Abakristaayo baine kukuratira emisingye ya Baibuli baaba nibacwamu oku baraayerinde. Emisingye egi neeyoreka ngu nikiba kigwire Abakristaayo kukoresa ebirwaniso nk’embundu ey’omu ngaro nari empango kwerinda abantu abandi. Teekateeka aha shonga ezi:

Yehova naatwara amagara g’omuntu nk’agarikwera. Daudi omuhandiiki wa Zaaburi akahandiika ahari Yehova ati: “Ah’ori niho enshuro y’amagara eri.” (Zaaburi 36:9) N’ahabw’ekyo, Omukristaayo yaacwamu kwerinda nari kurinda ebintu bye, aine kukora kyona ekirikubaasika kwetantara kugiibwaho orubanja rw’okusheesha eshagama, ekirikumanyisa okujunaanwa okufa kw’omuntu ondiijo.​—Eky’Ebiragiro 22:8; Zaaburi 51:14.

N’amazima ngu ekintu kyona eki omuntu arikukoresa kwerinda nikibaasa kumurugiramu kugiibwaho orubanja rw’okusheesha eshagama. Kwonka waaba oine embundu, kyorobi kwita omuntu ahabwa butandu nari okigyendereire. * (Reeba obugambo obw’ahansi.) Kandi, orikukutaahirira nawe naaba atiinire, mbwenu yaareeba oine embundu, embeera neebaasa kuba ey’akabi kirugiremu omuntu kufa.

Obu Yesu yaabaire naaza kufa reero akagambira abakuratsi be kukwata zaarurara, akaba atarikubagira ngu bazikwate kwerinda. (Luka 22:36, 38) Kureka, Yesu akaba naayenda kubamanyisa ngu: Abakuratsi be tibaine kuba enshaarizi n’obu baakutaahirirwa abantu abaine eby’okurwanisa. (Luka 22:52) Petero ku yaakoreise rurara ye kurwanisa omuheereza w’omunyamurwa omukuru, Yesu akaragiira Petero ati: “Garura rurara yaawe omu kyobati kyayo.” Reero Yesu akagamba omusingye ogu Abakristaayo bakirikugyenderaho na hati: “Boona abatwara rurara, baryaitwa rurara.”​—Matayo 26:51, 52.

Nk’oku kyagambirweho ira omuri Miika 4:3, Abaheereza ba Ruhanga ‘zaarurara zaabo nibaziheeshamu amafuka, n’amacumu gaabo bagaheeshamu empabyo.’ Abakristaayo ab’amazima nibamanywa ahabw’okuba ab’obusingye. Nibakuratira ebiragiro ebi Ruhanga yaahaire kurabira omu ntumwa Paulo ngu “mutaihura omuntu weena ekibi ahabw’ekibi” kandi ngu “mutuurane n’abantu boona n’obusingye.” (Abarooma 12:17, 18) N’obu Paulo araabe yaabaire naaraba omu mbeera zigumire, otwariiremu okuraba “omu bambuzi,” tarabaasize kuhenda emisingye ya Baibuli arikwenda kwerinda. (2 Abakorinso 11:26) Omu mwanya gw’ekyo, akeesiga Ruhanga, kandi akaba naamanya ngu obuhabuzi bw’obwengye oburi omu Baibuli “nibukira eby’okurwanisa.”​—Omubuurizi 9:18.

Aha Bakristaayo amagara n’ag’omuhendo munonga kukira ebintu. Nitumanya ngu “amagara g’omuntu tigari mu bwingi bw’ebintu ebi aine.” (Luka 12:15) N’ahabw’ekyo, omushuma oine embundu twamugambira omu muringo gw’embabazi akanga kuhurikiza, nitukuratira obuhabuzi bwa Yesu obu: “Otarirwana n’omuntu mubi.” Eki nikibaasa kumanyisa ngu twine kumureka akatwara buri kimwe eki arikwenda. (Matayo 5:39, 40; Luka 6:29) * (Reeba obugambo obw’ahansi.) Kwonka nikiba kiri  eky’obwengye kwetantara abashuma. Abashuma nibabaasa kutatutaahirira twakuratira obuhabuzi bwa Baibuli obw’okwetantara kweyoreka ahabw’ebi twine. (1 Yohaana 2:16) Nikiba eky’oburinzi abataahi baaba nibatumanya ngu turi Abajurizi ba Yehova ab’obusingye.​—Enfumu 18:10.

Abakristaayo nibaha ekitiinisa omuntu w’omunda ow’abandi. (Abarooma 14:21) Ab’eishe-emwe abandi nibabaasa kutangaara nari kuteerwa entsibo baamanya ngu ow’eishe-emwe mugyenzi waabo aine embundu y’okwerindisa abantu abandi. Nitubaasa kuba nitwikirizibwa kugira embundu, kwonka ahabw’okugira ngu nitukunda ab’eishe-emwe bagyenzi baitu, nituba tutarikwenda kukora ekintu eki turikumanya ngu nikibateeza entsibo.​—1 Abakorinso 10:32, 33; 13:4, 5.

Abakristaayo nibateeraho abandi eky’okureeberaho kirungi. (2 Abakorinso 4:2; 1 Petero 5:2, 3) Omukristaayo yaaba aine embundu y’okwerindisa abantu abandi, abareeberezi nibamuhana barikukoresa Baibuli. Yaayanga akaguma n’embundu egyo, naaba atari ky’okureeberaho kirungi. Ekirikumanyisa, naaba atarikubaasa kutunga obujunaanizibwa omu kibiina, nari kuheereza omu buheereza bw’omutaano. Nikyo kimwe n’Omukristaayo orikugumizamu naakoresa embundu aha murimo gwe. Nikiba kiri kirungi kuteeraho kusherura omurimo ogundi. *​—Reeba obugambo obw’ahansi.

Buri Mukristaayo aine kwecweramu omurimo ogu araakore, oku araayerinde, oku araarinde eka ye, n’ebintu bye. Kwonka kyona eki araacwemu, kishemereire kuba nikyegamira aha misingye ya Baibuli. Ruhanga waitu ow’obwengye akatuha emisingye egi ahabw’okugira ngu naatukunda. Niyo nshonga ahabw’enki Abakristaayo abaine omukago murungi na Yehova nibacwamu kutagira mbundu y’okwerindisa abantu bagyenzi baabo. Nibamanya ngu baayesiga Ruhanga kandi bakakuratira emisingye ya Baibuli, nibaija kutunga oburinzi obwabuzima ebiro byona.​—Zaaburi 97:10; Enfumu 1:33; 2:6, 7.