1. Bamwe ahariitwe nitubaasa kwebuuza ki nk’Omugabe Daudi?

TWENA nituba nitwenda kuguma tutuurize kandi twikaikaine. Tihaine orikwenda kuguma ayerarikiriire. Kwonka obumwe, nitubaasa kuteganisibwa okwerarikirira. Nangwa na bamwe aha baheereza ba Yehova nibabaasa kwebuuza ekibuuzo nk’eki Omugabe Daudi yaabuurize Yehova eki: “Ndyahitsya hi [okwerarikirira], n’okurenzya eizooba nyine obusaasi omu mutima gwangye?”​—Zab. 13:2.

2. Nituza kugamba ahari ki omu kicweka eki?

² N’obu turaabe tutarikubaasa kumariraho kimwe okwerarikirira, nitubaasa kukutegyeka. Omu kicweka eki, nituza kubanza kureeba bimwe aha bintu ebirikubaasa kutureetera kwerarikirira. Reero bwanyima nituza kushwijuma emiringo mukaaga oku turikubaasa kuguma twikaikaine twaba twine oburemeezi.

3. Ni bintu ki ebirikubaasa kutwerarikiriza, kwonka shi nitubaasa kubiremesa kubaho?

³ Nitubaasa kutazibira ebintu ebirikutureetera kwerarikirira. Nk’eky’okureeberaho, titurikubaasa kuremesa ebeeyi y’eby’okurya, ebijwaro, n’oburaaro kutemba buri mwaka, titurikubaasa n’okuzibira abu turikukora nabo nari abu turikushoma nabo kutaba beesigwa nari kushambana. Kandi titurikubaasa kuzibira emishango kubaho omu bicweka byaitu. Ebi  byona twine kubyemera ahakuba nitutuura omu nsi ei abantu baingi baine emiteekateekyere etarikwegamira aha misingye ya Baibuli. Sitaane ruhanga w’ensi egi, naamanya ngu abantu abamwe nibaija kwikiriza “amaganya g’ensi” egi kubaremesa kuheereza Yehova. (Mat. 13:22; 1 Yoh. 5:19) N’ahabw’ekyo tikirikutangaaza kureeba ngu ensi eijwiremu ebirikureeta amaganya!

4. Nitubaasa kutwaza tuta omu kugyemeserezibwa kw’amaani?

⁴ Okugyemeserezibwa kw’amaani nikubaasa kutureetera kugira amaganya maingi. Nk’eky’okureeberaho, nitubaasa kwerarikirira ngu titurikwija kutunga esente zirikumara kwehitsyaho ebi turikwenda nari ngu nitwija kurwara tube tutakikora, nari batubingye aha murimo. Nitubaasa n’okwerarikirira ngu twayohibwa nitwija kuremwa kuguma turi abeesigwa ahari Ruhanga. Juba Sitaane naija kureetera abu aineho obushoboorozi kutaahirira abaheereza ba Ruhanga, n’ahabw’ekyo nitubaasa kwerarikirira oku turaatwaze omu kutaahirira okwo. Nitubaasa kwebuuza tuti: ‘Mbwenu shi kigwire kwerarikirira aha nshonga nk’ezi?’

5. Yesu akaba naamanyisa ki obu yaagira ngu murekyere aho ‘kwemereza emitima’?

⁵ Nitumanya ngu Yesu akagambira abakuratsi be kurekyera aho ‘kwemereza emitima.’ (Mat. 6:25) Mbwenu shi eki nikimanyisa ngu titwine kwerarikirira na kakye? Ngaaha tikwo kiri! Ahakuba, na ira abaheereza ba Yehova abeesigwa bakaba nibateganisibwa okwerarikirira, kandi Yehova nabwo akaguma naabasiima. * (1 Bag. 19:4; Zab. 6:3) Yesu akaba ariyo naatugumya. Akaba atarikwenda ngu twerarikirire munonga aha bikwatiraine n’amagara gaitu reero ekyo kituremese kuheereza gye Ruhanga. Nitubaasa kutuubya tuta amaganya gaitu?​—Reeba akabokusi “ Oku Orikubaasa Kukikora.”

6. Kurugiirira aha Abafilipi 4:6, 7, niki ekirikubaasa kutureetera kutuuza twaba twerarikiriire?

⁶ (1) Shaba hakye-hakye. Abakristaayo abarikwerarikirira nibabaasa kutunga obuhuumure baashaba Yehova baihire aha mutima. (1 Pet. 5:7) Okushaba kwawe nikubaasa kugarukwamu orikutunga “obusingye bwa Ruhanga oburengire okwetegyereza kw’omuntu weena.” (Shoma Abafilipi 4:6, 7.) Yehova naareetera ebiteekateeko byaitu kutuuza arikukoresa omwoyo gwe gurikwera ogw’amaani maingi.​—Gal. 5:22.

7. Twine kwijuka ki twaba nitushaba Ruhanga?

⁷ Waaba nooshaba Yehova, mwaturire ebiri omu mutima gwawe. Gamba kyenyini. Mugambire oburemeezi obu oine, kandi omushoboororere oku orikwehurira ahabw’oburemeezi obwo. Waaba noobaasa kugira eki waakora, mushabe kukuha obwengye bw’okumanya eki oraakore, n’amaani g’okukikora. Kyaba kitarikubaasika kusingura oburemeezi bwawe, shaba Yehova kukuhwera kuterarikirira ekirenga. Waagamba kyenyini omu kushaba, haahinguraho obwire noobaasa kureeba gye oku Yehova agarukiremu okushaba kwawe. Waaba otatungire eky’okugarukamu ahonaaho bwanyima y’okushaba, otahanika okarireera kushaba. Yehova tarikwenda ngu omugambire eki orikwenda kyonka, beitu naayenda ngu ogumizemu noomushaba.​—Luk. 11:8-10.

8. Ni bintu ki ebi tushemereire kugambaho omu kushaba?

⁸ Waaba noogambira Yehova okwerarikirira  kwawe omu kushaba, fayo n’okumusiima. Ni kirungi kubara emigisha yaitu, na munonga embeera zaitu zaaba zigumire. Obumwe waaba otarikubaasa kutunga ebigambo ebihikire kugamba enyehurira zaawe, ijuka ngu Yehova naagarukamu n’okushaba kworobi nka ‘nyabura ’we mpwera!’​—2 Bus. 18:31; Rom. 8:26.

9. Oburinzi obwabuzima nibubaasa kutungwa buta?

⁹ (2) Yesigye obwengye bwa Yehova, beitu butari obwawe. Ira omu kyasha kya munaana Y.A., abantu ba Yuda bakaba batiinire Abaasiria. Bashobeirwe batarikwenda kuza ahansi y’obutegyeki bw’Abaasiria, bakeesiga eihanga erikaafiire erya Misri. (Isa. 30:1, 2) Yehova akabarabura ngu obugomi bwabo bukaba nibwija kubarugiramu akagwe. (Isa. 30:7, 12, 13) Yehova arikukoresa Isaaya akagambira abantu oku baabaire nibabaasa kutunga oburinzi obwabuzima. Akabagira ati: ‘Omu kutuuza n’omu kwesiga [Yehova] nimwo amaani gaanyu garaarugye.’​—Isa. 30:15b.

10. Ni mbeera ki ezirikubaasa kutwetengyesa kworeka ngu nitwesiga Yehova?

¹⁰ Nitubaasa kworeka tuta ngu nitwesiga Yehova? Yetegyereze eby’okureeberaho ebimwe. Ka tugire ngu waatunga omurimo gw’esente nyingi kwonka nigwija kukwetengyesa kukora obwire bwingi, kandi nigwija kuteganisa entebeekanisa yaawe ey’eby’omwoyo. Nari ka tugire ngu omuntu aha murimo yaakurigira, kwonka ti muheereza wa Ruhanga obatiziibwe. Nari ka tugire ngu omuntu omukundwa omu ka yaawe yaakugira ngu oine kucwamu “kuguma naanye nari kuheereza Ruhanga waawe.” Omu mbeera ezi ishatu, noija kugumirwa kucwamu, kwonka omu buri mbeera Yehova naabaasa kukuhabura ekihikire eki oine kukora. (Mat. 6:33; 10:37; 1 Kor. 7:39) Ekibuuzo kiri ngu, noija kwesiga okuhabura kwe okugyendereho?

11. Ni baahi abarikugambwaho omu Baibuli abu turikubaasa kwegaho reero tukaguma tutuurize twaba nituhakanisibwa?

¹¹ (3) Yegyera aha by’okureeberaho ebirungi n’ebibi. Hariho baingi abarikugambwaho omu Baibuli kworeka obukuru bw’okutuuza n’okwesiga Yehova. Waaba nooshwijuma ebirikukwata aha baheereza ba Ruhanga aba, yetegyereze ekyabahweraire kuguma batuurize omu kuhakanisibwa kw’amaani. Nk’eky’okureeberaho, eicwero ry’emanja ery’Abayudaaya ku ryaragiire entumwa kurekyera aho kubuurira, tibaraikiriize kutiinatiinisibwa. Kureka, bakagarukamu n’obumanzi bati: “Tushemereire kworobera Ruhanga okukira abantu.” (Byak. 5:29) Nangwa na bwanyima y’okubateera, tibaragizire bwoba. Ahabw’enki? Ahakuba bakaba nibamanya ngu Yehova ari aha rubaju rwabo. Akaba naabasiima. N’ahabw’ekyo, bakagumizamu nibabuurira amakuru marungi. (Byak. 5:40-42) Nikyo kimwe, obu Sitefaano yaabaire ari haihi kwitwa, akaguma aine obusingye n’eihoreere reero aha maisho ge ‘haashusha aha maraika.’ (Byak. 6:12-15) Ahabw’enki? Ahakuba akaba naahamiza kimwe ngu Yehova naamusiima.

12. Kurugiirira ahari 1 Petero 3:14 na 4:14, ahabw’enki turikubaasa kushemererwa twahiiganisibwa?

¹² Entumwa bakaba nibahamiza kimwe ngu Yehova ari nabo. Akaba abahaire amaani g’okukora eby’okutangaaza. (Byak. 5:12-16; 6:8) Itwe Yehova tarikutuha amaani g’okukora eby’okutangaaza. N’obu kiraabe kiri kityo, Yehova arikukoresa Ekigambo kye, naatuhamiza ngu twabonabona ahabw’okuhikiiririra, naatusiima kandi nituhwerwa omwoyo gurikwera. (Shoma 1 Petero 3:14; 4:14.) N’ahabw’ekyo omu mwanya gw’okuta omutima aha ku turaatwaze omu kuhiiganisibwa  kw’amaani omu biro by’omumaisho, twine kumanya eki twine kukora hati kwongyera kuta obwesigye bwaitu omuri Yehova ngu naija kutushagika kandi atucungure. Nk’oku entumwa baakozire, twine kwesiga okuraganisa kwa Yesu oku: ‘Niinyija kubaha orurimi n’obwengye, ebi abazigu baanyu batarikwija kubaasa kurwanisa n’obu kwakuba okuhakanisa.’ Twine obuhame ngu, ‘omu kwehangaana nimwo murikwija kujunira amagara gaanyu.’ (Luk. 21:12-19) Kandi kimanye ngu Yehova naaguma naijuka buri kantu koona akarikukwata aha baheereza be abaafiire bari abeesigwa. Eki nikiija kumubaasisa kubazoora.

13. Nitubaasa kugasirwa tuta twashwijuma ebyahikire ahari abo abaaremirwe kuguma batuurize n’okwesiga Yehova?

¹³ Nitubaasa n’okwegyera ahari abo abaaremirwe kuguma batuurize n’okwesiga Yehova. Okwega ebirikubakwataho nikiija kutuhwera kwetantara kukora enshobe nk’ezi baakozire. Nk’eky’okureeberaho, obu Omugabe Asa owa Yuda yaabaire atandikire kutegyeka, akeesiga Yehova obu yaataahirirwa eihe rihango, kandi Yehova akamuhwera kusingura. (2 Bus. 14:9-12) Kwonka bwanyima, eihe rikye ery’Omugabe Baasha owa Israeli ku ryaizire kutaahirira Asa, akashashurira eihe rya Siria kumuhwera omu mwanya gw’okwesiga Yehova kumujuna, nk’oku yaabaire yaakozire enyima. (2 Bus. 16:1-3) Kandi ari haihi kufa, ku yaatungire endwara y’amaani, akanga kwesiga Yehova kumuhwera.​—2 Bus. 16:12.

14. Nitubaasa kwegyera ki aha nshobe za Asa?

¹⁴ Omu kubanza, Asa akeesiga Yehova ku yaatungire oburemeezi. Kwonka bwanyima akanga kusherura obuhwezi ahari Ruhanga we, yaacwamu kukwata enshonga omu muringo gwe. Asa omu ndeeba ye, akareeba ngu n’eky’obwengye kushaba Abasiria obuhwezi kurwanisa Israeli. Kwonka obusinguzi bwe bukaba buri obw’akaanya kakye. Yehova akamugambira kurabira omuri nabi ati: “Ahabw’okuba oyesigire omugabe wa Siria, tiwaayesiga [Yehova] Ruhanga waawe, nikyo eihe ry’omugabe wa Siria” rikuremiire. (2 Bus. 16:7) Twine kwegyendesereza kuteeyesiga kukwata enshonga omu muringo ogwaitu tukabura kwesiga Yehova turikusherura obuhabuzi omu Kigambo kye. Nangwa n’obu twakuba twine kucwamu ahonaaho, twine kuguma tutuurize turikwesiga Yehova, kandi naija kutuhwera kusingura.

15. Nitubaasa kukora ki twaba nitushoma Baibuli?

¹⁵ (4) Kwata Ebyahandiikirwe omu mutwe. Waatunga ebyahandiikirwe ebirikworeka ngu amaani nigaruga omu kuguma otuurize n’okwesiga Yehova, teeraho kukwata omu mutwe bimwe aharibyo. Nikibaasa kukuhwera kubishoma omu iraka eririkuhurirwa nari kubihandiika reero okaguma noobyeyijutsya. Yoshua akaragiirwa kushoma atyo ekitabo ky’Ebiragiro butoosha kubaasa kutwaza omu muringo gw’obwengye. Ebiragiro ebi bikaba nibiija n’okumuhwera kusingura okutiina oku yaabaire naabaasa kugira ahabw’obujunaanizibwa bwe. (Yos. 1:8, 9) Bingi ebihandiikirwe omu Baibuli nibibaasa kukuha obusingye bw’omu biteekateeko n’omu mutima omu mbeera ezirikukira kureetera abantu kwerarikirira nari kutiina.​—Zab. 27:1-3; Enf. 3:25, 26.

16. Yehova naakoresa ata ekibiina kutuhwera kuguma tutuurize n’okumwesiga?

¹⁶ (5) Ba hamwe n’abantu ba Ruhanga. Yehova naakoresa ab’eishe-emwe kutuhwera kuguma tutuurize n’okumwesiga. Omu nteerane zaitu, nitugasirwa omu mbazo ezirikuheebwa, eby’okugarukamu by’abandi, n’ebigaaniiro by’ab’eishe-emwe ebirikwombeka.  (Heb. 10:24, 25) Kandi nikibaasa kutugumya munonga twagambira banywani baitu abu turikwesiga omu kibiina enyehurira zaitu. “Ekigambo kirungi” kuruga aha munywani nikibaasa kukora kihango kukuhwera kutuubya okwerarikirira kwawe.​—Enf. 12:25.

17. Kurugiirira aha Abaheburaayo 6:19, amatsiko gaitu g’Obukama nigabaasa kutuhamya gata n’omu mbeera zigumire?

¹⁷ (6) Guma oine amatsiko gahami. Amatsiko gaitu g’Obukama ni “nk’ekitsibo ky’amagara,” nigatureetera kuhama n’obu turikuba turi omu mbeera zigumire nari twerarikiriire. (Shoma Abaheburaayo 6:19.) Teekateeka aha kuraganisa kwa Yehova okw’ebiro by’omumaisho obu haraabe hatariho ebiteekateeko bibi. (Isa. 65:17) Yereebe omu nsi ensya ey’obusingye, eraabe etarimu ebirikwerarikiriza. (Mik. 4:4) Kandi amatsiko gaawe nigaija kweyongyera kuhama waaguma noogagambiraho abandi. Kora kyona eki orikubaasa omu murimo gw’okubuurira n’okuhindura abantu abeegi. Waakora otyo, noija ‘kugira amatsiko otarikubangaanisa okuhitsya aha muheru.’​—Heb. 6:11.

18. Nitubaasa kwija kuhikwaho mbeera ki ezigumire omu biro by’omumaisho, kandi nitwija kubaasa kuzirabamu gye tuta?

¹⁸ Obu emperu y’obusingye obu eri haihi kuhika, nitwija kuhikwaho embeera nyingi ezirikubaasa kutureeta kwerarikirira. Ekyahandiikirwe kyaitu eky’omwaka 2021 nikibaasa kutuhwera kworekyera embeera ezo, kwonka twine kuguma tutuurize turikwesiga Yehova, beitu gatari maani gaitu. Omu mwaka ogu gwona, ka tworekye omu bikorwa byaitu ngu nitwesiga okuraganisa kwa Yehova oku: ‘Omu kutuuza n’omu kwesiga nimwo amaani gaanyu garaarugye.’​—Isa. 30:15.