1. Ni mazima ki agu waamanyire ku waatandikire kwega Baibuli?

 NOIJUKA obu waatandika kwega Baibuli? Noobaasa kuba waatangaire kumanya ngu Ruhanga aine eiziina. Noobaasa kuba waagizire oburuhuuko kumanya ngu Ruhanga tarikufubira bantu omu muriro ogutarikuraara. Kandi noobaasa kuba waashemereirwe kumanya ngu noija kureeba abakundwa baawe abaafiire kandi otuure nabo omu paradiso aha omu nsi.

2. Oyihireho okwega amazima ga Baibuli, ni mpinduka ki ezindi ezi waakozire? (Abaefeso 5:1, 2)

² Ku waayongyeire kwega Ekigambo kya Ruhanga, okoongyera kukunda Yehova. Rukundo egyo ekakuhiga kugyendera aha bi waayegire. Okabaasa kucwamu gye orikwihirira aha misingye ya Baibuli. Okahindura emiteekateekyere n’emitwarize yaawe kubaasa kushemeza Ruhanga. Nk’oku omwana arikutooreza omuzaire orikumukunda, okaba oriyo nootooreza Sho ow’omu iguru.​—Shoma Abaefeso 5:1, 2.

3. Ni bibuuzo ki ebi turikubaasa kwebuuza?

³ Nitubaasa kwebuuza tuti: ‘Mbwenu shi hati nyongyeire kukunda Yehova, okukira obu naaba Omukristaayo? Kwiha obu naabatizibwa, nyongyeire kuteekateeka n’okutwaza nka Yehova, na munonga omu kworeka ab’eishe-emwe na banyaanyazi-itwe rukundo?’ “Okukunda kwawe okw’okubanza” kwaba kutuubire, otakaahwa amaani. Ekyo nikyo kyahikire aha Bakristaayo omu kyasha ky’okubanza. Kwonka Yesu akaguma abainemu amatsiko kandi naitwe naija kutukorera  nikyo kimwe. (Kush. 2:4, 7) Naamanya ngu nitubaasa kugaruka kugira rukundo ei twabaire twine obu twabanza kwega amazima.

4. Nituza kushwijuma ki omu kicweka eki?

⁴ Ekicweka eki nikiza kugamba aha ku turikubaasa kwongyera kukunda Yehova n’abandi. Bwanyima nituza kureeba emigisha ei turikutunga twakora ekyo.

5-6. Entumwa Paulo akahikwaho buremeezi ki omu buheereza, kwonka niki ekyamuhigire kugumizamu naaheereza Yehova?

⁵ Entumwa Paulo akatunga ebirungi omu buheereza, kwonka akahikwaho oburemeezi bwingi. Paulo akaba naakira kugyenda engyendo ndaingwa, kandi obwire obwo kikaba kitoorobi. Omu ngyendo ze ezimwe, akaba ahikwaho “akabi omu migyera” nari agwa “omu bambuzi.” Obumwe abahakanisa bakaba bamuteera. (2 Kor. 11:23-27) Kandi obumwe Abakristaayo bagyenzi be bakaba batarikumusiima ahabw’okuteeraho kubahwera.​—2 Kor. 10:10; Fil. 4:15.

⁶ Niki ekyahweraire Paulo kugumizamu naaheereza Yehova? Paulo akoongyera kwega bingi aha mitwarize ya Yehova kurabira omu Byahandiikirwe n’ebi yaarabiremu. Paulo akabaasa kuhamiza kimwe ngu Yehova Ruhanga naamukunda. (Rom. 8:38, 39; Efe. 2:4, 5) Kandi ekyo kikamureetera kwongyera kumukunda. Paulo akooreka ngu naakunda Yehova arikumuheereza kandi arikugumizamu naaheereza abarikwera.​—Heb. 6:10.

7. Nitubaasa kuhamya tuta rukundo ei twiniire Yehova?

⁷ Nitubaasa kwongyera kukunda Ruhanga turikweyegyesa Ekigambo kye. Waaba nooshoma Baibuli, teeraho kwetegyereza oku ebi orikushoma birikukwegyesa ahari Yehova. Yebuuze oti: ‘Ebi naashoma nibimpamiza bita ngu Yehova naankunda? Ni mashomo ki agarimu agarikundeetera kumukunda?’

8. Okushaba nikukuhwera kuta kwongyera kukunda Ruhanga?

⁸ Okushaba Yehova butoosha turikumugambira oku turikwehurira n’omuringo ogundi gw’okworeka ngu nitumukunda. (Zab. 25:4, 5) Kandi Yehova naija kugarukamu okushaba kwaitu. (1 Yoh. 3:21, 22) Khanh, munyaanyazi-itwe kuruga Asia, naagira ati: “Omu kubanza nkaba ninkunda Yehova ahabw’ebi naabaire mwegireho, kwonka nkongyera kumukunda ku naareebire oku arikugarukamu okushaba kwangye. Eki kikandeetera kwenda kukora ebirikumushemeza.” b

9. Timoseo akooreka ata ngu naayongyera kukunda abandi?

⁹ Bwanyima ya Paulo kuba Omukristaayo, akabona omutsigazi w’emitwarize mirungi orikwetwa Timoseo. Akaba naakunda Yehova n’abantu. Paulo akagambira Abafilipi ati: “Tinyine ondiijo nka [Timoseo], orita omutima munonga aha byanyu.” (Fil. 2:20) Omu kyahandiikirwe eki, Paulo taragambire aha kubaasa kwa Timoseo okw’okutebeekanisa gye ebintu nari okw’okuba omugambi murungi, kwonka akareeba oku Timoseo arikukunda beene ishe na banyaanya. Hatariho kubangaanisa ab’ebibiina ebi Timoseo yaabaire naataayaayira bakaba baine ekihika ky’okuba nawe.​—1 Kor. 4:17.

10. Anna na iba baakoreka bata ngu nibakunda ab’eishe-emwe na banyaanyazi-itwe?

¹⁰ Naitwe nitusherura oburyo bw’okuhwera Abakristaayo bagyenzi baitu. (Heb. 13:16)  Teekateeka aha ky’okureeberaho kya Anna, owaaba yaagambirweho omu kicweka eki. Bwanyima y’eihunga ry’amaani, we na iba bakaza omuka y’Omujurizi wa Yehova baareeba enju yaabo esiisikaire aha mutwe. Kandi emyenda yaabo ekaba erofahire. Anna naagira ati: “Tukatwara emyenda yaabo twagyozya, twagigorora kandi twagikuba. Itwe tukaba nitukireeba nk’ekikorwa kikye, kwonka kikatureetera kugira omukago guhami nabo n’okuhitsya hati.” Rukundo ei Anna na iba baabaire bainiire ab’eishe-emwe bagyenzi baabo ekabahiga kugira eki baakora kubahwera.​—1 Yoh. 3:17, 18.

11. (a) Okuteeraho kwaitu kworeka abandi rukundo nikubakwataho kuta? (b) Kurugiirira aha Enfumu 19:17, Yehova naatureeba ata twayoreka ngu nitukunda abandi?

¹¹ Twatwariza abandi omu muringo gwa rukundo, nibakira kureeba ngu nituteeraho kuteekateeka n’okutwaza nka Yehova. Kandi nibabaasa kukwatwaho ebikorwa byaitu by’embabazi kukira oku turikuteekateeka. Khanh, owaaba yaagambirweho, naijuka abaabaasize kumuhwera. Naagira ati: “Ninsiima munonga banyaanyazi-itwe abakundwa abaabaire nibabuurira naanye. Bakaba baanyakiira omu ka, bantaayaayisa kurya nabo kyamushana kandi baangarura owangye. Hati ninyetegyereza ngu bakaba nibeefeereza munonga. Kandi bakakikora ahabwa rukundo.” Amazima gari ngu, ti buri omwe naija kutwebaza ahabw’ebi turikumukorera. Khanh naagira ati: “Nkaayenzire kuzimuriira boona abaampweraire omu miringo mingi, kwonka tindikumanya ei barikutuura. Kwonka Yehova naamanya ei bari kandi naija kubashumbuusha.” Khanh ahikire. Yehova naareeba n’ebikorwa bikye by’embabazi ebi turikukorera abandi. Okwefeerereza okwo naakureeba nk’okw’omuhendo kandi nk’eibanja eri aine kushashura.​—Shoma Enfumu 19:17.

12. Ab’eishe-emwe nibabaasa kworeka bata ngu nibakunda ekibiina? (Reeba n’ebishushani.)

 ¹² Ku oraabe ori ow’eishe-emwe, noobaasa kworeka ota ngu nookunda abandi kandi nooyenda kubahwera? Ow’eishe-emwe muto orikwetwa Jordan akabuuza omureeberezi oku arikubaasa kwongyera kuhwera omu kibiina. Omureeberezi akamusiima ahabw’entunguuka ei yaabaire akozire kandi yaamugambira eki arikubaasa kukora kwongyera kuhwera. Nk’eky’okureeberaho, akagambira Jordan kuhika kare aha Kyombeko ky’Obukama kuramutsya abandi, kugarukamu omu nteerane, kushagika guruupu ye y’okubuurira butoosha, n’okusherura oburyo bw’okuhwera abandi. Jordan ku yaataire omu nkora obuhabuzi obwo, akaba atarikwega obukoryo busya kyonka, kureka akaba naayongyera n’okukunda ab’eishe-emwe na banyaanya. Jordan akeetegyereza ngu ow’eishe-emwe yaaba omuheereza, naaba atarikutandika kuhwera abandi, kureka naaba naagumizamu kubahwera.​—1 Tim. 3:8-10, 13.

13. Rukundo ekahiga eta ow’eishe-emwe orikwetwa Christian kugaruka kuba omureeberezi?

¹³ Kandi shi ku waakuba waabaireho omuheereza nari omureeberezi? Yehova naijuka ebi waakozire enyima na rukundo eyaakuhigire kubikora. (1 Kor. 15:58) Kandi naareeba oku orikugumizamu nookunda abandi. Ow’eishe-emwe orikwetwa Christian akeehurira kubi ku yaihirweho obujunaanizibwa bw’okuba omureeberezi. Kwonka naagira ati: “Nkacwamu kukora kyona eki ndikubaasa kuheereza Yehova ahabw’okumukunda beitu ti ahabw’obujunaanizibwa.” Bwanyima, akagaruka yaaba omureeberezi. Christian naagira ati: “Nkabanza kutiina kugaruka kuheereza. Kwonka nkamanya ngu Yehova ku araabe angiriire embabazi akanyikiriza kugaruka kuba  omureeberezi, nyine kukikora ahabwa rukundo ei mwiniire n’ab’eishe-emwe bagyenzi bangye.”

14. Nooyegyera ki aha byagambirwe munyaanyazi-itwe kuruga Georgia?

¹⁴ Abaheereza ba Yehova nibooreka ngu nibakunda bataahi baabo. (Mat. 22:37-39) Nk’eky’okureeberaho, Elena, munyaanyazi-itwe kuruga omu ihanga rya Georgia, naagira ati: “Omu kubanza, ekyampigire kubuurira ni rukundo ei nyiniire Tata ow’omu iguru, Yehova. Kwonka ku naayongyeire kumukunda, nkongyera n’okukunda abantu. Nkateeraho kuteekateeka aha buremeezi obu barikurabamu, n’enshonga ei ndikubaasa kugambaho kubahika aha mutima. Okukora ekyo, kikampiga kwongyera kubahwera.”​—Rom. 10:13-15.

15-16. Nk’oku kirikworekwa omu bishushani, ni migisha ki erikuruga omu kworeka abandi rukundo?

¹⁵ Twakunda ab’eishe-emwe, ti bonka abarikugasirwa. Ekigwererezi kya COVID-19 ku kyatandikire, ow’eishe-emwe orikwetwa Paolo n’omukazi we bakahwera banyaanyazi-itwe bingi abakaikwire kwega kukoresa ebyoma byabo kubuurira. Omwe aharibo owaabaire naagumirwa kukoresa ekyoma kye akarugaho yaayega kukikoresa. Akabaasa kukikoresa kweta abanyabuzaare be aha Kiijutsyo. Abantu 60 aharibo bakabaho barikukoresa vidiyo! Munyaanyazi-itwe ogwo n’abanyabuzaare be boona bakagasirwa ahabw’okuteeraho kwa Paolo n’omukazi we.  Bwanyima, munyaanyazi-itwe akahandiikira Paolo arikumugira ati: “Mwebare kutwegyesa itwe abakaikwire. Titurikwija kwebwa oku Yehova ayorekire ngu naatufaho n’okuteeraho kwanyu mutari kweganda.”

¹⁶ Eky’okureeberaho kya Paolo nitukyegyeraho eishomo rikuru. Nikiijutsya ngu rukundo neekirira kimwe obwengye n’okubaasa kw’omuntu. Naagira ati: “Nkaba nimpeereza nk’omureeberezi wa saketi. Obunaku obu, niimanya ngu ab’eishe-emwe nibabaasa kuba baayebirwe embazo ezi naahaire, kwonka nibakiijuka ebi naabakoreire.”

17. Ni baahi abandi abarikugasirwa twayoreka rukundo?

¹⁷ Twagirira abandi rukundo, nitugasirwa omu miringo ei tutarikuteekateeka. Jonathan, orikutuura New Zealand, eki akakyereebera butunu. Aha Rwamukaaga omu ihangwe, akareeba payoniya naabuurira aha rubaju rw’omuhanda. Jonathan akacwamu kubuurira na payoniya ogwo buri Rwamukaaga omu ihangwe. Akaba atarikumanya ngu nawe naija kugasirwa omu kikorwa ekyo eky’embabazi. Jonathan naagira ati: “Omu bwire obwo nkaba ntarikukunda kubuurira, kwonka ku naareebire oku payoniya ogwo yaabaire naayegyesa, n’ebirungi ebirikuruga omu buheereza bwe, kikandeetera kukunda kubuurira. Kandi nkatunga omunywani murungi owaampweraire kutunguuka omu by’omwoyo, kukunda obuheereza n’okwirira haihi Yehova.”

18. Yehova naayenda ngu tukore ki?

¹⁸ Yehova naayenda ngu twena twongyere kumukunda kandi tukunde n’abandi. Nk’oku twayega, nitubaasa kwongyera kumukunda turikushoma Ekigambo kye, tukakiteekateekaho kandi tukamushaba obutoosha. Nitwongyera kukunda ab’eishe-emwe na banyaanyazi-itwe twabahwera omu miringo erikureebwa butunu. Rukundo yaitu yaaguma neeyeyongyera, nitwija kwongyera kwirira haihi Yehova n’eka yaitu y’eby’omwoyo. Kandi nitwija kuguma twine enkoragana nungi nabo ebiro byona.