1-3. (a) Zaaburi 147 neebaasa kuba yaahandiikirwe ryari? (b) Nitubaasa kwega ki twashwijuma Zaaburi 147?

NITUKIRA kuhimbisa omuntu twashemezibwa eki yaagamba nari eki yaakora. Ka tushemereire kugira ekihika kingi ky’okuhimbisa Yehova Ruhanga n’okukiraho! Nitumuhimbisa ahabw’amaani ge maingi, agu turikureebera aha bi yaahangire, kandi nitumuhimbisa ahabwa rukundo ye mpango ei atwiniire, ei yaayorekire arikuhayo Omwana we nk’ekitambo.

² Twashoma Zaaburi 147, nitukireeba butunu ngu omuhandiiki waayo akaba aine ekihika ky’amaani eky’okuhimbisa Yehova. Kandi akahiga n’abandi kumwegaitaho omu kumuhimbisa.​—Shoma Zaaburi 147:1, 7, 12.

³ Titurikumanya owaahandiikire Zaaburi 147. Kwonka owaagihandiikire ashemereire kuba yaabaire ariho omu bwire obu Abaisraeli baaruga omu bukwatwa Babulooni kugaruka Yerusaalemu. (Zaaburi 147:2) Omuhandiiki wa Zaaburi egi akahimbisa Yehova ahabw’okugira ngu abaheereza be bakaba nibabaasa kugaruka kuramiza omu ihanga ryabo. Akagumizamu yaaha n’enshonga ezindi ez’okuhimbisa Yehova. Enshonga ezo ni ziiha? Kandi  iwe oine nshonga ki ezirikukureetera kugira ngu “Haleluya!” nari Kuhimbisa Ya?​—Zaaburi 147:1.

4. Obu Mugabe Kuuro yaacungura Abaisraeli, baine kuba baayehuriire bata, kandi ahabw’enki?

⁴ Teekateeka oku Abaisraeli bashemereire kuba baayehuriire obu baabaire bari omu bukwatwa omuri Babulooni. Abo abaabaire batwireyo bakabashungisa barikubagira bati: “Mutweshongorere ekyeshongoro kimwe aha bya Saayuuni.” Kwonka Abayudaaya bakaba batarikwenda kweshongora. Yerusaalemu orurembo orwabaire nirukirayo kubareetera okushemererwa rukaba rucwekyereziibwe. (Zaaburi 137:1-3, 6) Emitima yaabo ekaba ehendekire, kandi bakaba nibenda kuhuumurizibwa. Kwonka nk’oku Ekigambo kya Ruhanga kyabaire kigambire, Yehova akahwera abantu be. Ata shi? Omugabe Kuuro owa Perisi akahamba Babulooni kandi yaagamba ahari Yehova ati: “Anyehanangiriize kumwombekyera enju omuri Yerusaalemu.” Kandi Kuuro akagambira Abaisraeli ati: “Mbwenu omuntu weena omuriimwe ow’omu bantu be, Mukama Ruhanga we agume nawe; kandi ainamukye.” (2 Obusingye 36:23) Eki ka kishemereire kuba kyahuumuriize Abaisraeli omuri Babulooni!

5. Omuhandiiki wa Zaaburi akagamba ki aha maani ga Yehova ag’okukiza?

⁵ Yehova akahuumuriza eihanga rya Israeli ryona hamwe na buri Mwisraeli okwe. Naitwe nikwo Yehova arikutuhuumuriza ati obunaku obu. Omuhandiiki wa Zaaburi akahandiika ati “akiza ab’emitima ehendekire, ashemba obuhuta bwabo.” (Zaaburi 147:3) Twaba turwaire nari twine obujune, nitubaasa kuhamya ngu Yehova naatufaho. Yehova naakundira kimwe kutuhuumuriza n’okukiza enkojo z’enyehurira zaitu. (Zaaburi 34:18; Isaaya 57:15) Naatuha obwengye n’amaani kugira ngu tubaase kwemera oburemeezi obu twine.​—Yakobo 1:5.

6. Nitubaasa kugasirwa tuta omu bigambo by’omuhandiiki wa Zaaburi 147:4? (Reeba ekishushani aha kutandika.)

⁶ Ekyakuratsireho omuhandiiki wa Zaaburi akareeba ahaiguru reero yaagira ngu Yehova “amanya obwingi bw’enyonyoozi” kandi “zoona azeeta amaziina gaazo.” (Zaaburi 147:4) Omuhandiiki wa Zaaburi akaba naabaasa kureeba enyonyoozi, kwonka akaba atarikubaasa kumanya omuhendo gwazo. Obunaku obu, abanyasayansi nibamanya ngu omu kizinga kyaitu harimu obuhumbi bw’enyonyoozi. Kandi akaabunga koona nikabaasa kuba karimu obuhumbi n’obuhumbi bw’ebizinga! Abantu tibarikubaasa kubara enyonyoozi zoona, kwonka Omuhangi we naabaasa. Nangwa naamanya gye buri nyonyoozi ahabw’okugira ngu buri emwe akagiha eiziina. (1 Abakorinso 15:41) Ruhanga orikumanya ahu buri nyonyoozi eri, naiwe naakumanya. Naaba naamanya ahu orikuba ori butoosha, oku orikwehurira, n’eki orikuba nooyenda!

7, 8. (a) Yehova naatumanyaho ki? (b) Ha eky’okureeberaho ekirikworeka embabazi za Yehova.

⁷ Yehova naayetegyereza embeera ei orikurabamu, kandi aine amaani g’okukuhwera  omu buremeezi bwawe. (Shoma Zaaburi 147:5.) Noobaasa kuteekateeka ngu embeera yaawe egumire munonga torikubaasa kugyemera. Ruhanga naamanya obugarukiro bwaitu, “naijuka ku turi omucuucu.” (Zaaburi 103:14) Turi abatahikiriire, n’ahabw’ekyo nituguma nitukora enshobe turikuzigarukamu, kandi nitubaasa kutamwa. Obumwe nitwefuuza ebintu ebi turikugamba, ebyetengo bibi ebi turikugira, nari eihari eri turikugira. Yehova taine butahikiirira bwona, beitu naayetegyereza gye oku turikwehurira.​—Isaaya 40:28.

⁸ Iwe waareebire oku omukono gwa Yehova gurikukuhwera kuraba omu kugyezibwa? (Isaaya 41:10, 13) Eki kikahika ahari payoniya orikwetwa Kyoko. Ku yaagiire omu buheereza busya akagira enaku. Kwonka shi Kyoko akamanya ata ngu Yehova naayetegyereza oburemeezi bwe? Omu kibiina kisya eki yaagiiremu, hakaba harimu abantu baingi abaabaire nibabaasa kwetegyereza enyehurira ze. Akeehurira ngu Yehova akaba ari nk’orikumugira ati: “Niinkukunda, ti ahabw’okugira ngu ori payoniya, kwonka ahabw’okugira ngu ori muhara wangye oyehaireyo ahariinye. Niinyenda ngu oshemererwe kandi obe gye ahabw’okuba Omujurizi wangye!” Yehova akworekire ata ngu “okwetegyereza kwe tikurikubaasa kupimwa”?

9, 10. Ni mu muringo ki omukuru ogu Yehova arikwija kutuhweramu? Ha eky’okureeberaho.

⁹ Twena nituba nitwenda ebintu nk’eby’okurya, eby’okujwara, n’oburaaro. Obundi noobaasa kuba nootiina ngu torikwija kutunga eby’okurya birikumara. Kwonka Yehova akahanga eitaka ririkubaasa kweza rikarugamu eby’okurya birikumara, nangwa naariisa ‘n’abaana b’ebikoona abarikwaniira.’ (Shoma Zaaburi 147:8, 9.) Yehova ku araabe naabaasa kuriisa ebikoona, nitubaasa kuhamya ngu naija kutuha eby’okutubaisaho.​—Zaaburi 37:25.

¹⁰ Ekikuru munonga, Yehova naatuha ebirikwetengyesa kuhamya okwikiriza kwaitu, kandi naatuha “obusingye bwa Ruhanga oburengire okwetegyereza kw’omuntu weena.” (Abafilipi 4:6, 7) Ow’eishe-emwe orikwetwa Mutsuo we n’omukazi we bakareeba oku Yehova yaabahwereire. Obu eihunga tsunami ryateera Japan omu 2011, bakakira kakye kufa barikutemba aha mutwe gw’enju yaabo. Eizooba eryo, bakafeerwa haihi buri kimwe eki baabaire baine. Ekiro ekyo bakaraara omu kishengye kirimu omwirima aharikufuka ahaiguru omu nju yaabo. Omu kasheeshe, bakasherura ekintu ekyabaire nikibaasa kubahuumuriza. Ekintu kyonka eki baaboine ni Yearbook ey’Abajurizi ba Yehova eya 2006. Mutsuo ku yaabaire naashuuruura akatabo ako, akareeba omutwe “Tsunami z’Akabi Ezirabaireho.” Ekicweka eki kikaba nikikwata aha mutsitsa ogwabaire omuri Sumatra omu 2004 ogwareetsireho omwegyemure gw’amaani omu byafaayo. Mutsuo n’omukazi we bakarira obwo barikushoma ebyahikire aha b’eishe-emwe na banyaanyabo. Bakareeba ngu Yehova ariyo naabaha okuhuumurizibwa oku baabaire nibenda. Yehova akabareeberera n’omu miringo endiijo. Ab’eishe-emwe omu bicweka ebindi ebya Japan bakabaha eby’okurya n’ebijwaro. Kwonka ekyabahigire munonga n’ab’eishe-emwe abaayohoreziibwe ekibiina kubataayaayira omu bibiina byabo. Mutsuo naagira ati: “Okaba nooshusha oti Yehova ari aha rubaju rwa buri omwe ahariitwe arikutureeberera. Oku ka n’okuhuumurizibwa kw’amaani!” Ruhanga naabanza  atuha eby’omwoyo kuhamya okwikiriza kwaitu, reero bwanyima abona kutuha eby’okutubaisaho.

11. Twine kukora ki kubaasa kugasirwa omu buhwezi bwa Ruhanga?

¹¹ Yehova “akwatirira abacureezi.” Naatukunda kandi butoosha naaba ayeteekateekire kutuhwera. (Zaaburi 147:6a) Nitubaasa kugasirwa tuta omu buhwezi bwe? Twine kugira omukago murungi nawe. Kubaasa kugira omukago murungi nawe, twine kuba turi abacureezi. (Zefania 2:3) Abacureezi nibeesiga Yehova kwija kwihaho obutari buringaaniza n’okubonabona kwabo kwona. Yehova naabasiima.

12, 13. (a) Kubaasa kugasirwa omu buhwezi bwa Ruhanga, twine kwetantara ki? (b) Yehova naashemererwa baahi?

¹² Aha rubaju orundi, Ruhanga “ababi abanagira kimwe ahansi.” (Zaaburi 147:6b) Titurikwenda  ngu eki kitubeho! Nitwenda ngu Ruhanga atugirire rukundo ye etahwaho. N’ahabw’ekyo twine kwanga eki arikwanga. (Zaaburi 97:10) Nk’eky’okureeberaho, twine kwangira kimwe eby’obushambani. Eki nikimanyisa ngu twine kwetantara ekintu kyona ekirikubaasa kutureetera kugwa omu bushambani, otwariiremu n’ebirikwitsa enshoni. (Zaaburi 119:37; Matayo 5:28) Oku nikubaasa kuba okurwana kw’amaani, kwonka okurwana kwaitu ti kwa busha, Yehova naija kutuha emigisha.

¹³ Titurikubaasa kurwana orutaro oru ahabwaitu. Twine kwesiga Yehova. Mbwenu shi naija kushemererwa twayesiga ebintu ebi abantu barikwesiga kubahwera? Ngaaha, Yehova “tayesiimira maani g’embaraasi.” Mbwenu shi twine kwesiga amaani gaitu nari abantu abandi? Yehova ‘amaguru g’omuntu tigo ashemerererwa.’ (Zaaburi 147:10) Omu mwanya gw’ekyo, twine kugumizamu nitushaba Yehova obuhwezi, kandi tumweshengyereze kutujuna omu bweremwa bwaitu. Tarikubaasa kuruha kuhurira okushaba kwaitu n’obu twakumushaba emirundi mingi. Yehova “ashemerererwa abarikumutiina, bakeesiga embabazi ze ezitahinduka” nari rukundo ye etahwaho. (Zaaburi 147:11) Ahabw’okugira ngu naatuhamiraho kandi naatukunda, nitumanya ngu naija kuguma naatuhwera kusingura ebyetengo byaitu ebibi.

14. Niki eki omuhandiiki wa Zaaburi yaabaire naahamya?

¹⁴ Yehova naatuhamiza ngu naija kutuhwera twaba twine oburemeezi. Abaisraeli ku baagarukire Yerusaalemu, omuhandiiki wa Zaaburi akateekateeka aha ku Yehova yaabaire naabahwera. Akeeshongora ati: “Akagumya empimbi z’amarembo gaawe; n’abaana baawe abari omuriiwe yaabaha omugisha. Areeta obusingye omunda y’emyatano yaawe.” (Zaaburi 147:13, 14) Ahabw’okugira ngu Yehova akaba naija kugumya emiryango y’endembo, kikareetera omuhandiiki wa Zaaburi kuhurira aine oburinzi. Eki kikamuhamiza ngu Yehova naija kurinda abantu be.

15-17. (a) Obumwe nitubaasa kwehurira tuta aha bikwatiraine n’okugyezibwa kwaitu, kwonka Yehova naakoresa ata Ekigambo kye kutuhwera? (b) Ha eky’okureeberaho ekirikworeka oku Ruhanga ‘arikwiruka munonga’ kutuhwera.

¹⁵ Noobaasa kwerarikirira ahabw’oburemeezi obu oine, kwonka Yehova naabaasa  kukuha obwengye kubwemera. Omuhandiiki wa Zaaburi akagira ngu Ruhanga “atweka ekiragiro kye ahansi; Ekigambo kye kiirukanga munonga.” Bwanyima omuhandiiki wa Zaaburi akagamba aha birika, ekime nari oruho, n’orubaare reero yaabuuza ati: “N’oha owaakubaasa kwemera embeho ye?” Ekyakuratsireho akagira ngu Yehova “atweka ekigambo kye, abiyazya.” (Zaaburi 147:15-18) Ruhanga waitu orikumanya buri kimwe kandi orikubaasa kukora buri kimwe, orikutegyeka orubaare n’ebirika, buzima naabaasa kukuhwera kusingura buremeezi bwona obu oine.

¹⁶ Obunaku obu, Yehova naatwebembera arikukoresa Ekigambo kye Baibuli. Omuhandiiki wa Zaaburi akagira ngu ekigambo kya Yehova ‘nikiirukanga munonga’ kutuhwera. Ruhanga naatuhabura omu muringo murungi kandi omu bwire obuhikire. Teekateeka oku orikugasirwa omu Baibuli, n’ebitabo ‘by’omwambari omwesigwa kandi ow’obwengye,’ JW Broadcasting, jw.org, abareeberezi, n’ab’eishe-emwe na banyaanyazi-itwe. (Matayo 24:45) Iwe waakireebire ngu Yehova naarahuka munonga kukuhabura?

¹⁷ Munyaanyazi-itwe orikwetwa Simone akareeba oku Ekigambo kya Ruhanga kirikumuhwera. Akeehurira nk’otaine mugasho, akaba naateekateeka ngu Yehova tarikumusiima. Kwonka, ku yaahwairemu amaani, akaguma naashaba Yehova, arikumweshengyereza kumuhwera. Kandi akagumizamu naayega Baibuli. Simone akagira ati: “Tinkabaga mu mbeera yoona ngu ti naareeba maani ga Ruhanga n’obuhabuzi bwe.” Eki kimuhwereire kwongyera kugira emiteekateekyere mirungi.

18. Ahabw’enki noohurira ngu Yehova akuri haihi, kandi oine nshonga ki ezishemereire kukureetera Kuhimbisa Ya?

¹⁸ Omuhandiiki wa Zaaburi akaba naamanya ngu Yehova atooraine eihanga rya Israeli eya ira kuruga omu mahanga g’ensi kuba abantu. Niryo eihanga ryonka eri Ruhanga yaabaire ahaire ‘ekigambo kye’ hamwe ‘n’ebiragiro bye.’ (Shoma Zaaburi 147:19, 20.) Obunaku obu, twine ekitiinisa ky’amaani eky’okwetererwa eiziina rya Ruhanga. Nitushemererwa ahabw’okumumanya, ahabw’okugira Ekigambo kye ekirikutwebembera, n’ahabw’okugira omukago murungi nawe. Nk’omuhandiiki wa Zaaburi 147, oine enshonga nyingi ezishemereire kukureetera Kuhimbisa Ya! n’okuhiga abandi kukora nikyo kimwe.