Ebibuuzo Kuruga omu Bashomi
Ahabw’enki abamwe nibagira ngu ebiri omuri Zaaburi 12:7, nibimanyisa “ebigambo bya [Yehova]” ebiri omu mushororongo 6, kandi Baibuli eya New World Translation erikworeka ngu nibimanyisa ‘abooro abarikuganya’ omu mushororongo 5?
Ebyetooroire omushororongo ogu nibigamba aha bantu.
Zaaburi 12:1-4, nihagira ngu ‘abeesigwa babuzire omu bantu.’ Hati ka twetegyereze Zaaburi 12:5-7, emishororongo eyaagambwaho omu kibuuzo.
“Ahabw’okunyagwa kw’abooro,
n’ahabw’okutsinda kw’abakyene,
mbwenu ka nyimukye,’ nikwo [Yehova] arikugira.
Mmute omu mwanya gw’obusingye ogu atuura naayetenga.
Ebigambo bya [Yehova] n’ebigambo bishemeire,
ni nk’efeeza eshemeziibwe omu iziiko ry’ahansi, eshemeziibwe emirundi mushanju.
[Yehova], ogume oturinde,
kandi otujune ab’obusingye obu.”
Omushororongo 5 gurimu ebi Ruhanga yaagambire aha booro. Naija kubajuna.
Omushororongo 6 nigwongyeraho ngu, “ebigambo bya [Yehova] n’ebigambo bishemeire, ni nk’efeeza eshemeziibwe.” Abakristaayo nibaikirizana n’ebigambo ebyo.—Zab. 18:30; 119:140.
Ka twetegyereze omushororongo ogurikukurataho, Zaaburi 12:7: “[Yehova], ogume oturinde, kandi otujune ab’obusingye obu.” Ekigambo “oturinde” nikijwekyera ki?
Ahabw’okugira ngu ebirikubandiza omushororongo 7 nibigamba aha ‘bigambo bya [Yehova],’ abamwe nibabaasa kuteekateeka ngu Ruhanga naarinda ebigambo bye. Kandi nitumanya ngu Ruhanga atwire naarinda Baibuli n’obu abahakanisa baateireho kugicwekyereza.—Isa. 40:8; 1 Pet. 1:25.
Kwonka, ebiri omu mushororongo 5 nabyo bihikire. Yehova atwire naahwera, kandi naarinda abooro, “n’abarikubonabonesibwa.”—Yob. 36:15; Zab. 6:4; 31:1, 2; 54:7; 145:20.
Mbwenu shi ekigambo “oturinde” ekiri omu mushororongo 7 nikijwekyera ki?
Ebiri omuri zaaburi egi nibyoreka ngu ekigambo “oturinde” nikijwekyera abantu.
Zaaburi 12:1 nihooreka embeera ei abantu ‘abeesigwa’ barikurabamu. Reero omushororongo ogurikukurataho nigworeka ngu Yehova naija kwimuka agire eki yaakora ahari abo abarikukoresa kubi orurimi rwabo. Zaaburi egi neetuhamiza ngu nitubaasa kwesiga Ruhanga kugira eki yaakorera abantu be ahabw’okugira ngu ebigambo bye bishemeire.
N’ahabw’ekyo omushororongo 7 nigugira ngu Yehova naija ‘kuturinda’ twabonabonesibwa ababi.
Ekigambo “oturinde” kikakoresibwa n’omu bihandiiko by’Oruheburaayo ebya ira. N’envunuura ey’Orugriika eyaabandize neekoresa ekigambo “itwe” emirundi ebiri omu mushororongo 7, ekirikujwekyera abeesigwa abarikubonabonesibwa, kandi abarikuganya. Omushororongo 7 niguhendera gurikworeka ngu Yehova naija kurinda abeesigwa abajune “ab’obusingye obu,” abarikushagika ebikorwa bibi. (Zab. 12:7, 8) Omu nvunuura ey’Oruramaika, omushororongo 7 nigugira guti: “Iwe, MUKAMA, noija kurinda abahikiriire, kandi obajune ab’obusingye obu ababi ebiro byona.” Eki nikyongyera aha buhame oburikworeka ngu ebiri omu Zaaburi 12:7 tibirikumanyisa ebigambo bya Ruhanga.
N’ahabw’ekyo, omushororongo ogu niguha amatsiko ‘abeesigwa’ ngu Ruhanga naija kugira eki yaabakorera.
