1-2. (a) Yesu akarabura abeegi be ahari ki? (b) Ahabw’enki abeegi be baasingwirwe obweremwa bwabo? (Reeba n’ebishushani.)

 “OMUTIMA gwo nigukunda, kwonka omubiri n’omweremwa.” a (Mat. 26:41b) Ebigambo ebyo bikooreka ngu Yesu naayetegyereza obweremwa bwaitu. Kwonka, nibiturabura kuteeyesiga. Ekiro ekyo, abeegi be bakaba baherize kworeka ngu bamaririire kuhamira ahari Mukama waabo. (Mat. 26:35) Bakaba nibenda kukora ekihikire. Kwonka, bakaba batarikumanya ngu nibabaasa kurahuka kuhwa amaani baayohibwa. N’ahabw’ekyo, Yesu akabarabura ati: ‘[Mugume] nimureeba mushabe, murekye kugwa omu kwohibwa.’—Mat. 26:41a.

² Eky’obusaasi, abeegi be bakaremwa kuguma nibareeba. Mbwenu shi obu Yesu yaakwatwa, bakamuhamiraho nari bakatiina baahunga? Ahabw’okugira ngu tibaragumire nibareeba, bakamutsigaho.—Mat. 26:56.

3. (a) Kubaasa kuguma tuhamiire ahari Yehova, ahabw’enki twine kwetantara okweyesiga ekirenga? (b) Nituza kushwijuma ki omu kicweka eki?

³ Titushemereire kuteekateeka ngu obwire bwona nitwija kukora ekihikire. Buzima, tumariirire kutaikiriza ekintu kyona kutwiha ahari Yehova. Kwonka, tituhikiriire, kandi nitubaasa kwohibwa kukora ekitahikire. (Rom. 5:12; 7:​21-23) Obumwe nitubaasa kweshanga omu mbeera ezirikutureetera  kureeba ekigwire nk’ekihikire. Kubaasa kuguma tuhamiire ahari Yehova n’Omwana we, twine kugyendera aha kurabura kwa Yesu okw’okuguma nitwerinda kwohibwa kukora ekibi. Ekicweka eki nikibaasa kutuhwera kukora ekyo. Ka tubanze tureebe ebi twine kwerinda. Bwanyima tureebe oku turikubaasa kwerinda kwohibwa. Reero, tureebe oku turikubaasa kuguma nitwerinda.

EBI TWINE KWERINDA

4-5. Ahabw’enki twine kwerinda ebibi ebirikureebeka nka bikye?

⁴ Ebibi ebirikureebeka nka bikye nabyo nibibaasa kutuubya omukago gwaitu na Yehova. Kandi nibibaasa kutureetera kukora ekibi ky’amaani.

⁵ Twena nitwohibwa kukora ekitahikire. Kwonka, buri omwe aine ebirikubaasa kumugyeza kukora ekibi ky’amaani, kwejumba omu mitwarize etashemeire, nari kuhabisibwa emiteekateekyere y’ensi. Nk’eky’okureeberaho, omuntu naabaasa kuba naarwanisa okwohibwa kugwa omu bushambani. Ondiijo naabaasa kuba naayohibwa kwejumba omu bikorwa bitashemeire nk’okwemarisa nari kureeba eby’enshoni. Kandi ondiijo naabaasa kuba naateeraho kusingura okutiina abantu, okwebembeza emiteekateekyere eye, okurahuka kugira ekiniga, nari ekindi. Nk’oku Yakobo erikworeka, “omuntu weena ayohibwa, yaabeihwabeihwa okwetenga kwe, kwamwosyosya.”—Yak. 1:14.

6. Twine kwebeera ab’amazima ahari ki?

⁶ Noomanya embeera ezirikukirayo kukugyeza? Ti kirungi kuteekateeka ngu titwine bweremwa nari ngu tuhami munonga titurikubaasa kukora ekibi. (1 Yoh. 1:8) Ahakuba Paulo akagira ngu n’abahami omu ‘by’omwoyo’ nibabaasa kugwa omu kwohibwa baaba bateerinzire. (Gal. 6:1) Twine kwebeera ab’amazima, kandi tukamanya obweremwa obu twine.—2 Kor. 13:5.

7. Niki eki twine kuteeraho munonga kwerinda? Ha eky’okureeberaho.

⁷ Twamanya obweremwa bwaitu twine kukora ki? Tuteereho kubwerinda. Nk’eky’okureeberaho, omu bwire bwa Baibuli ekicweka ky’orurembo ekyabaire nikikira kutaahirirwa gakaba gari amarembo gaarwo. N’ahabw’ekyo, amarembo gakaba garindwa munonga. Nikyo kimwe, naitwe twine kuteeraho kwerinda embeera ezi turikumanya ngu nizibaasa kutureetera kwohibwa kukora ekibi.—1 Kor. 9:27.

 OKU TURIKUBAASA KWERINDA OKWOHIBWA

8-9. Omutsigazi orikugambwaho omu Enfumu eshuura 7 akaba naabaasa kwerinda ata kukora ekibi ky’amaani? (Enfumu 7:​8, 9, 13, 14, 21)

⁸ Nitubaasa kwerinda tuta? Yetegyereze eki turikubaasa kwegyera aha mutsigazi orikugambwaho omu Enfumu eshuura 7. Akashambana n’omukazi maraaya. Omushororongo 22 nigugira ngu omutsigazi akamukurata “ahonaaho.” Kwonka nk’oku emishororongo ey’enyima erikworeka, akaba akozire ebintu bingi ebyamureeteire kuhika aha kukora ekibi.

⁹ Niki ekyamureeteire kugwa omu kibi? Eky’okubanza, omu mwabazyo, akaraba “omu nguto eririkuraba haihi n’akeekubo k’aha nju y’ogwo mukazi [maraaya].” Reero akagyema omuhanda ogurikuzayo. (Shoma Enfumu 7:​8, 9.) Bwanyima ku yaareebire omukazi, tarahungire. Kureka, akaikiriza ogwo mukazi kumunywegyera, kandi yaamuhurikiza arikugira ngu ahongire empongano z’okusiima, obundi arikwenda kumureetera kuteekateeka ngu ti mukazi mubi. (Shoma Enfumu 7:​13, 14, 21.) Kuri noogira ngu omutsigazi ogwo akeetantara akabi akamureetaire kukora ekibi, akaba naija kwerinda okwohibwa n’ekibi.

10. Omuntu obunaku obu naabaasa kukora ata enshobe nk’ei omutsigazi ogwo yaakozire?

¹⁰ Ebi Sulemaani yaagambire nibyoreka ekirikubaasa kuba aha muheereza wa Yehova weena. Naabaasa kukora ekibi ky’amaani kandi bwanyima ateekateekye ngu buri kimwe kyabaho “ahonaaho.” Nari naabaasa kugira ngu, “kyabaho bubaho.” Kwonka yaateekateeka aha byabaho, naabaasa kwetegyereza ngu haine ebi acwiremu omu muringo gutari gw’obwengye ebimureeteire kugwa omu kwohibwa. Ebi acwiremu nibibaasa kuba nibitwariramu okuba n’abanywani babi, eby’okweshemeza ebitashemeire nari okuba butunu omu myanya etahikire nari aha mukura. Obundi naabaasa kuba abaire arekiire aho kushaba, kushoma Baibuli, kuza omu nteerane, n’okubuurira. Nk’omutsigazi orikugambwaho omu Enfumu, ekibi kye nikibaasa kuba kitabaireho “ahonaaho.”

11. Twine kukora ki kwetantara kukora ekibi?

¹¹ Eky’okwega? Twine kwetantara ekibi n’ebirikubaasa kutureetera kukikora. Sulemaani akagamba aha nshonga egi omu bi yaahandiikire aha mutsigazi, n’omukazi maraaya. Akagamba aha mukazi ogwo ati: “Otahabira omu tuhanda twe.” (Enf. 7:25) Kandi, akagamba aha mukazi enshambani ati: “Mwetantarire hare, kandi otairira haihi emiryango y’enju ye.” (Enf. 5:​3, 8) Okubaasa kwerinda okukora ekibi, twine kwetantara embeera ezirikubaasa kutureetera kukikora. b Eki nikibaasa kutwariramu okwetantara embeera nari ebintu ebi Abakristaayo barikwikirizibwa kukora, kwonka ebirikubaasa kutureetera kugwa omu kwohibwa.—Mat. 5:​29, 30.

12. Yobu akaba amaririire kukora ki, kandi ekyo kikaba nikiija kumuhwera kita kutagwa omu kwohibwa? (Yobu 31:1)

¹² Kubaasa kwetantara embeera ezirikubaasa kutureetera kukora ekibi twine kumariirira kwerinda. Ekyo nikyo Yobu yaakozire. ‘Akaragaana endagaano n’amaisho ge’ kutarigira abakazi abandi. (Shoma Yobu 31:1.) Okuhamira aha kumariirira okwo kikamurinda kutagwa omu bushambani. Naitwe nitubaasa kumariirira kwetantara ekintu kyona ekirikubaasa kutureetera kugwa omu kwohibwa.

13. Ahabw’enki twine kurinda ebiteekateeko byaitu? (Reeba n’ebishushani.)

 ¹³ Twine okurinda ebiteekateeko byaitu. (Kur. 20:17) Abamwe nibagira ngu tikigwire kugira ebyetengo bitahikire kasita oba otakozire kibi. Kwonka emiteekateekyere nk’egyo egwire. Omuntu orikuta omutima aha byetengo bibi naayongyera kwenda kubikora. Naaba ari nk’orikweteeraho okwohibwa oku arikuba aine kusingura. Amazima gari ngu obumwe nitubaasa kugira ebiteekateeko bibi. Ekyo kyabaho, nituba twine kubyangira ahonaaho omu mwanya gwabyo tukatamu ebirungi. Twakora tutyo, nitwetantara kugira ekyetengo ky’amaani ekigumire kusingura, kandi ekirikubaasa kuturugiramu okukora ekibi ky’amaani .—Fil. 4:8; Kol. 3:2; Yak. 1:​13-15.

14. Niki ekindi eki turikubaasa kukora kwerinda okwohibwa?

¹⁴ Niki ekindi eki turikubaasa kukora kwerinda kwohibwa? Twine kuba nituhamiza kimwe ngu butoosha nitugasirwa twayorobera ebiragiro bya Yehova. Obumwe nitubaasa kugumirwa kugira ebiteekateeko, n’ebyetengo ebirikusiimwa Ruhanga, kwonka twateeraho, nitugira obusingye oburikukirira kimwe okuteeraho kwaitu.

15. Okuteeraho kugira ebyetengo ebihikire nikiija kutuhwera kita kwerinda okwohibwa?

¹⁵ Twine kuteeraho kugira ebyetengo ebihikire. Twayega ‘kwanga ebibi tukakunda ebirungi,’ nitwija kuba nitwongyera kuhamya okumariirira kwaitu kw’okukora ekihikire, kandi twetantare embeera ezirikubaasa kutureetera kukora ekibi. (Amo. 5:15) Okugira ebyetengo birungi, nakyo nikibaasa kutuhwera kuguma tuhami twayohibwa omu muringo ogu tutarikuteekateeka nari ogu tutarikubaasa kuzibira.

16. Okwejumba omu by’omwoyo nikibaasa kutuhwera kita kwerinda? (Reeba n’ebishushani.)

¹⁶ Nitubaasa kugira tuta ebyetengo ebihikire? Turikuta omutima aha kwejumba omu by’omwoyo nk’oku kirikubaasika. Twaba turi omu nteerane z’Ekikristaayo nari omu  kubuurira, tikyorobi kwohibwa kukora ekibi. Kureka, nituba nitwongyera kumariirira kushemeza Yehova. (Mat. 28:​19, 20; Heb. 10:​24, 25) Nitwongyera kukunda ebirungi n’okwanga ekibi turikushoma Ekigambo kya Ruhanga, kandi tukakiteekateekaho. (Yos. 1:8; Zab. 1:​2, 3; 119:​97, 101) Ijuka ngu Yesu akagambira abeegi be ati: “Mushabe, [obutoosha] murekye kugwa omu kwohibwa.” (Mat. 26:41) Twashaba Tataitwe ow’omu iguru, naatunga ah’okwihirira kutuhwera kandi nitwongyera kumariirira kumushemeza.—Yak. 4:8.

GUMIZAMU ORIKWERINDA

17. Ni bweremwa ki obwabaire nibuteganisa Petero?

¹⁷ Nikibaasika kusingurira kimwe bumwe aha bweremwa bwaitu. Kwonka nitubaasa kugumizamu kurwana kusingura obweremwa obundi. Teekateeka aha ky’okureeberaho kya Petero. Ahabw’okugira ngu akaba naatiina abantu, akeehakana Yesu emirundi eshatu. (Mat. 26:​69-75) Petero naabaasa kuba yaabaire asingwire okutiina abantu obu yaabuurira n’obumanzi Ab’eishengyero. (Byak. 5:​27-29) Kwonka, bwanyima y’emyaka, “ahabw’okutiina abashazirwe,” akamara akaire atarikurya n’Abakristaayo Abanyamahanga. (Gal. 2:​11, 12) Petero akagaruka yaatiina abantu. Obundi naabaasa kuba yaabaire atakasingwire okutiina okwo.

18. Niki ekirikubaasa kubaho aha bikwatiraine n’emize ei twaherize kusingura?

¹⁸ Nitubaasa kweshanga omu mbeera niyo emwe. Mu muringo ki? Nitubaasa kugaruka kugyezibwa omuze oguturikuteekateeka ngu tukasingura. Nk’eky’okureeberaho, ow’eishe-emwe naagira ati: “Nkarekyera aho kureeba ebirikwitsa enshoni kumara emyaka ikumi, kandi nkaba nimpamiza kimwe ngu nsigwire omuze ogwo. Kwonka gukaba gukiindimu gutegyereize obwire burungi bw’okugaruka kwimuka.” Ekirungi, tarahanikire akabirugaho. Akeetegyereza ngu aine kuteeraho munonga buri izooba kwangira omuze ogwo, obundi kumara ebiro by’amagara ge omu ntebeekanisa y’obusingye obu. Arikuhwerwa omukazi we n’abareeberezi b’ekibiina, akataho oburyo bw’okusingura okureeba ebirikwitsa enshoni.

19. Nitubaasa kusingura tuta obweremwa oburikureebeka nk’obutarikubaasa kurugaho?

 ¹⁹ Nitubaasa kukora ki kugira ngu obweremwa obu oburikureebeka nk’obutarikubaasa kurugaho tibwatureetera kukora ekibi? Turikukuratira obuhabuzi bwa Yesu oburikukwata aha kwohibwa oburikugira buti: ‘Mugume nimureeba.’ N’obu obumwe orikuhurira ngu ohami, oine kugumizamu nooyetantara embeera ezirikubaasa kukureetera kwohibwa. (1 Kor. 10:12) Gumizamu nookora ebyakuhweraire kuba omusinguzi. ‘Yezirikye’ kuguma nooyerinda.—2 Pet. 3:14.

OKU TURIKUGASIRWA TWAGUMA NITWERINDA

20-21. (a) Nitwija kutunga birungi ki twaguma nitwerinda okwohibwa? (b) Yehova naija kutuha ki, twakora eki twine kukora? (2 Abakorinso 4:7)

²⁰ Nitubaasa kugira obwesigye ngu okugumizamu nitwerinda okwohibwa nikirugamu ebirungi. Nitushemererwa munonga twagyendera aha mitindo ya Yehova, omu mwanya gw‘eby’okweshemeza by’ekibi ebirikuhwaho juba.’ (Heb. 11:25; Zab. 19:8) Niyo nshonga ahabw’enki twahangirwe turikubaasa kugyendera omu mihanda ye. (Kut. 1:27) Nitwija kugira omutima ogutarikweshinja, kandi tugume omu muhanda ogurikuhitsya omu magara agatahwaho.—1 Tim. 6:12; 2 Tim. 1:3; Yud. 20, 21.

²¹ N’amazima, “omubiri n’omweremwa.” Kwonka tikirikumanyisa ngu titwine buhwezi. Yehova ayeteekateekire kutuha amaani agarikwetengyesa. (Shoma 2 Abakorinso 4:7.) Kandi yetegyereze ngu, Ruhanga naatuha amaani agarikukira aga butoosha. Amaani aga butoosha nikwo okuteeraho kwaitu buri izooba kwerinda kugwa omu kwohibwa, kandi n’obujunaanizibwa bwaitu. Twakora tutyo, nitubaasa kugira obwesigye ngu Yehova naija kugarukamu okushaba kwaitu, atuhe amaani agarikukiraho kyayetengyesa. (1 Kor. 10:13) Ahabw’obuhwezi bwa Yehova, nitubaasa kuguma nitusingura okwohibwa.