Obuhame nibworeka ngu Yesu akaba Omunyamurwa Omukuru obu yaabatizibwa omu gwa 29 Y.A.K. Obuhame obu ni buuha? Obu Yesu yaabatizibwa, akooreka ngu ayeteekateekire kwehayo nk’ekitambo aha itambiro ‘ry’okukunda’ kwa Ruhanga. (Gal. 1:4; Heb. 10:5-10) Obu eitambiro eryo ryabaire ririho kuruga obu Yesu yaabatizibwa n’okweyongyerayo, hekalu enkuru ey’eby’omwoyo, erikujwekyera entebeekanisa y’okuramya Yehova omu muringo ogushemeire kwihirira aha kitambo, kushemereire kuba kwatandikire omu bwire obwo. Eitambiro nikyo kintu kikuru ekya hekalu egyo ey’eby’omwoyo.​—Mat. 3:16, 17; Heb. 5:4-6.

Bwanyima ya hekalu nkuru ey’eby’omwoyo kuteebwaho, hakaba niheetengyesa omunyamurwa omukuru w’okuheerezamu. Yesu kubaasa kuhikiiriza ekyo, ‘akashukwaho omwoyo gurikwera n’amaani.’ (Byak. 10:37, 38; Mak. 1:9-11) Kwonka, nitubaasa kuhamya tuta ngu Yesu akatooranwa kuba Omunyamurwa Omukuru atakafiire kandi akazooka? Nitubaasa kutunga eky’okugarukamu twashwijuma ebyahikire ahari Arooni n’abaagiire omu bigyere bye nk’abanyamurwa abakuru ahansi y’Ebiragiro bya Musa.

Nk’oku Ebiragiro byabaire nibyoreka, omunyamurwa omukuru niwe wenka owaabaire naikirizibwa kutaaha Aharikwera Munonga omu ihema, na bwanyima omu hekalu. Omukingo nigwo gwabaire nigutaanisa Aharikwera Munonga n’Aharikwera. Omunyamurwa omukuru akaba aza enyima y’omukingo aha Izooba ry’Okurihiirira Ebibi. (Heb. 9:1-3, 6, 7) Nk’oku Arooni n’abaagiire omu bigyere bye baabaire baine kushukwaho amajuta batakagiire enyima ‘y’omukingo’ gw’eihema, Yesu nawe ashemereire kuba yaatoorainwe kuba Omunyamurwa Omukuru owa hekalu ya Yehova enkuru ey’eby’omwoyo atakafiire akaraba “omu mukingo, nigwo mubiri gwe” kuza omu iguru. (Heb. 10:20) Ahabw’enshonga egi, entumwa Paulo akagamba ahari Yesu ‘nk’omunyamurwa omukuru’ owaarabire “omu ihema eririkukira obukuru n’okuhikiirira, eritakozirwe bantu” kuza “omu iguru buzima.”​—Heb. 9:11, 24.

Tihariho ntaaniso obu endagaano ensya yaahamibwa n’obu yaatandika kukora. Ahabw’enki? Yesu ku yaagiire omu iguru akahayo amagara ge agahikiriire ahabwaitu, hakabaho amadaara ashatu agaareeteire endagaano ensya kuhamibwa. Kandi amadaara nigo gamwe gakareetera endagaano egyo kutandika kukora. Ni madaara ki ago?

Ery’okubanza, Yesu akaza omu maisho ga Yehova, erya kabiri, akahayo omuhendo gw’ekitambo kye ahari Yehova, erya kashatu, Yehova akaikiriza omuhendo gw’eshagama ya Yesu eyaasheeshekire. Amadaara ago gatakahikiriire, endagaano ensya ekaba etarikukora.

Baibuli terikutugambira obwire bwenyini obu Yehova yaikiriza omuhendo gw’ekitambo kya Yesu. N’ahabw’ekyo, titurikubaasa kworeka obwire bwenyini obu endagaano ensya yaahamibwa kandi ekatandika kukora. Kwonka, nitumanya ngu bwanyima ya Yesu kuza omu iguru hakahinguraho ebiro ikumi, izooba rya Pentekoote ryabona kuhika. (Byak. 1:3) Omu bwire bugufu obwo, nibwo yaahayo omuhendo gw’ekitambo kye, reero Yehova akakiikiriza. (Heb. 9:12) Obuhame obwayorekire ngu hati endagaano ensya eriyo neekora bukareebwa butunu aha Pentekoote. (Byak. 2:1-4, 32, 33) Obwo kikareebwa butunu ngu endagaano ensya yaahamiibwe kandi eriyo neekora.

Omu bugufu, endagaano ensya ekahamibwa kandi yaatandika kukora bwanyima ya Yehova kwikiriza omuhendo gw’eshagama ya Yesu eyaasheeshekire n’okureeta entoore omu ndagaano egyo. Obwo endagaano egyo ekatandika kukora, Omunyamurwa Omukuru Yesu arikuheereza nk’Omuhikaanisa waayo.​—Heb. 7:25; 8:1-3, 6; 9:13-15.