1-2. (a) Okurugiirira ahari Matayo 28:18-20, ekibiina Ekikristaayo kiine kigyendererwa ki ekikuru? (b) Omu kicweka eki nituza kushwijuma bibuuzo ki?

ENTUMWA baine kuba baabaire baine ekihika obu baayerundanira aha rushozi. Yesu bwanyima y’okuzooka, akashaba abeegi be kubugana nawe aha mwanya ogwo. (Mat. 28:16) Obwo noobaasa kushanga nibwo ‘yaayeyoreka ab’eishe-emwe okukira ahari magana ataano.’ (1 Kor. 15:6) Ahabw’enki Yesu yaatebeekaniise kubabugana aha mwanya ogwo? Akaba naaza kubaha obujunaanizibwa bukuru obu: “N’ahabw’ekyo mugyende omu mahanga goona, muhindure abantu abeegi.”—Shoma Matayo 28:18-20.

² Abeegi ba Yesu abaahuriire ebi yaagambire bakaba bamwe aha b’ekibiina Ekikristaayo omu kyasha ky’okubanza. Ekigyendererwa kikuru eky’ekibiina ekyo kikaba kiri okuhindura abantu abeegi ba Kristo. * Obunaku obu, hariho ebibiina bingi by’Abakristaayo ab’amazima omu nsi yoona, kandi nabo nikyo kigyendererwa kyabo ekikuru. Omu kicweka eki nituza kushwijuma ebibuuzo bina ebi: Ahabw’enki okuhindura abantu abeegi ni kikuru munonga? Nikitwariramu ki? Mbwenu shi Abakristaayo boona nibeejumba omu murimo gw’okuhindura abantu abeegi? Kandi ahabw’enki twine kugumisiriza omu murimo ogu?

3. Okurugiirira ahari Yohaana 14:6 na 17:3, ahabw’enki omurimo gw’okuhindura abantu abeegi ni mukuru munonga?

³ Ahabw’enki omurimo gw’okuhindura abantu abeegi ni mukuru munonga? N’ahabw’okugira ngu abeegi ba Kristo bonka  nibo barikuba banywani ba Ruhanga. Kandi abarikukuratira Kristo nibagira amagara marungi hati, kandi baine n’amatsiko g’okutunga amagara agatahwaho omu biro by’omumaisho. (Shoma Yohaana 14:6; 17:3.) Hatariho kubangaanisa, Yesu atuhaire obujunaanizibwa bw’amaani, kwonka titurikukora omurimo ogu twenka. Entumwa Paulo akeehandiikaho n’abagyenzi be ati: ‘Turi abakozi abarikukora kumwe [na] Ruhanga.’ (1 Kor. 3:9) Ogu ka n’omugisha gw’amaani ogu Yehova na Yesu baahaire abantu abatahikiriire!

4. Eky’okureeberaho kya Ivan na Matilde nitukyegyeraho ki?

⁴ Omurimo gw’okuhindura abantu abeegi nigutureetera okushemererwa kwingi. Teekateeka aha ky’okureeberaho kya Ivan n’omukazi we Matilde, ab’omuri Colombia. Bakabuurira omunyeeto orikwetwa Davier, yaabagira ati: “Niinyenda kukora empinduka, kwonka nikiingumira.” Davier akaba ari omuteezi w’ebikonde owaabaire naakoresa emibazi y’ekitabura bwongo, arikunywa amaarwa ekirenga, kandi akaba naatuura n’omwishiki Erika ou yaabaire atagaitsirwe nawe. Ivan naagira ati: “Tukatandika kumutaayaayira omu kyaro kye ekyehereire, eki nikimanyisa ngu tukaba twine kuvuga egaari kumara eshaaha nyingi omu nguuto z’ebyondo. Erika bwanyima y’okureeba empinduka ezi Davier yaakozire omu micwe n’omu mitwarize ye, nawe akabeegaitaho omu kwega Baibuli.” Bwanyima, Davier akarekyera aho kukoresa emibazi y’ekitabura bwongo, okunywa amaarwa, n’omuzaano gw’okuteera ebikonde. Kandi akagaitwa na Erika. Matilde naagira ati: “Obu Davier na Erika baabatizibwa omu 2016, tukaijuka eki Davier yaabaire naakira kugamba ngu, ‘niinyenda kuhinduka, kwonka nikiingumira.’ Tukashemererwa munonga twahika n’aha kurira.” Hatariho kubangaanisa, nikitushemeza munonga twahwera abantu kuba abeegi ba Kristo.

5. Eidaara ry’okubanza omu kuhindura abantu abeegi ni riiha?

⁵ Eidaara ry’okubanza omu kuhindura abantu abeegi ‘n’okusherura’ abo abarikwenda kwega ahari Yehova. (Mat. 10:11) Nitworeka ngu turi Abajurizi ba Yehova twabuurira abantu boona omu kicweka kyaitu. Twayorobera ekiragiro kya Kristo eky’okubuurira nituba nitworeka ngu turi Abakristaayo ab’amazima.

6. Niki ekirikubaasa kutuhwera kuba abasinguzi omu kubuurira?

⁶ Abamwe baine ekihika ky’okwega amazima, kwonka abandi abu turikubuurira omurundi gw’okubanza tibarikufayo. Nituba twine kwimutsya ekyetengo kyabo eky’okwenda kwega. Kubaasa kuhikiiriza gye obuheereza bwaitu, twine kwetebeekanisa gye. Toorana enshonga z’okugaaniiraho ezirahikye abu oraabuurire aha mutima. Reero, kora entebeekanisa oku oraayanjure buri nshonga.

7. Noobaasa kutandika ota kugaaniira n’omuntu, kandi ahabw’enki ni kikuru kumuhurikiza kandi okamuha ekitiinisa?

⁷ Nk’eky’okureeberaho, noobaasa kubuuza ou orikubuurira oti: “Noofayo naakubuuza eki orikuteekateeka aha nshonga egi? Bwingi aha buremeezi obu twine obunaku obu nibuhika n’aha bandi omu nsi yoona. Nooteekateeka ngu nitwetenga gavumenti emwe omu nsi yoona kubaasa kumaraho oburemeezi obu?” Reero noobaasa kuhikaanisa nawe ebiteekateeko ahari Danieli 2:44. Nari noobaasa kugambira omuntu oti: “Nooteekateeka ngu omuringo murungi gw’okworora abaana bakagira emicwe mirungi ni guuha? Ninkushaba ongambire eki orikuteekateeka?” Reero hikaanisa nawe ebiteekateeko aha Eky’Ebiragiro 6: 6, 7. Kyona eki oraacwemu kukoresa, teekateeka aha bantu abaraakuhurikize. Teekateeka oku barikwija kugasirwa baayega eki Baibuli erikwegyesa. Waaba noogaaniira nabo ni kikuru kuhurikiza eki barikugamba kandi okabaha ekitiinisa. Waakora otyo noija kubeetegyereza gye, kandi nibabaasa kukuhurikiza.

8. Ahabw’enki twine kuteeraho kuguma nitugarukira abantu?

⁸ Otakatandikire kwegyesa omuntu Baibuli, nikibaasa kukwetengyesa kutaho obwire bw’okuguma noogarukayo. Ahabw’enki? Ahakuba obumwe baingi abu turikugarukira nibaba batariyo. Kandi obumwe nikibaasa kukwetengyesa kugarukira omuntu emirundi mingi, kubaasa kukwesiga akaikiriza ngu omwegyese Baibuli. Ijuka ngu, ekimera nikikura waaguma nookiitirira amaizi. Omu muringo nigwo gumwe, rukundo ei omwegi ainiire Yehova na Kristo neekura twaguma nituhikaanisa nawe ebiteekateeko aha Kigambo kya Ruhanga.

9-10. Ahabw’enki turikubaasa kugira ngu buri Mukristaayo naayejumba omu kusherura abaine emitima eshemeire?

⁹ Buri Mukristaayo aine eki arikukora omu kusherura abaine emitima eshemeire. Eki nitubaasa kukigyeragyeranisa n’okusherura omwana obuzire. Mu muringo ki? Teekateeka aha kyahikire aha mwana w’omwojo ow’emyaka eshatu owaarugire omuka akabura. Abantu nka 500 bakeejumba omu kumusherura. Aha muheru, ku haahwaireho eshaaha nka 20, omuntu omwe yaamubona omu musiri gw’ebicoori. Omushaija ogwo akaba atarikwenda abantu bamuhimbise ahabw’okubona omwana. Akagira ati: “Abantu baingi baayejumba omu murimo gw’okusherura omwana ogu.”

¹⁰ Abantu baingi bari nk’omwana ogwo, nabo bahabire. Tibaine matsiko kwonka baine kuhwerwa.  (Efe. 2:12) Abajurizi ba Yehova abarikurenga obukaikuru munaana nibateeraho kusherura abaine emitima eshemeire nk’abo. Iwe nk’omuntu noobaasa kutatunga muntu orikwenda kwega Baibuli. Kwonka ababuurizi abandi abarikukora omu kicweka ekyo, nibabaasa kutunga omuntu orikwenda kwega amazima agari omu Kigambo kya Ruhanga. Ow’eishe-emwe nari munyaanyazi-itwe yaabona omuntu akahinduka omwegi wa Kristo, buri mubuurizi owaayejumbire omu kusherura oku aine enshonga ehikire y’okushemererwa.

11. N’obu waakuba otaine ou orikwegyesa Baibuli, ni miringo ki endiijo ei orikubaasa kuhweramu omu kuhindura abantu abeegi?

¹¹ N’obu oraabe otaine ou orikwegyesa Baibuli hati, noobaasa kuhwera omu kuhindura abantu abeegi omu miringo endiijo. Nk’eky’okureeberaho, noobaasa kutangirira abasya abarikwija aha Kyombeko ky’Obukama, kandi obanywane. Omu muringo ogwo, noobaasa kubahamiza ngu rukundo nigwo mutwarize ogurikutaanisaho Abakristaayo ab’amazima. (Yoh. 13:34, 35) Eby’okugarukamu byawe omu nteerane, n’obu biraabe nibiba biri bigufu, nibibaasa kwegyesa abasya kugamba baihire aha mutima, kandi omu muringo gw’ekitiinisa. Noobaasa kugyenda n’omubuurizi musya omu kubuurira omuhwere kuhikaanisa gye ebiteekateeko n’abantu aha Byahandiikirwe. Waakora otyo, nooba noomuhwera kutooreza eky’okureeberaho kya Kristo.—Luk. 10:25-28.

12. Mbwenu shi nikitwetengyesa kugira okubaasa kw’omutaano tukabona kuhindura abantu abeegi? Shoboorora.

¹² Tihaine n’omwe ahariitwe oshemeire kuteekateeka ngu twine kugira okubaasa kw’omutaano, reero tukabona kwegyesa abandi kuba abeegi ba Yesu. Ahabw’enki? Teekateeka aha ky’okureeberaho kya Faustina, orikutuura omuri Bolivia. Akaba atarikubaasa kushoma obu yaatandika kumanya Abajurizi ba Yehova. Kuruga obwo akatandika kwega kushoma mporampora. Hati abatiziibwe, kandi naakunda kwegyesa abandi. Naakira kwegyesa abeegi bataano ba Baibuli buri saabiiti. N’obu Faustina araabe atarikubaasa kushoma gye nka baingi aha bu arikwegyesa Baibuli, abaasize kuhwera abantu mukaaga kuhika aha kubatizibwa.—Luk. 10:21.

13. N’obu twakuba twine bingi by’okukora, nitubaasa kutunga birungi ki ebimwe omu murimo gw’okuhindura abantu abeegi?

¹³ Abakristaayo baingi baine bingi by’okukora n’obujunaanizibwa bwingi bukuru. Kwonka nabwo, nibatunga obwire bw’okwegyesa abantu Baibuli, kandi nibatungamu ebirungi. Teekateeka aha ky’okureeberaho kya Melanie. Akaba ari omuzaire omwe, arikutuura n’omuhara w’emyaka munaana omuri Alaska. Akaba aine omurimo gw’obutwire, kandi akaba naareeberera n’omuzaire we  oine ekookoro. Melanie niwe yaabaire ari Omujurizi wa Yehova wenka omu tauni egyo eyehereire. Butoosha akaba naashaba kutunga amaani g’okuza omu kubuurira n’okwemera obufuki bwingi ahabw’okuba buzima akaba naayenda kutunga ow’okwegyesa Baibuli. Akarugaho yaabugana Sara, owaashemereirwe munonga ahabw’okwega ngu Ruhanga aine eiziina. Ku haahingwireho obwire, Sara akaikiriza kwega Baibuli. Melanie naagira ati: “Buri mwabazyo Orwakataano, nkaba mba nduhire, kwonka nyowe na muhara wangye tukaba tugasirwa munonga kuza kumwegyesa Baibuli. Tukaba nitukunda kucondooza eby’okugarukamu by’ebibuuzo ebi Sara yaabaire naatubuuza, kandi kikatushemeza munonga kureeba naaba munywani wa Yehova.” Sara akagumira okuhiiganisibwa, yaaruga omu kanisa ye, kandi yaabatizibwa.

14. (a) Omurimo gw’okuhindura abantu abeegi nigushushana guta n’okujuba eby’enyanja? (b) Ebigambo bya Paulo ebiri omuri 2 Timoseo 4:1, 2 nibikukwataho bita?

¹⁴ N’obu obuheereza bwawe bwakuba nibureebeka nk’obutarikurugamu birungi, otarekyera aho kusherura abarikubaasa kuba abeegi. Ijuka ngu Yesu akagyeragyeranisa okuhindura abantu abeegi n’okujuba eby’enyanja. Abajubi by’eby’enyanja nibamara eshaaha nyingi barikusherura eby’enyanja. Obumwe nibakora nyekiro munonga nari omu kasheeshe kare munonga, kandi obumwe nibavuga obwato baza hare munonga. (Luk. 5:5) Omu muringo nigwo gumwe, ababuurizi abamwe nibagumisiriza, bamara eshaaha nyingi barikusherura abantu omu bwire butarikushushana n’omu  myanya etarikushushana. Ahabw’enki? Kubaasa kwongyera aha migisha yaabo ey’okushangayo abantu. Abeeziriki nibakira kutunga omugisha gw’okushangayo abantu abarikukunda obutumwa bwaitu. Mbwenu shi noobaasa kuteeraho kuza kubuurira omu shaaha obu orikubaasa kushangayo abantu, nari omu mwanya ahu orikubaasa kubashanga?—Shoma 2 Timoseo 4:1, 2.

15. Ahabw’enki okwegyesa abantu Baibuli kirikwetengyesa okugumisiriza?

¹⁵ Ahabw’enki okwegyesa abantu Baibuli kirikwetengyesa okugumisiriza? Enshonga emwe eri ngu twine kukora ekirikukira aha kuhwera abeegi ba Baibuli kumanya enyegyesa za Baibuli n’okuzikunda. Twine kuhwera omwegi kumanya Yehova owaahandiikiise Baibuli n’okumukunda. Kandi okwongyera aha kwegyesa omwegi ebi Yesu arikwenda ngu abeegi be bakuratire, twine kumuhwera kuba Omukristaayo owaabuzima n’okumanya oku ashemereire kutwaza. Twine kugumisiriza turikumuhwera yaaba naateeraho kugyendera aha misingye ya Baibuli. Abamwe nibabaasa kuhindura emiteekateekyere n’emize yaabo omu meezi makye, kwonka abamwe nibatwara obwire buraingwaho.

16. Waayegyera ki aha ky’okureeberaho ekirikukwata ahari Raúl?

¹⁶ Omumiisani omuri Peru haine ekyamuhikireho ekirikworeka omugasho gw’okugumisiriza. Naagira ati: “Omwegi wa Baibuli orikwetwa Raúl nkamwegyesa ebitabo bibiri.” Kwonka nabwo akaba aine oburemeezi bw’amaani. Akaba naakira kutunga oburemeezi omu bushwere bwe, akaba naakoresa orurimi rubi, kandi akaba aine abaana abaabaire nibagumirwa kumworobera. Kwonka akaba naakira kwija omu nteerane, n’ahabw’ekyo nkagumizamu niimutaayaayira kumuhwera n’ab’omu ka ye. Bwanyima y’emyaka eshatu kuruga obu naamubuurira ogw’okubanza, akaba ohikire kubatizibwa.”

17. Nituza kwega ki omu kicweka ekirikukurataho?

¹⁷ Yesu akagira ngu “mugyende omu mahanga goona, muhindure abantu abeegi.” Kubaasa kuhikiiriza obujunaanizibwa obu, nitukira kugamba n’abantu abaine emiteekateekyere erikutaana n’eyaitu, otwariiremu abaine ediini, nari obundi abataine diini. Omu kicweka ekirikukurataho nituza kureeba oku turikubaasa kumanyisa abantu b’embeera zitarikushushana amakuru marungi.