BAIBULI eijwiiremu ebigambo ebi abashaija abaabaire baine enyehurira nk’ezaitu baagambire. (Yak. 5:17) Nk’eky’okureeberaho, nitubaasa kwetegyereza gye ebigambo bya Paulo ebiri omu Abarooma 7:21-24: “Nyowe ku mba niinyenda kukora ekirungi, ekibi kimba haihi. . . . Ai bambe, ka ndi omuntu enshoberwa!” Enyehurira nk’ezi nizitwijutsya ngu niturwanisa obutahikiirira bwaitu.

Paulo akagamba oku yaabaire naayehurira omu Abagalatia 2:20, akagira ngu akaba naahamiza kimwe ngu Yesu akamukunda, kandi yaayehayo ahabwe nk’omuntu! Mbwenu shi naiwe nikwo orikwehurira otyo? Obundi rimwe na rimwe.

Twayereeba nk’abataine mugasho ahabw’ebibi ebi twakozire enyima, nikibaasa kutugumira kwikiriza ngu Yehova atusaasiire kandi ngu naatukunda, nikibaasa n’okutugumira kureeba ekitambo kya Yesu nk’ekiconco ekihairweyo ahabwaitu. Mbwenu shi Yesu buzima naayenda ngu tureebe ekitambo omu muringo ogwo? Ku kiraabe nikwo kiri, niki ekiraatuhwere kureeba ekitambo nk’ekiconco? Ka tushwijume ebibuuzo ebyo.

Eego, Yesu naayenda ngu tureebe ekitambo kye nk’ekiconco eki yaahaireyo kugasira buri muntu. Ekyo nitukihamya tuta? Shoma Luka 23:39-43, oteere akashushani omushaija ahanikirwe aha muti aha rubaju rwa Yesu, reero yaikiriza ku akozire ekibi. Naabaasa kuba yaakozire ekihagaro ky’amaani ahakuba ekifubiro ky’okuhanikwa aha muti kikaba kiri eky’abantu abakozire ebicumuro by’amaani. Ahabw’okwerarikirira ayeshengyereza Yesu ati: “Ku oriija omu Bukama bwawe, onyijukye.”

Yesu akamugarukamu ata? Teera akashushani Yesu omu obusaasi bwingi naahinduka kumureeba. N’obu araabe aine obusaasi, amwenya kandi amuhamiza ati: ‘Buzimazima ninkugambira eri izooba nti: Noija kuguma naanye omuri Paradiso.’ Yesu akaba naabaasa kumwijutsya ngu ‘Omwana w’omuntu akaija kuhayo amagara ge okucungura baingi.’ (Mat. 20:28) Omu mwanya gw’ekyo, Yesu akooreka omushaija ogwo ngu naija kugasirwa omu kitambo eki yaabaire naaza kuhayo. Akamugarukamu omu muringo murungi arikukoresa ebigambo nka “noija,” hamwe “naanye.” Kandi Yesu okugamba atyo, kikahamiza omushaija ogwo ngu aine amatsiko g’okutuura omu paradiso ey’omu nsi.

Hatariho kubangaanisa, Yesu akaba naayenda ngu omushaija ogwo amanye ngu ekitambo nikiija kumugasira. Yesu ku araabe yaagiriire embabazi enkozi y’ebihagaro owaabaire atakaheereize Ruhanga, tarikwija kugirira embabazi ezirikukiraho Omukristaayo obatiziibwe orikuheereza Ruhanga? Niki ekirikubaasa kutuhwera kugira okwikiriza kuhami ngu ekitambo kya Yesu nikitugasira n’obu twakuba twine ebibi ebi twakozire enyima?

Obuheereza bwa Paulo obw’okubuurira bukamureetera kureeba ekitambo nk’ekihairweyo ahabwe. Mu muringo ki? Naashoboorora ati: “Ninsiima Kristo Yesu Mukama waitu owampaire amaani, ahabw’okuba akanteekateekaho kuba omwesigwa, yampa omurimo gw’okumuheereza, n’obu ndaabe obunyakare naamurogotsireho, nkamujuma, ndi omuntu enshaarizi.” (1 Tim. 1:12-14) Omurimo ogu Paulo yaahairwe gukamuhamiza ngu Yesu amugiriire embabazi, na rukundo kandi ngu naamwesiga. Naitwe Yesu atuhaire omurimo gw’okubuurira. (Mat. 28:19, 20) Mbwenu shi naitwe omurimo gw’okubuurira nigutuhwera kwetegyereza ngu Yesu akatufeera?

Albert, oherize kugaruka omu kibiina bwanyima y’okumara emyaka nka 34 abingirwe naagira ati: “Ebibi byangye nibiba biri omu maisho gangye butoosha. Kwonka naaba ndi omu kubuurira, ninyehurira nk’oku entumwa Paulo yaayehuriire, nindeeba ngu obuheereza obu mbuhairwe Yesu. Eki nikindeetera okushemererwa n’okugira emiteekateekyere mirungi aha mbeera zangye n’aha biro by’omumaisho.”—Zab. 51:3.

Allan, owaakozire ebihagaro kandi akeejumba omu bikorwa by’obushaarizi atakeegire mazima, naagira ati: “Na hati ninkiteekateeka aha bintu bibi ebi naakozire abantu. Obumwe, eki nikindeetera amaganya. Kwonka ninsiima Yehova kureeba ngu naikiriza nyowe omusiisi kubuurira abandi amakuru marungi. Ku ndikureeba oku abantu barikwikiriza amakuru marungi, nikinyijutsya oburungi bwa Yehova na rukundo ye. Nindeeba ngu Yehova kurabira omuriinye naahwera abandi abarikweshinja ahabw’ebibi ebi baakozire.”

Obuheereza bwaitu nibutuhwera kugira emiteekateekyere mirungi n’okukora ebirungi. Nibutuhamiza ngu Yesu atwiniire embabazi na rukundo kandi ngu naatwesiga.

Emitima yaitu neebaasa kugumizamu neetushinja ahabw’ebibi ebi twakozire enyima okuhitsya obu obusingye bwa Sitaane buraacwekyerezibwe. Niki ekiraatuhwere kusingura enyehurira nk’ezo?

Jean orikukira kweshinja ahabw’ebibi ebi yaakozire akiri muto naagira ati: “Nikinshemeza kumanya ngu ‘Ruhanga ni mukuru okukira emitima yaitu.’” (1 Yoh 3:19, 20) Naitwe nikibaasa kutuhuumuriza kumanya ngu Yehova na Yesu nibeetegyereza ngu tituhikiriire. Ijuka ngu bakahayo ekitambo ti ahabw’abantu abahikiriire kureka ahabw’abantu abasiisi abarikweteisa.—1 Tim. 1:15.

Nituhamiza emitima yaitu amazima aga ku turikushaba, tukateekateeka aha muringo ogu Yesu yaatwariizemu abantu abatahikiriire, kandi tukakora kyona ekirikubaasika kuhikiiriza obuheereza obu yaatuhaire. Waakora otyo, nka Paulo noobaasa kugira ngu Yesu akankunda yaayehayo “ahabwangye.”