-emwe bakaikiriza okushaba kwangye. Tukaba baapayoniya kumara ameezi munaana, reero twatandika obuheereza bwa saketi Seputemba 1962.

Bwanyima y’emyaka ebiri turi omu buheereza bwa saketi, tukeetwa kuheereza aha Beseeli omuri Brussels. Tukatandika kuheerezayo Okitoba 1964. Omu buheereza busya obu tukatunga emigisha mingi. Bwanyima y’obwire bukye Ow’eishe-emwe Knorr aherize kutaayaayira Beseeli yaitu omuri 1965, nkatangaara ku naatorainwe kuba aha kakiiko k’eitaagi. Bwanyima, nyowe na Elly tukeetwa omu Ishomero rya Gileadi erya 41. Ebigambo ebi Ow’eishe-emwe Knorr yaagambire emyaka 13 enyima bikahikiirira. Eishomero ku ryahweire, tukagaruka aha Beseeli ya Belgium.

Kumara emyaka, ntungire omugisha gw’okukoresa okumanya oku nyine aha by’ebiragiro kujurira obugabe bwaitu bw’okuramya omuri Buraaya n’omu bicweka ebindi. (Fil. 1:7) Eki kimbaasiise kukora hamwe n’ab’obushoboorozi omu mahanga agarikurenga omuri 55 ahu omurimo gwaitu gwabaire guzibiirwe nari gwemereziibwe. Omu mwanya gw’okugamba aha bukugu bwangye omu by’ebiragiro, nkaba niinyeyanjura “nk’omushaija wa Ruhanga.” Butoosha nkaba nshaba Yehova kumpabura, ndikumanya ngu “omutima gw’omugabe [nari omuramuzi] guba omu mukono gwa [Yehova] agutooza ahu arikwenda hoona.”—Enf. 21:1.

 Ekyanshemeize munonga n’ekyabaireho obu naabaire ningaaniira n’omwe aha b’omwishengyero rya Buraaya. Nkaba ntaireho emirundi mingi kugamba nawe, kandi akarugaho yaikiriza ngu tubugane. Akangira ati: “Naakuha edakiika itaano, kandi otarenzyaho n’emwe.” Nkainika omutwe naashaba. Ow’eishengyero akambuuza eki naabaire ninkora atiinire. Nkaimutsya omutwe, naagira nti: “Naaba ninsiima Ruhanga ahabw’okugira ngu ori omwe aha baheereza be.” Akambuuza ati: “Noomanyisa ki?” Nkamworeka Abarooma 13:4. Akaba ari Omuporotesitanti, n’ahabw’ekyo ekyahandiikirwe eki kikamukwataho. N’ekyarugiremu, akanyikiriza kugamba nawe kumara ekicweka ky’eshaaha, kandi hakarugamu ebirungi. Nangwa akagira ngu naaha ekitiinisa omurimo gwaitu.

Kumara emyaka mingi abaheereza ba Yehova babaasize kujurira emanja nyingi omuri Buraaya eziine akakwate n’okutagwera rubaju, enshonga z’okureeberera abaana, emishoro, n’ezindi. Ntungire omugisha gw’okwejumba omu manja ezirikukira obwingi, kandi nyereebeire butunu oku Yehova arikutuhwera kusingura. Abajurizi ba Yehova babaasize kusingura emanja ezirikurenga 140 omu Kooti ya Buraaya ey’Obugabe bw’Abantu!

Omu myaka ya 1990, nkakora n’Ow’eishe-emwe Philip Brumley, kuruga aha ofiisi enkuru, n’Ow’eishe-emwe Valter Farneti, kuruga Italy, kuhwera ab’eishe-emwe kugira obugabe bw’okuramya omuri Cuba ahu omurimo gwaitu gwabaire guzibiirwe. Nkahandiikira Ofiisi y’omujwekyerwa wa Cuba omuri Belgium reero nkabugana owaabaire naaza kukora aha nshonga zaitu. Obu twabanza kubugana, tituraabaasize kushoboorora obutaikirizana obwareetaire omurimo gwaitu kwemerezibwa.

Ku twaherize kushaba Yehova kutuhwera, tukashaba orusa, kandi tukaikirizibwa kwoherezibwa Baibuli 5000 omuri Cuba. Baibuli zikahikayo gye, kandi zaaheebwa ab’eishe-emwe, ekyo kikatuhamiza ngu Yehova naatuha omugisha ahabw’okuteeraho kwaitu. Bwanyima tukashaba orusa rw’okwoherezayo Baibuli ezindi 27,500. Kandi tukaikirizibwa. Okuhwera buri omwe aha b’eishe-emwe na banyaanyazi-itwe omuri Cuba kutunga Baibuli eye kikandeetera kugira okushemererwa kwingi.

Nkaza Cuba emirundi mingi kuhwera omu nshonga z’eby’ebiragiro eziine akakwate n’omurimo  gwaitu. Ekyo kikambaasisa kugira enkoragana nungi n’abarikukora omu gavumenti baingi.

Omuri 1994 abantu abarikurenga 1,000,000 bakaitirwa omu kiita bantu ekyahikire aha Batutsi omuri Rwanda. Eky’obusaasi, bamwe aha b’eishe-emwe na banyaanyazi-itwe nabo bakaitwa. Guruupu y’ab’eishe-emwe bakashabwa kukora entebeekanisa y’okwirukangirira ab’eishe-emwe na banyaanyazi-itwe omu ihanga eryo.

Guruupu yaitu ku yaahikire Kigali, orurembo orukuru, tukashanga ofiisi y’abavunuuzi n’ahu ebitabo byabaire nibibiikwa hatairwe amasasi. Tukahurira bingi ebirikukwata aha b’eishe-emwe na banyaanyazi-itwe abaatemagwirwe ebyabaire nibikwatsa enaku. Kwonka tukahurira n’oku ab’eishe-emwe baayorekire rukundo y’Ekikristaayo. Nk’eky’okureeberaho, tukaganiira n’ow’eishe-emwe Omututsi owaasherekirwe omu kiina kumara ebiro 28, arinzirwe eka y’Abajurizi ba Yehova Abahutu. Omu ruteerane orwabaireho omuri Kigali, tukagumya ab’eishe-emwe na banyaanyazi-itwe abarikurenga 900 omu by’omwoyo.

Bwanyima tukaza Zaire (hati erikwetwa Democratic Republic of the Congo) kusherura Abajurizi ba Yehova baingi abaarugire Rwanda bakahuungira omu kampu z’empungi eziri haihi n’orurembo Goma. Kwonka titurababoine, n’ahabw’ekyo tukashaba Yehova kutuhwera kumanya ahu baabaire bari. Reero tukareeba omuntu arikwija ahu turi, kandi twamubuuza yaaba naamanya Abajurizi ba Yehova. Akagira ati: “Eego, ndi Omujurizi wa Yehova. Ka mbatware mborekye abari aha kakiiko k’okwirukangirira.” Ku twaherize kugumya abari aha kakiiko, tukahuumuriza ab’eishe-emwe na banyaanyazi-itwe 1,600 abaabaire bahungire, kandi twabagumya omu by’omwoyo. Tukabashomera n’ebaruha kuruga aha Kakiiko Akareeberezi. Ab’eishe-emwe na banyaanyazi-itwe bakakwatwaho munonga, ku baahuuriire ebigambo ebi: “Butoosha nitubashabira. Nitumanya ngu Yehova tarikwija kubatsigaho.” Ebigambo ebyo eby’Akakiiko Akareeberezi bihikiriire. Hati, Rwanda eine Abajurizi ba Yehova abarikurenga 30,000.

Bwanyima y’okumara emyaka nka 58 omu bushwere, nkafeerwa omukundwa wangye Elly omu 2011. Nkagambira Yehova obusaasi bwangye omu kushaba, kandi akampuumuriza. Okugambira abataahi amakuru marungi g’Obukama nakyo kimpuumuriize.

N’obu ndaabe ndengize emyaka 90, nimbuurira buri saabiiti. Kandi, nikinshemeza kuhwera ekitongore ekirikukora aha by’ebiragiro aha ofiisi y’eitaagi eya Belgium, kugambira bandi ebi naarabiremu, n’okugumya eminyeeto aha Beseeli.

Emyaka nka 84 enyima, nkashaba Yehova omurundi gw’okubanza. Ekaba eri entandikiro y’orugyendo rurungi orurikushemeza, orumbaasiise kwongyera kwirira haihi na Yehova. Nyine okushemererwa ahabw’okugira ngu amagara gangye goona Yehova ahuriire okushaba kwangye.—Zab. 66:19. b