1. Nk’oku kiri omuri 3 Yohaana 3, 4, niki ekirikutushemeza?

NOOBAASA kuteebereza oku entumwa Yohaana yaashemereirwe ku yaahuriire ngu abu yaahweraire kwega amazima nibagumizamu nibaheereza Yehova omu bwesigwa? Bakaba baine oburemeezi bwingi, kandi Yohaana akeezirika kugumya Abakristaayo abo abeesigwa abu yaabaire naatwara nk’abaana be ab’omwoyo. Naitwe nitushemererwa abaana baitu abu tuzaire nari ab’omwoyo baayehayo ahari Yehova, kandi bakagumizamu nibamuheereza.​—Shoma 3 Yohaana 3, 4.

2. Ebaruha ezi Yohaana yaahandiikire zikaba ziine kigyendererwa ki?

² Omu mwaka gwa 98 Y.A.K., Yohaana naabaasa kuba yaabaire naatuura haihi na Efeso. Naabaasa kuba yaagiireyo bwanyima y’okuruga omu buzaahe aha kirwa kya Patumo. Omu bwire obwo naabaasa kuba nibwo yaahigirwe omwoyo gurikwera kuhandiika ebaruha ishatu. Ekigyendererwa ky’ebaruha ezo kukaba kuri okuhiga Abakristaayo abeesigwa kuguma nibaikiririza omuri Yesu, n’okuguma nibagyendera omu mazima.

3. Nituza kugarukamu bibuuzo ki?

³ Yohaana niwe ntumwa owaahererukire, kandi akaba ayerarikiriire aha ku abeegyesa b’ebishuba baraateganise ebibiina. * (1 Yoh. 2:18, 19, 26) Abagomi abo bakaba nibeetwara nk’abarikumanya Yehova, kwonka bakaba batarikworobera ebiragiro bye. Ka tushwijume obuhabuzi obu Yohaana yaahaire. Twaba nitubushwijuma, nitwija kugarukamu ebibuuzo bishatu ebi: Nikimanyisa ki okugyendera omu mazima? Nitubaasa kuremesibwa ki kugyendera omu mazima? Kandi nitubaasa kuhwerahwerana tuta kuguma omu mazima?

4. Kurugiirira ahari 1 Yohaana 2:3-6 na 2 Yohaana 4, 6, okugyendera omu mazima nikitwariramu ki?

⁴ Kubaasa kugyendera omu mazima, twine kumanya amazima agari omu Kigambo kya Ruhanga. Kandi twine ‘kworobera ebiragiro’ bya Yehova, ekirikumanyisa okubikuratira. (Shoma 1 Yohaana 2:3-6; 2 Yohaana 4, 6.) Yesu akataho eky’okureeberaho ekihikiriire eky’okworobera Yehova. N’ahabw’ekyo omuringo gumwe mukuru ogu turikubaasa kworoberamu Yehova n’okuteeraho kutooreza gye Yesu nk’oku kirikubaasika.​—Yoh. 8:29; 1 Pet. 2:21.

5. Ni buhame ki obu tushemereire kuba twine?

⁵ Kubaasa kuguma nitugyendera omu mazima, twine kuba nituhamiza kimwe ngu Yehova ni Ruhanga ow’amazima, kandi ngu buri kimwe eki arikutugambira omu Kigambo kye Baibuli, kihikire. Kandi twine kuba nituhamiza kimwe ngu Yesu niwe Mesia owaaraganisiibwe. Baingi obunaku obu nibabangaanisa yaaba Yesu atoorainwe kuba Omugabe w’Obukama bwa Ruhanga. Yohaana akarabura ngu hakaba nihaija kubaho “abarikuhabisa baingi,” abarikubaasa kuhabisa abatarikumanya kujurira gye mazima agarikukwata ahari Yehova na Yesu. (2 Yoh. 7-11) Yohaana akahandiika ati: “Omubeihi n’oha? T’ogwo ohakana ku Yesu atari Kristo? Antikristo n’ogwo oyehakana Isheboona n’Omwana.” (1 Yoh. 2:22) Omuringo gumwe ogu turikubaasa kwetantara kuhabisibwa, n’okwega Ekigambo kya Ruhanga. Twakora tutyo, nitwija kumanya Yehova na Yesu. (Yoh. 17:3) Reero obwo nibwo turaahamize kimwe ngu twine amazima.

6. Kimwe aha birikubaasa kuremesa Abakristaayo eminyeeto kugyendera omu mazima niki?

⁶ Abakristaayo boona baine kwegyendesereza kutabeihwabeihwa ebigunjano by’abantu. (1 Yoh. 2:26) Na munonga Abakristaayo eminyeeto baine kwegyendesereza omutego ogu. Alexia, * munyaanyazi-itwe ow’emyaka 25 kuruga France, naagira ati: “Obu naabaire ndi muto, nkaba ninteganisibwa emiteekateekyere y’ensi, nk’enyegyesa erikugira ngu ebintu bikabaho bubaho hamwe n’ebigunjano by’abantu. Obumwe, nkaba ninshemezibwa enyegyesa ezo. Kwonka nkaba nindeeba ngu tinyine kwikiriza ebi ndikwegyesibwa aha ishomero byonka, reero nkabura kuhurikiza ebi Yehova arikugamba.” Alexia akeega ekitabo Life​—How Did It Get Here? By Evolution or by Creation? Omu saabiiti  nkye, okubangaanisa kwe kukahwaho. Alexia naagira ati: “Nketungira obuhame ngu Baibuli erimu amazima. Kandi nketegyereza ngu okugyendera aha mitindo eri omu Baibuli nikindeetera okushemererwa n’obusingye.”

7. Ni kugyemeserezibwa ki oku twine kwangira, kandi ahabw’enki?

⁷ Abakristaayo abato n’abakuru, baine kwangira okugyemeserezibwa kuba ebirumira habiri. Yohaana akooreka ngu titurikubaasa kugyendera omu mazima, kandi tukagaruka tukeejumba omu bikorwa by’obuhwanshoni. (1 Yoh. 1:6) Twaba turi ab’okusiimwa Yehova hati n’omu biro by’omumaisho, twine kutwaza nk’abarikumanya ngu buri kimwe kiri omu mushana. Ekirikumanyisa ngu, tihariho kibi ekirikubaasa kusherekwa ahakuba buri kimwe eki turikukora Yehova naaba naakireeba.​—Heb. 4:13.

8. Twine kwangira miteekateekyere ki?

⁸ Twine kwangira emiteekateekyere y’ensi aha kibi. Entumwa Yohaana akahandiika ati: “Ku tugira ngu titwine kibi, tuba nitwebeiha.” (1 Yoh. 1:8) Omu bunaku bwa Yohaana, abagomi bakaba nibateekateeka ngu omuntu naabaasa kuguma naakora ebibi agyendereire, kandi agume aine omukago murungi na Ruhanga. Hati, nitutuura omu bantu abaine emiteekateekyere nk’egyo. Baingi nibagira ngu nibaikiririza omuri Ruhanga, kwonka tibarikwikiriza oku Ruhanga arikutwara ekibi, na munonga kyaba nikikwata aha nshonga y’okuteerana. Ebi Yehova arikutwara nk’emitwarize mibi, abantu nibagira ngu n’enshonga ezi baine kwecweramu eki barikwenda, nari nibagira ngu n’entwaza y’omutaano.

9. Eminyeeto nibagasirwa bata baahamira aha mitindo ya Baibuli?

⁹ Okukira munonga eminyeeto nibo barikubaasa kugyemeserezibwa kuba abahwanshoni, kushushana n’abu barikwega nabo nari abu barikukora nabo. Eki nikyo kyabaire ahari Aleksandar. Naagira ati: “Abaishiki abamwe aha ishomero bakateeraho kungyemesereza kuteerana nabo. Bakangira ngu obu ntaine mwishiki  ou ndikuriima, nyine kuba ndi ekitingwa.” Ku oraahikweho okugyezibwa nk’oku, ijuka ngu waahamira aha mitindo ya Baibuli, noija kwerinda, orinde amagara gaawe, enyehurira zaawe, n’omukago gwawe na Yehova. Kandi buri murundi ogu orikwangira okwohibwa, nikikworobera kukora ekihikire. Ijuka ngu emiteekateekyere y’ensi egi ekiikami erikukwata aha kuteerana neekomooka ahari Sitaane. N’ahabw’ekyo waayanga kwejumba omu buhwanshoni nk’abandi, nooba ‘waasingura omubi.’​—1 Yoh. 2:14.

10. Ebiri omuri 1 Yohaana 1:9 nibituhwera bita kuheereza Yehova twine omuntu w’omunda omurungi?

¹⁰ Nitumanya ngu Yehova niwe aine obugabe bw’okutumanyisa emitwarize etahikire. Kandi nituteeraho nk’oku kirikubaasika kwetantara kukora ekibi. Kwonka kyabaho tukashiisha, nitweteisa ekibi kyaitu turikushaba Yehova. (Shoma 1 Yohaana 1:9.) Twakora ekibi ky’amaani, nitushaba abareeberezi kutuhwera, ahakuba nibo Yehova atooraine kutureeberera. (Yak. 5:14-16) Kwonka, titwine kuguma nitweshinja ahabw’enshobe ezi twakozire enyima. Ahabw’enki? Ahakuba Tataitwe orikutukunda akataho ekitambo ky’Omwana we kugira ngu tusaasirwe ebibi byaitu. Yehova yaagira ngu naija kusaasira abasiisi, naaba naamanyisa eki arikugamba. N’ahabw’ekyo tihariho ekishemereire kuturemesa kuheereza Yehova twine omuntu w’omunda omurungi.​—1 Yoh. 2:1, 2, 12; 3:19, 20.

11. Nitubaasa kurinda tuta ebiteekateeko byaitu kutazamu enyegyesa ezirikubaasa kushiisha okwikiriza kwaitu?

¹¹ Twine kwangira enyegyesa z’abagomi abeehagwire aha mazima. Kuruga obu ekibiina Ekikristaayo kyatandika, Omuregi atwire naakoresa abarikuhabisa baingi kuta okubangaanisa omu biteekateeko by’abaheereza ba Ruhanga abeesigwa. N’ahabw’ekyo, twine kumanya oku twine kutaanisa amazima n’ebishuba. * Abazigu baitu nibabaasa kukoresa Intaneeti nari emikura y’empurizana kuteeraho kutuubya obwesigye  bwaitu omuri Yehova na rukundo ei twiniire ab’eishe-emwe bagyenzi baitu. Ijuka ori enyima ya pokopoko nk’egyo, kandi oyangye kugiikiriza!​—1 Yoh. 4:1, 6; Kush. 12:9.

12. Ahabw’enki twine kwongyera kusiima amazima agu twayegire?

¹² Kubaasa kwangira okutaahirira kwa Sitaane, twine kwongyera kwesiga Yesu n’omwanya gwe omu kuhikiiriza ekigyendererwa kya Ruhanga. Kandi twine n’okwesiga abu Yehova arikukoresa obunaku obu kureeberera ekibiina kye. (Mat. 24:45-47) Nitwongyera aha bwesigye bwaitu turikuguma nitwega Ekigambo kya Ruhanga butoosha. Obwo okwikiriza kwaitu nikwija kuba nk’omuti ogutsimbire emizi omu itaka ahansi munonga. Paulo akagamba enshonga eri nk’egyo obu yaahandiikira ekibiina kya Kolosai. Akagira ati: “Nk’oku mwayakiire Kristo Yesu Mukama, mube nikwo mwagyendera mutyo omuriwe, mutsimbire emizi omuriwe, mwombekirwe omuriwe, kandi muhamiibwe omu kwikiriza.” (Kol. 2:6, 7) Tihariho eki Sitaane nari abaine emiteekateekyere nk’eye barikubaasa kukora ekirikwija kugarura enyima Omukristaayo ohamize okwikiriza kwe.​—2 Yoh. 8, 9.

13. Nitumanya ngu haine kubaho ki, kandi ahabw’enki?

¹³ Twine kwikiriza ngu ensi neija kutwanga. (1 Yoh. 3:13) Yohaana naatwijutsya ngu ‘ensi yoona eri omu butegyeki bw’omubi.’ (1 Yoh. 5:19) Emperu y’ensi egi yaaguma neirira haihi, ekiniga kya Sitaane nikiija kweyongyera. (Kush. 12:12) Naakoresa emitego etarikureebwa butunu, nk’omutego gw’obushambani nari ebishuba by’abeehagwire aha mazima. Kandi naakoresa n’okuhiiganisibwa okwa butunu. Sitaane naamanya ngu atsigaize akaanya kakye k’okuteeraho kuremesa omurimo gwaitu gw’okubuurira nari kushiisha okwikiriza kwaitu. N’ahabw’ekyo tikirikutangaaza kureeba ngu omurimo gwaitu niguzibirwa nari nigwemerezibwa omu mahanga agamwe. N’obu kiraabe kiri kityo, ab’eishe-emwe na banyaanyazi-itwe omu mahanga ago nibagumisiriza. Okugumisiriza kwabo nikuhamya ngu n’obu omubi yaakutukora ki, nitubaasa kuba abasinguzi!

14. Nitubaasa kuhwera tuta ab’eishe-emwe na banyaanyazi-itwe kuguma omu mazima?

¹⁴ Kubaasa kuhwera ab’eishe-emwe na banyaanyazi-itwe kuguma omu mazima, twine kubooreka ngu tubainiire esaasi. (1 Yoh. 3:10, 11, 16-18) Twine kukundana omu mbeera nungi na haabaho oburemeezi. Nk’eky’okureeberaho, noomanya omuntu ofeereirwe, kandi arikwenda kuhuumurizibwa nari kuhwerwa omu miringo erikugasha? Nari ohuriire ngu ab’eishe-emwe bahikirweho ekihikiirizi kandi Ekyombeko kyabo ky’Obukama kiine kugaruka kwombekwa nari amaka gaabo? Nitworeka ngu nitukunda munonga ab’eishe-emwe na banyaanyazi-itwe, kandi ngu tubainiire esaasi omu bi turikugamba, kwonka okukira munonga omu bi turikukora.

15. Nk’oku kiri omuri 1 Yohaana 4:7, 8, twine kukora ki?

¹⁵ Nitworeka ngu nitutooreza Tataitwe ow’omu iguru turikworeka ngu nitukundana. (Shoma 1 Yohaana 4:7, 8.) Omuringo mukuru gw’okworeka ngu nitukundana n’okusaasirana. Nk’eky’okureeberaho, omuntu naabaasa kutukora kubi, kwonka ashabe okusaasirwa. Nitworeka ngu nitumukunda turikumusaasira kandi tukeebwa n’eki ashobize. (Kol. 3:13) Ow’eishe-emwe orikwetwa Aldo akahikwaho okugyezibwa oku obu yaahurira ngu ow’eishe-emwe ou arikuha ekitiinisa agambire kubi aha ruganda rwe. Aldo naagira ati: “Nkaguma ninshaba Yehova kumpwera kutagira enyehurira mbi aha w’eishe-emwe ogwo.” Kwonka Aldo haine ekindi eki yaakozire. Akacwamu kushaba ow’eishe-emwe ogwo kugyenda nawe omu kubuurira. Ku baabaire nibabuurira hamwe,  Aldo akashoboorora oku ebigambo bye byamukwatsireho. “Ow’eishe-emwe ku yaahuriire oku ebigambo bye byankozire kubi,” Aldo nikwo arikugira, “akashaba okusaasirwa. Kurugiirira aha iraka eri yaakoreise, nkabaasa kwetegyereza ngu akeefuuza munonga ahabw’ebi yaagambire. Tukahendera tugarukire kuba abanywani kandi oburemeezi twabwehuzya.”

16-17. Tushemereire kumariirira kukora ki?

¹⁶ Entumwa Yohaana akooreka ngu naafayo aha mbeera y’eby’omwoyo ey’ab’eishe-emwe bagyenzi be, kandi enyehurira egyo neeyorekwa omu baruha ishatu ezi yaahandiikire. Ka nikigaruramu amaani kumanya ngu abashaija n’abakazi nkawe nibashukwaho omwoyo gurikwera kuza kutegyeka na Kristo!​—1 Yoh. 2:27.

¹⁷ Ka tuteereho kugyendera aha buhabuzi obu twashwijuma. Ka tumariire kugyendera omu mazima, tworobere Yehova omu mbeera zoona. Yega Ekigambo kye, kandi okitemu obwesigye. Gira okwikiriza kuhami omuri Yesu. Yetantare ebigunjano by’abantu n’enyegyesa z’abagomi abeehagwire aha mazima. Yangira okugyemeserezibwa kuba ekirumira habiri, empereruka okakora ekibi. Yorobera emitindo ya Yehova erikukwata aha micwe. Kandi ka tuhwere ab’eishe-emwe kuguma bahami turikusaasira abarikutukora kubi, kandi turikuhwera abaine eki bakyenire. Reero, n’obu turaabe twine embeera zigumire, nitwija kugumizamu nitugyendera omu mazima.