1. Abato bashemereire kucwamu ki aha biro byabo eby’omumaisho? Niki ekirikubaasa kubahwera okuterarikirira munonga? (Reeba ekishushani aha kutandika.)

ABATO nimumanya ngu otakatandikire orugyendo, ni kikuru kumanya ei orikuza. Amagara ni nk’orugyendo, kandi obwire bw’okutebeekanisa ei oraaze ni waaba okiri muto. N’amazima, nikibaasa kutakworobera kutebeekanisa ei oraaze. Omwishiki orikwetwa Heather akagira ati: “Ni kitiinisa. Oine kucwamu eki oraakore ebiro byona.” Waaba nooyehurira otyo, ijuka ngu Yehova naagira ati: “Otahahaaza omutima, ahabw’okuba ndi Ruhanga waawe. Ndyakuha amaani, ndyakuhwera.”​—Isaaya 41:10.

2. Noomanya ota ngu Yehova naayenda ngu ocwemu ebiraakushemeze omu biro by’omumaisho?

² Yehova naakuhiga kwetebeekanisiza gye ebiro byawe by’omumaisho. (Omubuurizi 12:1; Matayo 6:20) Naayenda ngu oshemererwe. Eki nikyeyoreka gye waareeba, okahurira, kandi okaroza ebintu ebi yaahangire. Yehova naatureeberera n’omu miringo endiijo. Naatuhabura kandi atwegyesa omuringo murungi gw’okutwazamu. N’ahabw’ekyo abantu ku barikwanga obuhabuzi bwe, tarikushemererwa. Naagambira abarikwanga obuhabuzi  bwe ati: “Mwatoorana ebi ntarikushemerererwa. . . . Reeba abaheereza bangye baryashemererwa, kwonka imwe mwitwe enshoni. Reeba abaheereza bangye baryayeshongora ahabw’obunanukye bw’omu mutima.” (Isaaya 65:12-14) Ku turikucwamu gye, nituhaisa Yehova ekitiinisa.​—Enfumu 27:11.

3. Yehova naayenda ngu okore ki?

³ Ni bigyendererwa ki ebi Yehova arikwenda ngu oteho? Kubaasa kushemererwa, oine kumanya Yehova kandi okamuheereza. Okwo nikwo Yehova yaahangire abantu. (Zaaburi 128:1; Matayo 5:3) Enyamaishwa zo nizirya, zinywa, kandi zizaara kwonka. Beitu Yehova naayenda ngu otebeekanise ebiraakuhwere kugira okushemererwa n’ekigyendererwa. Omuhangi waawe ni ‘Ruhanga wa rukundo,’ ‘Ruhanga oine okushemererwa,’ owaahangire abantu ‘omu kishushani kye.’ (2 Abakorinso 13:11; 1 Timoseo 1:11; Okutandika 1:27) Noija kushemererwa waatooreza Ruhanga oine rukundo. Baibuli neegira eti: “Okugaba kuhaisa omugisha okukira okuheebwa.” (Ebyakozirwe 20:35) Waatungireho okushemererwa nk’oku? Aga nigo mazima agarikukwata aha mbeera y’omuntu. N’ahabw’ekyo Yehova naayenda ngu otebeekanise ebiro byawe by’omumaisho orikwihirira ahari rukundo ei omwiniire hamwe n’abandi.​—Shoma Matayo 22:36-39.

4, 5. Niki ekyareeteire Yesu okushemererwa?

⁴ Yesu Kristo akabateeraho eky’okureeberaho kirungi imwe abato. Obu yaabaire akiri muto, aine kuba yaabaire naakunda kuzaana n’okushemererwa. Nk’oku Ekigambo kya Ruhanga kirikugamba, hariho obunaku ‘bw’okusheka n’obw’okuzina.’ (Omubuurizi 3:4) Kandi Yesu akairira haihi Yehova arikweyegyesa Ebyahandiikirwe. Obu yaabaire aine emyaka 12, abeegyesa aha hekalu bakatangaarira “obwengye bwe n’ebi yaabaire naabagarukamu.”​—Luka 2:42, 46, 47.

⁵ Yesu ku yaabaire mukuru, okukora ebi Ruhanga yaabaire naayenda ngu akore kikamureetera okushemererwa. Nk’eky’okureeberaho, Ruhanga akaba naayenda ngu Yesu ‘abuurire abooro’ kandi ‘amanyise empumi eby’okuhumuurwa.’ (Luka 4:18) Zaaburi 40:8 nihagamba aha nyehurira ya Yesu hati: “Ninshemerererwa okukora ebi okunda.” Yesu akaba naakunda kubuurira abantu ebirikukwata ahari Ishe. (Shoma Luka 10:21.) Eizooba rimwe, bwanyima ya Yesu kugamba n’omukazi aha kuramya okw’amazima, akagambira abeegi be ati: “Eby’okurya byangye nikwo kukora eki Owantumire akunda n’okuhikiiriza omurimo gwe.” (Yohaana 4:31-34) Yesu akashemererwa ahakuba akooreka ngu naakunda Ruhanga n’abandi. Waakora nikyo kimwe, naiwe noija kushemererwa.

6. Ahabw’enki ni kikuru okugambira abandi aha bigyendererwa byawe by’omumaisho?

⁶ Abakristaayo baingi bakatandika kuba baapayoniya bakiri bato, kandi eki kikabareetera okushemererwa. Noobaasa kugamba na bamwe aharibo aha bigyendererwa byawe? “Ahatari kuhanuura enaama zifa busha, kwonka ahu abahi b’obwengye baingi bari, zihikiirizibwa.” (Enfumu 15:22) Obundi ab’eishe-emwe na banyaanyazi-itwe abaabuzima  nibaija kukugambira ngu okuba payoniya nikikuhwera kutunga okutendekwa okuraakuhwere ebiro byona. Yesu obu yaabaire ari omu iguru Ishe akamwegyesa ebintu bingi. Bwanyima, obu yaabaire naaheereza omu nsi, akagumizamu naayega. Akatunga okushemererwa okurikuruga omu kubuurira abandi amakuru marungi, kandi yaaguma ari omwesigwa omu mbeera zigumire. (Shoma Isaaya 50:4; Abaheburaayo 5:8; 12:2) Ka tureebe enshonga ahabw’enki obuheereza obw’obutwire burikubaasa kukureetera okushemererwa.

7. Ahabw’enki abato baingi nibakunda kuhindura abantu abeegi?

⁷ Yesu akatugambira kugyenda ‘kuhindura abantu abeegi’ kandi tubeegyese. (Matayo 28:19, 20) Waagira ekigyendererwa ky’okukora omurimo ogu, noija kugira amagara marungi agarikuhaisa Ruhanga ekitiinisa. Nk’emirimo endiijo, nikikwetengyesa obwire kubaasa kumanya kugukora gye. Ow’eishe-emwe orikwetwa Timothy owaatandikire kuba payoniya akiri omushogoyo akagira ati: “Ninkunda kuheereza Yehova ndi omu buheereza bw’obutwire ahakuba nigwo muringo ogu ndikumworeka ngu nimukunda. Omu kubanza, nkaba ntarikubaasa kutunga omwegi wa Baibuli, kwonka bwanyima nkaza omu kicweka ekindi, kandi omu kwezi kumwe nkaba naatungire abeegi baingi. Omwe aharibo akatandika kwija aha Kyombeko ky’Obukama. Bwanyima y’okuza omu Ishomero ery’Ab’eishe-emwe Abatakagiire omu Bushwere kumara ameezi abiri, nkoherezibwa ahandi ahu ntungire abeegi ba Baibuli bana. Ninkunda kwegyesa abantu, ahakuba nindeeba ngu omwoyo gurikwera guriyo nigubahindura.” * (Reeba obugambo obw’ahansi.)​—1 Abatesalonika 2:19.

8. Abato abamwe bakozire ki kubaasa kubuurira abantu baingi?

⁸ Abato abamwe babaasize kwega orurimi orundi. Nk’eky’okureeberaho, Jacob, kuruga omuri North America, akahandiika ati: “Obu naabaire nyine emyaka mushanju, baingi abu naabaire niinyega nabo bakaba nibaruga omuri Vietnam. Nkaba niinyenda kubagambira ahari Yehova, n’ahabw’ekyo bwanyima y’obwire bukye nkeega orurimi rwabo. Obwire obwingi, nkaba niinyega ndikugyeragyeranisa Omunaara gw’Omurinzi ogw’Orungyereza n’ogw’Oruvetinaamu. Kandi nkatunga abanywani kuruga omu kibiina ekyabaire kiri haihi ekirikukoresa Oruvetinaamu. Ku naahikize emyaka 18, nkatandika kuheereza nka payoniya. Bwanyima, nkaza omu Eishomero ry’Ab’eishe-emwe Abatakagiire omu Bushwere. Eki kikampwera omu buheereza bwangye nka payoniya, kandi omu guruupu erikukoresa Oruvetinaamu niinye mureeberezi nyenka. Abavetinaamu baingi nibatangaara ahabw’okureeba oku nyegire orurimi rwabo. Nibanyakiira omu maka gaabo, kandi obwire obwingi nibaikiriza kwega Baibuli. Abamwe batunguukire baabatizibwa.”​—Gyeragyeranisa Ebyakozirwe 2:7, 8.

9. Omurimo gw’okuhindura abantu abeegi nigutwegyesa ki?

⁹ Omurimo gw’okuhindura abantu abeegi nigukwegyesa oku orikubaasa kutwaza gye aha murimo, oku orikubaasa kugamba gye, n’oku orikubaasa kugira obumanzi n’okukoresa obwengye. (Enfumu 21:5; 2 Timoseo 2:24) Kwonka omurimo ogu okukira munonga nigureeta okushemererwa ahakuba nooyega  oku orikubaasa kworeka ngu ebi orikwikiriza nibiruga omu Byahandiikirwe. Kandi nooyega n’oku orikubaasa kukora hamwe na Yehova.​—1 Abakorinso 3:9.

10. Noobaasa kutunga okushemererwa ota omu murimo gw’okuhindura abantu abeegi n’obu ekicweka ky’okubuuriramu kyakuba kitoorobi?

¹⁰ Noobaasa kutunga okushemererwa omu murimo gw’okuhindura abantu abeegi n’obu abantu bakye bonka omu kicweka kyanyu baakuba nibo barikwenda kwega Baibuli. Okubaasa kuhindura abantu abeegi, ab’omu kibiina boona baine kukwatanisa bakakorera hamwe. N’obu ow’eishe-emwe nari munyaanyazi-itwe omwe wenka yaakuba niwe yaahwera omuntu kuhinduka omwegi, twena nitushemererwa ahakuba twena tukeejumba omu kusherura. Nk’eky’okureeberaho, Brandon, owaaheereize nka payoniya kumara emyaka mwenda omu kicweka eki abantu bakye bonka baabaire barikwenda kwega Baibuli, akagira ati: “Ninkunda kubuurira amakuru marungi ahakuba Yehova niwe arikutugambira kukikora. Nkatandika kuheereza nka payoniya ahonaaho ku naaherize kushoma. Ninkunda kugaruramu amaani abato omu kibiina kyaitu n’okureeba oku barikweyongyera kukura omu by’omwoyo. Bwanyima y’okuruga omu Ishomero ry’Ab’eishe-emwe Abatakagiire omu Bushwere, nkatandika kuheereza nka payoniya. N’amazima tinkatungahoga omuntu omu kicweka eki ndikubuuriramu obaasize kubatizibwa, kwonka abandi babaasize kukikora. Nyine okushemererwa ahakuba nkataho ekigyendererwa ky’okuheereza n’obweziriki omu murimo gw’okuhindura abantu abeegi.”​—Omubuurizi 11:6.

11. Ni buheereza ki obu abato baingi barikwejumbamu?

¹¹ Hariho emiringo mingi y’okuheerezamu Yehova. Nk’eky’okureeberaho, abato abaingi nibahwera omu murimo gw’okwombeka. Ebyombeko by’Obukama bingi ebisya nibyetengwa. Emyanya egi neehaisa Yehova ekitiinisa, n’ahabw’ekyo waahwera omu kugyombeka noobaasa kutunga okushemererwa. Kandi noobaasa n’okutunga okushemererwa okurikuruga omu kukora n’ab’eishe-emwe n’abanyaanyazi-itwe. Kandi noobaasa n’okwega ebintu bingi ebisya, nk’okukora omurimo omu muringo murungi, n’okukwatanisa na bakama baawe.

12. Okuheereza nka payoniya nikibaasa kukuhitsya aha migisha ki endiijo?

¹² Ow’eishe-emwe orikwetwa Kevin naagira ati: “Kuruga obu naabaire ndi muto, nkaba nyine ekyetengo ky’okwenda kuheereza Yehova omu buheereza obw’obutwire. Nkarugaho naatandika kuheereza nka payoniya nyine emyaka 19. Nkaba ninyebaisaho ndikukorera ow’eishe-emwe omwombeki ebiro bikye omu saabiiti. Nkeega okushakaara, okubyara amadirisa, hamwe n’enyigi. Bwanyima, nkamara emyaka ebiri ndikukora n’ab’eishe-emwe abarikuhwera abateirwe omwegyemure, turikwombeka Ebyombeko by’Obukama n’amaju g’ab’eishe-emwe agasiisikaire. Ku naahuriire ngu omuri South Africa hariyo ekyetengo  ky’okwombeka, nkatayo okushaba kwangye kandi bakanyeta. Aha omuri Africa, niinduga aha Kyombeko ky’Obukama nza aha kindi bwanyima ya saabiiti nkye. Abu ndikwombeka nabo turi nk’eka. Nitutuura hamwe, twega Baibuli hamwe, kandi tukora hamwe. Kandi ninkunda kubuurira n’ab’eishe-emwe ab’omu kibiina buri saabiiti. Ebigyendererwa ebi naataireho nkiri muto bindeeteire okushemererwa omu miringo ei naabaire ntarikuteekateeka.”

13. Ahabw’enki abato baingi baine okushemererwa ahabw’okuheereza aha Beseeli?

¹³ Bamwe abaabaire bari baapayoniya hati nibaheereza aha Beseeli. Okuheereza aha Beseeli nikireeta okushemererwa ahakuba buri kimwe eki orikukorerayo nookikorera Yehova. Beseeli neehwera omu kushohoza Baibuli, n’ebitabo ebindi ebirikushoboorora Baibuli kugira ngu abantu babaase kwega amazima. Omubeseeli orikwetwa Dustin naagira ati: “Nkagira ekigyendererwa ky’okuheereza omu buheereza bw’obutwire obu naabaire nyine emyaka mwenda, kandi nkatandika kuheereza nka payoniya ahonaaho mperize kushoma. Bwanyima y’omwaka gumwe n’ekicweka, bakanyeta kuza kuheereza aha Beseeli, ahu naayegiire kukoresa ekyoma ekirikuteera ebitabo, nkeega n’okukora puroguraamu za kompyuta. Aha Beseeli, ninkunda kuhurira oku omurimo gw’okuhindura abeegi gurikweyongyera omu nsi yoona. Ninkunda kuheereza aha, ahakuba ebi turikukora nibihwera abantu kwirira haihi na Yehova.”

14. Niki eki orikubaasa kukora hati kwetebeekaniisiza obuheereza obw’obutwire?

¹⁴ Noobaasa kwetebeekanisiza ota obuheereza obw’obutwire? Kubaasa kuheereza Yehova nk’oku kirikubaasika, oine kugira emitwarize y’Ekikristaayo. Yeyegyese Ekigambo kya Ruhanga otarikwosha, teekateeka aha bi orikwega, kandi teeraho kworeka okwikiriza kwawe omu nteerane z’ekibiina. Waaba okiri aha ishomero, noobaasa kwongyera amaani omu kubuurira amakuru marungi. Yega kufayo aha bantu orikubabuuza omu bwengye eki barikuteekateeka, reero ohurikize gye eby’okugarukamu byabo. Kandi noobaasa n’okwehayo kuhwera nk’omu kuboneza n’okuhunduuza Ekyombeko ky’Obukama. Yehova naashemererwa kukoresa abacureezi kandi abarikwenda kukora. (Shoma Zaaburi 110:3; Ebyakozirwe 6:1-3) Entumwa Paulo akeeta Timoseo kuheereza nk’omumiisani ahakuba ‘akaba naasiimwa ab’eishe-emwe.’​—Ebyakozirwe 16:1-5.

15. Noobaasa kukora ki kutunga omurimo oguraakubaasise kuba payoniya?

¹⁵ Baingi abari omu buheereza obw’obutwire baine kuba baine emirimo. (Ebyakozirwe 18:2, 3) Obundi noobaasa kwega omwoga gw’obwire bukye oguri omu kicweka kyanyu, oguraakuhwere kukora ebiro bikye omu saabiiti. Gamba n’omureeberezi orikutaayaayira ebibiina na baapayoniya abandi aha bigyendererwa byawe obashabe kukuha obuhabuzi. Reero, nk’oku Baibuli erikugira, “emirimo yaawe gyegyekyerere” Yehova, “obwo nibwo enaama zaawe zirihamibwa.”​—Enfumu 16:3; 20:18.

16. Obuheereza bw’obutwire nibubaasa kukuhwera buta kwetebeekanisiza obujunaanizibwa obundi omu biro by’omumaisho?

¹⁶ Noobaasa kugira obuhame ngu Yehova naayenda ngu ‘otungye’ okushemererwa omu biro by’omumaisho. (Shoma 1 Timoseo 6:18, 19.) Obuheereza obw’obutwire nibukuhwera kuba Omukristaayo okuzire omu by’Omwoyo obwo orikukora n’abandi abari omu buheereza obwo. Kandi abandi bashangire ngu okuheereza omu buheereza obw’obutwire bakiri bato kibahwereire omu bushwere bwabo. Obwire obwingi, abaabaire baapayoniya batakagiire omu bushwere, nibagumizamu bari baapayoniya bombi omu bushwere.​—Abarooma 16:3, 4.

17, 18. Okugira entebeekanisa nikitwariramu kita omutima gwawe?

¹⁷ Zaaburi 20:4 nihagamba ahari Yehova hati: “Akuhe eki omutima gwawe gurikwetenga, kandi ahikiirize enaama zaawe zoona.” Waaba nooyetebeekanisiza ebiro by’omumaisho, teekateeka aha ki buzima orikwenda kukora. Teekateeka aha bi Yehova ariyo naakora ebiro ebi n’eki orikubaasa kukora omu murimo gwe. Reero teekateeka aha kukora ekirikumushemeza.

¹⁸ Waaheereza Yehova n’omutima gwawe gwona, kandi okamuha ekitiinisa, noija kushemererwa munonga. Noija ‘kushemerererwa omuri’ Yehova, nawe naija kukuha “ebi omutima gwawe gurikwetenga.”​—Zaaburi 37:4.