1. Omutsigazi omwe akakwatwaho ata orubazo orwahairwe aha ruteerane oruhango omuri 1935?

OMUTSIGAZI omwe akaba aine emyaka 18 obu yaabatizibwa 1926. Abazaire be bakaba bari Abajurizi ba Yehova abaabaire nibeetwa Abeegi ba Baibuli obwire obwo. Bakaba baine abaana bashatu b’aboojo n’abaishiki babiri, abu baakurize kuheereza Yehova Ruhanga n’okutooreza Yesu Kristo. Omutsigazi ogu akaba naarya aha mugaati anywa n’ahari viinyo buri mwaka aha Kiijutsyo, nk’Abakristaayo abandi omu bwire obwo. Kwonka orubazo orwakozire ebyafaayo orwabaire rwine omutwe, “Abantu Nyamwingi,” rukahindura emiteekateekyere ye. J. F. Rutherford niwe yaaruhaire omuri 1935 aha ruteerane oruhango omuri Washington, D.C., U.S.A. Ni nshonga ki enkuru eyaamanyirwe aha ruteerane orwo?

2. Ow’eishe-emwe Rutherford akashoboorora mazima ki omu rubazo rwe?

² Ow’eishe-emwe Rutherford omu rubazo rwe, akashoboorora abarikutwarirwa omu ‘mutwe muhango gw’abantu,’ nari “abantu nyamwingi,” abarikugambwaho omu Okushuuruurwa 7:9. Enyima, aba guruupu egi bakaba nibatwarwa nk’ab’eidaara rya kabiri abaraaze omu iguru, kwonka abataine kwikiriza kw’amaani. Ow’eishe-emwe Rutherford akakoresa Ebyahandiikirwe kushoboorora ngu aba tibatoorainwe kuza omu iguru, beitu ngu n’ab’entaama za Kristo ezindi * abaraahonokeho  “omu kubonabona kwingi” bakatuura omu nsi ebiro byona. (Kush. 7:14) Yesu akaraganisa ati: “Nyine entaama ezindi, ezitari z’omu itsibikiro eri, nazo nshemereire kuzireeta, zihurire eiraka ryangye, zibe obusyo bumwe, n’omuriisa abe omwe.” (Yoh. 10:16) Aba n’Abajurizi ba Yehova abeesigwa abaine amatsiko g’okutuura omu Paradiso omu nsi ebiro byona. (Mat. 25:31-33, 46) Ka tureebe oku enyetegyereza nsya egi yaahindwire emiteekateekyere ya baingi, otwariiremu n’ow’eishe-emwe ow’emyaka 18 ogwo.​—Zab. 97:11; Enf. 4:18.

3-4. Omu ruteerane oruhango orwa 1935, abantu nyamwingi bakamanya ngu baine matsiko ki, kandi ahabw’enki?

³ Hakabaho okushemererwa kwingi omu ruteerane orwo obu omugambi yaabuuza abamuhurikiize ati: “Abaine amatsiko g’okutuura omu nsi ebiro byona nibabaasa kwemerera?” Kurugiirira ahari baakareebi, abantu abarikurenga kimwe kya kabiri kya 20,000 bakeemerera. Reero Ow’eishe-emwe Rutherford akagira ati: “Reeba! Abantu nyamwingi!” Abantu bakagamba n’eiraka rihango bashemereirwe. Abaayemereire bakamanya ngu tibatoorainwe kuza omu iguru. Bakamanya ngu tibashukirweho omwoyo kuba entoore. Eizooba eryakuratsireho, abantu 840 abasya bakabatizibwa, kandi baingi aharibo bakaba bari ab’entaama ezindi.

⁴ Bwanyima y’orubazo orwo, omutsigazi owaaba yaagambirweho n’abandi nyamwingi bakarekyera aho kurya n’okunywa aha bumanyiso bw’Ekiijutsyo. Ow’eishe-emwe omwe omu bucureezi akagamba enyehurira za baingi obu yaagira ati: “Ekiijutsyo kya 1935 nikyo naahererukireyo kurya n’okunywa aha bumanyiso. Nkamanya ngu Yehova akaba atantairemu amatsiko g’okuza omu iguru arikukoresa omwoyo gurikwera, kureka nkaba nyine amatsiko g’okutuura omu nsi n’okwejumba omu kugihindura paradiso.” (Rom. 8:16, 17; 2 Kor. 1:21, 22) Kuruga obwo, omutwe muhango gw’abantu beeyongyeire kukanya, kandi batwire nibaheereza n’abashukirweho amajuta entsigarira. *

5. Yehova naareeba ata abarikurekyera aho kurya n’okunywa aha bumanyiso bw’Ekiijutsyo?

⁵ Yehova naareeba ata abaarekyeire aho kurya n’okunywa aha bumanyiso bw’Ekiijutsyo bwanyima ya 1935? Kandi shi hati Omujurizi wa Yehova obatiziibwe orikurya kandi akanywa aha bumanyiso bw’Ekiijutsyo bwanyima ku yaakumanya ngu buzima ti ntoore? (1 Kor. 11:28) Abamwe nibarya kandi banywa aha bumanyiso ahabw’okugira ngu tibarikwetegyereza amatsiko gaabo. Kwonka baaba ab’amazima bakamanya enshobe yaabo bakarekyera aho, kandi bakagumizamu nibaheereza Yehova omu bwesigwa, buzima naija kubabarira aha b’entaama ezindi. N’obu baraabe batarikurya kandi bakanywa aha bumanyiso, nabwo nibaza aha Kiijutsyo ahabw’okugira ngu nibasiimira kimwe eki Yehova na Yesu baabakoreire.

6. Yesu aragiire baamaraika kukora ki?

⁶ Obu okubonabona kwingi kuri haihi kubaho, n’eky’obwengye kushwijuma eki Okushuuruurwa eshuura 7 harikugamba aha Bakristaayo abashukirweho omwoyo gurikwera n’abantu nyamwingi ab’entaama ezindi. Yesu naaragiira baamaraika kuba bakikwatsire  emiyaga ena ey’okucwekyereza. Tibaine kurekura emiyaga egyo kwija omu nsi kuhitsya entoore boona baaheza kuteebwaho akamanyiso k’aha muheru, ekirikumanyisa okuhamibwa Yehova ngu bashemeire. (Kush. 7:1-4) Beene Ishe Kristo entoore nibaija kutunga enshumbuushano yaabo barikuba abagabe n’abanyamurwa hamwe nawe omu iguru, ahabw’okuba abeesigwa. (Kush. 20:6) Boona ab’omu iguru nibaija kushemererwa kureeba entoore 144,000 barikutunga ekihembo kyabo.

7. Omu Okushuuruurwa 7:9, 10, Yohaana akareeba baahi omu kworekwa, kandi bakaba nibakora ki? (Reeba ekishushani ekiri aha kipampagare.)

⁷ Yohaana bwanyima y’okugamba aha 144,000 abaraabe abagabe n’abanyamurwa, akareeba “omutwe muhango gw’abantu” abaraahonokeho ahari Haramagedoni. Okutashushana na guruupu ey’okubanza, guruupu egi eya kabiri ni mpango, omuhendo gwayo tigurikubarwa. (Shoma Okushuuruurwa 7:9, 10.) “Bajwaire ebijwaro birikwera,” ekirikworeka ngu nibeerinda “okugira amabara g’ensi” ya Sitaane kandi bahamiire ahari Ruhanga na Kristo. (Yak. 1:27) Nibagamba n’eiraka rihango ngu bajunirwe ahabw’eki Yehova na Yesu baakozire. Kandi, bakwaitse amataagi g’enkindo, ekirikworeka ngu nibashemererwa kwikiriza Yesu nk’Omugabe ou Yehova atooraine.​—Gyeragyeranisa Yohaana 12:12, 13.

8. Ebiri omu Okushuuruurwa 7:11, 12 nibitumanyisa ki aha b’omu iguru?

⁸ Shoma Okushuuruurwa 7:11, 12. Ab’omu iguru bakatwaza bata? Yohaana akareeba boona ab’omu iguru bashemereirwe, obwo abantu nyamwingi barikwija omu maisho ga Ruhanga kumuhimbisa. Ab’omu iguru nibaija kushemererwa munonga okworekwa oku kukuraahikiirire obu abantu nyamwingi baraarugye omu kubonabona kwingi bahuriire.

9. Kurugiirira aha Okushuuruurwa 7:13-15, guruupu y’abantu nyamwingi nibakora ki hati?

⁹ Shoma Okushuuruurwa 7:13-15. Yohaana naayoreka ngu omutwe muhango gw’abantu “bakoozya ebijwaro byabo omu shagama y’Omwana gw’entaama.” Eki nikimanyisa ngu baine omutima gushemeire ogutarikubashinja kandi ngu nibasiimwa Yehova. (Isa. 1:18) Aba n’Abakristaayo abeehaireyo bakabatizibwa abarikwiririza kimwe omu kitambo kya Yesu, kandi baine omukago murungi na Yehova. (Yoh. 3:36; 1 Pet. 3:21) N’ahabw’ekyo, bahikire kwemerera omu maisho g’ekitebe kya Ruhanga kumuheereza “nyomushana na nyekiro” omu mbuga ya hekalu ey’eby’omwoyo aha omu nsi. Nangwa na hati, nibakora kihango omu muringo gw’okubuurira n’okuhindura abantu abeegi, barikwebembeza Obukama bwa Ruhanga kukira ebyabo.​—Mat. 6:33; 24:14; 28:19, 20.

10. Abantu nyamwingi baine buhame ki, kandi ni kuraganisa ki oku baraareebe nikuhikiirira?

¹⁰ Abantu nyamwingi abaraarugye omu kubonabona kwingi baine obuhame ngu Ruhanga naija kugumizamu naabareeberera, ahakuba ‘Ogwo oshutami aha kitebe ky’obukama naija kubasangira n’eihema rye.’ Kandi okuraganisa oku batwire bainiire ekihika nikwija kuhikiiririra: ‘[Ruhanga] naija kuragaza amarira goona aha maisho gaabo, tiharikwija kubaho okufa bundi, n’obu kwakuba okucura nari okurira nari obusaasi.’​—Kush. 21:3, 4.

11-12. (a) Nk’oku kiri omu Okushuuruurwa 7:16, 17, abantu nyamwingi nibaija kutunga migisha ki? (b) Ab’entaama ezindi nibabaasa kukora ki aha Kiijutsyo, kandi ahabw’enki?

¹¹ Shoma Okushuuruurwa 7:16, 17. Hati,  bamwe aha baheereza ba Yehova, tibaine by’okurya birikumara ahabw’entaatsya mbi nari ahabw’emihondano n’entaro. Abamwe nibakomwa ahabw’okwikiriza kwabo. Kwonka, abantu nyamwingi nibeesiima kumanya ngu ku baraahonokeho aha kucwekyerera kw’obusingye obu, nibaija kuguma baine eby’okurya by’omubiri n’eby’omwoyo ebirikumara. Ensi ya Sitaane ku eraabe neecwekyerezibwa, tibarikwija kuhikwaho “ekibabo” ky’ekiniga kya Yehova ekiraashukwe aha mahanga. Okubonabona kwingi ku kuraahendere, Yesu naija kwebembera abaraahonokeho kubahitsya aha ‘maizi g’amagara’ agatahwaho. Teekateeka ahari eki: Abantu nyamwingi baine amatsiko g’omutaano. Aha buhumbi bw’abantu abaaratwireho omu nsi, bo nibabaasa kutaija kufa!​—Yoh. 11:26.

¹² Ab’entaama ezindi ka baine amatsiko g’omuhendo agu barikusiimira Yehova na Yesu! Tibatoorainwe kuza omu iguru, kwonka tikugira ngu n’ab’omuhendo mukye, nari ngu ti b’omugasho ahari Yehova. Entoore n’ab’entaama ezindi boona nibabaasa kuhimbisa Ruhanga na Kristo. Omuringo gumwe ogw’okukora eki n’okuza aha Kiijutsyo.

13-14. Ahabw’enki buri omwe aine kuza aha Kiijutsyo?

¹³ Omu myaka egi, omuntu nk’omwe ahari 1,000 abarikwija aha Kiijutsyo niwe arikurya kandi akanywa aha bumanyiso. Omu bibiina ebingi abarikwija aha Kiijutsya nihaba hatariho n’omwe orikurya kandi akanywa aha bumanyiso. Baingi abarikwija aha Kiijutsyo baine amatsiko g’okutuura omu nsi. Ahabw’enki nibaza aha Kiijutsyo? Nibabaho nk’oku abantu barikuza aha bugyenyi bw’okugaitwa. Nibaija ahabw’okwenda kworeka ngu nibakunda abarikugaitwa kandi nibabashagika. N’ahabw’ekyo, ab’entaama ezindi nibaza aha Kiijutsyo kworeka ngu nibakunda Kristo n’entoore kandi nibabashagika. Kandi nibooreka ngu nibasiima ekitambo kya Yesu, ekirikubabaasisa kwija kutuura omu nsi ebiro byona.

¹⁴ Kandi ab’entaama ezindi nibaza aha Kiijutsyo ahabw’okworobera ekiragiro kya Yesu. Obu Yesu yaatandikaho omukoro ogu ari n’entumwa be abeesigwa, akabagira ati: “Mugume mukore muti okuunyijukiraho.” (1 Kor. 11:23-26) N’ahabw’ekyo nibaija  kugumizamu nibaza aha Kiijutsyo entoore baaba bakiri omu nsi. Nangwa, ab’entaama ezindi nibeeta buri omwe kwija kuba nabo aha Kiijutsyo.

15. Buri omwe ahariitwe naabaasa kuhimbisa ata Ruhanga na Kristo aha Kiijutsyo?

¹⁵ Aha Kiijutsyo, nituba twine omugisha gw’okuhimbisa Ruhanga na Kristo kurabira omu kweshongora n’okushaba. Orubazo oruraaheebwe omwaka ogu rwine omutwe, “Yoreka ngu Noosiima eki Ruhanga na Yesu Baakukoreire!” Nirwija kutuhwera kwongyera aha ku turikusiima Yehova na Kristo. Baaba nibarabyamu obumanyiso, nitwija kwijukibwa ngu nibujwekyera omubiri gwa Yesu n’eshagama ye. Nitwija kumanyisibwa ngu Yehova akaikiriza Omwana we kutufeera kugira ngu itwe tugire amagara. (Mat. 20:28) Buri omwe orikukunda Tataitwe ow’omu iguru n’Omwana we naija kwenda kuza aha Kiijutsyo.

16. Entoore n’ab’entaama ezindi nibashushana mu miringo ki?

¹⁶ Okuba entoore tikirikubahindura ab’omuhendo munonga kukira ab’entaama ezindi. Aba guruupu ezi zombi nibaingana omu kuba ab’omuhendo ahari Ruhanga. Nangwa Yehova akashashura omuhendo nigwo gumwe, ogw’amagara g’Omwana we omukundwa, kugura entoore n’ab’entaama ezindi. Entaaniso y’aba guruupu ezi zombi n’okugira ngu baine amatsiko gatarikushushana. Kwonka aba guruupu zombi baine kuguma bahamiire ahari Ruhanga na Kristo. (Zab. 31:23) Kandi ijuka ngu, omwoyo gurikwera nigubaasa kubahwera omu muringo nigwo gumwe. Eki nikimanyisa ngu Yehova naaha buri omwe omwoyo gurikwera kurugiirira aha kyetengo ekiriho.

17. Entoore entsigarira baine ekihika ky’okukora ki?

¹⁷ Abakristaayo entoore tibarikuzaarwa baine amatsiko g’okuza omu iguru. Ruhanga niwe aine kuta amatsiko ago omu mitima yaabo. Nibateekateeka aha matsiko gaabo, bashaba aha bikwatiraine nago, kandi baine ekihika ky’okutunga omugabo gwabo omu iguru. Nangwa tibarikubaasa n’okuteebereza oku omubiri gwabo ogw’omwoyo guraabe nigushusha. (Fil. 3:20, 21; 1 Yoh. 3:2) N’obu kiraabe kiri kityo, entsigarira baine ekihika ky’okuba hamwe na Yehova, Yesu, baamaraika, n’entoore abandi abaazookire. Baine ekihika ky’okuza kutegyeka nabo omu Bukama bw’omu iguru.

18. Ni bintu ki ebi ab’entaama ezindi bainiire ekihika?

¹⁸ Ab’entaama ezindi baine amatsiko agu Ruhanga yaabahangiiremu, okutuura omu nsi ebiro byona. (Mub. 3:11) Baine ekihika  ky’okwejumba omu kuhindura ensi yoona paradiso. Baine ekihika ky’okwombeka amaju agaabo, bakahinga emisiri eyaabo, kandi bakoorora abaana abaine amagara gahikiriire. (Isa. 65:21-23) Nibenda kwongyera kumanya ebiri omu nsi nk’enshozi, ebibira, enyanja, n’okwega aha bihangirwe bya Yehova bingi munonga. Okukira byona, nibashemererwa munonga kumanya ngu omukago gwabo na Yehova nigwija kwongyera kuhama, kandi bamwirire haihi.

19. Ekiijutsyo nikibaasisa buri omwe ahariitwe kutunga mugisha ki, kandi nikiza kubaho ryari omwaka ogu?

¹⁹ Yehova ahaire buri omwe aha baheereza be amatsiko g’ebiro by’omumaisho. (Yer. 29:11) Okwijuka okufa kwa Kristo nikubaasisa buri omwe ahariitwe kutunga omugisha gw’amaani ogw’okuhimbisa Ruhanga na Kristo ahabw’ebi batukoreire kugira ngu tutungye amagara agatahwaho. Hatariho kubangaanisa Ekiijutsyo nigwo mukoro ogu Abakristaayo ab’amazima baine kubaho. Nikiija kubaho bwanyima y’eizooba kurenga Orwamukaaga, Maaci 27, 2021. Omwaka ogu baingi nibaija kuba aha mukoro mukuru ogu baine obugabe buringaniire. Abandi nibaija kubaho n’obu baraabe nibahiiganisibwa. Abamwe nibabaasa kuba bari omu bihome. Nitushaba ngu buri kibiina, guruupu, na buri muntu okwe, bagire Ekiijutsyo kirungi, bakwataniise n’ab’omu iguru!