Ku naabaire payoniya, orwigi orurikutaatsya omu buheereza butari bumwe rukaigurwaho eki naabaire ntarikuteekateeka. (Efe. 3:20) Noobaasa kwebuuza oku ekyo kyabaireho. Nkambanze mbagambire oku byatandikire.

Nkazaarirwa omuri Berlin, Germany, ameezi makye bwanyima y’Orutaro rw’Ensi Yoona II omuri 1939. Orutaro ku rwabaire niruhendera omuri 1945, orurembo Berlin rukateerwa bomu nyingi. Eizooba rimwe ekicweka kyaitu kikateerwa bomu, reero nyowe n’ab’omu ka twahungira omu mwanya ogutarikuteerwa bomu. Bwanyima, ahabw’orutaro tukagaruka twahungira Erfurt, ahu maama yaazaariirwe.

Maawe akaba aine ekihika ky’okwega amazima. Akashoma ebitabo bingi ebihandiikirwe abahangu kandi yaateeraho kushwijuma ediini nyingi kwonka eki yaabaire naasherura tarakitungire. Nk’omu 1948, Abajurizi ba Yehova babiri bakaija omuka. Maawe yaabaakiira kandi yaababuuza ebibuuzo bingi. Hatakahingwireho eshaaha, nyowe na munyaanyazi, akatugira ati: “Naabona amazima!” Omu kaire kakye, nyowe, maawe, na munyaanyazi, tukatandika kuza omu nteerane omuri Erfurt.

Omuri 1950 tukagaruka Berlin, omu kibiina kya Berlin-Kreuzberg. Bwanyima, tukaza omu kibiina ekindi omuri Berlin ekirikwetwa Berlin-Tempelhof. Ku haahingwireho obwire, maawe akabatizibwa, kwonka nyowe nkeziringa kukikora. Ahabw’enki?

Nkaba nintunguuka mpora ahabw’okugira enshoni. N’obu ndaabe naabaire ninza omu kubuurira kumara emyaka ebiri, tihaine n’omwe ou naabuuriire. Embeera zikahinduka ku naamazire obwire n’ab’eishe-emwe n’abanyaanyazi-itwe abaabaire boorekire obumanzi omu kuheereza Yehova. Bamwe aharibo bakagumisiriza okuteebwa omu nkambi n’omu bihome by’omuri East German. Abandi bakooga amagara gaabo kutwara ebitabo bwesherekye omuri East Germany. Ebi baarabiremu bikankwataho munonga. Nkateekateeka ngu ku baraabe baataire amagara gaabo  omu kabi ahabwa Yehova n’ab’eishe-emwe, naanye tinshemereire kutiina munonga.

Nkatandika kusingura enshoni obu naayejumba omu kampeyini y’okubuurira omuri 1955. Omu baruha, eyaateirwe omu Informant, * Ow’eishe-emwe Nathan Knorr akagira ngu kampeyini egyo niyo yaakizireyo kutebeekanisibwa ekibiina. Akagira ngu ababuurizi boona baagishagika, “nikwo kuraabe okwezi kurungi okurikukirayo okw’okwejumba omu kubuurira omu byafaayo.” Kandi nikwo kyabaire! Ku haahingwireho akaire kakye, nkeehayo naabatizibwa omuri 1956, tata na munyaanyazi nabo bakabatizibwa. Bwanyima nkaba nyine enshonga nkuru ei naabaire nyine kucwamu.

Kumara emyaka mingi nkaba niinyenda kuba payoniya, kwonka nkaguma ninyeziringa. Ahakuba nkaba niinyenda kubanza kutendekwa eby’okushuubura omuri Berlin kubaasa kushuubura omu mahanga agandi. Bwanyima nkaba niinyenda kukora omurimo ogu naashomereire kwongyera kuba omuhangu aha murimo ogwo. N’ahabw’ekyo, omuri 1961, nkatunga omurimo omuri Hamburg, orurembo orwabaire rwine omwaro ogurikukirayo obuhango omuri Germany. Nkatandika kukunda omurimo gwangye, kyandeetera kuguma ninyeziringa kutaaha omu buheereza obw’obutwire. Mbwenu shi nkaba ninza kukora ki?

Ninsiima Yehova ahabw’okukoresa ab’eishe-emwe kumpwera kwebembeza ebigyendererwa by’omwoyo. Baingi ahari banywani bangye bakaba batandikire kuba baapayoniya kandi bakanteeraho eky’okureeberaho kirungi. Okwongyera ahari ekyo, ow’eishe-emwe Erich Mundt, owaatwairweho omu nkambi, akampiga kwesiga Yehova. Akagira ngu obu yaabaire ari omu nkambi, ab’eishe-emwe abaabaire nibeeyesiga, bwanyima bakahwamu amaani. Kwonka abo abaahamiire ahari Yehova bakaguma bari abeesigwa, kandi bakaba enyomyo omu kibiina kya Yehova.

Ow’eishe-emwe Martin Pötzinger, owaizire kuheereza aha Kakiiko Akareeberezi, akaguma naahiga ab’eishe-emwe, arikugira ati: “Obumanzi niryo eitungo rikuru eri orikubaasa kugira!” Ku naateekateekire munonga aha bigambo ebyo, nkacwamu kutsigaho omurimo gwangye naaba payoniya omu Kwamukaaga 1963. Okucwamu okwo nikwo kurikukirayo obukuru oku ndakozire! Bwanyima y’ameezi abiri, ntakatandikire kusherura omurimo ogundi, bakanyeta kuheereza nka payoniya ow’omutaano. Bwanyima y’emyaka mikye, Yehova akampa emigisha kukira oku naabaire ninteekateeka. Nkeetwa omu Ishomero rya 44 erya Gileadi.

Ekintu kikuru eki naayegyeire aha b’eishe-emwe okukira munonga Nathan Knorr na Lyman Swingle n’okugira ngu tinshemereire ‘kurahuka kuruga omu buheereza’ bwangye. Bakatuhiga kuguma omu buheereza bwaitu n’obu twakugira oburemeezi. Ow’eishe-emwe Knorr akagira ati: “Noija kuta omutima ahari ki? Omucuucu, obuguguna, nari obworo? Nari noija kuta omutima aha miti, ebimuri, n’abantu abashemereirwe? Teeraho kukunda abantu!” Eizooba rimwe, ow’eishe-emwe Swingle obu yaabaire naashoboorora ahabw’enki abamwe nibatsigaho obuheereza bwabo, akooreka enyehurira ezi yaabaire aine yaayenda n’okurira. Akaba aine kubanza kwikaikana akagumizamu n’orubazo rwe. Nkakwatwaho munonga kandi naamariirira kutareebya Kristo na beene ishe abeesigwa.—Mat. 25:40.

Ku twahairwe obuheereza bw’obumiisani, bamwe aha babeseeli bakatubuuza baine ekihika kumanya omwanya ogu twabaire nituza kuheerezamu. Bakagarukamu gye aha myanya endiijo kuhitsya obu naabagizire nti: “Congo (Kinshasa).” Bakahunamamu kakye baagarukamu bati: “Eeeh, Congo! Yehova agume naiwe!” Omu bwire obwo, amakuru agaabaire nigaruga Congo (Kinshasa) gakaba nigooreka oku abantu baingi baabaire nibaitwa ahabw’orutaro. Kwonka nkaguma ninteekateeka aha bi naayegire omu Gileadi. Ku twaherize emishomo y’aha Gileadi omu Kwamwenda 1967, nyowe, Heinrich Dehnbostel, Claude Lindsay, tukaza Kinshasa orurembo orukuru omuri Congo.

Ku twahikire Kinshasa, tukatandika kwega French. Bwanyima tukaza Lubumbashi, orurembo orwabaire nirumanywa ira nka Elisabethville, aha mwatano gwa Zambia na Congo. Tukatuura aha gati y’orurembo ahu abamiisani baabaire nibatuura.

Ahakuba ekicweka kihango omu Lubumbashi kikaba kitakabuuriirwe, kikatushemeza munonga okuba naitwe twabandize kwegyesa abantu b’omu kicweka ekyo amazima. Omu bwire bukye, tukaba twine abeegi ba Baibuli baingi. Tukabuurira abakozi ba gavumenti n’abaporiisi. Baingi bakaba nibaha Ekigambo kya Ruhanga ekitiinisa n’omurimo gwaitu gw’okubuurira. Ahabw’okugira ngu baingi abu twabaire nitubuurira bakaba nibagamba Oruswahiri, nyowe na Claude Lindsay tukatandika kurwega. Bwanyima tukooherezibwa omu kibiina ky’Oruswahiri.

N’obu turaabe twatungire emigisha mingi, tukahikwaho oburemeezi butari bumwe. Tukaba nitukira kuteganisibwa abaserukare abasinzi abaabaire nibatutaho emishango ei tutakozire. Eizooba rimwe abaporiisi bakatutaahirira turi omu ruteerane rw’ekibiina omu ka y’omumiisani, baatutwara aha poriisi baatushutamisa ahansi kuhitsya shaaha ikumi z’omu mwabazyo reero baaturekura.

Omuri 1969, nkatandika kutaayaayira ebibiina. Omu kyanga ekyo nkaba nindaba omu bishaka, ngyenda engyendo ndaingwa aha nguuto z’ebyondo. Omu kyaro kimwe, nkaraara n’enkoko eine obwana bwayo ahansi y’ekitanda. Tindikwija kwebwa oku enkoko egyo yaatandikire kunyomberera  bukiri omu kasheeshe kare munonga. Nikinshemeza ku ndikwijuka obwire obu naamazire n’ab’eishe-emwe turikugaaniira aha mazima agari omu Baibuli turikwota omuriro omu mwabazyo.

Oburemeezi bw’amaani obu naatungire n’okuba n’ab’eishe-emwe ab’ebishuba, abaabaire nibashagika ekigombe kya Kitawala. * Bamwe aharibo bakabatizibwa baaheebwa n’obujunaanizibwa omu kibiina. Ab’eishe-emwe abo abaabaire beesherekire omu kibiina bakamanywa kandi tibarabaasize kuhabisa abandi abeesigwa. (Yud. 12) Aha muheru, Yehova akaboneza ekibiina yaataho omusingi gw’okukireetera kutunguuka.

Omuri 1971, nkaheebwa obujunaanizibwa kuheereza aha ofiisi y’eitaagi omuri Kinshasa, ahu naabaire ninkora emirimo etari emwe, nk’aha mabaruha, ebitabo n’aha by’obuheereza. Nkeega kutebeekanisa omurimo gw’okubuurira omu ihanga rihango eryabaire ritaine bintu bingi eby’okukoresa. Obumwe, amabaruha gaitu gakaba gatwara ameezi maingi kuhika omu bibiina. Amabaruha aga bakaba bagaiha omu nyonyi bagata aha bwato ahu gaabaire gamara esaabiiti ishatu ahabw’okuremesibwa omwata gw’aha nyanja. Kwonka nabwo, emirimo ekaba neekorwa n’obu haraabe haabaire hariho oburemeezi nk’obu n’obundi bwingi.

Kikantangaaza munonga kureeba oku ab’eishe-emwe baabaire nibabaasa kugira oruteerane oruhango bataine sente zirikumara. Bakaba nibakora puratifoomu barikukoresa enkungu z’enkyebebe, embingo nk’ebisiika, kandi ezimwe bakaba bazikoramu eby’okushutamaho. Emigano bakaba bagyombekyesa, reero ebifunjo babishakaaza, bakoramu n’emeeza. Bakaba nibashatura obuti bukye babukoresa nk’emisimaari. Butoosha kikaba nikinshemeza kureeba ab’eishe-emwe n’abanyaanyazi-itwe oku bari abanyabwengye omu kukora ebintu. Kikandeetera kubakunda munonga. Kikanshasha munonga kubatsigaho ku naatungire obuheereza obundi!

Omuri 1974, nkatwarwa aha ofiisi y’eitaagi omuri Nairobi, Kenya. Omuri Kenya tukaba twine bingi by’okukora ahabw’okureeberera omurimo gw’okubuurira omu mahanga ikumi agari haihi, kandi agamwe omurimo gwaitu gukaba guzibiirwe. Kaingi nkaheebwa obujunaanizibwa bw’okutaayaayira amahanga ago, okukira munonga Ethiopia ahu ab’eishe-emwe baabaire nibahiiganisibwa munonga. Baingi bakaba nibatwarizibwa kubi, barikuteerwa, bakateebwa n’omu bihome, kandi abamwe baitwa. Kwonka bakagumisiriza baguma bari abeesigwa ahakuba bakaba nibakunda Yehova n’ab’eishe-emwe bagyenzi baabo.

Omuri 1980, nkakora ekintu ky’omutaano naataaha omu bushwere na Gail Matheson kuruga Canada. Nyowe na Gail tukaba turi hamwe omu ishomero rya Gileadi. Tukaba nitukira kuhurizana turikuhandiikirana amabaruha. Gail akaba naaheereza omu ihanga rya Bolivia nk’omumiisani. Bwanyima y’emyaka 12, tukabugana omu rurembo New York. Ku haahingwireho akaire kakye, tukataaha omu bushwere turi omuri Kenya. Okuba na Gail nikinshemeza munonga ahakuba naayebembeza eby’omwoyo kandi amazirwe. Naagumizamu kunshagika n’okuba omuhwezi murungi.

Omuri 1986, nyowe na Gail tukaheebwa obujunaanizibwa bw’okutaayaayira ofiisi z’amataagi, kandi nkaba nimpeereza n’aha kakiiko k’eitaagi. Nkaba nintaayaayira amahanga agaabaire nigareebererwa ofiisi y’eitaagi eya Kenya.

Ninyijuka ndikusherura omwanya gw’okugiriramu oruteerane oruhanga omuri Asmara (hati erikwetwa Eritrea) omuri 1992 ahu omurimo gwaitu gwabaire guzibiirwe. Eky’obusaasi, omwanya ogu twabonire ogw’okugiriramu oruteerane gukaba gwombekyesiibwe ebibaati nigureebeka kubi aheeru n’omunda. Aha izooba ry’oruteerane, kikantaagaaza kureeba oku ab’eishe-emwe baabonoize omunda y’omwanya ogwo kubaasa kuramizamu Yehova. Amaka maingi gakareeta emyenda  y’okushweka ebintu byona ebyabaire nibireebeka kubi. Tukagira oruteerane rurungi munonga orwabaire rurimu abantu 1,279.

Omurimo gw’okutaayaayira amataagi agandi gukaba nigwetengyesa okuraara omu myanya etarikushushana. Haine obu twaraara omu mwanya murungi oguri aha rubaju rw’enyanja, n’omu kaju k’ebibaati akaabaire kaine ekihoroonio ekiri hare nk’omu fuuti 300. Kwonka tukaba tutarikuta omutima aha bintu nk’ebyo, kureka eki twabaire nitutaho omutima n’obwire obu twabaire nitumara na baapayoniya n’ababuurizi abeeziriki. Ku twahairwe obuheereza obundi, tukaba twine kutsigaho banywani baitu abu twabaire nitwija kugirira orushusho rwingi.

Kuruga 1987 kuhika 1992, omurimo gwaitu gukaikirizibwa omu mahanga maingi agaabaire nigareebererwa ofiisi y’eitaagi eya Kenya. N’ekyarugiremu, ofiisi ezindi ez’eitaagi zikatandikwaho omu mahanga ago. Omuri 1993, tukaza kuheereza omuri Addis Ababa, Ethiopia, ahu okumara emyaka mingi omurimo gwaitu gwabaire gutarikwikirizibwa.

Yehova ahaire omugisha omurimo gw’okubuurira omuri Ethiopia. Ab’eishe-emwe na banyaanyazi-itwe baingi bakaba baapayoniya. Ababuurizi nk’ebicweka 20 ahari 100 baheereize nk’abaapayoniya ab’obutwire buri mwaka kwiha 2012. Okwongyera ahari ekyo, amashomero g’Obukama gatendekire ab’eishe-emwe, kandi Ebyombeko by’Obukama ebirikurenga 120 byombekirwe. Omu 2004 Ababeseeli bakatunga omugisha ku bafurukire bakaza omu mwanya musya ogwine n’ekyombeko ky’enteerane empango.

Okumara emyaka mingi, nyowe na Gail tutungire abanywani baingi ab’aha mara omuri Ethiopia ahabw’okugira emitwarize mirungi nk’embabazi na rukundo. Ahabw’okugira ngu hati twine amagara mabi, tukatwarwa aha ofiisi y’eitaagi eya Central Europe. Okwo nitureebererwa gye, kwonka tukiiniire ab’eishe-emwe aba Ethiopia orushusho.

Tureebire oku Yehova arikureetera omurimo gwe kutunguuka. (1 Kor. 3:6, 9) Nk’eky’okureeberaho, obu naabanza kubuurira abantu kuruga Rwanda barikuza Congo kutiimba kopa, hakaba hatariyo omubuurizi n’omwe omu ihanga eryo. Hati hariyo ab’eishe-emwe na banyaanyazi-itwe abarikurenga 30,000 omu ihanga eryo. Omuri 1967, Congo (Kinshasa) ekaba erimu ababuurizi nka 6,000. Hati hariyo ababuurizi abarikurenga 230,000, kandi omu 2018 abantu abarikurenga akakaikuru kamwe bakaija aha Kiijutsyo. Amahanga goona agaabaire nigareebererwa Kenya, omubaro gw’ababuurizi gweyongyeire munonga okurenga 100,000.

Okurenga emyaka nka 50 enyima, Yehova akakoresa ab’eishe-emwe batari bamwe kumpwera kuza omu buheereza obw’obutwire. N’obu ndaabe ninkitiina kugamba n’abantu, nyegire kwesigira kimwe Yehova. Ebi ndabiremu omuri Africa bimpwereire kugumisiriza n’okumarwa n’ebi nyine. Nyowe na Gail, nitukunda munonga ab’eishe-emwe na banyaanyazi-itwe abarikworeka obufura, bakagumisiriza omu mbeera zigumire barikwesiga Yehova. Niimusiima munonga ahabw’embabazi ze. Buzima Yehova ampaire emigisha mingi erikukirira kimwe ei naabaire ninteekateeka.—Zab. 37:4.