1. Kurugiirira aha Abafilipi 2:3, okuba abacureezi nikituhwera kita kugira omukago murungi n’abandi?

OMU bucureezi nitworobera emitindo ya Yehova, turikumanya ngu butoosha naamanya ekiraatugasire. (Efe. 4:22-24) Obucureezi nibutuhiga kwebembeza kukora ebi Yehova arikukunda n’okureeba abandi nk’abarikutukira. N’ekirikurugamu, nitugira omukago murungi na Yehova n’Abakristaayo bagyenzi baitu.​—Shoma Abafilipi 2:3.

2. Entumwa Paulo akeetegyereza ki, kandi nituza kushwijuma ki omu kicweka eki?

² Twaba tutegyendesereize, n’obu twakuba turi abacureezi, ensi ya Sitaane neebaasa kutureetera kugira omwetunguuro nari okweyendeza. * Nikireebeka omu kyasha ky’okubanza abamwe bakaba nibatwaza batyo, ahakuba entumwa Paulo akahandiikira Abarooma ati: “Ningambira buri muntu weena omuriimwe, ngu arekye kweteekateekaho okukira oku ari, kureka ateekateekye okutarenzya oku ari.” (Rom. 12:3) Paulo akaba naamanya ngu twine kweteekateekaho obumwe. Kwonka obucureezi nibutuhwera kwegiraho emiteekateekyere eringaniire. Ekicweka eki nikiza kugamba aha nshonga ishatu oku obucureezi burikutuhwera kwetantara kweteekateekaho kukira oku kishemereire. Enshonga ezi (1) n’obushwere bwaitu, (2) obujunaanizibwa bwaitu bw’okuheereza, (3) n’okukoresa emikura y’empurizana.

3. Ahabw’enki obushwere burikubaasa kubamu emihondano, kandi abamwe nibatwaza bata?

³ Yehova akataho obushwere kureetera omushaija n’omukazi we okushemererwa. Kwonka obu hatariho ohikiriire, obumwe nihabaasa kubaho obutaikirizana. Nangwa, Paulo akahandiika ngu abarikutaaha omu bushwere obumwe nibaija kugira obusaasi. (1 Kor. 7:28) Abamwe nibakira kugira emihondano n’abakundwa baabo, kandi eki nikibaasa kubareetera kuteekateeka ngu bakaba batahikire kutaaha hamwe omu bushwere. Baaba baine emiteekateekyere y’ensi, nibabaasa kurahuka kuteekateeka ngu okugaitururwa nikyo kiraabahwere. Nibaija kuteekateeka ngu nigwo muringo gwonka ogurikubaasa kubareetera kwehurira gye.

4. Niki eki twine kwetantara?

⁴ Twine kwetantara omuze gw’okuhurira tutamazirwe omu obushwere bwaitu. Nitumanya ngu kurugiirira aha Byahandiikirwe obushambani niyo nshonga yonka erikubaasa kureetera abari omu bushwere kugaitururwa. (Mat. 5:32) N’ahabw’ekyo twagira obusaasi omu bushwere obu Paulo yaahandiikireho, titurikwenda kwikiriza omwetunguuro kutureetera kwebuuza tuti: ‘Obushwere obu nibuhikiiriza ebyetengo byangye? Nintunga rukundo ei nshemereire kutunga? Omukundwa ondiijo naabaasa kundeetera okushemererwa kukira ou nyine?’ Yetegyereze ngu ebibuuzo ebi birimu okweyendeza. Obwengye bw’ensi nibukuhiga kukuratira ebiri omu omutima gwawe n’okukora ebirikushemeza iwe wenka, n’obu kyakuba nikimanyisa okuruga omu bushwere. Obwengye bwa Ruhanga bwo nibworeka ngu toine ‘kweta aha byawe wenka, kureka oyete n’aha by’abandi.’ (Fil. 2:4) Yehova naayenda ngu orinde obushwere bwawe, beitu kutari kuburugamu. (Mat. 19:6) Naayenda ngu obanze omuteekateekyeho, beitu kutari kweteekateekaho.

5. Kurugiirira aha Abaefeso 5:33, omushaija n’omukazi we baine kutwarizana bata?

 ⁵ Omushaija n’omukazi we baine kutwarizana omu muringo gwa rukundo kandi ogw’ekitiinisa. (Shoma Abaefeso 5:33.) Baibuli neetuhiga kuta omutima aha kuha bandi omu mwanya gw’okuheebwa. (Byak. 20:35) Ni mutwarize ki ogurikubaasa kuhwera omushaija n’omukazi we kworekana rukundo n’okuhaana ekitiinisa? N’obucureezi. Abashaija n’abakazi abacureezi, tibarikwebembeza ebyabo bonka, kureka ‘n’ebya bataahi baabo.’​—1 Kor. 10:24.

6. Ebi Steven na Stephanie baagambire noobyegyeraho ki?

⁶ Obucureezi buhwereire Abakristaayo baingi abari omu bushwere kwongyera kushemererwa. Nk’eky’okureeberaho, omushaija orikwetwa Steven naagira ati: “Iwe n’omukundwa waawe mwine kukorera hamwe, na munonga haabaho oburemeezi. Omu mwanya gw’okuteekateeka ngu ‘niki ekiraagasire nyowe?’ oine kuteekateeka ngu ‘niki ekiraatugasire twembi?’” Stephanie omukazi we, nawe nikwo arikwehurira. “Tihaine orikwenda kutuura n’omuzigu we,” Stephanie nikwo arikugira. “Haabaho obutaikiriza, nituteeraho kumanya ekyabureeta. Bwanyima nitushaba, tucondooza, kandi tukigaaniiraho. Niturwanisa oburemeezi, beitu kutari kurwanagana twembi.” Abashaija n’abakazi baabo nibagasirwa baaba batarikweteekateekaho okukira oku kishemereire.

7. Ow’eishe-emwe aine kugira miteekateekyere ki yaaheebwa obujunaanizibwa omu kibiina?

⁷ Nitugutwara nk’omugisha kuheereza Yehova omu muringo gwona ogu turikubaasa. (Zab. 27:4; 84:10) Ow’eishe-emwe yaaba naabaasa kuza omu buheereza bw’omutaano, ekyo ni kirungi. Nangwa, Baibuli neegira eti: “Omuntu ku ayenda omurimo gw’omureeberezi, aba akunzire omurimo murungi.” (1 Tim. 3:1) Kwonka, yaaheebwa obujunaanizibwa obwo tashemereire kweteekateekaho munonga kukira oku kishemereire. (Luk. 17:7-10) Ekigyendererwa kye kishemereire kuba okuheereza abandi omu bucureezi.​—2 Kor. 12:15.

8. Nitwegyera ki ahari Diotorefe, Uziya, na Abusalomu?

⁸ Baibuli neegamba aha bantu ba ira abaayeteekateekireho munonga. Diotorefe akaba atari mucureezi yaateeraho ‘kwekuza’ omu kibiina. (3 Yoh. 9) Uziya akagira omwetunguuro yaateeraho kukora omurimo ogu Yehova ataramuhaire kukora. (2 Bus. 26:16-21) Abusalomu omu muringo gw’oburyarya akateeraho kusherura obushagiki bw’abantu ahabw’okwenda kuba omugabe. (2 Sam. 15:2-6) Nk’oku ebirikukwata aha bantu abo ab’omu Baibuli birikworeka gye, Yehova tarikusiima abantu abarikwesherurira ekitiinisa. (Enf. 25:27) Bwanyima y’obwire, omwetunguuro n’okweyendeza nibirugamu oburemeezi.​—Enf. 16:18.

9. Yesu akataho ky’okureeberaho ki?

⁹ Okutaana n’eby’okureeberaho bibi ebyo, Yesu we “n’obu araabe yaabaire ari omu muringo gwa Ruhanga, tarateekateekire [ngu naingana] na Ruhanga.” (Fil. 2:6) Yesu, ori owa kabiri ahari Yehova omu bushoboorozi, tarikweteekateekaho kukira oku kishemereire. Akagambira abakuratsi be ngu, omuntu weena orikwetwara nk’ow’ahansi “omuriimwe mwena ogwo niwe mukuru.” (Luk. 9:48) Ka n’omugisha gw’amaani kuheereza hamwe na baapayoniya, abaheereza, abareeberezi, n’abarikutaayaayira ebibiina abacureezi nka Yesu! Abaheereza ba Yehova abacureezi nibongyera aha mwoyo gwa rukundo ogu ekibiina kya Ruhanga kirikumanyirwaho.​—Yoh. 13:35.

10. Oine kukora ki waaba nooteekateeka ngu oburemeezi omu kibiina tiburikushoboororwa omu muringo murungi?

¹⁰ Kwonka shi ku waakuba nooreeba ngu hariho  oburemeezi omu kibiina, kandi nooteekateeka ngu tiburikushoboororwa omu muringo murungi? Omu mwanya gw’okwetomboita, noobaasa kworeka ngu ori omucureezi orikushagika abarikureeberera ekibiina. (Heb. 13:17) Kubaasa kukora ekyo, yebuuze oti: ‘Oburemeezi obu ndikureeba buzima n’obw’amaani munonga bwine kushoboororwa? Obu nibwo bwire burungi bw’okutereeza enshonga? N’obujunaanizibwa bwangye kubushoboorora? Mbwenu shi okuba ow’amazima, ndiyo niinteeraho kureetaho obumwe, nari ndiyo niinteeraho kwekuza?’

11. Kurugiirira aha Abaefeso 4:2, 3, twaheereza Yehova omu bucureezi niharugamu birungi ki?

¹¹ Yehova naatwara obucureezi kuba obw’omuhendo kukira okubaasa, kandi obumwe nibukira okukora gye ebintu. N’ahabw’ekyo, teeraho kukora nk’oku orikubaasa kuheereza Yehova omu bucureezi. Waakora otyo, noija kureeta obusingye omu kibiina. (Shoma Abaefeso 4:2, 3.) Yejumbire kimwe omu buheereza. Sherura oburyo bw’okuheereza abandi orikubakorera eby’embabazi. Ba efura aha bantu boona, otwariiremu n’abataine bujunaanizibwa omu kibiina. (Mat. 6:1-4; Luk. 14:12-14) Waaba nooheereza n’ab’omu kibiina omu bucureezi, nibaija kureeba okubaasa kwawe n’obucureezi bwawe.

12. Mbwenu shi Baibuli neetuhiga kutunga abanywani? Shoboorora.

¹² Yehova akatuhanga ngu tushemererwe twaba turi na banywani baitu n’abanyabuzaare. (Zab. 133:1) Yesu akaba aine abanywani barungi. (Yoh. 15:15) Baibuli neeshoboorora omugasho gw’okugira abanywani abaabuzima. (Enf. 17:17; 18:24) Kandi  neeyoreka ngu ti kirungi okwetaanisa aha bandi. (Enf. 18:1) Baingi nibateekateeka ngu emikura y’empurizana n’omuringo gw’okutunga abanywani baingi n’okwetantara kugira eihamba. Kwonka, twine kuba abeegyendesereza twaba nitukoresa omuringo ogw’empurizana ogu.

13. Ahabw’enki abarikukoresa emikura y’empurizana barikukira kugira eihamba n’amaganya?

¹³ Okucondooza kworekire ngu abantu abarikumara obwire aha mikura y’empurizana nibabaasa kuhendera bagizire eihamba n’amaganya. Ahabw’enki? Enshonga emwe erikubaasa kureeta ekyo, n’okugira ngu abantu nibakira kutaho ebishushani by’okweyoreka, ebishushani birungi ebi batooraine, ebya banywani baabo, n’emyanya mirungi ei barikuba bagiiremu. Orikureeba ebishushani ebyo naabaasa kuteekateeka ngu we n’ow’ahansi munonga omu kwegyeragyeranisa n’ou yaareeba aha mukura. “Nkatandika kugira eihari ku naabaire nindeeba abandi nibashemererwa aha wiikenda obwo nyowe ndikuguma omuka ntundami,” nikwo munyaanyazi-itwe ow’emyaka 19 yaagizire.

14. Obuhabuzi oburi omu 1 Petero 3:8 nibubaasa kuhwera buta omu kukoresa emikura y’empurizana?

¹⁴ Amazima gari ngu, emikura y’empurizana neebaasa kuhwera omu miringo mirungi, nk’okuhurizana n’ab’eka yaawe n’abanywani. Kwonka shi oreebire ngu ebi abantu abamwe barikuta aha mikura nibiba bigyendereire ngu abandi babahimbise? “Ka baandeebe” nibwo butumwa oburikuba buri enyima y’ebi barikutaho. Abamwe nibata aha bishushani byabo ebigambo ebirikujuma nari ebirikuhemurana, nari nibabita aha bishushani eby’abandi. Eki nakyo nikitaanira kimwe n’omutwarize gw’obucureezi n’okufayo aha bandi ebi Abakristaayo barikuhigwa kugira.​—Shoma 1 Petero 3:8.

15. Baibuli neebaasa kutuhwera eta kwetantara okwekuza?

¹⁵ Waaba nookoresa emikura y’empurizana, yebuuze oti: ‘Ebigambo ebi ndikuhandiika aha bishushani, nari aha vidiyo ezi ndikuta aha mukura nibireetera abandi kuteekateeka ngu ninyehimbisa? Nimbaasa kureetera abandi kugira eihari?’ Baibuli neegira eti: ‘Byona eby’omu nsi, ebi omubiri gurikwetenga, n’ebi amaisho garikwetenga, n’okwehimbisa ahabw’eby’amagara  aga, tibirikuruga hari Isheboona, kureka nibiruga omu nsi egi.’ (1 Yoh. 2:16) Envunuura ya Baibuli emwe ebigambo ‘okwehimbisa ahabw’eby’amagara aga,’ neebivunuura ‘nk’okwenda kwetwara nk’ow’ekitiinisa.’ Abakristaayo tibashemereire kugira ekigyendererwa ky’okwekuza. Nibakuratira okwehanangiriza kwa Baibuli oku: “Turekye kwehimbisiza ahari busha, n’obu kwakuba okugwisana kubi nari okugirirana amahari.” (Gal. 5:26) Obucureezi nibutuhwera kwetantara kugira omwoyo gw’ensi ogw’okwekuza.

16. Ahabw’enki twine kwetantara omwetunguuro?

¹⁶ Twine kugira omutwarize gw’obucureezi ahabw’okuba abarikwetunguura nibaba bataine emiteekateekyere etebeekaine. (Rom. 12:3) Abarikwetunguura nibakira kutongana n’okwehimbisa. Emiteekateekyere yaabo n’ebikorwa byabo nibibareetera obusaasi hamwe n’abandi. Baaba batahindwire emiteekateekyere yaabo, Sitaane naabaasa kugishiisha kandi agihabise. (2 Kor. 4:4; 11:3) Kwonka omuntu omucureezi, naaba aine emiteekateekyere etebeekaine. Naaba ayeyineho emiteekateekyere eringaniire kandi ey’oburyo, arikumanya ngu abandi nibamukira omu miringo mingi. (Fil. 2:3) Kandi naaba naamanya ngu ‘Ruhanga naarwanisa ab’amaryo, kwonka abacureezi naabaha omugisha.’ (1 Pet. 5:5) Abaine emiteekateekyere mirungi tibaine kutwaza nk’abarikuhakanisa Yehova.

17. Twine kukora ki kubaasa kuguma turi abacureezi?

¹⁷ Kubaasa kuguma turi abacureezi, twine kuratira obuhabuzi bwa Baibuli oburikutuhiga ‘kujuura omuntu owa ira n’emitwarize ye, tukajwara omuntu omusya.’ Ekyo nikyetengyesa okukora n’amaani. Twine kushwijuma eky’okureeberaho kya Yesu, kandi tukateeraho kumutooreza nk’oku kirikubaasika. (Kol. 3:9, 10; 1 Pet. 2:21) Kwonka ebirungi ebirikurugamu nibikira okuteeraho kwaitu. Twaba abacureezi, nitugira amaka marungi, nitureetaho obumwe omu kibiina, kandi nitumanya oku twine kwetantara kukoresa kubi emikura y’empurizana. Okukira byona, nitwija kusiimwa Yehova kandi atuhe emigisha.