1. Ni mu muringo ki oku Abakristaayo baine kuba nk’omuti? (Reeba n’ekishushani.)

 “OMUYAGA tiguhenda muti gworobi.” Enfumu egyo neeyoreka omutwarize mukuru gw’okworoba ogurikubaasisa emiti emwe kukura gye. Abakristaayo kubaasa kukura gye omu by’omwoyo, baine kworoba haabaho empinduka. Bata shi? Twine kuba turinganiire turikubaasa kuhinduramu embeera zaitu zaahinduka kandi turikuha ekitiinisa emiteekateekyere n’okucwamu kw’abandi.

2. Ni mitwarize ki eraatuhwere embeera zaitu zaahinduka, kandi nituza kugamba ahari ki omu kicweka eki?

² Itwe abaheereza ba Yehova, ni kirungi kuba abaringaniire. Twine kuba abacureezi kandi abanyasaasi. Omu kicweka eki, nituza kureeba oku emitwarize egi yaahweraire Abakristaayo abamwe kugumisiriza, embeera zaabo ku zaahindukire. Kandi nituza kureeba oku emitwarize egyo erikubaasa kutuhwera. Ka tubanze twegyere ahari Yehova na Yesu aboorekire ngu baringaniire omu muringo oguhikiriire.

3. Ni buhame ki oburikworeka ngu Yehova aringaniire?

³ Yehova naagambwaho nka “Rukiri” ahabw’okuba tarikutengyetsibwa. (Bir. 32:4) Kwonka nabwo, aringaniire. Embeera ku erikuguma neehinduka omu nsi egi, Ruhanga waitu naahinduramu kugira ngu ekigyendererwa kye kibaase kuhikiirira. Yehova akahanga abantu omu kishushani kye barikubaasa kumanyiira embeera zaahinduka. Akatuha emisingye ya Baibuli erikutuhwera kucwamu n’obu twakuhikwaho embeera zigumire. Eky’okureeberaho kya Yehova n’emisingye ya Baibuli  n’obuhame oburikworeka ngu n’obu Yehova araabe ari “Rukiri,” aringaniire.

4. Ha eky’okureeberaho ekirikworeka ngu Yehova aringaniire. (Abaleevi 5:7, 11)

⁴ Emihanda ya Yehova ehikiriire kandi eringaniire. Tarikuremera aha nshonga omu ku arikutwariza abantu. Teekateeka aha ku Yehova yaatwariize Abaisraeli omu muringo guringaniire. Taragizire ngu abagaiga n’abooro baine kuhayo ebitambo ebirikwingana. Omu mbeera ezimwe, akaba aikiriza omuntu kuhayo ebitambo kurugiirira aha mbeera ze.​—Shoma Abaleevi 5:7, 11.

5. Ha eky’okureeberaho ekirikworeka ngu Yehova n’omucureezi kandi aine esaasi.

⁵ Yehova naahigwa obucureezi bwe n’esaasi kutwaza omu muringo guringaniire. Nk’eky’okureeberaho, Yehova akooreka ngu n’omucureezi obu yaabaire ari haihi kucwekyereza abantu babi ba Sodoma. Yehova akakoresa baamaraika be, kugambira Looti kuhungira omu nshozi. Looti akatiina kuzayo. N’ahabw’ekyo akeeshengyereza Yehova, ngu we n’eka ye baikirizibwe kuhungira Zoari, tauni nkye ei Yehova yaabaire acwiremu kucwekyereza. Yehova akaba naabaasa kuremera aha nshonga ngu Looti akore eki yaamugambira. Kwonka, akakora eki Looti yaamushabire, n’obu Zoari yaabaire eri ey’okucwekyerezibwa. (Kut. 19:18-22) Ebyasha ebyakuratsireho, Yehova akagirira esaasi abatuuzi ba Nineeve. Akatuma nabi Yona kugambira abantu babi ba Nineeve ngu bo n’orurembo bakaba nibaza kucwekyerezibwa. Kwonka abantu ba Nineeve ku baayetisiize, Yehova akabagirira esaasi tiyacwekyereza n’orurembo.​—Yon. 3:1, 10; 4:10, 11.

6. Ha eby’okureeberaho kworeka oku Yesu yaatooreize Yehova omu kuba oringaniire.

⁶ Yesu akatooreza Yehova omu kuba oringaniire. Akooherezibwa omu nsi kubuurira ‘entaama z’oruganda rwa Israeli ezaabuzire.’ Kwonka akooreka ngu aringaniire omu kuhikiiriza obujunaanizibwa bwe. Nk’eky’okureeberaho, omukazi owaabaire atari Mwisraeli akamweshengyereza kukiza omuhara owaabaire “ariho daimoni.” Yesu akagirira omukazi ogwo esaasi yaakora eki yaamushabire, yaakiza omuhara. (Mat. 15:21-28) Teekateeka aha ky’okureeberaho ekindi. Obu Yesu yaabaire atandikire obuheereza bwe akagira ati: ‘Weena oriinyehakana, naanye ninyija kumwehakana.’ (Mat. 10:33) Mbwenu shi akeehakana Petero, owaamwehakaine emirundi eshatu? Ngaaha. Yesu akateekateeka aha kweteisa n’okwikiriza kwa Petero. Bwanyima ya Yesu kuzooka, akeeyoreka Petero kandi naabaasa kuba yaamuhamiize ngu amusaasire kandi ngu naamukunda.​—Luk. 24:33, 34.

7. Okuhikaana n’ebiri omu Abafilipi 4:5, nitwenda ngu tumanywe tuta?

⁷ Twareeba ngu Yehova Ruhanga na Yesu Kristo baringaniire. Kandi shi itwe? Yehova naayenda ngu tube abaringaniire. (Shoma Abafilipi 4:5.) Envunuura emwe neegamba aha mushororongo ogu eti: “Manywa nk’oringaniire.” Nitubaasa kwebuza tuti: ‘Abandi  nibandeeba nk’omuntu oringaniire, oyorobi, kandi orikugumisiriza? Nari nk’omuntu orikuremera aha nshonga? Nimba niinyenda ngu abandi bakore ebintu nk’oku ndikuteekateeka, nari nimbahurikiza kandi nyikirizana n’eki barikugamba kyaba nikyetengyesa?’ Twaba abaringaniire nitworeka ngu nitutooreza Yehova na Yesu. Ka tugambe aha mbeera ibiri ahu kiri kikuru kuba abaringaniire, embeera zaitu zaahinduka, emiteekateekyere n’okucwamu kw’abandi kwaba nikutaana n’okwaitu.

8. Niki ekirikubaasa kutuhwera kuba abaringaniire embeera zaahinduka? (Reeba n’obugambo obw’ahansi.)

⁸ Okuringaanira nikitwariramu okuhinduramu embeera zaahinduka. Ekyo kyabaho embeera nizongyera kuguma. Nitubaasa kutunga oburemeezi omu magara ahonaaho. Ahu turikutuura, eby’entaatsya n’eby’obutegyeki nibibaasa kuhinduka kitaraariire kireetere embeera zaitu kuguma munonga. (Mub. 9:11; 1 Kor. 7:31) Kandi obuheereza bwaitu bwahinduka nikibaasa kutugumira. N’obu haakubaho mpinduka ki, nitubaasa kumanyiira embeera nsya twakora ebintu bina ebi: (1) twikiriza embeera nk’oku eri, (2) twateekateeka aha by’omumaisho, (3) twata omutima aha birungi, kandi, (4) tukahwera abandi. b Ka tushwijume eby’okureeberaho ebirikworeka oku turikugasirwa twakora ekyo.

9. Omushaija n’omukazi we abamiisani bakagumisiriza bata okugyezibwa okwabaireho kitaraariire?

⁹ Ikiriza embeera nk’oku eri. Emanuele na Francesca bakooherezibwa kuheereza nk’abamiisani omu ihanga erindi. Ku baabaire batandikire kwega orurimi n’okumanyiira ekibiina kyabo ekisya, hakabaho ekigwererezi kya COVID-19 kandi baine kwetaanisa aha bantu abandi. Nyina wa Francesca akafa kitaraariire. Francesca akaba naayenda kuba n’ab’eka ye, kwonka ekigwererezi kikamuremesa kuzayo. Niki ekyamuhweraire kwemera embeera ezo ezaabaire zigumire? Eky’okubanza, Emanuele na Francesca bakashaba Yehova kubaha obwengye bw’okugumisiriza buri-izooba okwaryo. Yehova akagarukamu okushaba kwabo arikurabira omu by’okurya by’omwoyo ebi turikutunga omu bwire obuhikire. Nk’eky’okureeberaho, bakahuumurizibwa ow’eishe-emwe owaabuuziibwe omu vidiyo owaagizire ati: “Ku turikurahuka kwikiriza empinduka nsya, nikitworobera kugaruka kushemererwa n’okukora ebirikutugasira omu mbeera egyo.” c Ekya kabiri, bakahigwa kwongyera kwega kukoresa gye esimu omu kubuurira, nangwa bakatandika kwegyesa omuntu Baibuli. Ekya kashatu, bakasiima okuhuumurizibwa n’obushagiki bw’ab’eishe-emwe b’ekicweka ekyo. Munyaanyazi-itwe omwe omunyambabazi akaba abooherereza Ekyahandiikirwe buri izooba kumara omwaka. Naitwe twaikiriza embeera nk’oku eri, nitwija kutunga okumarwa omu bi turikukora.

10. Munyaanyazi-itwe omwe akabaasa ata kwemera empinduka y’amaani eyamuhikireho?

¹⁰ Teekateeka aha by’omumaisho, kandi ote omutima aha birungi. Christina, munyaanyazi-itwe owa Romania orikutuura omuri Japan, akeehurira kubi ekibiina ky’Orungyereza eki yaabaire arimu ku kyaihirweho. Kwonka, taragumire naateekateeka aha byabaireho enyima. Kureka, akacwamu kukora  eki arikubaasa omu kibiina ekirikukoresa Orujapani omu kicweka ekyo kandi yaayejumbira kimwe omu kubuurira arikukoresa Orurimi orwo. Akashaba omukazi ou yaakozireho nawe kumuhwera kwega kugamba gye Orujapani. Omukazi ogwo akaikiriza kukoresa Baibuli n’akatabo Yesiimire Amagara Ebiro Byona! kwegyesa Christina Orujapani. Christina akoongyera kugamba gye Orujapani kandi n’omukazi ogwo akatandika kukunda amazima. Twateekateeka aha ki turikubaasa kukora kandi tukata omutima aha birungi, empinduka ezirikubaho kitaraariire nizibaasa kurugamu emigisha ei tutarikuteekateeka.

11. Omushaija n’omukazi we bakagumisiriza bata oburemeezi omu by’entaatsya?

¹¹ Hwera abandi. Omushaija n’omukazi we abarikutuura omu ihanga ahu omurimo gwaitu guzibiirwe bakatunga oburemeezi omu by’entaatsya, eihanga ku ryateirwe obworo. Bakakora mpinduka ki? Eky’okubanza, bakateeraho kutuubya aha nshohoza yaabo. Ekindi, omu mwanya gw’okuta omutima aha buremeezi bwabo, bakacwamu kuhwera abandi barikumara obwire bwingi omu kubuurira. (Byak. 20:35) Omushaija akagira ngu, “okugira bingi by’okukora omu buheereza kikatuhwera kuta omutima aha kukora ebi Ruhanga arikukunda omu mwanya gw’okuteekateeka aha bintu bibi.” Embeera zaitu zaahinduka, twine kwijuka ngu ni kikuru kugumizamu nituhwera abandi, na munonga turikubuurira.

12. Entumwa Paulo nitumwegyeraho ki aha bikwatiraine n’okuhinduramu omu kubuurira?

¹² Nikyetengyesa kuhinduramu omu kubuurira. Nitubuurira abantu b’enyikiriza zitarikushushana kandi abarikuruga omu mbeera n’omu mahanga gatarikushushana. Entumwa Paulo akaba naahinduramu, naitwe nitubaasa kumwegyeraho. Yesu akatoorana Paulo kuba “entumwa aha banyamahanga.” (Rom. 11:13) Arikuhikiiriza obujunaanizibwa obwo, Paulo akabuurira Abayudaaya, Abagriika, abantu abashomire, abatashomire, n’ab’eby’obutegyeki. Paulo kubaasa kuhika aha mitima y’abantu abo ab’emiringo etarikushushana, akahinduka byona ahari boona. (1 Kor. 9:19-23) Obu yaabaire naabuurira, akaba ateekateeka aha mbeera y’abantu, ahu barikuruga, n’ebi barikwikiriza kandi ahinduramu kyayetengyesa. Naitwe nitubaasa kuhikiiriza gye obuheereza bwaitu twahinduramu kuhikaana n’embeera z’abarikutuhurikiza.

13. Ni buremeezi ki oburikugambwaho omu 1 Abakorinso 8:9 obu twine kwetantara twaba nituha ekitiinisa emiteekateekyere y’abandi?

¹³ Okuringaanira nikutuhwera kuha ekitiinisa emiteekateekyere y’abandi. Nk’eky’okureeberaho, bamwe ahari banyaanyazi-itwe nibeekoraho, kandi abandi tibarikwekoraho. Abakristaayo abamwe nibakunda kunywa amaarwa makye, kandi abandi nibacwamu kutaganywa. Abakristaayo boona nibakunda kugira amagara marungi, kwonka nibacwamu kuragurirwa omu miringo etarikushushana. Twaba nituhamira aha miteekateekyere yaitu kandi tukateeraho kureetera abari omu kibiina kutushagika, nitubaasa kuteeza abandi entsibo kandi tubareetere okwebaganisamu. Buzima titwakwenzire kukora ekyo! (Shoma 1 Abakorinso 8:9; 10:23, 24) Ka tugambe aha by’okureeberaho bibiri ebirikworeka oku okugyendera aha misingye ya Baibuli kirikutuhwera kugira emiteekateekyere eringaniire n’okurinda obusingye.

14. Ni misingye ki ya Baibuli ei twine kuteekateekaho kyahika aha kujwara n’okweboneza?

¹⁴ Okujwara n’okweboneza. Yehova omu  mwanya gw’okutugambira oku twine kujwara, akatuha emisingye y’okukuratira. Nituba twine kujwara omu muringo ogushemereire abaheereza ba Ruhanga, turikworeka okuringaanira, obucureezi, “n’okwerinda.” (1 Tim. 2:9, 10; 1 Pet. 3:3) N’ahabw’ekyo, titwine kujwara omu muringo ogurikureetera abandi kututaho omutima. Kandi, emisingye ya Baibuli neehwera abareeberezi kwetantara kutaho ebiragiro ebyaabo ebirikukwata aha kujwara n’emishono y’eishokye. Nk’eky’okureeberaho, abareeberezi omu kibiina kimwe bakaba nibenda kuhwera ab’eishe-emwe bamwe eminyeeto abaabaire batandikire kuteega eishokye barikutooreza omushono ogwabaire guhaangire kwonka gutashemeire. Abareeberezi bakaba nibabaasa kubahwera bata batataireho kiragiro? Omureeberezi wa saketi akabahabura kugambira ab’eishe-emwe abo ati: “Waaba ori aha puratifoomu kandi abahurikiize bakata omutima aha ndeebeka yaawe, beitu bitari ebi orikugamba, nikimanyisa ngu hariho oburemeezi omu mijwarire yaawe n’oku orikweboneza.” Omuringo gworobi ogwo gukashoboorora enshonga bataireho kiragiro. d

15. Ni biragiro ki n’emisingye ya Baibuli erikutuhwera twaba nitucwamu aha muringo gw’okuragurirwa? (Abarooma 14:5)

¹⁵ Okuragurirwa. Buri Mukristaayo aine kwecweramu aha muringo gw’okuragurirwa. (Gal. 6:5) Abakristaayo baaba nibacwamu omuringo gw’okuragurirwa, nibaba baine kworobera ebiragiro bya Baibuli ebirikukwata aha kukoresa gye eshagama n’okwetantara eby’obufumu. (Byak. 15:20; Gal. 5:19, 20) Omu nshonga ezimwe, buri omwe naaba aine kwecweramu. Abantu abamwe nibaza omu irwariro kuragurirwa, kandi abandi nibasherura emiringo  endiijo ey’okuragurirwa. N’obu twakuba nitureeba ngu omuringo gw’okuragurirwa guhikire nari gugwire, twine kuha ekitiinisa emiringo y’okuragurirwa ei ab’eishe-emwe na banyaanyazi-itwe barikucwamu. Twine kuguma nitwijuka enshonga ezi: (1) Obukama bwa Ruhanga bwonka nibwo buramarireho kimwe okurwara. (Isa. 33:24) (2) Buri Mukristaayo aine ‘kumanyira kimwe’ ekihikire eki aine kukora. (Shoma Abarooma 14:5.) (3) Titurikwenda kucwera abandi orubanja nari kubateeza entsibo. (Rom. 14:13) (4) Abakristaayo nibooreka rukundo kandi tibarikucwamu ebirikushiisha obumwe bw’ekibiina. (Rom. 14:15, 19, 20) Twaijuka enshonga ezo, nituguma twine omukago murungi n’ab’eishe-emwe na banyaanyazi-itwe kandi nitureetera ekibiina kwongyera kubamu obusingye.

16. Omureeberezi naabaasa kworeka ata okuringaanira omu ku arikukoragana n’abareeberezi bagyenzi be? (Reeba n’ebishushani.)

¹⁶ Abareeberezi baine kutaho eky’okureeberaho kirungi omu kuba abaringaniire. (1 Tim. 3:2, 3) Nk’eky’okureeberaho, omureeberezi tashemereire kuteekateeka ngu ebi arikucwamu nibyo abareeberezi bagyenzi be baine kwikiriza ahabw’okugira ngu naabakira. Naamanya ngu omwoyo gurikwera nigubaasa kureetera weena ori aha kakiiko k’abareeberezi kugamba enshonga erikubaasa kubahwera kucwamu omu muringo gw’obwengye. Kandi haaba hataine musingye gwa Baibuli ogwahendwa, abareeberezi abaine omutwarize gw’okuringaanira nibashagika okucwamu kwa baingi abari aha kakiiko, n’obu barikuba baine emiteekateekyere erikutaana n’eyaabo.

17. Abakristaayo abarikuba baringaniire nibatunga birungi ki?

¹⁷ Abakristaayo nibatunga ebirungi bingi ahabw’okuba abaringaniire. Nitugira enkoragana nungi n’ab’eishe-emwe na banyaanyazi-itwe, kandi ekibiina nikibamu obusingye. Nitushemererwa kuheereza Yehova turi n’abantu abaine emitwarize n’emigyenzo etarikushushana omu kibiina kya Yehova. Okukira byona, twine okumarwa ahabw’okumanya ngu nitutooreza Yehova Ruhanga oringaniire.