EKICWEKA EKY’OKWEGA 28
EKYESHONGORO 123 Okworobera Entebeekanisa ya Yehova ey’Obwebembezi
Nootaanisa Amazima n’Ebishuba?
“Mwemerere, mwezirikire amazima omu nda nk’orukoba.”—EFE. 6:14.
ENTIMA
Okwetendeka kumanya entaaniso eri aha gati y’amazima agu twegire kuruga ahari Yehova, n’ebishuba ebi Sitaane n’abarikutuhakanisa barikwenegyeza.
1. Abaheereza ba Yehova nibatwara bata amazima?
ABAHEEREZA ba Yehova nitukunda amazima agari omu Kigambo kye. Nitwegamiza okwikiriza kwaitu aha mazima. (Rom. 10:17) Nituhamiza kimwe ngu Yehova akataho ekibiina Ekikristaayo kuba “enyomyo kandi obuhamizo bw’amazima.” (1 Tim. 3:15) Nitushemererwa kworobera abareeberezi b’ekibiina baaba nibashoboorora amazima ga Baibuli, kandi barikutuha obuhabuzi oburikuhikaana n’ebi Ruhanga arikukunda.—Heb. 13:17.
2. Kurugiirira ahari Yakobo 5:19, nitubaasa kugira buremeezi ki bwanyima y’okwega amazima?
2 Kwonka, na bwanyima y’okwikiriza amazima n’okumanya ngu twine kukuratira obuhabuzi bw’ekibiina kya Yehova, nitubaasa kuhabisibwa. (Shoma Yakobo 5:19.) Sitaane naayendera kimwe kutureetera kuteesiga Baibuli, n’obuhabuzi obu turikuheebwa ekibiina kya Ruhanga.—Efe. 4:14.
3. Ahabw’enki twine kuhamira aha mazima? (Abaefeso 6:13, 14)
3 Shoma Abaefeso 6:13, 14. Juba, Omuregi naija kukoresa pokopoko y’amaani kureetera amahanga goona kurwanisa Yehova. (Kush. 16:13, 14) Ekindi, Sitaane naija kwongyeramu amaani kuhabisa abaheereza ba Yehova. (Kush. 12:9) N’ahabw’ekyo, ni kikuru kwetendeka kumanya entaaniso eri aha gati y’amazima n’ebishuba, kandi tukoorobera amazima. (Rom. 6:17; 1 Pet. 1:22) Okuhonokaho kwaitu omu kubonabona kwingi, nikwija kurugiirira ahari ekyo.
4. Nituza kushwijuma ki omu kicweka eki?
4 Omu kicweka eki, nituza kushwijuma emitwarize ebiri erikwetengyesa kubaasa kumanya amazima ga Baibuli, n’okwikiriza obuhabuzi bw’ekibiina kya Ruhanga. Bwanyima nituza kureeba obuhabuzi bw’emiringo eshatu obu twine kukuratira kubaasa kuguma tuhamiire aha mazima.
EMITWARIZE ERIKWETENGYESA KUMANYA AMAZIMA
5. Okutiina Yehova nikutuhwera kuta kumanya amazima?
5 Okutiina Yehova. Twaba nitutiina Yehova omu muringo oguhikire, titurikwija kukora ekintu kyona ekirikumugwisa kubi. Twine ekihika ky’okumanya entaaniso eri aha gati y’ekihikire n’ekigwire, amazima n’ebishuba, kugira ngu tubaase kusiimwa Yehova. (Enf. 2:3-6; Heb. 5:14) Obu bingi ebirikukira kushemeza abantu bitarikushemeza Yehova, titwine kwikiriza okutiina abantu kukira rukundo ei twiniire Yehova.
6. Okutiina abantu kikareetera kita abakuru 10 b’Abaisraeli kuremwa kugamba amazima?
6 Twatiina abantu kukira Ruhanga, nitubaasa kuruga omu mazima. Teekateeka aha ky’okureebera ky’abakuru b’abantu 12 abaatatsire ensi ei Yehova yaabaire araganiise kuha Abaisraeli. Ikumi aharibo bakatiina munonga Abanyakanaani kukira oku baabaire nibakunda Yehova. Bakagambira Abaisraeli bagyenzi baabo bati: “Titurikubaasa kwinamukayo kurwana na bari bantu, ahabw’okuba nibatukiza amaani.” (Kub. 13:27-31) Omu mireebere y’abantu, Abanyakanaani bakaba nibakiza Abaisraeli amaani. Kwonka okugira ngu Abaisraeli bakaba batarikubaasa kusingura abazigu baabo kikoreka ngu, tibarateekateekire ahari Yehova. Entatsi ikumi bakaba baine kuta omutima aha ki Yehova yaabaire naayenda ngu Abaisraeli bakore. Kandi bakaba baine kuteekateeka aha bi yaabaire aherize kubakorera. Ekyo kikaba nikiija kubahwera kumanya ngu Yehova aine amaani maingi kukira Abanyakanaani. Okutaana n’entatsi abo abaabaire bataine kwikiriza, Yoshua na Kalebu bakaba nibenda kusiimwa Yehova. Bakagambira abantu bati: ‘[Yehova] ku araabe naatusiima, naija kugituhitsyamu, agituhe.’—Kub. 14:6-9.
7. Nitubaasa kwongyera tuta kutiina Yehova? (Reeba n’ekishushani.)
7 Kubaasa kwongyera kutiina Yehova, twine kuta omutima aha kucwamu ebirikumushemeza. (Zab. 16:8) Waaba nooshoma Baibuli, yebuuze oti: ‘Ku ogire ngu nkaba ndi omu mbeera egi, nkaba niinyija kucwamu nta?’ Nk’eky’okureeberaho, teera akashushani ohurikiize abakuru b’Abaisraeli barikugamba ebigwire. Okaba noija kwikiriza ebi baagambire kandi otiina abantu, nari rukundo ei oiniire Yehova n’okwenda kumushemeza bikaba nibiija kusingura okutiina? Abaisraeli boona bakaremwa kwikiriza amazima agu Yoshua na Kalebu baagambire. N’ekyarugiremu, bakafeerwa omugisha gw’okutaaha omu Nsi Eyaaraganisiibwe.—Kub. 14:10, 22, 23.
Okaba noija kwikiriza oha? (Reeba akacweka 7)
8. Twine kuteeraho kugira mutwarize ki, kandi ahabw’enki?
8 Obucureezi. Yehova naahwera abacureezi kumanya amazima. (Mat. 11:25) Tukaikiriza omu bucureezi kwega amazima. (Byak. 8:30, 31) Kwonka, twine kwegyendesereza kutaba abanyamaryo. Okugira amaryo nikibaasa kutureetera kugira ngu emiteekateekyere yaitu nayo ehikire nk’emisingye y’Ebyahandiikirwe n’obuhabuzi bw’ekibiina kya Yehova.
9. Twine kukora ki kuguma turi abacureezi?
9 Kubaasa kuguma turi abacureezi, twine kumanya ngu twayegyeragyeranisa na Yehova, titwine ki turi. (Zab. 8:3, 4) Twine kushaba Yehova ngu tube abacureezi, kandi abarikwegyesibwa. Yehova naija kutuhwera kugira emiteekateekyere nk’eye erikukira eyaitu, arikukoresa Ekigambo kye n’ekibiina kye. Waaba nooshoma Baibuli, yetegyereze enshonga ezirikworeka ngu Yehova naakunda obucureezi, kandi naayanga amaryo, omwetunguuro, n’omwemanyo. Kandi teeraho kuguma ori omucureezi waaheebwa obujunaanizibwa oburikubaasa kukureetera kumanywa munonga.
OKU TURIKUBAASA KUHAMIRA AHA MAZIMA
10. Yehova akoreise baahi kuha obuhabuzi abaheereza be?
10 Gumizamu nooyesiga obuhabuzi bw’ekibiina kya Yehova. Omuri Israeli eya ira, Yehova akakoresa Musa, kandi bwanyima akakoresa Yoshua kugambira abaheereza be obuhabuzi bwe. (Yos. 1:16, 17) Abaisraeli bakaba batunga emigisha ku baabaire bareeba abashaija abo nk’abarikujwekyera Yehova Ruhanga. Ebyasha ebyakuratsireho obu ekibiina Ekikristaayo kyatandikwaho, entumwa 12 bakaba nibaha obuhabuzi. (Byak. 8:14, 15) Bwanyima, guruupu egyo ekaba neetwariramu n’abakuru omuri Yerusaalemu. Ahabw’okugira ngu ebibiina bikagyendera aha buhabuzi obu byahairwe abashaija abo abeesigwa, ‘bikahamibwa omu kwikiriza, abantu baayeyongyera kukanya obutoosha.’ (Byak. 16:4, 5) Hati, naitwe nitutunga emigisha ku turikukuratira obuhabuzi obu turikuheebwa ekibiina kya Yehova. Yehova naabaasa kwehurira ata twayanga kworobera abu atooraine kwebembera? Nitubaasa kugarukamu ekibuuzo ekyo twateekateeka aha byabaire aha Baisraeli obu baabaire nibaza omu Nsi Eyaaraganisiibwe.
11. Niki ekyahikire aha Baisraeli abaayangire kushagika Musa ou Yehova yaabaire atooraine kubeebembera? (Reeba n’ekishushani.)
11 Obu Abaisraeli baabaire nibaza omu Nsi Eyaaraganisiibwe, abashaija abaabaire nibamanywa munonga bakahakanisa Musa, n’obujunaanizibwa obu Yehova yaabaire amuhaire. Bakagira bati: “Abantu b’eihanga ryona [atari Musa wenka] n’abarikwera, buri omwe omuribo, kandi [Yehova] ari omuribo.” (Kub. 16:1-3) N’obu kiraabe kyabaire kihikire omu maisho ga Yehova ngu “abantu b’eihanga ryona n’abarikwera,” kwonka akaba atooraine Musa kwebembera abantu be. (Kub. 16:28) Abagomi ku baahakaniise Musa, bakahakanisa Yehova. Tibarataire mutima aha ki Yehova yaabaire naayenda, kureka aha ki baabaire nibenda, nikwo okugira amaani n’okurangaanwa. Ruhanga akacwekyereza abaabaire nibeebembera abagomi, n’abandi baingi abaabashagikire. (Kub. 16:30-35, 41, 49) N’obunaku obu, nitubaasa kuhamya ngu Yehova tarikusiima abatarikuha kitiinisa entebeekanisa z’ekibiina kye.
Okaba noija kushagika oha? (Reeba akacweka 11)
12. Ahabw’enki nitubaasa kugumizamu twine obwesigye omu kibiina kya Yehova?
12 Nitubaasa kwongyera kuhamya obwesigye bwaitu omu kibiina kya Yehova. Abareeberezi tibarikweziringa kukora empinduka ezirikwetengyesa haabaho enyetegyereza nsya y’amazima gamwe ga Baibuli, nari haabaho empinduka omu ntebeekanisa y’emirimo y’Obukama. (Enf. 4:18) Ekyo nibakikora ahabw’okwenda kushemeza Yehova. Kandi nibateeraho kucwamu barikwihirira aha Kigambo kya Ruhanga, eki abaheereza ba Yehova boona baine kugyenderaho.
13. ‘Ebigambo by’amazima’ niki, kandi twine kubitwara tuta?
13 Guma ohamiire aha ‘bigambo by’amazima.’ (2 Tim. 1:13) ‘Ebigambo by’amazima” nibimanyisa enyegyesa z’Ekikristaayo eziri omu Baibuli. (Yoh. 17:17) Enyegyesa ezo nizo buhamizo bwa buri kimwe eki turikwikiriza. Ekibiina kya Yehova kitwegyeise kuhamya ngu enyegyesa zaitu nizeegamira aha mazima. Twahamya ekyo, nitwija kutunga emigisha.
14. Abakristaayo abamwe bakaremwa bata kuhamira aha ‘bigambo by’amazima’?
14 Niki ekirikubaasa kubaho twateishuka aha ‘bigambo by’amazima’? Teekateeka aha ky’okureeberaho eki. Omu kyasha ky’okubanza, Abakristaayo abamwe bakaba nibagambira abandi ngu ekiro kya Yehova kikaba kyahikire. Hakaba hariho ebaruha eyaagambire aha nshonga egyo ei baabaire nibateekateeka ngu ekahandiikwa entumwa Paulo. Ahabw’okutafayo kumanya ebihikire, Abakristaayo abamwe omuri Tesalonika bakaikiriza ekishuba ekyo, kandi baakijanjaaza. Bakaba batarikwija kubeihwa ku ogire ngu bakaijuka ebi Paulo yaabeegyeise obu yaabaire akiri nabo. (2 Tes. 2:1-5) Paulo akahabura ab’eishe-emwe bagyenzi be kutaikiriza buri kimwe eki baabaire nibahurira. Paulo kubaasa kubahwera omu biro by’omumaisho, akahendera ebaruha ya kabiri ey’Abatesalonika n’ebigambo ebi: “Nyowe Paulo, naahandiika endamutsyo egi n’omukono gwangye nyenka. Niko kamanyiso omu baruha yangye yoona, okwo nikwo mpandiika.”—2 Tes. 3:17.
15. Nitubaasa kwerinda tuta ebishuba ebirikureebeka nk’ebihikire? Ha eky’okureeberaho. (Reeba n’ebishushani.)
15 Ebigambo ebi Paulo yaahandiikiire Abatesalonika nitubyegyeraho ki? Twine kukoresa okwetegyereza twahurira ekintu kyona ekitarikwikirizana n’ebi turikwega omu Baibuli nari ebishuba ebirikutiinisa. Omuri Soviet Union eya ira, hariho obu abazigu baitu baaha ab’eishe-emwe ebaruha ei baagizire ngu ekaba neeruga aha ofiisi enkuru. Ekaba neehiga ab’eishe-emwe abamwe kugira ekibiina ekyabo. Ebyabaire biri omu baruha bikaba nibireebeka nk’ebihikire. Kwonka ab’eishe-emwe abeesigwa tibarahabisiibwe. Bakeetegyereza ngu ebyabaire biri omu baruha egyo bikaba bitarikuhikaana n’ebi baabaire beegyesiibwe. Obunaku obu, abazigu b’amazima obumwe nibakoresa tekinologiya eriho kuteeraho kutubuzabuza, n’okutubaganisamu. Omu mwanya ‘gw’okurahuka kuhahaaza omutima tukabura obwengye,’ nitubaasa kwerinda twateekateeka yaaba ebi turikuhurira nari ebi turikushoma nibihikaana n’amazima agu turikwega.—2 Tes. 2:2; 1 Yoh. 4:1.
Otahabisibwa ebishuba ebirikureebeka nk’amazima (Reeba akacweka 15) a
16. Kurugiirira aha Abarooma 16:17, 18, twine kukora ki abamwe bateishuka aha mazima?
16 Gumizamu nookwatanisa n’abarikuhamira ahari Yehova. Ruhanga naayenda ngu tugire obumwe omu kuramya kwaitu. Nituguma twine obumwe twahamira aha mazima. Boona abarikwetaanisa aha mazima nibareeta okwebaganisamu omu kibiina, n’ahabw’ekyo Ruhanga naaturabura ‘kubetantara.’ Twaba tutakozire ekyo, nitubaasa kuruga omu mazima.—Shoma Abarooma 16:17, 18.
17. Nitugasirwa tuta twamanya amazima kandi tukagahamiraho?
17 Ku turikumanya amazima, kandi tukagahamiraho, nitwija kuguma twine oburinzi omu by’omwoyo n’eby’omubiri. (Efe. 4:15, 16) Titurikwija kuhabisibwa enyegyesa za Sitaane ez’ebishuba na pokopoka ye, kandi nitwija kuguma turinzirwe Yehova omu kubonabona kwingi. Guma ohamiire aha kihikire, ‘obwo nibwo Ruhanga Mukama w’obusingye araagume naiwe.’—Fil. 4:8, 9.
EKYESHONGORO 122 Muhame, Mutatengyetsibwa!
a ENSHOBOORORA Y’EKISHUSHANI: Ekishushani kirikworeka ebaruha ei ab’eishe-emwe baatungire omu bwire bwa Soviet Union ei baagizire ngu neeruga aha ofiisi enkuru, kwonka erikuruga aha bazigu baitu. Obunaku obu, abazigu baitu nibabaasa kukoresa omukura kujanjaaza amakuru gatahikire aha kibiina kya Yehova.
