1-2. Omukristaayo naagyeragyeranisibwa ata n’ekyombeko kiraingwa munonga? (1 Abakorinso 15:58)

 EMYAKA ya 1970 erikuza kuhendera bakombeka ekyombeko kya kanyina 60 omuri Tokyo, Japan. Abantu bakaba nibeebuuza oku ekyombeko ekyo kiraabase kuguma kyemereire haabaho emitsitsa omu rurembo orwo. Ekyo kikaba nikibaasika kita? Abaayombekire ekyombeko ekyo bakakyombeka kirikubaasa kuguma kihami kyatengyetsibwa omutsitsa. Abakristaayo nibagyeragyeranisibwa n’ekyombeko kiraingwa ekyo. Mu muringo ki?

² Omukristaayo aine kuba ahami kwonka atagangaire kandi atarikutengyetsibwa. Aine kuba amaririre kuhamira aha biragiro bya Yehova n’emitindo ye. (Shoma 1 Abakorinso 15:58.) Naaba ayeteekateekire kworoba kandi naaguma ahamiire aha mitindo n’emisingye ya Baibuli. Kwonka aha rubaju orundi, taine kuremera aha nshonga kyayetengyesa. (Yak. 3:17) Omukristaayo oyegire kugira emiteekateekyere eringaniire naija kwetantara kurengyesereza atarikuremera aha nshonga nari kuba byafandimu. Omu kicweka eki, nituza kureeba oku twine kutatengyetsibwa. Nituza n’okureeba ebintu bitaano ebi Sitaane arikukoresa kutureetera kugumirwa kuguma tuhami kandi nituza n’okwega oku turikubaasa kwangira okuteeraho kwe.

3. Ni biragiro ki ebiri omu Ebyakozirwe 15:28, 29 ebi omuhi w’Ebiragiro Orikukirayo yaahaire?

³ Yehova omuhi w’Ebiragiro Orikukirayo, atwire naaha  abantu ebiragiro ebirikwetegyerezibwa gye. (Isa. 33:22) Nk’eky’okureeberaho, akakiiko akareeberezi ak’omu kyasha ky’okubanza kakagamba aha bintu bishatu oku Abakristaayo barikubaasa kuguma bahami: (1) barikuramya Yehova wenka omu mwanya gw’okuramya ebishushani, (2) barikutwara eshagama nk’erikwera, kandi (3) barikuhamira aha mitindo ya Baibuli ey’emicwe. (Shoma Ebyakozirwe 15:28, 29.) Abakristaayo obunaku obu nibabaasa kuguma bata bahami omu nshonga ezi ishatu?

4. Nituramya Yehova wenka tuta? (Okushuuruurwa 4:11)

⁴ Nituramya Yehova wenka omu mwanya gw’okuramya ebishushani. Yehova akaragiira Abaisraeli kuba niwe baaramya wenka. (Bir. 5:6-10) Kandi Yesu ku yaagyeziibwe Omuregi, akooreka butunu ngu twine kuramya Yehova wenka. (Mat. 4:8-10) N’ahabw’ekyo, titurikuramya ebishushani. Kandi, tituri kutwara abantu nka baaruhanga yaaba n’abeebembezi b’ediini, ab’eby’obutegyeki, ab’eby’emizaano nari ab’eby’okweshemeza. Nituguma aha rubaju rwa Yehova kandi nituramya ogwo wenka “owaahangire byona.”​—Shoma Okushuuruurwa 4:11.

5. Ahabw’enki nitworobera ekiragiro kya Yehova eky’okutwara amagara n’eshagama nk’ebirikwera?

⁵ Nitworobera ekiragiro kya Yehova eky’okutwara amagara n’eshagama nk’ebirikwera. Ahabw’enki? Ahakuba Yehova naagira ngu eshagama neejwekyera ekiconco ky’omuhendo eki atuhaire eky’amagara. (Lev. 17:14) Yehova ku yaikiriize abantu kurya enyama y’enyamaishwa, akabagambira kutarya eshagama. (Kut. 9:4) Ekiragiro ekyo akakigarukamu n’omu biragiro bya Musa ebi yaahaire ihanga rya Israeli. (Lev. 17:10) Kandi akagambira abari aha kakiiko akareeberezi ak’omu kyasha ky’okubanza kuhabura Abakristaayo boona “kureka . . . eshagama.” (Byak. 15:28, 29) Naitwe nitworobera ekiragiro ekyo twaba nitucwamu oku turaaragurirwe. b

6. Nituteeraho tuta kuhamira aha mitindo ya Yehova ey’emicwe?

⁶ Nituhamira aha mitindo ya Yehova ey’emicwe. (Heb. 13:4) Entumwa Paulo arikukoresa orurimi rw’akamanyiso, akatuhabura ‘kwita’ engingo zaitu. Eki nikimanyisa ngu twine kuteeraho nk’oku turikubaasa kwangira ebyetengo bibi by’omubiri. Nitwetantara kureeba nari kukora kyona ekirikubaasa kutureetera kushambana. (Kol. 3:5; Yob. 31:1) Twayohibwa kukora ekibi, ahonaaho nitwangira ebiteekateeko nari ebikorwa ebirikubaasa kushiisha omukago gwaitu na Ruhanga.

7. Twine kumariirira kukora ki, kandi ahabw’enki?

⁷ Yehova naayenda ngu ‘tumworobere’ twihire aha mutima. (Rom. 6:17) Obuhabuzi obu arikutuha n’obw’okutugasira kandi ebiragiro bye tibirikuhinduka. (Isa. 48:17, 18; 1 Kor. 6:9, 10) Nituteeraho nk’oku turikubaasa kushemeza Yehova n’okugira emiteekateekyere nk’ey’omuhandiiki wa zaaburi owaagizire ati: “Ntaire omutima gwangye aha kuhitsya ebiragiro byawe ebi waataireho ebiro byona okuhitsya aha muheru.” (Zab. 119:112) Kwonka, Sitaane naateeraho kutuubya okumariirira kwaitu. Naakoresa bukoryo ki?

8. Sitaane naakoresa ata okuhiiganisibwa kutuubya okumariirira kwaitu?

⁸ Okuhiiganisibwa. Omuregi naateeraho kutuubya okumariirira kwaitu arikutuhitsyaho akabi aha mubiri n’omu nyehurira. Ekigyendererwa kye naayenda ‘kuturya,’  ekirikumanyisa okushiisha omukago gwaitu na Yehova. (1 Pet. 5:8) Abakristaayo ab’ekyasha ky’okubanza bakatiinatiinisibwa, baateerwa, kandi baitwa ahabw’okumariirira kuguma bahami. (Byak. 5:27, 28, 40; 7:54-60) Sitaane naagumizamu kukoresa okuhiiganisibwa. Eki nikireebwa butunu waareeba oku ab’eishe-emwe na banyaanyazi-itwe barikuhiiganisibwa omuri Russia n’amahanga agandi, n’oku barikutwarizibwa kubi omu miringo endiijo.

9. Ha eky’okureeberaho ekirikworeka ahabw’enki twine kwerinda okugyemeserezibwa okutari kwa butunu.

⁹ Okugyemeserezibwa okutari kwa butunu. Okwongyera aha kuhiiganisibwa, Sitaane naakoresa ‘obugobya.’ (Efe. 6:11) Teekateeka aha kyahikire aha w’eishe-emwe orikwetwa Bob, owaabaire ari omu eirwariro ategyereize kushemezibwa. Akagambira abashaho ngu n’obu haakubaho ki tarikubaasa kwikiriza kuteebwamu eshagama. Omushaho owaabaire naaza kumushemeza akashagika okucwamu kwe. Kwonka, harikuburayo ekiro kimwe Bob akashemezibwa, omushaho ondiijo akaija kumureeba ab’eka ye baataahire. Akagambira Bob ngu nibabaasa kutakoresa eshagama kwonka ngu neija kuba eriho kyayetengyesa kugikoresa. Obundi omushaho akaba naateekateeka ngu Bob naabaasa kuhindura emiteekateekyere ye ab’eka ye baaba batariho. Kwonka Bob akahamira aha kihikire, arikugambira omushaho ngu n’obu haakubaho ki taraikirize kuteebwamu eshagama.

10. Ahabw’enki emiteekateekyere y’abantu n’ey’akabi? (1 Abakorinso 3:19, 20)

¹⁰ Emiteekateekyere y’abantu. Twaba twine emiteekateekyere nk’ey’abantu b’ensi, nitubaasa kwehuzya Yehova n’emitindo ye. (Shoma 1 Abakorinso 3:19, 20.) “Obwengye bw’ensi” nibureetera abantu kuta omutima aha ebyetengo by’omubiri. Abakristaayo abamwe omuri Perugamo na Suatira bakaba batandikire kugira emiteekateekyere y’obushambani n’okuramya ebishushani nk’abantu ab’omu ndembo ezo. Yesu akahana ebibiina byombi ahabw’okushwekyerera obushambani. (Kush. 2:14, 20) Naitwe nitugyemeserezibwa kugira emiteekateekyere egwire. Ab’eka yaitu na banywani baitu nibabaasa kwihirira aha nyehurira zaitu kutureetera kuhenda emisingye ya Baibuli. Nk’eky’okureeberaho, nibabaasa kukugira ngu okuguma oshemeire omu micwe ti kikuru kandi ngu emitindo ya Baibuli ey’emicwe ehweire aha mureembe.

11. Twaba nituteeraho kuhamira aha kihikire, twine kwetantara ki?

¹¹ Obumwe nitubaasa kugira ngu obuhabuzi obu Yehova arikuha tiburikumara. Nitubaasa n’okwohibwa ‘kurenga aha Byahandiikirwe.’ (1 Kor. 4:6) Ekyo nikyo abeebembezi b’ediini omu bwire bwa Yesu baabaire nibakora. Bakaba nibataho ebiragiro ebyabo, ebyabaire nibigumira abantu baabutoosha kworobera. (Mat. 23:4) Yehova naatuha obuhabuzi oburikwetegyerezibwa gye kurabira omu Kigambo kye n’ekibiina kye. Tihariho nshonga yoona eine kutureetera kwongyera aha buhabuzi obu arikuha. (Enf. 3:5-7) N’ahabw’ekyo, titurikurenga aha Byahandiikirwe nari kuteeraho Abakristaayo bagyenzi baitu ebiragiro aha nshonga ezi omuntu arikwecweramu.

12. Sitaane naakoresa ata “oburyarya obutaine mugasho”?

¹² Oburyarya. Sitaane naakoresa ‘oburyarya obutaine mugasho n’eby’okubanza eby’omu nsi’ kuhabisa n’okubaganisamu abantu. (Kol. 2:8) Omu kyasha ky’okubanza, ebi bikaba nibitwariramu obwengye bw’abantu obwabaire bwegami aha miteekateekyere y’abantu, enyegyesa z’Ekiyudaaya ezitari mu  Byahandiikirwe, n’enyegyesa erikugira ngu Abakristaayo baine kukuratira ebiragiro bya Musa. Obwo bukaba buri oburyarya ahakuba bakaba nibahabisa abantu kuruga ahari Yehova obukomooko bw’obwengye obuhikire. Hati, Sitaane naakoresa amakuru n’emikura y’empurizana kujanjaaza orugambo n’amakuru gatahikire ag’ab’eby’obutegyeki. Hakaba hariho amakuru maingi nk’ago omu bwire bw’ekigwererezi kya COVID-19. c Abajurizi ba Yehova abaayorobeire obuhabuzi bw’ekibiina bakaba batarikwerarikirira nk’abandi abaabaire nibahurikiza amakuru gatahikire.​—Mat. 24:45.

13. Ahabw’enki twine kwetantara ebirikuhuzya?

¹³ Ebirikuhuzya. Twine kuta omutima aha ‘birikukira’ obukuru. (Fil. 1:9, 10) Ebirikuhuzya nibibaasa kutureetera kushiisha obwire n’amaani agu twakukoreise ebintu by’omugasho. Ebintu bya butoosha nk’okurya, okunywa, okweshemeza n’omurimo gw’okwebaisaho nibibaasa kutuhuzya twaba nibyo twataho omutima. (Luk. 21:34, 35) Kandi buri izooba nituhurira amakuru agarikukwata aha nshonga z’abantu n’eby’obutegyeki. Titushemereire kwikiriza enshonga nk’ezo kutuhuzya. Kitari ekyo, nitubaasa kutandika kugwera orubaju omu biteekateeko n’omu mutima gwaitu. Sitaane naakoresa emiringo egi yoona kutureetera kutuubya okumariirira kwaitu kw’okukora ekihikire. Ka tushwijume oku turikubaasa kwangira okuteeraho kwe kandi tukaguma tuhami.

14. Niki ekirikubaasa kutuhwera kuhamira aha rubaju rwa Yehova?

¹⁴ Teekateeka ahabw’enki waayehaireyo kandi okabatizibwa. Okahika aha bigyendererwa ebi ahabw’okugira ngu okaba nooyenda kuguma aha rubaju rwa Yehova. Ijuka ekyakuhweraire kuhamya ngu otungire amazima. Okamanya gye Yehova kandi waayongyera kumukunda nka Sho ow’omu iguru. Okagira okwikiriza kwakuhiga kweteisa. Okareka kukora ebirikugwisa kubi Yehova waatandika kukora ebi arikukunda. Okeehurira gye ku waamanyire ngu Ruhanga  akusaasiire. (Zab. 32:1, 2) Okatandika kuza omu nteerane kandi waagambira abandi aha birungi ebi waabaire nooyega. Bwanyima y’okwehayo kandi okabatizibwa hati noogyendera omu muhanda gw’amagara kandi omaririire kuguma omu muhanda ogu.​—Mat. 7:13, 14.

15. Ahabw’enki okweyegyesa n’okuteekateeka n’eby’omugasho?

¹⁵ Yeyegyese Ekigambo kya Ruhanga kandi okiteekateekeho. Nk’oku omuti gurikuhama gwaba gwine emizi miraingwa, naitwe nituguma tuhami okwikiriza kwaitu kwaba kwegami aha Kigambo kya Ruhanga. Omuti ku gurikwongyera kukura, emizi neeyongyera kuranda n’okuba miraingwa. Twayeyegyesa kandi tukateekateeka nituhamya okwikiriza kwaitu, kandi nitwongyera kuhamiza kimwe ngu omuringo ogu Yehova arikukoramu ebintu nigwo gurikukirayo oburungi. (Kol. 2:6, 7) Teekateeka oku ebiragiro bya Yehova, obuhabuzi bwe, n’oburinzi byahweraire abaheereza be ira. Nk’eky’okureeberaho, omu kworekwa Ezekieli akataho omutima arikureeba maraika arikupima hekalu. Okworekwa oku kukagumya Ezekieli, kandi kurimu amashomo agarikworeka oku turikubaasa kuhamira aha mitindo ya Yehova omu kuramya okushemeire. d (Ezk. 40:1-4; 43:10-12) Naitwe nitugasirwa twateeraho kwega kandi tukateekateeka aha nshonga zitoorobi eziri omu kigambo kya Ruhanga.

16. Ahabw’okugira ngu Bob akaba aine omutima guhami kikamurinda kita? (Zaaburi 112:7)

¹⁶ Teeraho kugira omutima guhami. Omugabe Daudi akagamba ahari rukundo etarikuhinduka ei yaabaire ainiire Yehova obu yaayeshongora ati: “Omutima gwangye gugumire, ai Ruhanga.” (Zab. 57:7) Naitwe nitubaasa kugira omutima guhami, turikwesigira kimwe Yehova. (Shoma Zaaburi 112:7.) Teekateeka oku eki kyahweraire Bob, owaaba yaagambirweho. Ku yaamanyisiibwe ngu nibaza kuba baine eshagama y’okumutamu kyayetengyesa, akabagambira ngu baaba nibenda kumutamu eshagama naija kuruga omu irwariro  eryo ahonaaho. Bwanyima, Bob akagira ati: “Nkaba mmaririire kuhamira aha kucwamu kwangye kandi nkaba ntatiinire.”

17. Nitubaasa kwegyera ki ahari Bob? (Reeba n’ekishushani.)

¹⁷ Bob akaba atarikutengyetsibwa ahakuba akaba yaamaririre kuhamira aha kucwamu kwe atakagiire omu irwariro. Eky’okubanza, akaba naayenda kushemeza Yehova. Ekya kabiri, akeeyegyesa eki Baibuli n’ebitabo by’ekibiina birikugamba aha kwera kw’amagara n’eshagama. Ekya kashatu, akaba naahamiza kimwe ngu twagyendera aha buhabuzi bwa Yehova nikirugamu ebirungi eby’obutwire bwona. Naitwe nitubaasa kugira omutima guhami n’obu twakuhikwaho bureemezi ki.

18. Eky’okureeberaho kya Baraki nitukyegyeraho ki aha bikwatiraine n’okwesiga Yehova? (Reeba ekishushani ekiri aha kipampagare.)

¹⁸ Yesigye Yehova. Teekateeka aha businguzi obu Baraki yaatungire ahabw’okwesiga obuhabuzi bwa Yehova. N’obu yaabaire ataine ngabo n’amacumu garikumara, Yehova akamugambira kuza kurwanisa Sisera mukuru w’eihe ry’Abanyakanaani abaabaire biine eby’okurwanisa bingi. (Bar. 5:8) Nabikazi Debora akagambira Baraki kushuma omu ruhita aze kurwanisa Sisera n’ebigari bye 900. Baraki akooroba n’obu yaabaire naamanya ngu ebigaari nibigyenda gye omu mwanya oguteraire. Abaserukare ku baashumire kuruga aha kibungo Tabori, Yehova akagwisa enjura nyingi. Ebigaari bya Sisera bikashaayira omu byondo, Yehova yaahwera Baraki kusingura. (Bar. 4:1-7, 10, 13-16) Naitwe, Yehova naija kutuhwera kusingura twamwesiga kandi tukakuratira obuhabuzi obu arikutuha kurabira omu kibiina kye.​—Bir. 31:6.

19. Ahabw’enki nooyenda kuguma otarikutengyetsibwa?

¹⁹ Nikitwetengyesa kugumizamu tuhami twaba tukiri omu ntebeekanisa y’obusingye obu. (1 Tim. 6:11, 12; 2 Pet. 3:17) Ka tumariirire kutatengyetsibwa okuhiiganisibwa, okugyemeserezibwa okutari kwa butunu, emiteekateekyere y’abantu, oburyarya, n’ebirikuhuzya. (Efe. 4:14) Kureka, ka tugume tuhamiire ahari Yehova tutarikutengyetsibwa kandi tworobere ebiragiro bye. Kwonka twine n’okugira emiteekateekyere eringaniire. Omu kicweka ekirikukurataho, nituza kureeba oku Yehova na Yesu barikutaho eky’okureeberaho kirungi ky’okuba abaringaniire.