Nicolas na Céline bakahikwaho oburemeezi bw’omuringo ogundi. Bakaikiriza obujunaanizibwa obu bahairwe ofiisi y’eitaagi eya France kuza omu kibiina kisya. Nibagira bati: “Omu kubanza tukashemererwa, kwonka bwanyima kikaba kitoorobi ahabw’okugira ngu tukaba tugirira orushusho banywani baitu abu twatsigireho. Tukaba tutakagizire mukago guhami n’ab’eishe-emwe na banyaanyazi-itwe omu kibiina kyaitu ekisya.” a Mbwenu shi niki ekiraakuhwere waaba nooza omu kibiina ekisya? Abandi nibabaasa kukora ki kuhwera? Noobaasa kugasirwa ota omu kibiina ekisya, kandi naiwe okakigasira?

EMISINGYE ENA ERIKUBAASA KUKUHWERA

1. Yesigye Yehova. (Zab. 37:5) Kazumi, owa Japan, akaruga omu kibiina eki yaabaire arimu kumara emyaka 20 iba ku yaatungire omurimo omu kicweka ekindi. ‘Orugyendo rwe akarwegyekyerera ata [Yehova]’? Naagira ati: “Nkaguma ningambira Yehova byona ebyabaire nibinyerarikiriza, birikundeetera kugira eihamba, n’amaganya. Buri kumushaba, akaba ampa amaani agarikwetengyesa.”

Noobaasa kwongyera ota kwesiga Yehova? Nk’oku ekimera kirikwetenga amaizi n’ebiriisa by’omu itaka kubaasa kukura, n’okwikiriza kwaitu kwine kureebererwa gye kubaasa kuhama. Nicolas, owaaba yaagambirweho, akeetegyereza ngu okuteekateeka aha ky’okureeberaho kya Abrahamu, Yesu na Paulo abaayefeerereize bingi kukora ebi Ruhanga arikukunda kikamuhwera kwongyera kuhamya obwesigye bwe omu bushagiki bwa Yehova. Okugira entebeekanisa y’okweyegyesa Baibuli butoosha, nikiija kukuhwera kumanyiira empinduka, kandi kikuhwere kutunga eby’omuhendo  eby’omwoyo ebi orikubaasa kugambira abandi omu kibiina.

2. Yetantare okugyeragyeranisa. (Mub. 7:10) Jules akaba aine kukora empinduka y’amaani kumanyiira entwaza y’abantu obu yaaruga Benin akaza United States. Naagira ati: “Nkaba ninteekateeka ngu nyine kugambira buri omwe ebirikunkwataho.” Kwonka ahabw’okugira ngu eki yaabaire naateekateeka tikwo kyabaire, akatandika kwetaanisa aha bandi omu kibiina. Kwonka, ku yaaherize kumanya gye ab’eishe-emwe na banyaanyazi-itwe emiteekateekyere ye ekahinduka. Naagira ati: “Nyetegyereize ngu abantu ei bari hoona omu nsi nibamwe. Kwonka nibagamba, kandi batwaza omu muringo gutarikushushana. Okwikiriza abantu nk’oku bari ni kikuru.” N’ahabw’ekyo yetantare kugyeragyeranisa ekibiina ekisya n’eki waabaire orimu. Payoniya orikwetwa Anne-Lise, naagira ati: “Tindagiire mu mwanya musya kuguma ninyijuka ebi naatsigire enyima, kureka nkazayo kwega ebintu bisya.”

Abareeberezi nabo tibashemereire kugyeragyeranisa ebibiina ebi barimu n’ebi baarugiremu. Okukora ebintu omu miringo endiijo tikirikumanyisa ngu bigwire. N’eky’obwengye kubanza waamanya embeera y’ekicweka ekisya otakagizire eki waagamba. (Mub. 3:​1, 7b) Ni kurungi kuteeraho abandi eky’okureeberaho omu mwanya gw’okubagyemesereza kwikiriza eki orikuteekateeka.—2 Kor. 1:24.

3. Yejumbire kimwe omu mirimo y’ekibiina. (Fil. 1:27) Okuza omu kicweka ekindi nikyetengyesa obwire n’amaani, kwonka ni kikuru kuza omu nteerane z’ekibiina butunu ahonaaho kyaba nikibaasika. Ahakuba ab’omu kibiina ekisya tihaine oku barikubaasa kukushagika baaba batakakureebaga nari batarikukira kukureeba. Lucinda, owaafurukiire omu rurembo ruhango omuri South Africa n’abahara babiri, naagira ati: “Nkahaburwa kwejumbira kimwe omu kibiina, kukora n’abandi omu kubuurira, n’okugarukamu omu nteerane. Kandi tukaikiriza ngu eka yaitu ekoresibwe kugiriramu enteerane z’okubuurira.”

Okukorera hamwe emirimo y’ekibiina n’ab’eishe-emwe na banyaanyazi-itwe omu kibiina ekisya n’omuringo murungi gw’okuhamya okwikiriza kwawe n’okw’abandi. Anne-Lise, owaaba yaagambirweho, akahigwa abareeberezi kuteeraho kubuurira na buri omwe omu kibiina ekisya. Niki ekyarugiremu? Naagira ati: “Nketegyereza ngu n’omuringo murungi ogwampweraire kurahuka kwijura omu kibiina.” Kandi, okwehayo kuhwera omu mirimo nk’okuboneza, n’okureeberera Ekyombeko ky’Obukama, nikyoreka ngu hati nookitwara nk’ekibiina kyawe. Ku orikwongyera kukora bingi, n’abandi nibaija kurahuka kukureeba nk’omwe aha b’ekibiina ekyo ekisya.

4. Gira emikago misya. (2 Kor. 6:​11-13) Okufayo aha bandi n’omuringo murungi gw’okutunga abanywani, n’ahabw’ekyo gira obwire bw’okuba n’abantu enteerane zitakatandikire, na bwanyima yaazo kugira ngu obaase kubamanya gye. Teeraho  kumanya amaziina gaabo. Okwijuka amaziina g’abantu, okubafaho, n’okuba oyorobi kuhikwaho nikiija kureetera abandi kwenda kuba naiwe, kandi bahindukye banywani baawe abasya.

Omu mwanya gw’okwenda kureetera b’eishe-emwe na banyaanyazi-itwe kukunda, bareetera kukumanya gye. Kora eki Lucinda yaagambire arikugira ati: “Twine emikago mirungi ahabw’okuba nitwehabura kutaayaayisa abandi owaitu.”

“MWAKIIRANE”

Abamwe nibabaasa kutiina kutaaha omu Kyombeko ky’Obukama ekirimu abantu baingi abu batarikumanya. Mbwenu shi noobaasa ota kubareetera kuhurira baikaikaine omu kibiina kisya? Paulo akagira ati: “Mwakiirane, nk’oku Kristo yaabaakiire.” (Rom. 15:7) Abareeberezi baatooreza Kristo nibabaasa kuhwera abasya kwehurira gye. (Reeba akabokusi “ Ekiraakuhwere Waaba Nooza omu Kibiina Ekindi.”) Kwonka, twena otwariiremu n’abato nitubaasa kugira eki twakora kureetera abasya kwehurira gye omu kibiina.

Okwakiira abandi nikitwariramu okubakunira, n’okugira eki twakora kubahwera. Nk’eky’okureeberaho, munyaanyazi-itwe akeefeerereza obwire bwe kurambuza munyaanyazi-itwe omusya orurembo n’okumushoboororera emiringo y’eby’enda ey’omu kicweka. Eki munyaanyazi-itwe yaakozire kikamuhwera kumanyiira embeera nsya.

OMUGISHA GW’OKUTUNGUUKA

Enzigye yaaba neekura neeyeshubura emirundi mingi, kubaasa kuguruka. Nikyo kimwe, waaza omu kibiina ekindi oine kweihaho okutiina kwona okurikubaasa kukuremesa kwejumbira kimwe omu kuheereza Yehova. Nicolas na Céline nibagira bati: “Okufuruka n’okutendekwa orikukirayo oburungi. Okumanyiira abantu basya n’embeera nsya kikatuhwera kugira emitwarize misya.” Jean-Charles, owaagambwaho omu kutandika, naagamba aha ku eka ye egasiirwe arikugira ati: “Abaana baitu babaasize kutunguuka omu by’omwoyo omu kibiina ekisya. Bwanyima y’ameezi makye, muhara  waitu akaheebwa ekicweka omu ruteerane rw’aha gati ya saabiiti, kandi mutabani waitu akaba omubuurizi otabatiziibwe.”

Mbwenu shi ku waakuba otarikubaasa kuza omu kicweka ekindi, nk’ahu ababuurizi barikwenda munonga? Noobaasa kureeba ekibiina kyawe nka kisya orikuta omu nkora bumwe aha buhabuzi obwagambwaho omu kicweka eki. Yesigye Yehova orikwejumbira kimwe omu mirimo y’ekibiina, orikukora entebeekanisa y’okubuurira n’abandi, kandi orikuteeraho kugira emikago misya, n’okuhamya ei oine. Fayo kuhwera abasya nari abaine ebi bakyenire. Ahabw’okugira ngu Abakristaayo abaabuzima nibamanyirwa ahari rukundo, okugyoreka nikiija kukuhwera kutunguuka omu by’omwoyo. (Yoh. 13:35) Noobaasa kugira obwesigye ngu ‘ebitambo nk’ebyo nibyo birikushemeza Ruhanga.’—Heb. 13:16.

N’obu Abakristaayo abarikuza omu kibiina kisya barikutunga oburemeezi, baingi aharibo babaasize kuba abasinguzi, kandi naiwe noobaasa kusingura. Anne-Lise naagira ati: “Okuza omu kibiina ekindi kikampwera kushashaanuka.” Kazumi naahamiza kimwe ngu waaza omu kibiina ekindi “nooreeba obushagiki bwa Yehova omu miringo endiijo ei otakateekateekahoga.” Kandi shi Jules? Naagira ati: “Emikago ei ngizire empweraire kuhurira ntarikuburabura omu kibiina. Hati nimpurira nyijwire omu kibiina ekisya, kandi tindikwenda kukirugamu.”