1. Daudi akeeshanga mu mbeera ki ezigumire?

DAUDI akaba naahunzya amagara ge. Saulo, omugabe wa Israeli ow’amaani akaba amaririire kumwita. Obu yaabaire naayenda eby’okurya, akaza omu rurembo rwa Noobu reero yaashaba emigaati etaano. (1 Sam. 21:1, 3) Bwanyima, we n’abashaija be bakeeshereka omu nyanga y’eibaare. (1 Sam. 22:1) Daudi akaija ata kweshanga omu mbeera egi?

2. Saulo akeeta ata omu mbeera y’akabi? (1 Samueli 23:16, 17)

² Saulo akaba ainiire Daudi eitima ahabw’okugira ngu akaba naamanywa kandi ari omusinguzi omu mahe. Kandi Saulo akaba naamanya ngu obugomi bwe nibwo bwareeteire Yehova kumwangira kuba omugabe wa Israeli, reero akatoorana Daudi kuba niwe yaija kutegyeka. (Shoma 1 Samueli 23:16, 17.) Kwonka nabwo, ahabw’okugira ngu Saulo akaba ari omugabe wa Israeli, akaba aine eihe rihango n’abashagiki baingi, n’ahabw’ekyo Daudi akaba aine kuhunzya amagara ge. Mbwenu shi buzima Saulo akaba naateekateeka ngu naabaasa kuremesa ekigyendererwa kya Ruhanga eky’okuhindura Daudi omugabe? (Isa. 55:11) Ekyo Baibuli terikukigambaho, kwonka twine obuhame obu: Saulo akaba ariyo naayeta omu kabi. Abo abarikurwanisa Ruhanga butoosha nibasingurwa!

3. Daudi akaba naayehurira ata oyihireho embeera ezi yaabaire arimu?

³ Daudi akaba atari beeyendeza. Tiwe yaayetooraine kuba omugabe wa Israeli. Yehova niwe yaamuhaire obujunaanizibwa obwo. (1 Sam. 16:1, 12, 13) Saulo akaba naareeba Daudi nk’omuzigu we. Kwonka Daudi taracweraire Yehova orubanja ahabw’akabi aku yaabaire arimu, kandi tarayetomboitsire ahabw’okugira eby’okurya bikye, n’okweshereka omu nyanja  y’eibaare. Kureka, obu yaabaire ari omu nyanga y’eibaare egyo, naabaasa kuba nibwo yaahimba ekyeshongoro ky’okuhimbisa ekirikutwariramu ebigambo by’ekyahandiikirwe kikuru eky’ekicweka eki, ngu ‘abarikusherura [Yehova], tibarikwija kuburwa kirungi kyona.’—Zab. 34:10.

4. Nituza kushwijuma bibuuzo ki, kandi ahabw’enki ni bikuru?

⁴ Obunaku obu, Abajurizi ba Yehova baingi tibaine by’okurya birikumara, n’ebindi eby’okwebaisaho. * Eki kibaireho na munonga omu bwire bw’ekigwererezi eki. Kandi obu “okubonabona kwingi” kuri haihi kubaho, nitumanya ngu embeera niziija kwongyera kuguma. (Mat. 24:21) Turikwijuka eki, ka tugarukemu ebibuuzo bina ebi: Ni mu muringo ki ogu Daudi ‘atarabuzirwe kirungi kyona’? Ahabw’enki twine kwega kumarwa? Ahabw’enki turikubaasa kuhamya ngu Yehova naija kutureeberera? Kandi nitubaasa kwetebeekanisiza tuta ebiro by’omumaisho?

5-6. Zaaburi 23 neetuhwera eta kwetegyereza eki Daudi yaabaire naamanyisa obu yaagira ngu abaheereza ba Ruhanga ‘tibarikwija kuburwa kirungi kyona’?

⁵ Daudi akaba naamanyisa ki obu yaagira ngu abaheereza ba Ruhanga ‘tibarikwija kuburwa kirungi kyona’? Omuri Zaaburi 23 harimu ebigambo ebirikwenda kushushana n’ebyo. (Shoma Zaaburi 23:1-6.) Daudi naatandika zaaburi egi n’ebigambo Yehova ‘niwe muriisa wangye, tindikwija kukyena kintu kyona.’ Okweyongyerayo omuri zaaburi egi, Daudi naagamba aha bintu bikuru, nk’emigisha y’eby’omwoyo ei yaabaire aine ahabw’okwikiriza Yehova kuba Omuriisa we. Yehova akaba naamwebembera “omu mihanda y’okuhikiirira,” kandi akashagika Daudi omu bwire burungi n’obugumire. Daudi akeetegyereza ngu amagara ge gaaba gari “omu iriisizo ry’obunyaatsi” erya Yehova tigarikwija kuhikwaho akabi koona. Obumwe, akaba naabaasa kuhwamu amaani yaaba naaraba omu “ruhanga rw’ekibunda ky’okufa,” kandi akaba naija kugira n’abazigu. Kwonka akaba ‘atarikutiina akabi koona’ ahabw’okugira ngu Yehova n’Omuriisa we.

 ⁶ Eki n’eky’okugarukamu ky’ekibuuzo kyaitu eky’okubanza: Ni mu muringo ki ogu Daudi ‘atarabuzirwe kirungi kyona’? Omu by’omwoyo, tihaine kintu kyona eki yaabaire akyenire. Okushemererwa kwe kukaba kutarikwegamira aha bintu by’omubiri. Daudi akaba amazirwe n’ebi Yehova arikumuha. Eki yaabaire naatwara nka kikuru n’emigisha n’oburinzi ebi Ruhanga we yaabaire naamuha.

7. Kurugiirira ahari Luka 21:20-24, Abakristaayo abaabaire bari omuri Buyudaaya omu kyasha ky’okubanza bakahikwaho mbeera ki egumire?

⁷ Kurugiirira aha bigambo bya Daudi nitureeba ku kiri kikuru kugira emiteekateekyere mirungi aha bintu by’omubiri. Nitubaasa kwesiimira omu bintu ebi twine, kwonka tibyo tushemereire kwebembeza omu magara gaitu. Aga n’amazima makuru agu Abakristaayo ba Buyudaaya omu kyasha ky’okubanza baayetegyereize. (Shoma Luka 21:20-24.) Yesu akaba abarabwire ngu obwire nibwija kuhika orurembo rwa Yerusaalemu ‘rwehinguririziibwe’ ab’amahe. Eki ku kyakubaireho, bakaba baine kutandika ‘kuhungira omu nshozi.’ Okuhunga kwabo kukaba nikwija kubabaasisa kucungurwa, kwonka bakaba baine kwefeerereza bingi. Emyaka mingi enyima, Omunaara gw’Omurinzi gukagira guti: “Bakatsigaho amaka gaabo n’emisiri, n’ebintu byabo ebyabaire biri omu maju tibarabiihiremu. Bakaba baine obuhame ngu Yehova naija kubarinda kandi abareeberere, bakeebembeza okumuramya okukira ekintu kyona ekyabaire nikireebeka nka kikuru.”

8. Ni ishomo ki erikuru eri turikubaasa kwegyera aha Bakristaayo abaabaire nibatuura omuri Buyudaaya omu kyasha ky’okubanza?

⁸ Ni ishomo ki erikuru eri turikubaasa kwegyera aha Bakristaayo abaabaire nibatuura omuri Buyudaaya omu kyasha ky’okubanza? Omunaara gw’Omurinzi ogu twaheza kugambaho nigugira guti: “Omu biro by’omumaisho nihabaasa kwija kubaho okugyezibwa okuraayorekye yaaba nitutwara ebintu by’omubiri nka bikuru munonga, nari okucungurwa kw’abantu ba Ruhanga nikyo turikutwara nka kikuru? Eego, omu kuhunga kwaitu nitubaasa kwija kuhikwaho embeera zigumire, n’okutatunga byona eby’okwebaisaho. Nikiija kutwetengyesa kuba tweteekateekire kukora kyona ekirikubaasika, nk’oku Abakristaayo omu kyasha ky’okubanza omuri Buyudaaya baakozire.” *

9. Obuhabuzi obu entumwa Paulo yaahaire Abaheburaayo nibukugumya buta?

⁹ Noobaasa kuteebereza oku kirikubaasa kuba kyabaire kigumiire Abakristaayo abo kutsigaho ebintu byabo byona, reero bakatandika embeera ensya? Kikaba nikibeetengyesa kugira okwikiriza kubaasa kwesiga Yehova kubaha ebikuru ebirikwetengyesa. Kwonka bakaba baine obuhwezi. Emyaka etaano enyima Abarooma batakeehinguririize Yerusaalemu, entumwa Paulo akaha Abaheburaayo obuhabuzi bukuru obu: “Mutarigira omutima ogurikukunda empiiha, ebi mwine bibe nibyo byabamara, ahakuba We akagira ati: Tindikutsigaho, kandi tindikuhemukaho na kakye. Nikyo turikugambira, tutarikubangaanisa, tuti: [Yehova] niwe muhwezi wangye, tinditiina, omuntu naabaasa kungira ata?” (Heb. 13:5, 6) Hatariho kubangaanisa, abo abaakurataire obuhabuzi bwa Paulo obwo Abarooma batakataahiriire, kikaboorobera kurahuka kumanyiira kubaisibwaho ebintu bikye omu maka gaabo amasya. Bakaba nibahamya ngu Yehova naija kubaha ebirikwetengyesa. Ebigambo bya Paulo nibituhamiza ngu naitwe nitubaasa kugira obwesigye ngu Yehova naija kutureeberera.

10. Ni ‘buryo’ ki nari ekihama, eki Paulo arikutugambira?

¹⁰ Paulo akaha Timoseo obuhabuzi nibwo  bumwe, kandi naitwe nibutukwataho. Akahandiika ati: “Ku turaabe twine eby’okurya n’eby’okujwara, ebyo bigume bitumare.” (1 Tim. 6:8) Mbwenu shi eki nikimanyisa ngu titurikubaasa kurya eby’okurya birungi, kugira oburaaro burungi, nari kugura emyenda obumwe n’obumwe? Egyo tiyo nshonga ei Paulo arikugamba. Paulo naamanyisa ngu twine kumarwa n’ebyo ebi twine eby’okwebaisaho. (Fil. 4:12) Obwo nibwo ‘buryo’ nari ekihama eki Paulo yaayegire. Ekintu ekirikukirayo obukuru eki twine n’omukago gwaitu na Ruhanga, beitu bitari bintu by’omubiri ebi twine.—Hab. 3:17, 18.

11. Ni ishomo ki eririkukwata aha kumarwa eri turikwegyera aha bigambo ebi Musa yaagambiire Abaisraeli?

¹¹ Emiteekateekyere yaitu aha bintu ebirikwetengyesa, neebaasa kuba neetaanira kimwe aha ya Yehova. Yetegyereze eki Musa yaagambiire Abaisraeli bwanyima y’okumara emyaka 40 omu ihamba. Akabagira ngu Yehova ‘Ruhanga waanyu akabaha omugisha omu mirimo yoona ey’emikono yaanyu, yaamanya engyendo zaanyu ez’omuri eri ihamba rihango, kandi emyaka egi yoona makumi ana [Yehova] Ruhanga waanyu akaguma naimwe, mutaine ki mubuzirwe.’ (Bir. 2:7) Omu mwaka 40, Yehova akaha Abaisraeli emaanu y’okurya. Ebijwaro byabo ebi barugire nabyo omuri Misri, tibirabaasize kukura. (Bir. 8:3, 4) N’obu Abaisraeli baraabe baabaire nibareeba ebintu ebi nk’ebitarikumara, Musa akabaijutsya ngu bakaba baine buri kimwe eki barikwenda. Yehova naija kushemererwa twayega kugira okumarwa, kusiima n’ebikye ebi twine, turikubireeba nk’omugisha, kandi tukabimusiimira.

12. Niki ekirikworeka ngu Daudi akaba ataire obwesigye bwe omuri Yehova, omu mwanya gw’okweyesiga?

¹² Daudi akaba naamanya ngu Yehova naahamira aha bantu be kandi naafayo munonga ahari abo abarikumukunda. N’obu amagara ga Daudi garaabe gaabaire gari omu kabi obu yaahimba Zaaburi 34, ahabw’okugira amaisho g’okwikiriza akareeba “maraika wa” Yehova arikuteera ‘amahema okumwehinguririza.’ (Zab. 34:7) Obundi Daudi akaba naagyeragyeranisa maraika wa Yehova n’omuserukare ocumbiikire omu kishaka otegyereize omuzigu oraije. Daudi akaba ari omuserukare w’amaani kandi Yehova akaba amuraganiise kuba omugabe, kwonka Daudi tareesigire okubaasa kwe kw’okurekyera enjungu nari okukoresa rurara ye kurwanisa omuzigu. (1 Sam. 16:13; 24:12) Akeesiga Ruhanga, aine obuhame ngu maraika we ‘naija kucungura abarikumutiina.’ Amazima gari ngu, titurikwija kutunga oburinzi omu muringo gw’eky’okutangaaza. Kwonka nitumanya ngu tihariho orikwesiga Yehova orikwija kuhikwaho akabi ak’ebiro byona.

13. Googi owa Magoogi ku araatutaahirire, ahabw’enki turikwija kureebeka nk’abataine kihwera, kwonka ahabw’enki tutaine kutiina? (Reeba ekishushani ekiri aha kipampagare.)

¹³ Omu bwire butari bwa hare, obwesigye bwaitu omuri Yehova obw’okuturinda nibwija kugyezibwa. Googi owa Magoogi, nari amahanga ageegaitsire hamwe ku garaataahirire abantu ba Ruhanga, nitwija kureebeka nk’abari omu kabi. Twine kuba nituhamiza kimwe ngu Yehova naabaasa kutucungura. Amahanga ago nigaija kutureeba nk’entaama ezitaine burinzi bwona. (Ezk. 38:10-12) Nitwija kuba tutaine birwaniso, kandi tutatendekirwe kurwana omu ntaro. Amahanga nigaija kutureeba nk’aboorobi kusingura. Nibaija kuba batarikureeba eki itwe turikureeba n’amaisho gaitu ag’okwikiriza, nibo baamaraika baingi abaraabe beetooroire abantu ba Ruhanga boona, kandi beeteekateekire kuturinda. Amahanga tigarikwija kumanya ngu bariho. Tibarikureeba omu by’omwoyo. Nikiija kubatangaaza kureeba amahe g’omu iguru garikuturwanirira!—Kush. 19:11, 14, 15.

14. Ni bintu ki ebi turikubaasa kukora hati kwetebeekanisiza ebiro by’omumaisho?

¹⁴ Nitubaasa kukora ki kwetebeekanisiza ebiro by’omumaisho? Eky’okubanza, twine kugira emiteekateekyere mirungi aha bintu, turikumanya ngu eizooba rimwe nitwija kuhunga n’ebi twine byonka. Kandi twine kugira okumarwa n’okushemererwa ahabw’okugira omukago murungi na Yehova. Twamanya gye Ruhanga, nitwongyera kwesiga okubaasa kwe kw’okuturinda Googi owa Magoogi ku araatutaahirire.

15. Ni bintu ki ebyahikire ahari Daudi ebyamwegyeise ngu Yehova tarikubaasa kumureebya?

¹⁵ Yetegyereze ekindi ekyahweraire Daudi naitwe ekirikubaasa kutuhwera kwetebeekanisiza okugyezibwa. Daudi akagira ati: “Nimuroze, mureebe [Yehova] ku ari murungi! Orikumwesiga weena aine omugisha.” (Zab. 34:8) Ebigambo ebyo nibyoreka enshonga ahabw’enki Daudi yaabaire naahamya ngu naabaasa kwesiga obushagiki bwa Yehova. Daudi butoosha akaba naayesiga Yehova, kandi Ruhanga we taramureebize. Obu Daudi yaabaire ari muto, akarwana n’ekikaaka Goliasi, kandi akagambira omurwani ogwo ngu, Yehova naija ‘kukuhayo omu mikono yangye.’ (1 Sam. 17:46) Bwanyima Daudi akaba naaheereza omugabe Saulo, owaateireho emirundi mingi kumwita. Yehova “akaba ari hamwe”  na Daudi. (1 Sam. 18:12) Ahabw’okugira ngu Daudi akaba atungire obuhwezi bwa Yehova enyima, akaba naamanya ngu hati naabaasa kumwesiga omu kugyezibwa.

16. Ni mu miringo ki ei turikubaasa kuroza aha burungi bwa Yehova?

¹⁶ Twaguma nitwesiga Yehova hati, nitwongyera kugira obuhame ngu naija kuturinda omu biro by’omumaisho. Nikyetengyesa okwikiriza n’okuba tweteekateekire kwesiga Yehova kushaba bakama baitu aha murimo kutuha obwire bw’okuza omu ruteerane oruhango orw’ekiro kimwe nari bishatu, nari kubashaba kuhindura omu ntebeekanisa yaitu y’omurimo kuza omu nteerane zoona, n’okwongyera aha bwire bwaitu obw’okubuurira. Kandi shi bakama baitu ku baakwanga kutuha orusa nari baatubinga aha murimo. Twine okwikiriza ngu Yehova tarikubaasa kututsigaho, nari kutuhemukaho kandi ngu butoosha naija kuguma naatuha eby’okutubaisaho? (Heb. 13:5) Abari omu buheereza obw’obutwire nibabaasa kugamba oku bareebire Yehova arikubacungura obu baabaire nibamwetenga munonga. Yehova n’omwesigwa.

17. Ekyahandiikirwe ky’omwaka 2022 ni kiiha, kandi ahabw’enki kihikire?

¹⁷ Obu Yehova ari aha rubaju rwaitu, tihariho ekishemereire kutureetera kutiina ebiro ebirikwija. Ruhanga waitu tarikwija kututsigaho, twayebembeza okukora ebi arikukunda. Kubaasa kutwijutsya ngu twine kwetebeekanisiza ebiro bigumire ebiri haihi kubaho n’okwesiga Yehova ngu tarikwija kututsigaho, Akakiiko Akareeberezi katooraine Zaaburi 34:10 kuba ekyahandiikirwe kyaitu eky’omwaka 2022: ‘Abarikusherura [Yehova], tibarikwija kuburwa kirungi kyona’