Tata akaba ari omureeberezi omu United Church of Canada, n’ahabw’ekyo aha Sande nyowe na murumuna wangye akaba atwohereza ahu barikwegyeseza abaana eby’ediini aha sande reero bwanyima tumwegaitaho shaaha 5 z’akasheeshe kuza aha kanisa. Omu eihangwe, tukaba tugyenda na maaweitwe aha Kyombeko ky’Obukama. Ekyo kikaba kitubaasisa kureeba entaaniso eri aha gati y’ediini ezo zombi.

Maama akagambira banywani be Bob na Marion Hutcheson ebi yaabaire naayega, kandi nabo bakakunda mazima. Omuri 1958 ab’eka ya Hutcheson bakantwara n’aboojo baabo bashatu aha ruteerane rw’ebiro munaana “Divine Will” orurikubamu n’ab’amahanga agandi omuri New York City. Ku ndikureeba enyima hati ninyetegyereza, ngu kikaba kitoorobi kugyenda naanye, kwonka oruteerane orwo nirwo rwakirizeyo kumbonerera.

Obu naabaire ndi omushogoyo, tukaba nitutuura aha faamu ahu naabaire nindeeberera amatungo. Nkaba nyine ekigyendererwa ky’okuba omushaho w’amatungo. Maama eki akakigambira omureeberezi w’ekibiina kyaitu. Akanyijutsya omu muringo gw’embabazi ngu turi omu “biro by’aha mperu” n’oku okumara emyaka mingi ndikushoma aha yunivasite kirikukwata aha mukago gwangye na Yehova.  (2 Tim. 3:1) N’ekyarugiremu, nkacwamu kutaza aha yunivasite.

Kwonka nabwo, nkaba niinyebuuza eki ndaakore naaheza kushoma siniya. N’obu naabaire ninza kubuurira buri wiikenda, nkaba ntarikukunda obuheereza kandi ndikuteekateeka ngu tindikubaasa kuba payoniya. Omu bwire obwo, tata otari mu mazima na tatento bakaba nibampiga kukora obwire bwona omu kitongore ky’enshumbuushano omuri Toronto. Ahabw’okugira ngu tatento akaba aine omwanya mukuru omu kitongore ekyo, nkaikiriza kukorayo.

Omuri Toronto nkaba niindeezya obwire bw’okukora, kandi ndikukwatanisa n’abatari mu mazima kyandeetera kugumirwa kuhamira aha ntebeekanisa y’eby’omwoyo. Nkabanza kutuura na tatenkuru otari Mujurizi wa Yehova, kwonka ku yaafiire, kikanyetengyesa kusherura omwanya ogundi gw’okutuuramu.

Eka ya Hutcheson, abantwire aha ruteerane oruhango omuri 1958 nkaba nimbatwara nk’abazaire bangye. Bakanyeta kutuura owaabo kandi bakampwera munonga kutunguuka omu by’omwoyo. Omuri 1960, nkabatizibwa na mutabani waabo John. John ku yaabaire payoniya, kikampiga kwongyera aha buheereza bwangye. Ab’eishe-emwe omu kibiina bakeetegyereza ngu nkaba nintunguuka omu by’omwoyo, kandi bwanyima nkatooranwa kwebembera Ishomero ry’Obuheereza. a

Omuri 1966, nkataaha omu bushwere na Randi Berge, payoniya omweziriki owaabaire ayeteekateekire kuheereza ahu ababuurizi barikwendwa munonga. Omureeberezi wa saketi akooreka ngu naatufaho, kandi akatushaba kuza kuhwera ekibiina ekya Orillia, Ontario. N’ahabw’ekyo tuketebeekanisa, twazayo ahonaaho.

Ahabw’omujinya ogu Randi yaabaire aine, ku twahikire Orillia, nkamwegaitaho naaba payoniya. Ku naayejumbiire kimwe omu buheereza, nkatunga okushemererwa ahabw’okukoresa Baibuli n’okureeba abantu nibongyera kukunda amazima. Tukashemererwa ahabw’okuhwera omushaija n’omukazi we  omuri Orillia kukora empinduka ezirikwetengyesa bakaba abaheereza ba Yehova.

Obu twabaire turi Toronto, nkabugana Arnold MacNamara, owaabaire aine obujunaanizibwa bukuru aha Beseeli. Akambuuza yaaba niinyenda kuba payoniya w’omutaano. Nkamugarukamu ahonaaho ngu, eego niinyenda! Beitu hatari muri Quebec!” Abantu b’ekicweka kya Canada ekirikukoresa Orungyereza nibo baandeeteire kugira emiteekateekyere etahikire aha butaikirizana obwabaire buri omu kyanga ekirikukoresa Orufaransa omuri Quebec. Omu bwire obwo, ekigombe ky’eby’obutegyeki omuri Quebec kikaba nikihiga abantu kwetaanisa ahari Canada.

Arnold akangarukamu ati: “Quebec nigwo mwanya gwonka ahu bariyo niboohereza baapayoniya b’omutaano omu bwire obu.” Nkaikiriza ahonaaho kuzayo. Nkaba niinkimanya ngu Randi akaba naayenda kuza kuheereza omu mwanya ogwo. Bwanyima, nketegyereza ngu nkacwamu gye kuzayo!

Bwanyima y’okumara saabiiti itaano turikwega Orufaransa nyowe na Randi n’ondiijo w’eishe-emwe n’omukazi we tukaza Rimouski, mahiro nka 336 kuruga Montreal. Tukaba tukiine bingi by’okwega, kandi ekyo kiketegyerezibwa gye obu naabaire ninshoma ebirango aha ruteerane rw’ekibiina. Nkagira ngu aha ruteerane oruhango oruraabeho nitwija kuba twine “maaya” nyingi omu mwanya gw’okugira ngu nitwija kuba twine “abagyenyi kuruga Austria.”

Ku twabaire turi Rimouski, banyaanyazi-itwe bana abatari mu bushwere hamwe n’eka ya Huberdeaus n’abahara baabo babiri bakatwegaitaho. Ab’eka ya Huberdeaus bakapangisa enju y’ebishengye mushanju ei baapayoniya baabaire nibaraaramu, tukagyeta White House ahakuba ekaba aine emyoyo zirikwera kandi esiigire erangi erikwera. Tukaba nitukira kutuuramu abantu nka 12 nari 14. Ahabw’okugira nyowe na Randi tukaba turi baapayoniya b’omutaano, tukaba tuza kubuurira omu kasheeshe, omu ihangwe n’omu mwabazyo, n’ahabw’ekyo kikaba nikitushemeza kuba twine ow’okugyenda nawe omu kubuurira omu bwire bw’obutiti.

Tukoongyera kunywana baapayoniya abo abeesigwa kandi bakaba bari nka b’eka yaitu. Obumwe tukaba tushutama hamwe aheeru kwota omuriro, turya hamwe nari tuteeka nk’eka. Omwe aha b’eishe-emwe akaba naamanya kweshongora, n’ahabw’ekyo buri Rwamukaaga ny’ekiro tukaba nitukira kweshongora kandi tuzina.

Ekicweka kya Rimouski kikarugamu ebirungi! Omu myaka etaano, tukabaasa kureeba abeegi bingi ba Baibuli nibatunguuka kuhika aha kubatizibwa. Omubaro gw’ababuurizi gukeyongyera kuhika nka 35.

Omuri Quebec, tukatendekwa kuba ababuurizi barungi. Tukareeba oku Yehova arikutuhwera omu buheereza n’okutunga ebirikwetengyesa eby’omubiri. Ekindi, tukeega kukunda abantu abarikugamba Orufaransa, orurimi rwabo, n’entwaza yaabo.​—2 Kor. 6:13.

Akakiiko k’eitaagi kakatushaba kitaraariire kuza kuheereza omu tauni ya Tracadie, aha mwaro gwa burugwa izooba bwa New Brunswick. Eki kikaba kitoorobi ahakuba nibwo twabaire tuherize kushashurira enju y’okuraaramu, kandi nkaba nkiineyo obwire bw’okwegyesa aha ishomero. Ekindi, abeegi baitu ba Baibuli nibwo baabaire baherize kuba ababuurizi kandi tukaba tutandikire kwombeka Ekyombeko ky’Obukama.

Wiikenda yoona tukagimara nitushaba aha nshonga y’okuza Tracadie, omwanya ogwabaire nigutaanaho  kakye na Rimouski. Kwonka tukacwamu kuzayo ahakuba niyo Yehova yaabaire naayenda ngu tuze. Tukeesiga Yehova kuba niwe yaatuhwera kandi tukareeba oku yaatubaasise kusingura buri buremeezi. (Mal. 3:10) Ahabw’okugira ngu Randi akaba ari omukazi w’eby’omwoyo, arikwefeerereza, kandi arikukunda kushemererwa kikatworobera kufuruka.

Robert Ross niwe yaabaire ari omureeberezi wenka omu kibiina kyaitu ekisya. We n’omukazi we Linda bakaba bari baapayoniya omu kicweka ekyo kandi bakacwamu kugumayo bwanyima y’okuzaara omwana waabo w’okubanza. N’obu baraabe baabaire biine omwana mwojo w’okworora, nyowe na Randi tukakwatwaho munonga obufura, okumariirira, n’obweziriki bwabo omu kubuurira.

Bwanyima y’okuheereza omuri Tracadie nka baapayoniya kumara emyaka ebiri, tukagaruka twayetwa kitaraariire kuza omu murimo gwa saketi. Tukaheereza omu saketi y’Orungyereza kumara emyaka mushanju, bwanyima tukoherezibwa omu saketi y’Orufaransa omuri Quebec. Omureeberezi wa saketi eya Quebec, Léonce Crépeault, akaba naakira kunsiima naaheza kuha embazo. Kwonka bwanyima akaba ambuuza ati: “Waaba noobaasa kwongyera ota kuhwera abahurikize kumanya eki biine kukora?” b Okureeba oku yaabaire naanfaho kikampwera kuta omutima aha ku ndikubaasa kworobya embazo zangye zikongyera kwetegyerezibwa gye.

Eki ndikukira kwijuka omu buheereza bwangye n’ekyabaireho omuri 1978 aha ruteerane orurikubamu ab’amahanga agandi “Victorious Faith” omuri Montreal. Nkaba ninkora aha nshonga z’eby’okurya. Tukaba nituteebereza ngu nihaija kubaho abantu 80,000, kandi entebeekanisa y’okubariisa ekaba ehindukire. Buri kimwe kikaba kiri kisya: ebikoreso, eby’okurya, n’enteeka nsya y’eby’okurya. Tukaba twine furiigi mpango nka 20 kandi obumwe zikaba zitarikukora. Eizooba ry’okubanza ery’oruteerane ritakatandikire, tukaba tutarikubaasa kutaaha omu kishaayi zitakahikire shaaha mukaaga z’ekiro ahakuba hakaba harimu eby’emizaano. Kandi tukaba twine kutandika kuteeka kyantsya butakabaire omu kasheeshe! Tukaba turuhire, kwonka nkeegyera bingi aha bakozi bagyenzi bangye abaabaire nibakora n’amaani, bakuzire omu by’omwoyo, kandi bashemereirwe. Tukaba twine obumwe, ekyatureeteire  kuba abanywani n’okuhitsya hati. Tukagira okushemererwa ahabw’okuhwera omu kutebeekanisa oruteerane ruhango omuri Quebec, omu kicweka ekyabaire kirimu okuhiiganisibwa kw’amaani omu myaka ya 1940 na 1950!

Nkeegyera bingi aha bareeberezi bagyenzi bangye omu nteerane empango ezaabaireho omuri Montreal. David Splane, hati ori aha Kakiiko Akareeberezi, akareeberera oruteerane oruhango omwaka gumwe. Bwanyima, aha ruteerane oruhango ku naahairwe obujunaanizibwa obwo, David akampwera.

Omu 2011, bwanyima y’okumara emyaka 36 omu murimo gwa saketi nkeetwa kwegyesa omu Ishomero ry’Abareeberezi b’Ekibiina. Nyowe na Randi tukaraara aha bitanda 75 bitarikushushana omu myaka ebiri, kwonka kikarugamu ebirungi. Burikuhendera kwa saabiiti, abareeberezi bakaba baba baine okushemererwa kwingi ahabw’okureeba oku Akakiiko Akareeberezi kaabaire nikabafaho omu by’omwoyo.

Bwanyima, nkeegyesa omu Ishomero ry’Ababuurizi b’Obukama. Abeegi bakaba nibakira kuruha ahabw’okugira bingi by’okukora, barikushutama kwega kumara eshaaha nka mushanju buri izooba, barikutebeekanisa eby’okukorera omu ka buri mwabazyo kumara eshaaha ishatu, kandi baine embazo nka ina nari itaano buri saabiiti. Nyowe n’omwegyesa ondiijo tukabashoboororera ngu bakaba batarabaase kubikora Yehova kuri atarabahweraire. Ninyija kuguma ninyijuka oku abeegi baabaire nibatangaara bareeba ngu babaasize kukora bingi kukira oku baabaire nibateekateeka ahabw’okwesiga Yehova.

Ahabw’okugira ngu maawe akaba naafayo aha bandi kikahwera abu yaabaire naayegyesa Baibuli kutunguuka, na tata kugira emiteekateekyere mirungi aha mazima. Bwanyima y’ebiro bishatu maawe aherize kufa, kikatutangaaza kureeba tata naaza aha Kyombeko ky’Obukama kuhurira orubazo rwa boona, kandi akagumizamu naaza omu nteerane emyaka 26 eyaakuratsireho. N’obu tata araabe atarabatiziibwe, abareeberezi bakangira ngu butoosha niwe yaabaire naabanza kwija omu nteerane buri saabiiti.

Maawe akateeraho abaana be eky’okureeberaho kirungi. Banyaanyazi bonshatu n’abashaija baabo nibaheereza gye Yehova. Banyaanyazi babiri nibaheereza aha ofiisi y’eitaagi omuri Portugal kandi ondiijo naaheereza omuri Haiti.

Nyowe na Randi hati turi baapayoniya b’omutaano omuri Hamilton, Ontario. Obu twabaire nitutaayaayira ebibiina, tukakaba nitukunda kugyenda n’abandi kugarukira abantu nari abeegi ba Baibuli. Kwonka hati nitushemererwa kureeba abu turikwegyesa Baibuli nibatunguuka omu by’omwoyo. Kandi ku turikunywana ab’eishe-emwe na banyaanyazi-itwe omu kibiina kyaitu ekisya, nikitugumya ku turikureeba oku Yehova arikubahwera omu bwire bugumire n’omu mbeera nungi.

Ku turikureeba enyima, nitusiima munonga abantu baingi abaayorekire ngu nibatufaho. Kandi, naitwe nituteeraho “kworeka ngu nitufayo” aha bandi, turikubahiga kutunguuka omu by’omwoyo. (2 Kor. 7:6, 7) Nk’eky’okureeberaho, omu ka emwe, omukazi, omutabani, n’omuhara boona bakaba bari omu buheereza bw’obutwire. Nkabuuza nyineeka yaaba araateekateekireho kuba payoniya. Akangarukamu ngu akaba naashagika baapayoniya bashatu. Nkagaruka naamubuuza nti: “Noobaasa kubashagika gye kukira Yehova?” Nawe nkamuhiga kutunga okushemererwa nk’okwabo. Akaba payoniya omu meezi mukaaga.

Nyowe na Randi nitwija kugumizamu nitugambira ‘ab’obusingye bwona oburikukurataho’ ebirikukwata ahari Yehova ‘n’eby’okutangaaza ebi yaakozire’ kandi twine amatsiko ngu nabo nibaija kushemererwa omu kumuheereza nkaitwe.​—Zab. 71:17, 18.